Ukraine yakabaliana na hasara kubwa huku ikiadhimisha Siku ya Uhuru wake

Wachache wanajua gharama ya changamoto ya ushawishi wa Urusi kuliko Viktor Yushchenko.

Rais huyo wa zamani wa Ukraine aliwekewa sumu ya kemikali alipokuwa akifanya kampeni mwaka 2004 dhidi ya mgombea aliyependekezwa na Moscow.

Kisha aliongoza maandamano dhidi ya uchaguzi ulioibiwa kabla ya kuchukua madaraka mwaka uliofuata.

Akiwa ameketi katika nyumba yake iliyojengwa kwa mbao nje kidogo ya mji wa Kyiv, Bw Yushchenko anasifu ‘’nguvu ya utaifa’’ kama msingi wa uhuru wa Ukraine.

‘’Leo naweza kusema kwa kujiamini kwamba Waukraine milioni 42 wanazungumza kwa sauti moja. Na hiyo inaruhusu sisi kukabiliana na adui yeyote, ikiwa ni pamoja na Urusi.’’

Bado unaweza kuona kovu kwenye uso wa rais huyo wa zamani tangu alipolishwa sumu.

Siku ya Uhuru wa Ukraine inaangukia miezi sita tangu Vladimir Putin alipoanzisha uvamizi kutoka kaskazini, mashariki na kusini.

Wakati huo, karibu wanajeshi 9,000 wa jeshi la Ukraine wameuawa na vifo vya raia 5,500 vimethibitishwa na UN.

Ingawa ni wachache hapa waliotabiri vita, Bw Yushchenko analaumu kwa kiasi kikubwa kile anachokiona kama kutokuwa na uwezo wa kihistoria wa nchi za Magharibi kupambana na uvamizi wa Urusi: haswa mzozo wa 2008 huko Georgia na kunyakua Crimea miaka sita baadaye.

Hata hivyo, anadhani majaribio ya sasa dhidi ya Ukraine kumebadilisha msimamo wake duniani.

‘’Leo, wakati zaidi ya nchi 50 zimeonyesha mshikamano na mawazo ya mapambano yetu. Zinatoa kila aina ya msaada - kijeshi, kifedha na kibinadamu.’’

Useremala sasa unachukua wakati mwingi wa kiongozi huyo wa zamani.

Tumezungukwa na sanamu nyingi, na rais wa zamani ananiambia juu ya imani yake kamili kwamba Ukraine inaweza kupata ushindi katika vita hivi.

Kadiri Urusi inavyojaribu kuivuta Ukraine kwenye mzunguko wake, ndivyo hisia za watu wake za utambulisho wa kitaifa zinavyozidi kuwa na nguvu.

Katika kiwanda kidogo kwenye ukingo wa kushoto wa mto wa Kyiv wa Dnieper, biashara ya Nataliia ilikuwa ikitengeneza sare za hoteli, lakini sasa inazalisha bendera za Ukraine.

Alianza kupata maombi kutoka kwa vituo vya ukaguzi vya kijeshi mapema katika uvamizi huo, sasa anapokea zaidi ya oda 2,500 kwa mwezi - sio tu kutoka kwa jeshi, lakini biashara pia.

‘’Hizi ni rangi tunazopenda sana,’’ ananiambia juu ya sauti ya cherehani.

‘’Kila raia wa Ukraine anahisi rangi hizi na tunaziona katika kila kitu – kwenye anga, katika ngano. Hii inatupa furaha, furaha na hisia nzuri, kwa sababu kazi yetu ni muhimu.’’

Miezi sita ya vita, Ukraine inaonyeshwa kwa hali halisi zisizofurahisha.

Baada ya wiki kadhaa za kulizungumzia, mpango wa kukabiliana na mashambulizi ya Ukraine uliopangwa kusini, kwenye mji unaokaliwa wa Kherson, bado haujatimia.

Kufikia sasa silaha za Magharibi zinaisaidia Ukraine kushikilia njia na kutatiza njia za usambazaji zinazotumiwa na Urusi, lakini itachukua kitu cha kutetemeka kwa kasi hiyo kubadilika na kwa Kyiv kulazimisha Urusi kuondoka kabisa.

Kwa hivyo, hali hii ya kijeshi inaonekana kuendelea, kwa gharama inayokua, isiyoweza kufikirika kwa makumi ya maelfu ya familia.

Pia - wakati anatazamwa sana kama shujaa wa vita wa nchi hiyo, Rais Volodymyr Zelensky sasa anakabiliwa na ukosoaji wa jinsi alivyojiandaa kwa shambulio la Urusi.

Hasa juu ya uamuzi wake wa kutoshughulikia maonyo kutoka kwa Marekani, akisema itasababisha hofu na kuharibu uchumi wa Ukraine.

Ishara nyingine ya ukaidi wa Ukraine iko kwenye chumba cha habari cha Kyiv Independent.

Tovuti hii ya habari ya lugha ya Kiingereza ilianzishwa wiki kadhaa kabla ya uvamizi huo.

Ndani ya siku ufuasi wao mtandaoni ulitoka makumi ya maelfu hadi mamilioni.

‘’Ni Siku ya Uhuru ambayo hatukujua ingetokea,’’ anasema mhariri mkuu Olga Rudenko.

Anaelezea uchapishaji kama sauti ya Ukraine, na dirisha la ulimwengu ndani yake.

‘’Hapo nyuma mnamo Februari, wakati mambo hayakuwa ya uhakika, hatukujua kama sehemu kubwa ya nchi ingevamiwa au ikiwa tungeuawa,’’ anasema.

‘’Kuwa hapa bado na kuweza kusherehekea, kuna maana sana.’’

Mkataba wa hivi majuzi, ambao umeiruhusu Ukraine kwa mara nyingine tena kusafirisha nafaka kupitia Bahari Nyeusi, unasalia kuwa mafanikio pekee ya kidiplomasia katika vita hivi.

Wengine wanauona kuwa msingi wa mkataba wa amani, hatimaye.

Hiyo ni mbali sana, na Ukraine tayari imepoteza udhibiti wa sehemu ya tano ya eneo lake.

Ili kudumisha uhuru wake, nchi hii itategemea ulimwengu wa nje kwa usaidizi kwa muda.