 |  رام چندر ویراپا |
رام چندر ویرپا کوئی بہت مشہور شخصیت نہیں ہیں اور نہ ہی کوئی راجا مہا راجا ہیں لیکن ان کے حامی انہیں بہت عزت کی نظر سے دیکھتے ہیں۔اور کئی لوگوں کا خیال ہے کہ وہ آئندہ ہفتے ہونے والے عام انتخابات میں سب سے بزرگ امیدوار ہیں۔ دستیاب دستاویز کے مطابق ویرپا کی عمر بانوے برس ہے اور پارلیمان کے لئے وہ ساتویں مرتبہ الیکشن لڑرہے ہیں ۔ ان کا تعلق پسماندہ دلت طبقے سے ہے۔ان کا حلقہ بدر منگلور سے 700 کلو میٹر دور ہے ۔ بدر میں صرف دلت امیدوار ہی الیکشن لڑ سکتے ہیں۔ ویرپا کا کہنا ہے کہ ’اگر لوگوں کی خواہش ہوئی تو ایک بار پھر جیت جاؤں گا‘۔
ویرپا پیدل گھر گھر جاکر انتخابی مہم چلاتے ہیں۔ چالیس ڈگری درجۂ حرارت میں ہر روز تقریباً دس گھنٹے اتخابی مہم کے لئے باہر رہنا بہت مشکل کام ہے ۔ انہوں نے کہا کہ ان کا ریٹائرڈ ہونے کا کوئی ارادہ نہیں ہے۔ ان کا طرزِ زندگی بہت سادہ ہے وہ نہ تو پان کھاتے ہیں نہ شراب اور سگریٹ پیتے ہیں ۔ گھر کا پکا ہوا کھانا کھاتے ہیں انتخابی مہم کے دوران بھی وہ کھانا کھانے اپنے گھر جاتے ہیں۔ ویراپا خود اپنی عمر کے بارے میں یقین سے کچھ نہیں کہ سکتے بدر کے ڈپٹی کمشنر انل کمار کا کہنا ہے کہ کاغذاتِ کے مطابق ان کی عمر چورانوے برس ہے۔ انل کمار کا کہنا ہے کہ’ہو سکتا ہے کہ وہ اس انتخاب میں سب سے بزرگ امیدوار ہوں لیکن میں اس بارے میں یقین سے کچھ نہیں کہ سکتا‘۔ ان کے روز کے کھانے میں مکئ کی روٹی سبزی اور سرخ مرچ کی چٹنی ہوتی ہے ۔ ان کا کہنا ہے کہ اس علاقے میں پیدا ہوئے یہیں مریں گے اور جب تک انہیں لوگوں کی حمایت حاصل ہے سیاست میں رہیں گے۔ | 
یہ صفحہ دوست کو ای میل کیجیئے
پرِنٹ کریں
