جلد کے کینسر کے بارے میں آگاہی کے لیے آسٹریلیا کے ساحل بونڈائے پر برہنہ رضاکاروں کا پوز

تقریباً 2500 برہنہ رضاکاروں نے آسٹریلیا کے شہر سڈنی کے مشہور ساحل بونڈائے پر علی الصبح تصاویر کے لیے پوز کیا جس کا مقصد جلد کے کینسر کے حوالے سے آگاہی فراہم کرنا تھا۔

یہ امریکی فوٹوگرافر سپینسر ٹیونک کا تازہ ترین پراجیکٹ ہے جس کے ذریعے آسٹریلیا کے لوگوں کو جلد کا باقاعدگی سے معائنہ کرنے کی ترغیب دینا تھا۔

اس شوٹ کے لیے ساحل پر برہنہ ہونے سے متعلق قانون کو تبدیل کیا گیا تھا۔

ورلڈ کینسر ریسرچ فنڈ کے مطابق آسٹریلیا دنیا کا وہ ملک ہے جو جلد کے کینسر سے سب سے زیادہ متاثر ہے۔

صبح تین بج کر تیس منٹ سے رضاکاروں نے ساحل پر جمع ہونا شروع کر دیا تاکہ وہ اس تقریب کا حصہ بن سکیں۔

یہ فوٹو شوٹ سکن چیک چیمپیئنز نامی فلاحی ادارے کے تعاون سے منعقد کروایا گیا تھا اور یہ سکن کینسر سے متعلق آگاہی کا ہفتہ ہے۔

مقبول فنکار ٹیونک نے روئٹرز سے بات کرتے ہوئے کہا کہ ’ہمارے پاس جلد کا معائنہ کروانے کے لیے آگاہی فراہم کرنے کا یہ اچھا موقع ہے۔ یہاں آ کر میں نے آرٹ بنایا اور جسم کے بارے میں فرسودہ خیالات کا خاتمہ کرنا ہے اور اس کی حفاظت کے بارے میں آگاہی پھیلائی۔‘

بروس فشر جن کی عمر 77 سال ہے انھوں نے اس ایونٹ میں شرکت کی اور بعدازاں خبر رساں ادارے اے ایف پی سے بات کرتے ہوئے کہا کہ ’میں نے اپنی آدھی زندگی دھوپ میں گزاری ہے اور اپنی کمر سے دو مرتبہ کینسر کی رسولیوں کی سرجری کروائی ہے۔‘

’میرے خیال میں یہ ایک ایسی وجہ تھی جس کے بارے میں میں آگاہی فراہم کرنا چاہتا تھا اور مجھے ساحل بونڈائے پر کپڑے اتارنا ویسے ہی پسند ہے۔

ٹیونک اس سے پہلے بھی دنیا کے سب سے مقبول مقامات پر بڑے پیمانے پر برہنہ افراد کی تصاویر بنا چکے ہیں۔