پاکستان میں پرفارم کرنے کی خواہش ہے: اے آر رحمان
بھارت کے آسکر اور گریمی انعام یافتہ موسیقار اے آر رحمان کا کہنا ہے کہ انہوں نے صوفی موسیقی کی باریکیاں پاکستانی قوال نصرت فتح علی خان سے سیکھیں اور وہ پاکستان جا کر کانسرٹ کرنے کے خواہشمند ہیں۔
’خواجہ میرے خواجہ‘ ہو یا پھر ’عرضياں ساری‘ اے آر رحمان کی موسیقی پر صوفی موسیقی کی گہری چھاپ نظر آتی ہے۔ بی بی سی کی دیپتی کارکی سے بات کرتے ہوئے اس عالمی شہرت یافتہ موسیقار کا کہنا تھا کہ انہوں نے پہلی بار جو صوفی موسیقی سنی وہ نصرت فتح علی خان کی تھی۔
اے آر رحمان نے کہا کہ ’نصرت صاحب کی صوفی موسیقی جب میں نے سنی تو میرا نظریہ ہی بدل گیا۔ مجھے ان سے صوفی موسیقی کے ساتھ ساتھ قوالی سیکھنے کا موقع بھی ملا۔‘
اے آر رحمان کے مطابق صوفی موسیقی کی وجہ سے ان کی ذاتی زندگی میں بھی بہت تبدیلی آئی ہے اور اس نے صرف انہی کی نہیں بلکہ سننے والوں کی سوچ کو بھی تبدیل کیا ہے۔
ان کا کہنا ہے کہ ’میں کبھی سوچ بھی نہیں سکتا تھا کہ لوگ ’خواجہ میرے خواجہ‘ سے اس قدر متاثر ہوں گے۔ اس نغمے نے ہر انسان کو چھو لیا ہے چاہے وہ کسی بھی مذہب کا ہو۔ موسیقی میں یہی تو خاص بات ہوتی ہے کہ وہ لوگوں کو آپس میں جوڑتی ہے۔‘
ایک سوال کے جواب میں رحمان کا کہنا تھا کہ ’1998 میں مجھے پاکستان جانے کا موقع ملا تھا اور میں نے وہاں نصرت صاحب کے ساتھ کچھ گانے ریکارڈ کیے۔ اس کے بعد میں کبھی دوبارہ پاکستان نہیں گیا، اور اب موقع ملے تو ایک بار پھر پاکستان جا کر فن کا مظاہرہ کرنا چاہوں گا۔‘
ان کا کہنا تھا کہ ’میں امید کرتا ہوں کہ پاکستان میں حالات جلد ہی مستحکم ہو جائیں اور وہاں امن ہو۔‘
بی بی سی سے بات چیت میں انہوں نے بتایا کہ وہ اپنی آنے والی فلم ’ہائی وے‘ میں کچھ پاکستانی فنکاروں کے ساتھ کام کر رہے ہیں: ’امتیاز علی کی فلم میں میں زیب اور ہانیہ کی جوڑی کے ساتھ کام کر رہا ہوں کیونکہ موسیقی کی کوئی حد نہیں ہوتی۔‘
End of سب سے زیادہ پڑھی جانے والی
رحمان نے حال ہی میں بھارت میں ’رحمان عشق‘ کے نام سے کانسرٹ کیے۔ ان کا کہنا ہے کہ اس کے ذریعے ان کی کوشش تھی کہ وہ اپنی جڑوں تک واپس پہنچ پائیں۔
وہ کہتے ہیں،’یہ میرے لیے بھی ایک موقع تھا کہ میں اپنے سننے والوں کے روبرو ہوں اور یہ میرے سننے والوں کے لیے بھی ایک موقع تھا کہ وہ مجھے براہ راست دیکھیں۔‘
