بالی وڈ راؤنڈاپ: سنی لیونی کا مجسمہ مادام تساؤ میوزیم میں

بالی وڈ اداکارہ سنی لیونی اب بالی وڈ کی ان خوش نصیب ہستیوں میں شامل ہونے والی ہیں جن کا موم کا مجسمہ دہلی کے مادام تساؤ میں لگا ہوا ہے۔ یہ بات سبھی جانتے ہیں کہ سنی کے مداح دنیا بھر میں پھیلے ہوئے ہیں اور ان میں بڑی تعداد انڈیا میں ہے۔

ان کی اس مقبولیت کو دیکھتے ہوئے لندن سے اس میوزیم کی ایک ٹیم سنی سے ملنے ممبئی پہنچی جہاں انھوں نے سنی کی تقریباً دو سو تصاویر اتاریں تاکہ ان کا مجسمہ تیار کیا جائے سنی کا مجسمہ اس سال کے آواخر تک دہلی کے اس میوزیم میں لگا دیا جائے گا جہاں ان کے پرستار سنی کے مجسمے کے ساتھ سیلفی لے سکیں گے۔

یہ بھی پڑھیے

سنی لیونی کا کنڈوم کا اشتہار واپس

’سنی لیونی پر پیسے نہ لٹاؤ بھائی‘

سنی اس بارے میں بہت خوش ہیں اور ساتھ ہی ان کے پرستار بھی۔ اب دیکھنا ہے کہ کیا سنی انٹرنیٹ کی طرح اس میوزیم میں بھی امیتابھ بچن اور سلمان خان جیسے بڑے ستاروں کی مقبولیت کا ریکارڈ توڑ پائیں گی؟

بھنسالی کی مشکلات

اس سال انڈیا کے یومِ جمہوریہ کے موقعے پر دو بڑی فلموں کا ٹکراؤ ہونے سے بچ گیا۔ ایک سنجے لیلا بھنسالی کی فلم 'پدماوت' اور دوسری اکشے کی 'پیڈمین۔‘ راجپوت تنظیم کی مخالفت کے باوجود سپریم کورٹ اور فلم سینسر بورڈ کی ہری جھنڈی کے بعد 'پدماوت' اگلے ہفتے ریلیز ہو رہی ہے اور فلمساز سنجے لیلی بھنسالی اتنی مشکلوں کے بعد فلم کی ریلیز پر دو طرح کی تشویش میں مبتلا تھے۔

ایک تو راجپوت تنظیم کرنی سینا کی دھمکی اور دوسرے فلم 'پیڈ مین' کے ساتھ ٹکراؤ کی جس سے فلم کی کمائی متاثر ہو سکتی تھی۔

سنجے نے اس بارے میں فلم کے ہیرو اکشے کمار سے درخواست کی کہ وہ اپنی فلم کی نمائش کی تاریخ آگے بڑھا دیں۔ کام مشکل تھا پر اکشے نے حالات کی نزاکت کو دیکھتے ہوئے سنجے کی مشکلیں کم کرنے میں ان کی مدد کرنے کا فیصلہ کیا اور اپنی فلم کی نمائش فروری تک ملتوی کر دی۔

اکشے کا کہنا تھا کہ سنجے اتنی مشکلات کا سامنا کرنے کے بعد فلم ریلیز کرنے جا رہے ہیں اس لیے وہ ان کی پریشانی سمجھ سکتے ہیں۔

اب سنجے کی ایک مشکل تو حل ہو گئی، زیادہ بڑی مشکل اب کچھ ریاستوں میں فلم کی مخالفت ہے جہاں ریلیز کے موقعے پر تشدد کا خدشہ ظاہر کیا جا رہا ہے۔ دیکھنے والی بات ہے کہ اب حکومت اور انتظامیہ فلم کی ریلیز کو کس طرح محفوظ بناتی ہے۔

سلمان کی دوست

رومانیہ کی ٹی وی پرسنالٹی اور سلمان خان کی دوست یولیا وینتور اپنے کام سے کم اور سلمان خان کی وجہ سے زیادہ مشہور ہیں۔ وہ کافی عرصے سے ممبئی میں رہتی ہیں اور سلمان سے ان کی دوستی کو میڈیا میں مختلف نام اور معنی دیے جاتے ہیں۔

انھیں سلمان کی گرل فرینڈ کہا جاتا ہے۔ میڈیا میں اس حوالے سے کھلے عام اتنا کچھ کہے جانے کے باوجود بھی یولیا نے کبھی کھل کر اس بارے میں واضح طور پر کچھ نہیں کہا۔

37 سالہ اداکار منیش پال کے ساتھ اپنے گانے کی نئی البم ’ہرجائی‘ کی پروموشن کے دوران بات کر رہی تھیں۔ ان کا کہنا تھا کہ افواہوں کا ان پر کوئی اثر نہیں ہوتا اور نہ ہی سلمان خان یا ان کے خاندان کے ساتھ ان کے تعلقات متاثر ہوتے ہیں کیونکہ ان کے خیال میں رشتے اخبارات یا میڈیا کی سرخیاں نہیں بناتیں بلکہ حقیقی زندگی بناتی ہے۔

ان کا کہنا تھا کہ وہ سلمان کی بہت عزت کرتی ہیں اور ان کے بارے میں جو کچھ لکھا جاتا ہے وہ سچ نہیں، افواہیں ہوتی ہیں۔