حکمراں جماعت کے سینیئر رہنماؤں نے دوسرے مرحلے میں پارٹی کی کارکردگی کا جائزہ لیا اور خاص طور سے شمالی ریاستوں اتر پردیش اور بیہار میں ووٹروں کے رویے پر بات چیت کی۔

بی جے پی کے رہنماؤں کے اس اجلاس کا اہم سبب رائے عامہ کے تازہ ترین جائزے تھے جن میں دعویٰ کیا گیا ہے کہ بھارتیہ جنتا پارٹی کی حریف جماعت کانگریس تیزی سے متوقع نشستوں کے اس فرق کو کم کر رہی ہے جو پہلے مرحلے کی ووٹنگ کے بعد سامنے آیا تھا۔

ان عوامی جائزوں کے مطابق بی جے پی اور اس کی حلیف بائیس جماعتوں کے اتحاد کو 235 اور 279 کے درمیان نشتیں حاصل ہوں گی۔ کانگریس اور اس کے حلیفوں کے بارے میں دعوی ہے کہ وہ 160 سے 210 کے درمیان سیٹیں جیتں گے۔

رائے عامہ کے ان جائزوں میں یہ بھی کہا گیا ہے کہ علاقائی پارٹیوں کی کارکردگی ملک کے بعض حصوں میں بہت اچھی ہے۔ اس حوالے سے بالخصوص اتر پردیش کی ریاست میں سماج وادی پارٹی کا نام لیا جا رہا ہے۔