Abhinandan: అభినందన్‌ను భారత్‌లోకి తీసుకొచ్చిన మరుక్షణం ఏం చేస్తారు?

పాకిస్తాన్ ప్రభుత్వం అభినందన్‌ను భారత్‌కు అప్పగించేముందు పాటించే విధి విధానాల గురించి మేజర్ జనరల్ రాజ్ మెహతా బీబీసీ ప్రతినిధి గురుప్రీత్ సోనీకి వివరించారు. ఆ ప్రకారం చూస్తే..

భారత్‌లో జరిగేదేంటి?

  • అభినందన్ భారత్‌కు రాగానే భారత వాయుసేన తమ వైద్య బృందం చేత ఆయనకు పరీక్షలు నిర్వహిస్తుంది. ఈ పరీక్షల ఫలితాలను పాకిస్తాన్ ఇచ్చిన నివేదికలతో పోల్చి చూస్తుంది.
  • ఈ మేరకు ఇప్పటికే వైద్య నిపుణుల బృందాన్ని సిద్ధం చేసి ఉండొచ్చు.
  • వైద్య పరీక్షల అనంతరం అభినందన్‌తో ఉన్నతాధికారులు చర్చలు జరుపుతారు.
  • ఇంటెలిజెన్స్ డీ బ్రీఫింగ్ జరుగుతుంది. ఇందులో పాకిస్తాన్‌లో పట్టుబడినప్పటి నుంచి ఏం జరిగిందో, ఎలా జరిగిందో మొత్తం సంఘటనలను అభినందన్ వివరించాల్సి ఉంటుంది.
  • పాకిస్తాన్ ఎలా వ్యవహరించింది? ఏమేం అడిగింది? ఏమేం చర్చలు జరిగాయి? వీటన్నింటిపైనా విచారణ జరుగుతుంది.
  • అనంతరం వాయుసేన భారత ప్రభుత్వానికి నివేదిక సమర్పించాల్సి ఉంటుంది.

అంతకు ముందు పాకిస్తాన్‌లో జరిగేదేంటి?

  • తొలుత ఇంటర్నేషనల్ రెడ్ క్రాస్ సొసైటీ అభినందన్‌ను తమతో పాటు తీసుకెళుతుంది. అతనికి సమగ్రంగా పరీక్షలు జరుపుతుంది. వైద్య పరంగా ఎలాంటి ఇబ్బందులనైనా అభినందన్ ఎదుర్కొంటున్నాడా? అన్న విషయాన్ని పరిశీలిస్తుంది.
  • అభినందన్‌కు ఏమైనా డ్రగ్స్ ఇచ్చారా? శారీరకంగా కానీ, మానసికంగా కానీ ఏమైనా వేధింపులకు గురి చేశారా? అన్నది కూడా పరీక్షిస్తుంది.
  • ఈ పరీక్షలన్నీ జెనీవా కన్వెన్షన్ ప్రకారం తప్పకుండా చేయాల్సిన పరీక్షలు. ఈ పరీక్షలన్నింటి రిపోర్టులు తయారు చేసి, వాటిని భారత వాయుసేనకు ఇవ్వాల్సి ఉంటుంది.

ఏమైనా వివాదం తలెత్తితే?

ఒకవేళ పాకిస్తాన్ నివేదించినట్లుగా అభినందన్ పరిస్థితి లేకపోయినా? అభినందన్ విషయంలో ఏమైనా తప్పుగా వ్యవహరించినట్లు భారత్ భావించినా.. అంతర్జాతీయ వేదికలపై ఈ అంశాలకు సంబంధించిన ఆధారాలతో తన వాదనను బలపర్చుకోవాల్సి వస్తుంది.

వాఘా-అటారీ సరిహద్దులో పరిస్థితి ఎలా ఉంది?

సరిహద్దు వద్దకు పంజాబ్ సీఎం

అభినందన్‌కు స్వాగతం పలికేందుకు పంజాబ్ ముఖ్యమంత్రి అమరిందర్ సింగ్ వాఘా సరిహద్దు వద్దకు చేరుకున్నారు.

అమరిందర్ సింగ్ గతంలో కెప్టెన్ హోదాలో సైన్యంలో పనిచేశారు. అభినందన్ తండ్రి, తాను నేషనల్ డిఫెన్స్ అకాడెమీ (ఎన్డీఏ)కు చెందిన వాళ్లమని, అందుకే అభినందన్‌కు స్వాగతం పలికేందుకు తాను సరిహద్దు వద్దకు వెళుతున్నానని గురువారం ట్వీట్ చేశారు.

ఇవి కూడా చదవండి:

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)