యుక్రెయిన్: షాపింగ్ మాల్ మీద ‘రష్యా’ మిసైల్ దాడి... 16 మంది మృతి

యుక్రెయిన్‌లోని క్రెమెన్సోక్ నగరంలో గల ఒక షాపింగ్ మాల్ మీద జరిగిన మిసైల్ దాడిలో సుమారు 16 మంది చనిపోయారు. దాడి జరిగిన సమయంలో దాదాపు 1,000 మంది అందులో ఉండి ఉంటారని యుక్రెయిన్ అధ్యక్షుడు వొలొదిమిర్ జెలియెన్‌స్కీ తెలిపారు.

జర్మనీలో సమావేశమైన జీ7 దేశాల అధినేతలు ఈ దాడిని ఖండించారు. 'అమాయకులైన ప్రజల మీద దాడులు చేయడం యుద్ధ నేరమే.' అని ఉమ్మడి ప్రకటనలో జీ7 దేశాల అధినేతలు ప్రకటించారు.

రష్యా అధీనంలో ఉన్న ప్రాంతాలకు 130 కిలోమీటర్ల దూరంలోనే క్రెమెన్సోక్ ఉంటుంది.

మిసైల్ దాడిలో 59 మంది గాయపడ్డారు. మరణాల సంఖ్య ఇంకా పెరుగుతుందని భావిస్తున్నారు. ఈ దాడికి కారణం రష్యానే అని యుక్రెయిన్ ఆరోపిస్తోంది.

ఇప్పటి ఆ షాపింగ్ మాల్‌లో చాలా మంది ఆచూకీ తెలియడం లేదు. రాత్రి కావడం వల్ల సహాయక చర్యలు కాస్త నెమ్మదించాయని, చీకటిలోనూ బాధితులను కాపాడేందుకు జనరేటర్లు తీసుకొచ్చినట్లు వార్తా సంస్థ రాయిటర్స్ తెలిపింది.

భయానక వాతావరణం

సోఫీ విలియమ్స్, బీబీసీ న్యూస్

క్రెమెన్సోక్‌లో షాపింగ్ మాల్ మీద దాడి జరిగిన తరువాత పరిస్థితి భీతావహంగా మారింది. ఇప్పటికి నగరమంతా పొగ చూరిన వాసన వస్తోంది. షాపిల్ మాల్ అంతా శిథిలాల కుప్పగా మారింది.

సహాయక చర్యలు చేపడుతున్న పనుల శబ్ధాలు మినహా అక్కడ ఏమీ వినిపించడం లేదు. మంటలను పూర్తిగా ఆపామని, కానీ పొగలు ఇంకా వస్తూనే ఉన్నాయని ఒక అధికారి మాతో చెప్పారు.

Skip ఎక్కువమంది చదివినవి and continue reading
ఎక్కువమంది చదివినవి

End of ఎక్కువమంది చదివినవి

స్థానిక కాలమాన ప్రకారం సాయంత్రం 4 గంటలకు షాపింగ్ మాల్ మీద దాడి జరిగింది. మరణాల సంఖ్య ఇంకా పెరుగుతుందనే భయాలున్నాయి.

Tu-22M3 లాంగ్ రేంజ్ బాంబర్ లాంచ్ చేసిన Kh-22 మిసైల్ షాపింగ్ మాల్‌ను ఢీ కొట్టినట్లు యుక్రెనియన్ ఎయిర్‌ఫోర్స్ తెలిపింది. కానీ ఇది నిజమో కాదో బీబీసీ ధ్రువీకరించుకోలేదు.

రష్యా మీద మరిన్ని ఆంక్షలు విధించడంపై జీ7 దేశాల అధినేతలు జర్మనీలో చర్చిస్తున్న తరుణంలోనే ఈ మిసైల్ దాడి జరిగింది.

తాము పౌరులను లక్ష్యంగా చేసుకుని ఎన్నడూ దాడులు చేయలదంటూ వాదిస్తున్న రష్యా ఈ ఘటన మీద ఇంకా స్పందించలేదు.

ఇవి కూడా చదవండి:

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)