Guddoomiyaha cusub ee Hiiraan oo ka hadlay qorshihiisa dagaalka al-Shabaab
Ku soo dhowaada tebinta tooska ah ee BBC
Tebin toos ah
Al-shabaab oo dad ku gowracay deegaan ka tirsan Kenya
Xigashada Sawirka, Getty Images
Booliiska Kenya ayaa sheegay in shan qof lagu dilay weerar ka dhacay gobolka magaalo-xeebeedka Lamu oo ku dhow xadka Soomaaliya, kana tirsan gobolka Xeebta.
Waxay sheegeen in afar ka mid ah dadka la laayay la xiray kadibna qoorta laga jaray.
Kooxda al-Shabaab ayaa sheegatay weerarkan oo shalay dhacay. Waxay kooxdu sidoo kale dab qabadsiiyeen guryo ay ku noolaayeen dad aan heysan diinta Islaamka.
Waxay sheegatay in tani ay jawaab u tahay go'aankii Kenya ay sannadkii 2011-kii ku sheegtay inay ciidamadeeda u dirtay Soomaaliya si ay ula dagaallamaan kooxdaas.
Dagaal culus oo weli ka socda Suudaan iyo RSF oo la wareegtay xarun ciidan
Xigashada Sawirka, REUTERS/ABDULLAH ABDEL MONEIM
Dagaal culus ayaa ka socda koonfurta caasimadda Suudaan ee Khartoum kaas oo u dhexeeya ciidamada iyo xoogaga taageerada degdega ah.
RSF waxa ay sheegtay in ay la wareegtay xaruntii ay ku shaqeynayeen cutubyo ka tirsan booliska oo loo yaqaano Central Reserve Force.
Waxa ay baraha bulshada soo dhigtay muuqaal muujinaya ciidamadeeda oo dabaaldegaya.
Kadib toban todobaad oo dagaal ah xaalada bini'aadantinimo ayaa kasii daraysa magaalada.
Waxaa sii kordhaya walaaca caalamiga ah ee laga qabo weerarrada salka ku haya qowmiyadaha ee ka dhacay gobolka Darfur ee galbeedka Suudaan.
Maleeshiyada Carabta ee la shaqeysa RSF waxay beegsadeen qoysas aan Carab ahayn.
In ka badan boqol iyo konton kun oo qof ayaa ka qaxay Daarfuur oo aaday dalka jaarka ah ee Chad.
Gudoomiyaha cusub ee Gobolka Hiiraan oo ka hadlay qorshihiisa sii wadista ee dagaalka Al-shabaab
Xigashada Sawirka, Facebook
Guddoomiyaha cusub Gobolka Hiiraan Cabdulahi Axmed Maalin ( Sufurrow) ayaa ka hadlay xirnaashaha garoonka diyaaradaha Baladweyne.
Gudoomiyaha ayaa ku baaay in sida ugu dhaqsiyaha badan dib loogu howl geliyo adeegyadii garoonka diyaaradaha ee magaalada.
Gudoomiyaha cusub ee dhowaan loosoo magacaabay gobolka Hiiraan ayaa sidoo kal ka hadlay waxa uga qorsheysan dagaalka Al-shabaab looga saarayo qaybo kamida dalka isagoo yiri “Doorka maamulkan uu leeyhay in uu ka qaato waa siduu usii wadi lahaa la dagaalanka Al-shabaab, waxaa la’isla qaatay aniga ka gudoomiye ahaan in aan buuxiyo doorkii hoggaamineed ee heer gobol eek u aadan sida Al-shabaab inta wadanka ku hartay looga saari lahaa”
Gudoomiyaha oo hadalkiisa sii wata ayaa yiri “Aniga ka gudoomiye ahaan waxaan si khaas ah rabaa in aan dul istaago waqtigeygana aan geliyo dhulka hadda xorta ah, waxa kasoo harayna in feker iyo farsamo aan isugu geeyo sida inta ay ku hareen Al-shabaab ee Hiiraan aan uga saarilahayn”
Mareykanka "bilo kahor Putin waxa uu qorsheynayay in uu la wareego Kyiv maanta waxa uu difaacanayaa Moscow"
Xoghayaha arrimaha dibadda ee Maraykanka Antony Blinken ayaa xaaladda Ruushka uga waramay laanta wararka Mareykanka ee BBC, CBS.
Waa fal-celintii ugu horreysay ee sarkaal sare oo Mareykan ah uu ka bixiyo fallaagada calooshood u shaqeystayaasha ah ee Wagner.
"Waxaan aragnay dildilaacyo badan oo ka soo baxaya wejiga Ruushka. Aad ayey ugu dhakhsa badan tahay in si sax ah loo sheego halka ay aadaan ... laakiin hubaal, waxaan haynaa dhammaan noocyada su'aalaha cusub ee Putin uu doonayo inuu wax ka qabto toddobaadyada iyo bilaha soo socda. "
Mar la weydiiyay hoggaamiyaha Belarus oo sida muuqata dhexdhexaadiyay [heshiiska] ayuu yiri "Waxaa laga yaabaa in Putin uusan dooneynin inuu naftiisa hoos u dhigo heerka wada xaajoodka tooska ah ee Prigozhin. Markaa waxay ahayd mid faa'iido leh in la helo qof la mid ah Lukashenko [hoggaamiyaha Belarus] isaga oo wakiil ka ah. Laakiin mar kale, taasi waa mala-awaal. Waxaan doonaynaa inaan taas ka fogaanno."
Antony Blinken Waxa uu u sheegay ABC todobaadkan go’aanka Putin ee ah in uu ku duulo Ukraine uu qalalaase ka abuuray dalkiisa.
"Haddii aad arrintan eegno 16 bilood ka hor, Putin wuxuu ku sugnaa albaabka Kyiv ee Ukraine, isagoo raadinaya inuu magaalada ku qabsado maalmo gudahood, kana tirtiro waddanka khariidadda.
"Hadda, waa inuu Moscow, caasimadda Ruushka ka difaaco calooshood u shaqeystayaal uu isagu sameeyay," ayuu yiri Blinken.
Hadallada Blinken ayaa laga yaabaa inay yihiin hadalladii ugu xoogganaa ee ku saabsan xaaladda Ruushka ilaa hadda ee aan ka aragnay sarkaal sare oo reer galbeed ah.
Muxuu yahay qorshaha xiga ee Putin?
Xigashada Sawirka, Reuters
Vladimir Putin ayaa si weyn u neceb khiyaanada, waxa uu ka soo muuqday khudbadiisii qallafsaneed ee TV-ga qaranka subaxnimadii Sabtida, halkaas oo uu ku eedeeyay hogaamiyaha Wagner Yevgeny Prigozhin "in uu dhabarka ka toogtay" iyo in uu sameeyay khiyaano qaran.
Madaxweynaha Ruushka ayaan lagu arag meel fagaare ah tan iyo xilligaas, mana jirin khudbad cusub oo madaxweyne oo la qorsheeyay muddooyinka dhow.
Wareysi horay loo sii duubay oo laga sii daayay TV-ga dowladda Axadii kaasoo u muuqday in la sameeyay ka hor fallaagada Putin wuxuu sheegay inuu ku kalsoon yahay horumarka laga gaaray dagaalka Ukraine.
Tallaabooyinka amniga iyo ka hortagga argagixisada ayaa weli ka socda Moscow, laakiin ma cadda in madaxweyne Putin uu xitaa ku sugan yahay caasimadda Ruushka iyo in kale.
Qaar waxay filayaan in Putin uu si uun u aflagaadeyn doono, ama militari ahaan Ukraine, ama kuwa gudaha Ruushka ee aan taageersanayn.
Xildhibaanka Polish Radek Sikorski ayaa BBC u sheegay in hogaamiyaha Ruushku "ay u badan tahay in uu Ruushka ka sifayn doono kuwa uu u arkay in ay leexleexanayaan", taas oo la macno ah in maamulkiisu uu noqon doono "kaligii taliye iyo mid arxan daran".
Daawo: Sacab sawaxan iyo rasaas is qabsatay markii kooxda Wagner ay ka baxayeen magaalooyin ka tirsan Ruushka
Qoraalka Muuqaalka, Sacab iyo sawaxan is qabsaday markii Wagner ay ka baxayeen magaalooyin ka tirsan Ruushka War deg deg ah, Mareykanka "dul duleello ayaa ka muuqda awooddii Putin"
Xigashada Sawirka, Reuters
Xoghayaha arrimaha dibadda ee Maraykanka Antony Blinken ayaa ka hadlay xaaladda dalka Ruushka.
Blinken ayaa sheegay in kacdoonka mudada gaaban ee ka imaanaya calooshood u shaqeystayaasha Wagner ay muujineyso "jab dhab ah" oo ka jira maamulka Putin, sida ay sheegtay wakaalada wararka ee AFP.
Kacdoonkii kooxda calooshood u shaqeystayaasha gaarka loo leeyahay ee Wagner iyo hogaamiyahooda Yevgeny Prigozhin dhamaadkii toddobaadka wuxuu ahaa "caqabad toos ah oo ku wajahan awoodda Putin," ayuu yiri xoghayaha arrimaha dibadda ee Mareykanka Antony Blinken.
"Marka tani waxay dhalinaysaa su'aalo qoto dheer, waxay muujinaysaa dildilaacyo dhab ah," Blinken ayaa u sheegay CBS News talk show Face the Nation.
Kremlin-ka ayaa horay u sheegtay in aan wax dacwad ah lagu soo oogi doonin ciidamada Wagner ee shalay gadooday, in kasta oo ay horay ugu eedeysay gabood fallo hubeysan.
"Ragannimadii" uu muujin jiray Putin miyaa daciiftay?
Xigashada Sawirka, Getty Images
Dhacdooyinkii shalay ee Ruushka ayaa muujinaya daciifnimo "dhab ah oo ku timid maamulka Putin,” waxaa sidaa yiri tifaftiraha wararka arrimaha dibadda ee BBC.
Mar uu la hadlayay BBC Radio 5 Live, ayuu John Simpson sheegay in muddo 20 sano ah uu Putin mar walba isku heysan jiray madax sare.
“Waad xusuusaataan sawirradiisa isagoo qeybta sare ka qaawan oo faras kaxeynaya,” ayuu yiri Simpson.
Balse soo shaac bixii madaxa Wagner Yevgeny Prigozhin ayaa taas loollan ku keentay.
Wuxuu sheegay inay hoos u dhaceyso awoodda Putin.
"Waa billowgii dhammaadka Putin"
Qoraalka sawirka, Kasyanov 2014 Mikhail Kasyanov wuxuu ahaa raysal wasaarihii Ruushka ee maamulkii Putin laga soo bilaabo sanadihii 2000-04. Balse kaddib xilka ayaa laga qaaday, wuxuu ka mid noqday dadka dhaliila madaxweynaha kuwooda ugu cadcad.
Mar ay BBC weydiisay inuu u maleynayo in Prigozhin uu iska tagi doono, wuuxu yiri: "Waxaan u maleynayaa in ugu horreyn uu tagi doono Belarus, balse waxaan u maleynayaa inuu Belarus ka aadi doono Afrika uuna meelo keymo ah iyo wax la mid ah ku sugnaan doono.
"Mr Putin tan uma cafin doono."
Prigozhin, wuxuu sheegay, inuu burburiyay degganaanta Putin - noloshiisana ay geli doonto "su'aal weyn" taas awgeed.
Marka la eego Putin, wuxuu Kasyanov, sheegay in "tani ay tahay billowga dhammaadka.. hadda dhibaato aad u weyn ayuu ku jiraa."
Cali Jeyte: Muxuu salka ku hayaa khilaafka kala dhaxeeya Hirshabeelle?
Intan ka ogow labada taajir ee feerka ku ballamay?
Halkee ayuu ku sugan yahay hoggaamiyaha Wagner?
Xigashada Sawirka, Reuters
Waxaa jira su'aalo badan oo aan laga jawaabin oo ku saabsan heshiiskii hogaamiyaha Wagner Yevgeny Prigozhin uu ku soo afjaray caradii uu u qabay ciidamada Ruushka, iyo waxa xiga.
Mid ka mid ah waxyaabaha aynaan garanayn ayaa ah halka uu hadda Prigozhin ku sugan tahay.
Markii ugu dambeysay waxaa la arkay isaga oo saaran gaari ka soo baxay magaalada Rostov goor dambe oo sabti ah.
Rostov-on-Don waa magaalo ku taal koonfurta Ruushka.
Meesha xigta ee uu u socdo ayaa hadda loo-maleynayaa in ay tahay Belarus, ka dib heshiis la sheegay in uu dhexdhexaadinayey hogaamiyaha dalkaas Alexander Lukashenko, oo ah saaxiibka muhiimka ah ee madaxweyne Vladimir Putin.
Aag ka caagan duulimaadka ayaa hadda ka dhaqan galay koonfur-galbeed ee Ruushka.
Prigozhin sida loo maleynayo wuxuu ku safri karaa baabuur ama tareen - laakiin waa waddo dheer ilaa Belarus, maadaama ay tahay inuu sii maro Ukraine.
Dalka Giriiga oo ay doorasho ka socoto
Xigashada Sawirka, NICOLAS KOUTSOKOSTAS/NURPHOTO VIA GETTY IMAGES
Shacabka Giriiga ayaa codeynaya markii labaad muddo bil gudaheed ah iyadoo ra'iisul wasaarihii hore Kyriakos Mitsotakis uu rajeynayo inuu helo aqlabiyad weyn.
Waxa uu bishii May si dirqi ah uga adkaaday ninkii la tartamayey ee hogaamiyo xisbiga bidixda dhexe balse waxa uu ku baaqay doorashooyin cusub si uu kaligii u maamulo Giriigga .
Codbixinta dhaceysa maanta oo Axadda ah ayaa ku soo beegantay wax ka yar toddobaad ka dib markii doon ay saarnaayeen muhaajiriin ay ku degtay xeebaha Giriigga, taas oo loo maleynayo in 500 oo qof ay ku dhinteen. Laakin masiibadaasi ayaa saameyn yar ku yeelatay ololaha doorashada.
Ninka muxaafidka ah mudane Mitsotakis ayaa doorashadii bishii hore wax kayar 20 dhibcood kaga guuleystay xisbiga bidixda dhexe ee Syriza ee uu hogaamiyo Alexis Tsipras, oo ahaa ra'iisul wasaarihii hore, wuxuuna ku kalsoon yahay inuu mar kale ku guuleysan doono.
Codbixintu waxay socon doontaa ilaa 19:00 (16:00 GMT).
DAAWO: "Ha guursan adiga oo aan fahansanayn guurka"
Qoraalka Muuqaalka, "Ha guursan adiga oo aan fahansanayn guurka" Fartun Maxamed Cismaan, waa hooyo Soomaaliyeed oo u ololeysa arrimaha qoyska, waxay la latlisaa dhallinyarada guur doonka ah iyo sidoo kale xallinta khilaafaadka soo kala dhexgala lammaanaha.
Fartun oo Barnaamijyadeeda badanaa ku gudbiso habka internet-ka ayaa sheegtay inay dad badan ka faa'iideen intii ay wadday.
Waxaan ku booqanay gurigeeda iyada oo nooga warrantay waxa ku dhaliyay inay u istaagto ka hortagga burburka qoys iyo latalinta dhallinyarada guur doonka ah.
'Ukraine waxay ku faraxsan tahay in cadowgeedu jahwareer ku jiro'
Xigashada Sawirka, EPA-EFE/REX/Shutterstock
Sida uu sheegay danjirihii hore ee Mareykanka u fadhiyay Ukraine, Bill Taylor,ciidamada Ukraine ayaa ku sugan meel wanaagsan oo ay kaga faa’ideysan karaan daciifnimada ciidamada Ruushka oo ay sababtay isku daygii fallaagada uu madaxa kayahay Prigozhin.
Taylor waxa uu sheegay in Ukraine ay mar hore isu diyaarinaysay inay ciidamadeeda qaadaan weerarkeeda rogaal-celiska ka hor inta uusan dhicin kacdoonka, ayna “ku faraxsan yihiin in cadowgoodu uu khalkhal ku jiro”.
Ciidamada Ukraine waxay og yihiin inay hadda u baahan yihiin inay bilabaan weerarkooda maadaama Putin uu dib u soo noolayn karo ciidamadiisa, ayuu Taylor hadalkiisa ku daray.
Maxaa ka dhacay Ruushka?
Xigashada Sawirka, Reuters
Hadii aad hadda nagu soo biirtay, waa kuwan wararkii ugu dambeeyay ee xaalada Ruushka.
- Madaxweynaha Ruushka Vladimir Putin ayaa ka badbaaday halis degdeg ah oo soo wajahday awoodiisa ka dib markii hogaamiyaha kooxda calooshood u shaqeystayaasha ee Wagner uu ogolaaday inuu soo afjaro colaada ka dhanka ah ciidamada Ruushka.
- Yevgeny Prigozhin ayaa joojiyay socodkii ciidamadiisa Wagner ee Moscow habeenkii sabtida ka dib markii uu wadahadal la yeeshay hogaamiyaha Belarus Alexander Lukashenko. Waxa uu sidoo kale ogolaaday inuu ka tago Ruushka oo uu tago Belarus.
- Kremlin-ka ayaa sheegay in aysan ciqaabi doonin Prigozhin iyo dagaalyahanada Wagner.
- Heshiisku wuxuu hoos u dhigayaa qalalaasaha ammaan ee Sabtidii ka jiray Ruushka oo uu xitaa Putin ka digay dagaal sokeeye kadib khudbad heer qaran ah oo uu shalay jeediyay, wuxuuna ku ku tilmaamay ficilada Prigozhin inay yihiin "khiyaano qaran".
- Subaxnimadii Axadda, ciidamada Wagner waxay ka baxeen Rostov-on-Don, oo ah taliskii milatariga Ruushka ee koonfurta ee ay qabsadeen Sabtidii.
- Madaxweynaha Ukraine Zelensky ayaa sheegay in kacdoonku uu daaha ka qaaday fowdo ka jirta Ruushka iyo in "madaxda Ruushku aanay waxba xukumin" .
- Hogaamiyayaasha Mareykanka, UK iyo Midowga Yurub ayaa sheegay inay si dhow ula socdaan xaaladda.
- Warbaahinta Mareykanka ayaa ku warramaysa in Washington loo sii sheegay qorshaha Wagner horaantii Arbacada.
Wararkii ugu dambeeyay ee xaalada magaalada Laascanood
Maalintii labaad ayaa dagaal ka socdaa magaalada Laascaanood.
Dagaalka ayaa maanta ka duwan kii shalay iyadoo madaafiicda kala duwan laysu adeegsanayo, dhinaca waqooyigana u badan yahay.
Magaalada ayaa koranto la'aan ah iyadoo ay waxyeelo soo gaarsiiyeen madaafiicda waayirada dabka magaalada soo gaarsiiya.
Ma jiro qasaare nafeed oo weli la ogyahay.
Xayiraadaha Wadooyinka oo weli kajira qaar kamid magaalooyinka Ruushka
Waxaan horay u tebinay in laga qaaday xayiraadahii saarnaa waddooyinka Rostov iyo Lipetsk iyo qaar ka mid ah gobollada ay dhibaatadu saameysey ee ku yaal jidka weyn ee Moscow oo dagaalyahannada Wagner ay ku socdaalayeen Sabtidii.
Haatan wakaalada wararka ee dawladda Ruushka ee TASS ayaa ku warameysa in xannibaadaha waddooyinka ay weli ka jiraan meelo ka fog waqooyiga gobollada Moscow iyo gobolka Tula.
Tula waxa ay dhanka midig ka xigtaa Kaluga, oo ku calamaysan khariidada hoose.
Hogaamiyaha Chechnya oo sheegay waxa uu ka xanaaqay hogaamiyaha Wagner
Xigashada Sawirka, EPA
Nin ay muddo dheer xulufo yihiin madaxweyne Putin ayaa si kulul u weeraray "kibirka" hoggaamiyaha Wagner Yevgeny Prigozhin, isagoo sheegay inay taasi keeni karto "cawaaqib khatar ah".
Qoraal uu soo dhigay Telegram ka dib markii hogaamiyaha Wagner uu ka baxay mgaalada Rostov, hogaamiyaha Chechnya Ramzan Kadyrov ayaa sidoo kale sheegay in Prigozhin uu ka xanaaqay silsilado heshiisyo ganacsi oo aan guulaysan.
Kadyrov, hogaamiyaha jamhuuriyadda koonfureed ee Ruushka, ayaa sheegay in uu mar hore kula taliyey hogaamiyaha kooxda Wagner in uu dhinac iska dhigo arrimihiisa gaarka ah.
"Waan la hadlay Prigozhin, waxaan ku boorriyay inuu ka tago hammigiisa ganacsi oo uusan kumilin arrimaha muhiimka ah ee qaranka, waxaan u maleynayay inuu i maqlay, laakiin waxaa i soo baxday in xanaaqiisa isaga ku jira uu sii kordhayay intii mudo aheyd.
