Mapinduzi ya Niger: Ufaransa yakanusha kuyumbisha amani Niger

Moja kwa moja

1. 9 Agosti 2023Ufaransa yakanusha kuyumbisha amani Niger

   Ufaransa imekanusha shutuma ya utawala wa kijeshi nchini Niger kwamba ilipanga kuyumbisha nchi hiyo.

   Hapo awali uongozi wa kijeshi ulisema wanajeshi wa Ufaransa waliwaachilia wanajihadi waliotekwa, ili kushambulia maeneo ya kijeshi na kwamba ndege ya Ufaransa ilivunja katazo la anga ya nchi hiyo, ambayo ilifungwa Jumapili.

   Lakini serikali mjini Paris ilisema safari ya ndege inayozungumziwa ilikuwa imeidhinishwa na jeshi la Niger.

   Viongozi wa mapinduzi walimzuilia Rais Mohamed Bazoum mwezi uliopita na tangu wakati huo wamepinga juhudi za kidiplomasia kutatua mgogoro huo.

   Waziri wa Mambo ya Nje wa Marekani Antony Blinken alisema alizungumza na Bw Bazoum mapema na kumhakikishia uungwaji mkono unaoendelea.

2. 9 Agosti 2023EU yaanza kuandaa vikwazo dhidi ya Niger - ripoti

   Nchi za Umoja wa Ulaya zimeanza kuweka msingi wa kuweka vikwazo vya kwanza kwa wanachama wa serikali ya kijeshi iliyonyakua mamlaka nchini Niger mwezi uliopita, duru za Ulaya ziliiambia shirika la habari la Reuters siku ya Jumatano.

   Viongozi hao wapya wa kijeshi hadi sasa wamekataa juhudi za kidiplomasia za kimataifa katika upatanishi.

   Nchi jirani zinazounga mkono mapinduzi ya kijeshi zilitoa wito kwa Umoja wa Mataifa kuzuia uingiliaji kati wa kijeshi unaotishiwa na mataifa mengine ya Afrika Magharibi.

   Afisa wa Umoja wa Ulaya anayehusika katika kazi ya vikwazo na mwanadiplomasia wa Umoja wa Ulaya alisema umoja huo umeanza kujadili vigezo vya hatua za kuadhibu.

   Afisa huyo alisema hiyo itajumuisha "kudhoofisha demokrasia" nchini Niger na kuna uwezekano kuwa itakubaliwa hivi karibuni.

   "Hatua inayofuata itakuwa vikwazo dhidi ya wanachama binafsi wa junta" ikizingatiwa kuwajibika, mwanadiplomasia huyo wa EU alisema.

   Maafisa wa kitaifa walikuwa wakijadili suala hilo Jumatano, alisema afisa huyo na mwanadiplomasia mwingine wa EU. Vyanzo vyote vitatu vilizungumza kwa masharti ya kutokujulikana

   Haijabainika mara moja ni lini vikwazo vitakubaliwa.

   Viongozi wa Jumuiya ya Kiuchumi ya Nchi za Afrika Magharibi (ECOWAS) walipaswa kukutana siku ya Alhamisi baada ya muda wao wa mwisho kupitishwa wa kumrejesha madarakani Rais aliyeondolewa madarakani wa Niger Mohamed Bazoum.

   "EU iko tayari kuunga mkono maamuzi ya ECOWAS, ikiwa ni pamoja na kupitishwa kwa vikwazo," alisema Peter Stano, msemaji mkuu wa EU kuhusu sera za kigeni.

   Mawaziri wa mambo ya nje wa Umoja wa Ulaya waliokutana mjini Toledo, Uhispania, Agosti 31 walitarajiwa kujadili hali ya Niger, ikiwa ni pamoja na vikwazo.

   Soma zaidi:

   • Mapinduzi ya Niger: Wagner inatumia fursa ya ukosefu wa utulivu - Antony Blinken
   • Mgogoro wa mapinduzi Niger: Wahusika wakuu ni akina nani?
   • Tinubu apingwa vikali kuhusu matumizi ya nguvu nchini Niger
   • Je Afrika Magharibi inaweza kutumia mbinu gani kubadilisha mapinduzi ya Niger?

3. 9 Agosti 2023Madaktari wagoma Sudan kutokana na kucheleweshewa malipo na hali mbaya

   Wahudumu wa afya wa Sudan katika jimbo la Kordofan Kaskazini wamegoma kwa siku tano zilizopita wakidai kucheleweshewa malipo yao.

   Mgomo katika hospitali ya El-Obayed unajumuisha vituo vyote vya dharura na majeraha, wakati vituo vya kusafisha damu, magonjwa ya wanawake na uzazi bado vinafanya kazi kwa kiasi.

   Dk Nazifa Awad Allah alisema hilo lilikuwa suluhu la mwisho kwa madaktari hao baada ya mikutano zaidi ya 12 kwa muda wa miezi miwili kushindwa kufikia muafaka.

   Madaktari hao wanasema wanagoma kutokana na ukosefu wa usafiri wa kutosha kwenda na kurudi hospitalini, idadi ndogo ya wafanyakazi wa matibabu, kucheleweshwa kwa malipo ya kifedha kwa takriban miezi 10, pamoja na hali mbaya ya kazi.

   "Pia tulitoa wito wa kuweka mazingira ya kufaa ya kazi kwa madaktari, ikizingatiwa kwamba hospitali na sebule ya madaktari iko katika hali mbaya sana," aliongeza daktari mwingine wa Sudan aliye kwenye mgomo.

   Mapigano yanaendelea kati ya jeshi na Vikosi vya Msaada wa Haraka (RSF) katika mji mkuu wa Sudan Khartoum pamoja na miji ya karibu ya Omdurman na Bahri licha ya juhudi za upatanishi wa kimataifa.

4. 9 Agosti 2023Simu za mkononi huibiwa kila baada ya dakika sita Jijini London- Polisi

   Simu nyingi zinapigwa kwa kampuni za simu kusaidia kupunguza wizi baada ya data ya polisi kufichua simu za kiganjani zinaibiwa kila dakika sita huko London mwaka jana.

   Polisi wa Met wanasema simu 90,864, au karibu 250 kwa siku, ziliibiwa mnamo 2022.

   Meya wa London na kamishna wa Met wamewataka wakuu wa sekta ya simu "kubuni" mbinu za kuzuia wizi huo.

   Watengenezaji wa simu wakuu kama Apple na Samsung wameombwa kutoa maoni yao. Katika barua ya wazi, meya Sadiq Khan na mkuu wa Met Sir Mark Rowley walisema wabunifu wa programu lazima "watengeneze masuluhisho ya kuondoa uhalifu huo".

   Waliwataka watoa huduma za simu kushirikiana na Ikulu ya Jiji na polisi kwani takwimu mpya zinaonyesha kuwa uhalifu wa simu za mkononi ndio unaosababisha kuongezeka kwa matukio ya ujambazi na wizi katika mji mkuu ambapo asilimia 38 ya wizi wa watu binafsi mwaka jana unaohusisha kuibiwa kwa simu.

   Takwimu pia zinaonyesha karibu 70% ya wizi wote huko London mwaka jana unaohusiana na simu za rununu.

   Katika miaka ya nyuma, watengenezaji wa magari wamefanya kazi na polisi ili kupunguza kwa kiasi kikubwa wizi wa redio za magari na walinzi wa gari kwa kuziunganisha kwenye dashibodi za magari.

5. 9 Agosti 2023Iran yasema ina teknolojia ya kutengeneza kombora la anga za juu zaidi

   Iran imesema siku ya Jumatano ina teknolojia ya kutengeneza kombora la anga la juu, vyombo vya habari vya serikali ya Iran vimeripoti, tangazo ambalo linaweza kuongeza wasiwasi wa Magharibi juu ya uwezo wa makombora wa Tehran.

   Tangazo hilo linakuja siku chache baada ya ripoti kuhusu kuwasili kwa Wanamaji wa Marekani zaidi ya 3,000 ndani ya meli mbili za kivita za Marekani katika Bahari Nyekundu ili kuzuia Iran kukamata na kusumbua meli za wafanyabiashara zinazosafiri kupitia Mlango-Bahari wa Hormuz wa Ghuba.

   "Kombora hilo la anga la juu litafungua ukurasa mpya katika mpango wa ulinzi wa Iran, kwani ni vigumu sana kulinasa kombora linaloruka kwa kasi ya ajabu," shirika la habari la Tasnim liliripoti.

   "Kombora jipya la cruise kwa sasa linafanyiwa majaribio yake." Licha ya upinzani wa Marekani na Ulaya, Iran imesema itaendeleza zaidi mpango wake wa "kujilinda" wa makombora.

   Hata hivyo, wachambuzi wa masuala ya kijeshi wa nchi za Magharibi wanasema Iran wakati mwingine hutia chumvi uwezo wake wa makombora.

   Iran, ambayo ina moja ya mipango mikubwa ya makombora katika Mashariki ya Kati, inasema silaha zake zina uwezo wa kufika kwenye ngome za maadui wakubwa Israel na Marekani katika eneo hilo.

   Wasiwasi kuhusu makombora ya balistiki ya Iran ulichangia uamuzi wa rais wa Marekani wakati huo, Donald Trump mnamo 2018 wa kuachana na makubaliano ya nyuklia ya Tehran ya 2015 na mataifa sita makubwa na kuiwekea tena vikwazo Tehran.

   Mazungumzo yasiyo ya moja kwa moja kati ya Tehran na utawala wa Rais wa Marekani Joe Biden ili kuokoa mapatano ya nyuklia yamekwama tangu Septemba mwaka jana.

   Katika mfululizo wa mashambulio ya hivi punde dhidi ya meli katika Ghuba tangu 2019, Jeshi la Wanamaji la Marekani lilisema mwezi uliopita liliingilia kati kuzuia Iran kukamata meli mbili za mafuta katika Ghuba ya Oman.

   Pentagon mwezi uliopita ilituma ndege za ziada za kivita za F-35 na F-16 pamoja na meli ya kivita katika Mashariki ya Kati kwa nia ya kuangalia njia kuu za majini katika eneo hilo kufuatia Usumbufu wa Iran.

6. 9 Agosti 2023Raia wengi wameuawa katika mapigano Amhara, Ethiopia - madaktari

   Madaktari wa Bahir Dar, mji mkuu wa eneo la Amhara nchini Ethiopia, wameiambia BBC kwamba idadi kubwa ya raia wameuawa katika mapigano ya hivi majuzi kati ya wanamgambo wa eneo hilo na wanajeshi wa serikali.

   Daktari katika hospitali kuu ya jiji hilo alisema waliojeruhiwa ni pamoja na wazee na mtoto wa miezi mitano.

   Wakaazi walisema kuwa wanamgambo wamechukua udhibiti wa gereza na kuwaachilia wafungwa.

   Mvutano umekuwa ukiongezeka tangu mwezi wa Aprili wakati serikali ilipotangaza kuwa inasambaratisha vikosi vya kanda kote Ethiopia, na hivyo kuchochea maandamano ya wanamgambo wa Amhara ambao walisema hatua hiyo itadhoofisha eneo lao.

   Katika taarifa yake Jumanne, serikali ilisema kulikuwa na utulivu katika baadhi ya maeneo ya eneo hilo huku hatua zikichukuliwa kuwaondoa wanamgambo katika miji miwili mikubwa zaidi, Bahir Dar na Gondar.

   Shirika la ndege la Ethiopia limetangaza kusitisha safari za ndege kwa viwanja vinne vya ndege katika eneo hilo - ikiwa ni pamoja na Bahirdar na Gondar - kwa siku tatu.

7. 9 Agosti 2023Mazungumzo ya maridhiano ya kisiasa nchini Kenya yaanza

   Mazungumzo ya maridhiano kati ya muungano wa chama tawala nchini Kenya cha Kenya Kwanza na muungano wa Upinzani wa Azimio la Umoja yaliyokuwa yakisubiriwa kwa hamu yameanza leo katika ukimbi wa Bomas jijini Nairobi.

   Mazungumzo hayo ambayo yanatarajiwa kuongozwa na aliyekuwa rais wa Nigeria Olesegun Obasanjo, yamefanya huku pande hizo mbili zikiwa na misimamo tofauti, hali ambayo inatishia kusambaratisha mazungumzo hayo.

   Azimio kiliongoza maandamano makubwa mwezi Machi na Julai dhidi ya serikali ya Rais William Ruto kutaka kuundwa upya kwa tume ya uchaguzi na kupunguzwa kwa gharama ya maisha.

   Hali ilizidi kuwa mbaya baada ya serikali kuanzisha ushuru wa juu mnamo Julai ili kupata mapato ya bajeti ya kwanza ya Rais Ruto.

   Kundi la kutetea haki za binadamu limesema kuwa takriban watu 30 walifariki katika maandamano hayo lakini upinzani uliongeza idadi ya vifo kuwa 50.

   Hakuna muda uliotolewa juu ya mazungumzo na jopo la wanachama 10 na mgawanyiko unaendelea juu ya ajenda. Timu ya kiongozi wa upinzani Raila Odinga inataka kujadili gharama ya maisha na mageuzi ya uchaguzi baada ya kushindwa katika uchaguzi mwaka jana, lakini serikali inasisitiza kuwa tayari inafanya kazi kurekebisha mfumuko wa bei na kupunguza gharama ya bidhaa za kimsingi.

   Upinzani ulisimamisha maandamano mwezi Aprili na Mei ili kuruhusu mchakato sawa wa mazungumzo ya pande mbili, lakini maandamano yalianza tena baada ya mazungumzo kuvunjika. Bw Ruto na Bw Odinga wamesema kuwa mazungumzo hayo hayataleta makubaliano yoyote ya kugawana mamlaka.

8. 9 Agosti 2023Tazama video fupi: Wakati nyumba hii ya gorofa ilipoanguka mtoni wakati wa mafuriko

   Nyumba moja imeanguka kwenye mto Mendenhall katika mji mkuu wa Alaska, Juneau baada ya rekodi ya mafuriko ya barafu katika jiji hilo.

   Upungufu huo uliwafanya maafisa wa jiji kutoa maagizo ya kuhama kwa wakaazi katika mtaa mmoja.

   Mafuriko ya barafu hutokea wakati maji yaliyonaswa yanapitia barafu nyembam

9. 9 Agosti 2023Habari za hivi punde, Wahamiaji 41 wafariki katika ajali ya meli karibu na Italia

   Wahamiaji 41 wamefariki katika ajali ya meli karibu na kisiwa cha Lampedusa nchini Italia, walionusurika waliambia vyombo vya habari vya ndani.

   Kundi la watu wanne walionusurika kwenye maafa hayo waliwaambia waokoaji kuwa walikuwa kwenye boti iliyokuwa ikitoka Sfax nchini Tunisia na kuzama ikielekea Italia.

   Wanne walionusurika, asili yao kutoka Ivory Coast na Guinea, walifika Lampedusa siku ya Jumatano.

   Zaidi ya watu 1,800 wamepoteza maisha kufikia sasa mwaka huu katika kuvuka kutoka Afrika Kaskazini kuelekea Ulaya.

   Mamlaka ya Tunisia inasema Sfax, mji wa bandari ulio umbali wa maili 80 (km 130) kutoka Lampedusa, ni lango maarufu kwa wahamiaji wanaotafuta usalama na maisha bora barani Ulaya.

   Katika siku za hivi karibuni, boti za doria za Italia na vikundi vya kutoa misaada vimeokoa watu wengine 2,000 ambao wamefika Lampedusa.

10. 9 Agosti 2023Mapinduzi Niger: Marekani yatoa wito wa kuachiliwa mara moja kwa rais wa Niger aliyepinduliwa

    Waziri wa mashauri ya kigeni wa Marekani Anthony Blinkenamesema alizungumza na Rais wa Niger Bazoum ambaye kwa sasa nanashikiliwa na kumueleza ‘’juhudi zetu zinazoendelea za kupata suluhu la amani kwa mgogoro wa sasa wa kikatiba.

    Katika ujumbe wake wa Twitter Bw Blinken aliandikakuwa ‘’Marekani inasisitiza wito wetu wa kuachiliwa mara moja kwake na familia yake’’.

    Awali Waziri huyo wa mambo ya nje wa Marekani alisema kuwa hafikirii Urusi au Wagner ndiyo zilizochochea mapinduzi ya Niger.

    Hata hivyo Marekani ilikuwa na wasiwasi kuhusu kundi hilo "labda kujidhihirisha" katika sehemu za ukanda wa Sahel, alikiambia kipindi cha BBC Focus on Africa.

    Ecowas, jumuiya ya kiuchumi ya mataifa 15 ya Afrika Magharibi ilitoa makataa ya Jumapili kwa viongozi wa serikali ya Niger kujiuzulu na kumrejesha Rais Bazoum.

    Tarehe hii ya mwisho ilipuuzwa na Ecowas inatazamiwa kufanya mkutano siku ya Alhamisi ili kuamua nini cha kufanya baadaye.

    Siku ya Jumatatu, Naibu Waziri wa Mambo ya Nje wa Marekani, Victoria Nuland, alifanya kile alichokitaja kuwa "mazungumzo magumu na ya wazi" na viongozi wa mapinduzi, ambao alisema wanaelewa hatari ya kufanya kazi na mamluki.

    Bw Bazoum, ambaye kwa sasa yuko kifungoni, pia amezungumzia wasiwasi wake kuhusu ushawishi wa Wagner barani Afrika.

    Soma zaidi:

    • Mapinduzi ya Niger: Wagner inatumia fursa ya ukosefu wa utulivu - Antony Blinken
    • Mgogoro wa mapinduzi Niger: Wahusika wakuu ni akina nani?
    • Tinubu apingwa vikali kuhusu matumizi ya nguvu nchini Niger
    • Je Afrika Magharibi inaweza kutumia mbinu gani kubadilisha mapinduzi ya Niger?

11. 9 Agosti 2023Afya: Hatua 5,000 pekee kwa siku zinahitajika ili kuwa na afya njema, utafiti unaonyesha

    Utafiti uliohusisha zaidi ya watu laki mbili unaonesha kuwa kutembea hatua elfu tano kwa siku kunatosha kuimarisha afya ya binadamu.

    Tafiti za awali zilishauri mtu kutembea hatua elfu kumi kila siku ili kuepuka matatizo ya kiafya yakiwemo ya moyo lakini utafiti huu mpya umegundua kua hata waisoweza kufiksha hatua elfu tano,wanapomudu elfu nne, zinatosha kumuepusha mtu kuwa katika hatari ya kufariki dunia kutokana na magonjwa ya moyo.

    Kila hatua elfu moja zaidi ya hizo elfu nne zinapunguza hatari ya kufa mapema kwa hadi asilimia kumi na tano.

    Watafiti hao kutoa chuo kikuu cha Lodz nchini Poland na wa chuo kikuu cha matibabu cha Hopkins cha Marekani wamegundua kuwa manufaa ya kutembea kila siku yanawahusu watu wa tabaka zote bila ya kujali jinsia, umri au wanakoishi. Hata hivyo wanaonufaika zaidi ni watu walio chini ya umri wa miaka sitini.

    Kulingana na Shirika la afya duniani WHO, kutofanya mazoezi ya kutosha, ni chanzo cha nne cha vifo vingi zaidi duniani. Takriban watu milioni tatu na laki mbili hufariki dunia kila mwaka kwa kukosa mazoezi ya kutosha ya viungo.

    Wataaalam wanaonya kuwa kuketi chini kwa muda mrefu kuna athai chungu nzima ikwiemo matatizo ya mgongo hasa kwa wanafanya kazi za ofisini ambao mara nyingi hukaa kwa kujipinda kwa muda mrefu na hata kama si mara moja, baadae maishani, hukumbwa na matatizo ya uti wa mgongo na shingo.

    Kutembea kunapunguza shinikizo la damu,linaimarisha afya ya misuli na mifupa,inampa mtu nguvu zaidi kwa kuongeza viwnago vya homoni ya endorphine na inasaidia katika kudhibiti uzito wa mwili. Manufaa mengine ni inaimarisha afya ya akili na kumpa mtu fursa ya kufanya shughuli nyingine za kila siku.

12. 9 Agosti 2023Benki ya Dunia yasitisha mikopo kwa Uganda kwasababu ya sheria yake ya mapenzi ya jinsi moja

    Benki ya dunia imetangaza inasitisha mikopo mipya kwa Uganda kutokana na nchi hiyo kupitisha sheria kali dhidi ya watu wa jinsia moja walio katika mahusiano ya kimapenzi.

    Benki hiyo imesema sheria hiyo inayoharamisha LGBTQ iliyopitishwa miezi michache iliyopita inakwenda kinyume na misingi na maadili ya benki ya dunia ambayo haibagui yeyote kwa misingi ya jinsia, jinsi au rangi yake katika azma yake ya kutokomeza umasikini duniani.

    Tangu kupitishwa kwa sheria hiyo inayotoa adhabu kali kwa wana LGBTQ, nchi kadhaa ikiwemo Marekani na Umoja wa Mataifa umelaani utawala wa Uganda kwa kuridhia kupitishwa kwa sheria hiyo.

    Sheria ambayo Rais Yoweri Museveni alitia saini Mei 29 ina kifungu cha hukumu ya kifo kwa "mapenzi ya jinsi moja yaliyokithiri."

    Taarifa kwa vyombo vya habari iliyotolewa na Benki ya Dunia mwaka 2020 inabainisha kuwa "imetoa zaidi ya dola bilioni 10 katika ufadhili" kwa Uganda tangu 1963.

    Kampeni ya Haki za Kibinadamu na Baraza la Usawa wa Kimataifa ni miongoni mwa mashirika zaidi ya 100 ya utetezi ambayo yameitaka Benki ya Dunia kusitisha mikopo kwa Uganda. Takriban wanachama kumi na wawili wa Congress wiki iliyopita walisisitiza matakwa haya katika barua waliyotuma kwa Rais wa Benki ya Dunia Ajay Banga.

    Wizara ya Mambo ya Nje mwezi Juni ilitangaza kuwa Marekani ilikuwaimeweka vikwazo vya hati za kusafiria (viza), dhidi ya maafisa wa Uganda.

    Uganda imekuwa na msimamo mkali na wa wazi dhidi ya mapenzi ya jinsi moja, ikiyataja mapenzi ya jinsi moja kama kinyume na maadili ya utamaduni wa Uganda.

    Unaweza pia kusoma:

    • Je, sheria ya udhibiti wa mapenzi ya jinsia moja Uganda imepokewaje?
    • Utafungwa maisha gerezani kwa kusema unashiriki mapenzi ya jinsia moja Uganda
    • Rais Museveni apitisha sheria dhidi ya wapenzi wa jinsia moja Uganda

13. 9 Agosti 2023Kesi ya Felician Kabuga: 'Rwanda inaheshimu uamuzi wa mahakama',

    Serikali ya Rwanda kupitia msemaji wake, Yolande Makolo, imetangaza kwamba uamuzi wa Mahakama ya Rufaa ya mahakama ya kimataifa kusitisha kesi ya Kabuga Félicien, ni wa kusikitisha kwa waathiriwa wa mauaji ya kimbari dhidi ya Watutsi, lakini kwamba Rwanda inaheshimu uamuzi huo.

    Wakati huo huo mwendeshamashtaka wa mahakama hiyo Serge Brammertz naye amesema kwamba uamuzi wa mahakama ya rufaa lazima uheshimiwe, hata ikiwa matokeo hayaridhishi.

    Msemaji wa serikali ya Rwanda,Yolande Makolo ameviambia vyombo vya habari mjini Kigali kwamba Rwanda inaheshimu uamuzi uliotolewa na Mahakama ya Rufaa wa kusimamisha kwa muda usiojulikana kesi ya mshukiwa mkuu wa mauaji ya kimbari Felicien Kabuga akisisitiza kwamba, sio jambo la kufurahisha kwa manusura wa mauaji hayo na kusema kwamba ‘’kwa vyovyote vile Kabuga bado ni mshukiwa wa uhalifu mkubwa."

    Awali jumuiya ya manusura wa mauaji ya kimbari IBUKA ilitangaza kusikitishwa na uamuzi huo wa mahakama ya rufaa kuamuru Kabuga aachiliwe huru.

    Jumuiya hiyo imelaani ilichokitaja kuwa ‘’aibu kwa sheria ‘’ya kimataifa na kutowatendea haki manusura wa mauaji ya kimbari na kuiomba serikali ya Rwanda kusitisha ushirikiano na mahakama hiyo.

    Mwezi Juni, majaji katika mahakama ya uhalifu wa kivita ya Umoja wa Mataifa waliamua kuwa Bw Kabuga hafai kufikishwa mahakamani kutokana na ugonjwa wa akili lakini walipendekeza taratibu mbadala zifanyike. Kwa sasa majaji wa rufaa wamekataa pendekezo hilo.

    Kwa upande mwingine ,mwendeshamashtaka wa mahakama hiyo ya kimataifa Bwana Serge Brammertz kupitia ukurasa wake wa Twitter amesema matokeo hayo yanatokana kwanza kabisa na Kabuga kukwepa mkono wa sheria kwa miaka mingi.

    Alisema Kabuga akiwa na ufahamu kamili wa hatua zake kabla na wakati wa Mauaji ya Kimbari ya 1994, alikataa kushitakiwa mbele ya mahakama ya kimataifa iliyo huru na isiyopendelea upande kujibu mashtaka dhidi yake.

    Ameongeza kwamba baada ya kupitia kwa makini uamuzi wa chumba cha rufaa ,’’ni lazima uamuzi huo uheshimiwe, hata ikiwa matokeo hayaridhishi’’.

    ‘’Uamuzi huu unaweza kuwa wa kukatisha tamaa, lakini ninaweza kuwahakikishia waathiriwa kwamba sio mwisho wa mchakato wa haki’’. Brammertz alisema.

    Unaweza pia kusoma:

    • Mauaji ya Rwanda: Jinsi Felicien Kabuga alivyojificha kwa miaka 26
    • Félicien Kabuga: 'Huo wote ni uongo, sikumuua Mtutsi yeyote'
    • Félicien Kabuga: Mshukiwa mkuu wa mauaji ya kimbari Rwanda akamatwa

14. 9 Agosti 2023Vita vya Ukraine: Drone yaanguka kwenye nyumba ya watawa ya mpakani katika mkoa wa Kursk wa Urusi - Gavana

    Gavana wa eneo la Kursk nchini Urusi, Roman Starovoit, alitangaza kwamba ndege isiyo na rubani ya kamikaze ilianguka Jumanne katika makazi ya watawa(Monastri) ya Gornalsky St. Nicholas karibu na mpaka na Ukraine, na kusababisha majeraha madogo kwa mtoto.

    "Ndege isiyo na rubani ya kamikaze iliyozinduliwa kutoka Ukraine ilianguka kwenye eneo la makazi ya Gornalsky St. Nicholas katika wilaya ya Sudzhansky.

    Mtoto mmoja alipata majeraha madogo kwenye mkono. Usaidizi ulitolewa kwake papo hapo," Starovoit aliandika.

    Makazi ya watawa ya Mtakatifu Nicholas Belogorsky yako mita mia chache kutoka mpaka na Ukraine na Urusi.

    Urusi na Ukraine: Mengi zaidi

    • YA MSINGI:Mzozo wa Ukraine: Kwanini Urusi inaivamia Ukraine na Putin anataka nini?
    • UFAFANUZI:Mzozo wa Ukraine: Swift ni nini na kwa nini kuipiga marufuku Urusi ni muhimu sana?
    • UCHAMBUZI:Mzozo wa Ukraine: Putin humsikiliza nani?
    • KWENYE RAMANI:Uvamizi wa Ukraine: Shambulio la Urusi kwenye ramani
    • ZELENSKY:Volodymyr Zelensky: Mfahamu rais wa Ukraine aliyeacha umaarufu wake wa TV na kuingia kwenye siasa
    • PUTIN:Vladimir Putin: Rais wa Urusi aliyeagiza shambulio Ukraine

15. 9 Agosti 2023Mwanamke wa Texas aliyejeruhiwa vibaya baada ya kushambuliwa na mwewe na nyoka

    Mwanamke wa Texas nchini Marekani alishambuliwa na mwewe na nyoka kwa wakati mmoja baada ya ndege huyo - ambaye hula nyoka - kumdondoshea kwa bahati mbaya yule nyoka anayetambaa.

    Peggy Jones, 64, alikuwa akikata nyasi mwezi uliopita wakati mwewe aliyekuwa akipita alipomwangushia nyoka juu yake kabla ya kuruka chini kujaribu kwa hasira kurudisha mlo wake.

    Nyoka huyo alijizungusha kwenye mkono wake na kuanza kumpiga usoni huku ndege huyo amdonoa kwa makucha nyama yake.

    Adhabu hiyo ya kutisha ilimfanya apate majeraha na michubuko kwenye mkono na uso.

    Tukio hilo la ajabu lilitokea tarehe 25 Julai katika mji wa Silsbee, Texas, karibu na mpaka wa Louisiana.

    Ilianza baada ya nyoka kuanguka ghafla kutoka angani na kutua juu yake. Kabla hajaiondoa, shambulio la mwewe lilianza.

    "Nilipokuwa nikijaribu kuutupa mkono wangu kwa kiwiko na kumtoa nyoka huyo, nyoka alijifunga kwenye mkono wangu," aliambia CBS News, kituo washirika wa BBC nchini Marekani.

    "Nyoka alikuwa akipiga usoni mwangu, akapiga miwani yangu mara kadhaa ... nilikuwa kurusha mkono wangu , alikuwa akiupiga na kunigonga, na aliendelea kuning'inia."

    Hatimaye nyoka huyo alitolewa mkononi mwake, na kumwacha mume wake akishituka na kumkimbiza hospitalini.

16. 9 Agosti 2023Mapinduzi ya Niger: Rais wa Nigeria ajibu shutuma kuhusu uingiliaji kati wa kijeshi

    Rais wa Nigeria Bola Tinubu amejibu ukosoaji na kusisitiza kuwa uamuzi wa kuchunguza uwezekano wa kuingilia kijeshi ni hatua ya mwisho iliyotolewa kwa viongozi wa mapinduzi ya kijeshi ya Niger ni jumuiya ya kikanda, uamuzi wa ECOWAS na sio mamlaka ya Nigeria.

    Haya yanajiri wakati kiongozi huyo wa Nigeria ambaye ni mwenyekiti wa Jumuiya ya kiuchumi ya nchi za Magharibi mwa Afrika ECOWAS akishutumiwa kwa madai ya kuingilia kijeshi nchini Niger.

    Katika taarifa, msemaji wa serikali ya Nigeria alisisitiza, "Bwana rais ameona ni muhimu kusema bila shaka kwamba mamlaka na makataa yaliyotolewa na ECOWAS ni msimamo wa ECOWAS".

    Taarifa hiyo pia inasema vikwazo vya kifedha vilivyowekewa Niger pia ni vya ECOWAS na sio serikali ya Nigeria.

    ECOWAS imesema inapendelea azimio la kidiplomasia na kisiasa lenye lengo la kumrejesha madarakani rais aliyechaguliwa nchini Niger Mohamed Bazoum ambaye aliondolewa madarakani kwa mapinduzi lakini ikasema uingiliaji kati wa kijeshi utakuwa chaguo la mwisho, iwapo serikali ya kijeshi itaendelea kukaidi.

    Kufuatia kumalizika kwa muda wa mwisho wa ECOWAS, mkutano wa wakuu wa nchi za kikanda utafanyika, Alhamisi Abuja, mji mkuu wa Nigeria ambapo mazungumzo kuhusu hatua inayofuata nchini Niger yatafanyika.

    Unaweza pia kusoma:

    • Mgogoro wa mapinduzi Niger: Wahusika wakuu ni akina nani?
    • Tinubu apingwa vikali kuhusu matumizi ya nguvu nchini Niger
    • Je Afrika Magharibi inaweza kutumia mbinu gani kubadilisha mapinduzi ya Niger?

17. 9 Agosti 2023Hujambo na karibu kwa matangazo yetu ya mubashara ya leo ikiwa ni tarehe 09.08.2023