پاکستان کی فوج کی طرف سے گولہ باری کے متعلق ابھی تک کوئی بیان سامنے نہیں آیا ہے
شمالی کشمیر کے اُوڑی سیکٹر میں حکام کا کہنا ہے کہ لائن آف کنٹرول کے قریب واقع ایک گاؤں میں خاتون سمیت تین شہری اُسوقت ہلاک ہوگئے جب پاکستانی فوج نے بھارتی علاقہ کی طرف مارٹر گولے فائر کیے۔
فوج کے مطابق ہلاک ہونے والی خاتون حاملہ تھیں اور شیلنگ کے دوران خوف سے ان کے دل کی حرکت بند ہوگئی۔یہ واقع سرینگر سے شمال کی جانب ایک سو بیس کلومیٹر دوُر اوڑی قصبہ کے چورنڈا گاؤں میں منگل کی صبح دس بجے پیش آیا۔
اُوڑی کے ایک پولیس افسر نے نام ظاہر نہ کرنے کی شرط پر بتایا کہ مارٹر شیلنگ کی وجہ سے اُوڑی کے چورنڈا گاؤں کے لوگوں نے لاؤڈ سپیکروں کے ذریعہ پاکستانی فوج سے شیلنگ روکنے کی اپیلیں کیں تاکہ لاشوں کو دفنایا جا سکے۔
اُوڑی کے ایک پولیس افسر آر پی سنگھ نے بی بی سی کو بتایا: ’یہ واقع منگل کی صبح پیش آیا۔ اب وہاں پر امن ہے، مارے گئے شہریوں کو دفن کیا گیا ہے۔‘
اُوڑی کے ایک سماجی کارکن حاجی عبدالرحمٰن نے بتایا کہ چُورنڈا سے کچھ کنبے ہجرت کرکے اُوڑی میں اپنے رشتہ داروں کے یہاں آئے ہیں۔
فوج کے ایک اعلیٰ افسر کرنل گریوال نے بتایا: ’یہ واقع ہوتے ہی ہاٹ لائن کے ذریعہ پاکستانی فوجی حکام کے ساتھ رابطہ کیا گیا۔‘ تاہم انہوں نے تفصیلات ظاہر نہیں کیں۔
مسٹر گریوال نے بتایا کہ چورنڈا گاؤں کے قریب فوج کی کچھ چوکیاں ہیں جنہیں پاکستانی افواج نے نشانہ بنایا، لیکن اس حملہ میں عام شہریوں کو جانی نقصان اُٹھانا پڑا۔
پاکستانی فوج کی طرف سے اس سلسلے میں ابھی تک کوئی ردعمل سامنے نہیں آیا ہے۔
قابل ذکر ہے کہ بھارت اور پاکستان نے تعلقات کو استوار کرنے کے لیے اکتوبر دو ہزار آٹھ میں کنٹرول لائن کو کشمیر کے دونوں خطوں کے درمیان تجارت کے لیے کھولنے کا اعلان کیا۔ اُوڑی کے سلام آباد علاقہ میں ایک تجارتی رابطہ مرکز قائم کیا گیا ہے جہاں سے دونوں اطراف کی مال گاڑیاں تجارتی اجناس کا تبادلہ کرتی ہیں۔
ایل او سی تجارت سے وابستہ ایک معروف تاجر نور محمد بابا نے بی بی سی کو بتایا: ’فائرنگ سے تجارت پر اثر نہیں پڑا ۔ آج ہی پانچ مال گاڑیاں اُوڑی پہنچی جو بعد میں اپنی منزل کی طرف چل پڑیں۔‘
واضح رہے سات سو چالیس کلومیٹر لائن آف کنٹرول ایک عبوری سرحد ہے جو جموں کشمیر کو پاکستان اور بھارت کے درمیان تقسیم کرتی ہے۔ اُنیس سو سینتالیس کے بعد یہ سرحد دونوں ملکوں کے درمیان بڑی چھوٹی جنگوں کا میدان بنتی رہی ہے۔ نومبر دو ہزار تین میں دونوں ملکوں کے وزرائے اعظم ظفراللہ خان جمالی اور اٹل بہاری واجپائی کے درمیان کنٹرول لائن پر جنگ بندی کا معاہدہ طے پایا۔ اس معاہدے کے بعد پاک بھارت افواج کے درمیان شیلنگ یا فائرنگ کا تبادلہ رُک گیا۔ لیکن پچھلے نو سال کے دوران بھارت نے اکثر اوقات پاکستان پر جنگ بندی معاہدے کی خلاف ورزی کا الزام عائد کیا ہے۔
