ஆப்பிள் ஐபோன் 16 சீரிஸ் இந்தியாவில் எப்போது கிடைக்கும்? சிறப்பம்சங்கள், விலை என்ன?

ஆப்பிள் நிறுவனம் ஐபோன் 16 சீரிஸ் ஸ்மார்ட்போன்களை அறிமுகப்படுத்தியுள்ளது. இதற்கான நிகழ்ச்சி, அமெரிக்காவின் கலிபோர்னியாவில் உள்ள கியூபெர்டினோவில் உள்ள ஆப்பிள் பார்க்கில் செப்டம்பர் 9-ஆம் தேதி நடைபெற்றது.

இந்த நிகழ்வுக்கு "இட்ஸ் க்ளோடைம்" என்று ஆப்பிள் நிறுவனம் பெயரிட்டிருந்தது. இந்த நிகழ்வில் ஆப்பிள் நிறுவனம் தங்களின் ஐபோன்கள் மற்றும் இதர தயாரிப்புகளை ஒன்றன் பின் ஒன்றாக வெளியிட்டது.

ஐபோன் 16 சீரிஸில் உள்ள ஸ்மார்ட்போன்கள் மட்டுமின்றி, ஆப்பிள் வாட்ச் சீரிஸ் 10, ஏர்பாட்ஸ் 4, ஏர்பாட்ஸ் மேக்ஸ் மற்றும் ஆப்பிள் வாட்ச் அல்ட்ரா 2 போன்ற கருவிகளையும் ஆப்பிள் நிறுவனம் அறிமுகம் செய்துள்ளது.

ஆப்பிள் ஐபோன் 16 சீரிஸில் உள்ள சிறப்பம்சங்கள் என்ன?

ஐபோன் 16 வரிசையில் நான்கு ஸ்மார்ட்போன்களை ஆப்பிள் நிறுவனம் அறிமுகப்படுத்தியுள்ளது. அவை முறையே ஐபோன் 16, ஐபோன் 16 ப்ளஸ், ஐபோன் 16 ப்ரோ, ஐபோன் 16 மேக்ஸ் ஆகும்.

செயற்கை நுண்ணறிவுடன் (Artificial Intelligence (AI)) கூடிய போன்கள் அறிமுகம் செய்யப்படும் என்ற எதிர்பார்ப்பு இருந்தது. அதற்கேற்ப, தங்களின் செயற்கை நுண்ணறிவு மென்பொருளான ஆப்பிள் இண்டலிஜன்ஸுடன் இந்த போன்களை ஆப்பிள் நிறுவனம் தயாரித்துள்ளது.

ஆப்பிள் இண்டலிஜன்ஸுடன் புதிய வடிவமைப்பில், சிறப்பம்சங்களைக் கொண்ட ஐபோன்களை நாங்கள் வெளியிடுகின்றோம் என்று ஆப்பிள் நிறுவனத்தின் தலைமை நிர்வாக இயக்குநர் டிம் குக் தெரிவித்தார்.

"ஜூன் மாதத்தில் இந்த ஆப்பிள் இண்டலிஜன்ஸை வெளியிட்டோம். மிகவும் சக்தி வாய்ந்த எங்களின் இண்டலிஜன்ஸ் மென்பொருள் பல்வேறு வகையில் மிகவும் வித்தியாசமானது" என்றும் அவர் கூறினார்.

எழுத்துகள், புகைப்படங்கள் மற்றும் வீடியோக்களிலும் இந்த ஆப்பிள் இண்டலிஜன்ஸின் பங்களிப்பை பயனாளர்கள் நன்றாக உணர முடியும். இது மட்டுமின்றி, போனின் செயல்திறன் அதிகரிக்கும் என்று கூறப்பட்டுள்ளது. டிஜிட்டல் உதவிக்கான சிரியின் செயல் திறனும் முன்பை விட சிறப்பாக இருக்கும் என்று எதிர்பார்க்கப்படுகிறது.

இந்த ஆப்பிள் இண்டலிஜன்ஸ் மக்கள் மத்தியில் அதிக ஆர்வத்தை ஏற்படுத்தினாலும் கூட, உடனடியாக பயனாளர்கள் இதனை பயன்படுத்த இயலாது. ஆப்பிள் இண்டலிஜென்ஸை சில மாதங்கள் கழித்தே இந்த போன்களில் அப்டேட்டாக வழங்க ஆப்பிள் திட்டமிட்டுள்ளது. முதலில் இதன் 'பீட்டா' அம்சம் சில நாடுகளில் அறிமுகம் செய்யப்பட்டு, மற்ற நாடுகளுக்கு கொஞ்சம்கொஞ்சமாக விரிவுபடுத்தப்படும்.

சிறப்பம்சங்கள் என்ன?

பக்கவாட்டில் கேமராவின் செயல்பாட்டை கட்டுப்படுத்தும் பட்டனுடன் இந்த போன் அறிமுகம் செய்யப்பட்டுள்ளது. கேமரா செயலிக்குள் நுழைவது, புகைப்படங்கள் மற்றும் வீடியோக்கள் எடுப்பது, ஸூம் செய்வது, ஒளி அளவைக் கூட்டுவது, குறைப்பது போன்ற அனைத்தையும் இந்த பட்டன் மூலமே செய்ய முடியும்.

புகைப்படங்கள் மற்றும் வீடியோக்களை எளிமையாக எடுக்க இந்த சிறப்பம்சம் உதவும் என்று ஆப்பிள் நிறுவனம் கூறியுள்ளது.

ஆப்பிள் இண்டலிஜன்ஸ் அறிமுகம் செய்யப்பட்ட பிறகு, விஷூவல் இண்டலிஜன்ஸையும் பயனாளர்கள் பயன்படுத்த இயலும்.

ஆக்‌ஷன் பட்டன்

இந்த போனில் மற்றொரு சிறப்பம்சமாக ஆக்‌ஷன் பட்டனை அறிமுகம் செய்துள்ளது ஆப்பிள் நிறுவனம். ஒரே நேரத்தில் ஒரு செயலியில் இருந்து மற்றொரு செயலிக்கு மாற இந்த பட்டனை அழுத்தினால் போதும்.

உதாரணத்திற்கு இந்த பட்டனை அழுத்தி நீங்கள் ஃப்ளாஷ்லைட்டை ஆன் செய்ய இயலும். கேமராவை இயக்க முடியும். போனை சைலண்ட் மோடுக்கு மாற்ற இயலும். இவை தவிர்த்த, கூடுதல் அம்சங்களும் இருக்கிறது.

ஏ18 சிப்

ஆப்பிள் இண்டலிஜென்ஸை இயக்கும் வகையில் ஏ18 மைக்ரோசிப்பை இந்த சீரிஸில் உள்ள போன்களில் ஆப்பிள் நிறுவனம் பயன்படுத்தியுள்ளது. இதற்கு முன்பு வந்த ஐபோன் சீரிஸ் போன்களைக் காட்டிலும் இரண்டு தலைமுறை முன்னிலையில் உள்ளது இந்த மைக்ரோசிப்.

ஐபோன் 15 சீரிஸில் ஏ16 பயோனிக் சிப் பயன்படுத்தப்பட்டுள்ளது. ஏ18 மைக்ரோசிப், பேட்டரியின் செயல்திறனை அதிகரிக்கும்.

கேமரா

ஐபோன் 16 சீரிஸில் இடம் பெற்றுள்ள ஐபோன் 16 ஸ்மார்ட்போன் 48 மெகாபிக்‌ஸல் இரட்டை கேமராக்களை கொண்டுள்ளது. டெலிபோட்டோ லென்ஸ் 2 மடங்கு காட்சியை விரிவுபடுத்தும் திறன் கொண்டது.

ஐபோன் 16 ப்ரோவில் 5 மடங்கு காட்சியை விரிவுப்படுத்த இயலும்.

பேட்டரி, நிறம், திரை, சேமிப்புத்திறன் என்ன?

வீடியோ ப்ளேபேக்குடன் ஐபோன் 16 ஸ்மார்ட்போன் 27 மணி நேரம் இயங்கும். ஐபோன் 16 ப்ரோ ஸ்மார்ட்போன் 33 மணி நேரம் இயங்கும்.

ஐபோன் 16, ஐபோன் 16 ப்ளஸ் ஆகிய இரண்டு போன்களும் கருப்பு, வெள்ளை, இளஞ்சிவப்பு, டீல் நீலம், அல்ட்ராமரைன் நிறங்களில் கிடைக்கும்.

ஐபோன் 16 ப்ரோ, ப்ரோ மேக்ஸ் போன்ற போன்கள், கருப்பு மற்றும் வெள்ளை டைட்டானியம், நேச்சுரல் டைட்டானியம், டெசர்ட் டைட்டானியம் நிறங்களில் கிடைக்கிறது.

போனின் திரையைப் பொருத்தவரை, ஐபோன் 16 ஸ்மார்ட்போன் 6.1 அங்குலம் அளவுடையது. ஐபோன் 16 ப்ளஸ் - 6.7 அங்குலத்திலும், ஐபோன் 16 ப்ரோ 6.3 அங்குலத்திலும், ஐபோன் 16 ப்ரோ மேக்ஸ் 6.9 அங்குலத்திலும் வடிவமைக்கப்பட்டுள்ளது.

ஐபோன் 16, ஐபோன் 16 ப்ளஸ் ஸ்மார்ட்போன்களின் சேமிப்பு திறனானது 128 ஜிபி, 256 ஜிபி, 512 ஜிபியாக உள்ளது. ஐபோன் ப்ரோவில் 1 டிபி (1TB) சேமிப்பு திறன் கொண்ட போன்களும் அறிமுகம் செய்யப்பட்டுள்ளது. ஐபோன் ப்ரோ மேக்ஸ் போனில் 256 ஜிபி, 512 ஜிபி மற்றும் 1 டிபி சேமிப்புத் திறன் கொண்ட போன்கள் கிடைக்கின்றன.

இந்தியாவில் எப்போது கிடைக்கும்? விலை என்ன?

இந்த அனைத்து ஐபோன்களையும் வாங்க நீங்கள் இந்தியாவில் செப்டம்பர் 13-ஆம் தேதி முதல் ஆர்டர் செய்யலாம். செப்டம்பர் 20-ஆம் தேதி முதல் டெலிவரி செய்யப்படும்.

இந்தியாவில் ஐபோன் 16 போனின் விலை ரூ. 79,900-ஆக நிர்ணயம் செய்யப்பட்டுள்ளது. ஐபோன் 16 ப்ளஸ் போனின் விலை ரூ. 89,900 ஆகும். ஐபோன் 16 ப்ரோ போனின் விலை ரூ. 1,19,900 ஆகவும், ஐபோன் 16 ப்ரோ மேக்ஸ் போனின் விலை ரூ. 1,44,900 ஆகவும் நிர்ணயம் செய்யப்பட்டுள்ளது.

ஆப்பிள் அறிமுகப்படுத்திய இதர தயாரிப்புகள் என்ன?

இந்த நிகழ்வில் ஆப்பிள் வாட்ச் சீரிஸ் 10 அறிமுகம் செய்யப்பட்டது. இதற்கு முன்பு வெளியான இதர கடிகாரங்களைக் காட்டிலும் இது மிகவும் மெல்லியதாக இருக்கும் என்று தெரிவித்த ஆப்பிள் நிறுவனம், இந்த கடிகாரத்தின் செயல்திறன் மிகவும் சிறப்பானதாக இருக்கும் என்றும் கூறியுள்ளது.

உடற்பயிற்சியின் ஈடுபடும் போது பயன்படுத்திக் கொள்ள ஏற்ற கடிகாரமாக இது அறியப்படுகிறது. ஆரோக்கியம் குறித்த தரவுகளையும் பயனாளிகள் அறிந்து கொள்ள இயலும். செப்டமர் 20-ஆம் தேதி முதல் இந்தியாவில் விற்பனைக்கு வரும் இந்த கடிகாரத்தின் விலை ரூ. 46,900 ஆகும்.

இது மட்டுமின்றி, ஆப்பிள் வாட்ச் அல்ட்ரா 2 என்ற கடிகாரமும் அறிமுகப்படுத்தப்பட்டுள்ளது. இதுவும் செப்டம்பர் 20-ஆம் தேதி முதல் விற்பனைக்கு வருகிறது. மேலும் ஏர்பாட்ஸ் 4, ஏர்பாட்ஸ் மேக்ஸ் 2 - இயர்போன்களையும் ஆப்பிள் நிறுவனம் அறிமுகம் செய்துள்ளது.

முதல் ஐபோனின் விலை என்ன தெரியுமா?

2007-ஆம் ஆண்டு மேக்வேர்ல்ட் எக்ஸ்போ என்ற கண்காட்சியில் முதன்முறையாக ஐபோன்களை அறிமுகம் செய்து வைத்தார் ஆப்பிள் நிறுவனர் ஸ்டீவ் ஜாப்ஸ். அப்போது அது பலராலும் விமர்சனம செய்யப்பட்டது.

ஆனால் இன்று உலகில் மிகவும் செல்வ செழிப்பு மிக்க நிறுவனங்களில் ஒன்றாக உள்ளது ஆப்பிள். ஒவ்வொரு ஆண்டும் ஐபோன் பயனர்களின் எண்ணிக்கை அதிகரித்த வண்ணமே உள்ளது.

ஆப்பிள் வெளியிட்ட முதல் ஐபோனில் தொடுதிரை, அகலமான திரை, ஐபாட் மற்றும் இணைய ப்ரவுசர் சிறப்பம்சங்களாக இடம் பெற்றிருந்தன. 16 ஜிபி சேமிப்பு திறன் மற்றும் 2 மெகா பிக்சல் கேமராவை கொண்டிருந்தது அந்த முதல் ஐபோன்.

இந்த நாளுக்காக நான் இரண்டரை ஆண்டுகள் காத்துக் கொண்டிருந்தேன் என்று அறிமுக விழாவின் போது சி.என்.என். இதழிடம் பேசிய ஜாப்ஸ் கூறினார்.

முதல் ஐபோனின் விலை ரூ. 16,500 ஆக இருந்தது.

ஆப்பிள் நிறுவனத்தின் முன் உள்ள சவால்கள்

இணைய உலாவல், புகைப்பட எடிட்டிங் மற்றும் மொழிபெயர்ப்பு, ஆகியவற்றுக்கான ஜெனரேட்டிவ் AI (ஏஐ) திறன்களை ​​ஆப்பிள் சாதனங்களில் இணைப்பதில், தனது போட்டியாளர்களான சாம்சங் மற்றும் கூகுள் நிறுவனங்களை விட ஆப்பிள் நிறுவனம் பின்தங்கி உள்ளது.

சமீப காலமாக, அதன் போட்டியாளர்கள் ஃபோல்டிங் (Folding), ஃபிலிப்பிங் (Flipping) மற்றும் ட்ரை-ஃபோல்டிங் (tri-folding) வகை ஸ்மார்ட்போன்களில் ஜெனரேட்டிவ் ஏஐ திறன்களை இணைத்து வருகின்றனர்.

ஹூவாவே (Huawei) நிறுவனத்தின் புதிய ட்ரை-ஃபோல்ட் ஸ்மார்ட்போன் Mate XT-க்கு, திங்கள்கிழமை வரை மூன்று மில்லியனுக்கும் அதிகமான முன்பதிவுகள் செய்யப்பட்டுள்ளதாகக் கூறப்படுகிறது.

அமெரிக்க ஆய்வு நிறுவனமான கார்ட்னர்-இல் (Gartner) ஆய்வாளராக உள்ள அனெட் சிம்மர்மேனின் கூற்றுப்படி, “போட்டியாளர்களை விட தாமதமாக ஆப்பிள் நிறுவனம் ஏஐ திறன் கொண்ட ஸ்மார்ட்போன்களை வெளியிடுவதால், அந்த ஏஐ அப்டேட்களை குறித்த காலத்திற்குள், சிறப்பாக வழங்க வேண்டும் என்பதே முக்கியமானது"

முழுமையாக தயாராவதற்கு முன்பே ஏஐ அம்சங்கள் குறித்த அறிவிப்புகளை வெளியிடுவது, அவர்களின் பிராண்ட் மதிப்பிற்கு பாதிப்பை ஏற்படுத்தலாம் மற்றும் விற்பனையை பாதிக்கலாம் என்று எச்சரிக்கை விடுக்கிறார் அனெட் சிம்மர்மேன்.

- இது, பிபிசி-க்காக கலெக்டிவ் நியூஸ்ரூம் வெளியீடு

(சமூக ஊடகங்களில் பிபிசி தமிழ் ஃபேஸ்புக், இன்ஸ்டாகிராம், எக்ஸ் (டிவிட்டர்) மற்றும் யூட்யூப் பக்கங்கள் மூலம் எங்களுடன் இணைந்திருங்கள்.)