పవన్ కల్యాణ్: వైసీపీ మేనిఫెస్టో జనరంజకం... పాలన జనవిరుద్ధం

జనసేనను రెగ్యులర్ పొలిటికల్ పార్టీలా చూడొద్దు.. ఆరోగ్యకరమైన రాజకీయలనే జనసేన చేస్తుంది అని ఆ పార్టీ అధ్యక్షుడు పవన్ కల్యాణ్ అన్నారు.

కొత్త ప్రభుత్వంపై ఇంత త్వరగా మాట్లాడాల్సి వస్తుందని అనుకోలేదు.. మూడు నెలల్లోనే ప్రభుత్వ నిర్ణయాలు ప్రజలను ఆందోళన కలిగించాయి.. వంద రోజుల పాలనలో పారదర్శకత దార్శినికత లోపించింది అని వైఎస్సార్‌సీపీ 100 రోజుల పాలనపై 33 పేజీల నివేదిక విడుదల చేశారు పవన్ కల్యాణ్.

వైసీపీ మేనిఫెస్టో జనరంజకంగా ఉంది కానీ పాలన జనవిరుద్దంగా ఉందని విమర్శించారు.

ఈ నివేదికను సిద్ధం చేయడానికి తమ‌ పార్టీ బృందం అనేక జిల్లాల్లో పర్యటించి వాస్తవ పరిస్థితులు గమనించిందని పవన్ వెల్లడించారు. 9 ప్రధాన అంశాలతోపాటు ఇతర అంశాలపై కూడా ఈ బృందం అధ్యయనం చెసిందని తెలిపారు.

పవన్ ఇంకేమన్నారు?

ఇకపై ప్రభుత్వ ప్రతి నిర్ణయాలని క్షుణ్ణంగా పరిశీలిస్తుంటామని, తమ నివేదికపై ప్రభుత్వం నుంచి సరైన వివరణ కావాలని పవన్ అన్నారు.

అర్థం చేసుకోకుండా విమర్శలు సరికాదు: మంత్రి బొత్స

జనసేన అధ్యక్షుడు పవన్ కల్యాణ్ వ్యాఖ్యలపై మంత్రి బొత్స సత్యనారాయణ తీవ్రంగా స్పందించారు. అర్థం చేసుకోకుండా విమర్శలు చేయడం సరికాదని బీబీసీతో అన్నారు.

"పవన్ వ్యాఖ్యల్లో అర్థం లేదు. అవి చంద్రబాబు మాటలకు కొనసాగింపులా ఉన్నాయి. జగన్ ప్రభుత్వం సంక్షేమ కార్యక్రమాలతో ముందుకెళ్తోంది. వివిధ వర్గాల అందించే పథకాలను షెడ్యూల్ ప్రకటించి దాని ప్రకారం ప్రజల ముందుకు తెస్తున్నాం. రాజధాని అమరావతి సహా ఏపీలోని అన్ని నగరాల అభివృద్ధికి కమిటీ ఏర్పాటు చేశాం. ఇసుక, మద్యం అంశాల్లో ప్రభుత్వం పారదర్శకంగా నిర్ణయాలు తీసుకుంది. ఇవన్నీ గుర్తించకుండా విమర్శలు చేయడం అర్థరహితం. ఎన్నికల ముందు కూడా పవన్ కల్యాణ్ వైసీపీపై ఇలాంటి విమర్శలు చేసినా జనం స్వీకరించలేదు. ఇప్పటికైనా అర్థం చేసుకోకపోతే జనసేన మరింత పతనమవుతుంది" అని బొత్స వ్యాఖ్యానించారు.

ఇవి కూడా చదవండి.

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)