BBC News, Somali
U gudub qaybta macluumaadka

Meta oo“qarisay xaqiiqada” ku saabsan badbaadada carruurta, sida maxkamaddu sheegtay, iyadoo ay bilaabatay dacwaddii baraha bulshada

Meta ayaa loo haystaa in ay qarisay xaqiiqda dhabta ah ee ku saabsan dhibaatooyinka carruurta yaryar ay kala kulmaan baraheeda bulshada.

Kooban

Tebin toos ah

  1. War deg deg ah, Ruushka iyo UK oo iyaguna hawada isku marinaya hadallo adag iyo eedo

    .

    Xigashada Sawirka, EPA

    Ruushka ayaa ka digay “cawaaqibka” ka dhalan kara kadib markii la xaqiijiyay in diyaarado aan duuliye lahayn oo Britain samaysay loo adeegsaday weerarro ay Ukraine dhawaan ka fulisay gudaha Ruushka.

    Safaaradda Ruushka ee UK ayaa Britain ku eedaysay inay “si ula kac ah u dooratay inay sii kordhiso xiisadda ka dhalatay dagaalka Ukraine,” xilli Kyiv ay toddobaadyadii u dambeeyay kordhisay weerarrada ay ku qaadayso Moscow iyo meelo kale oo ka tirsan Ruushka

    Gaar ahaan, weerarrada ayaa lagu bartilmaameedsaday warshadaha sifaynta saliidda iyo bakhaarro ay leedahay shirkadda ugu weyn ee internetka ee Wildberries.

    Ra’iisul Wasaaraha UK Andy Burnham ayaa sheegay in London ay sii wadi doonto “100% taageerada ay siiso Ukraine.”

  2. War deg deg ah, Degdeg: Iran oo si degdeg ah ugu jawaabtay Imaaraadka

    .

    Afhayeenka Wasaaradda Arrimaha Dibadda Iran, Esmail Baghaei, ayaa beeniyay sheegashada Imaaraadka Carabta ee ah in Iran ay gantaallo ku ridday dalkooda.

    War-saxaafadeed uu soo saaray, Baghaei wuxuu sheegay in “eedeymaha” Imaaraadku ay yihiin kuwa aan sal iyo raad lahayn. Wuxuu sheegay in tallaabada Imaaraadku ay ka hor imaaneyso mabda’a deris-wanaagga, isla markaana ay carqaladeynayso dadaallada lagu xoojinayo kalsoonida iyo ka hortagga sii xumaanshaha amni-darrada gobolka.

    Saacado kaddib markii Imaaraadku sheegay in laba gantaal oo ballistic ah laga soo tuuray Iran, Abu Dhabi waxay ku dhawaaqday inay hakisay dhammaan macaamiladii ganacsi iyo maaliyadeed ee ay la lahayd Iran ilaa amar dambe. Wasaaradda Difaaca Imaaraadka ayaa sheegtay in mid ka mid ah gantaallada uu ku dhacay meel ka baxsan biyaha dhuleed ee dalka, halka kan kalena uu ku dhacay ciidda Imaaraadka..

    Iran, si kastaba ha ahaatee, waxay ku adkeysaneysaa in sheegashada Imaaraadku aysan sax ahayn. Khilaafkan cusub wuxuu kusoo beegmayaa xilli xiriirka labada dal uu mar kale aad u xumaaday, iyadoo horey loo soo sheegay weerarro iyo eedeymo la xiriira maraakiibta Imaaraadka ee marayay marin-biyoodka Hormuz

  3. War deg deg ah, Degdeg: Imaaraadka oo ku dhawaaqay inuu hakiyay xiriiradii uu lahaa Iran

    Imaaraadkaiyo Iiraan

    Xigashada Sawirka, Getty Images

    Imaaraadka Carabta ayaa sheegay inuu hakisay dhammaan xiriirradii ganacsi iyo maaliyadeed ee ay la lahaayen Iran ilaa amar dambe, kaddib markii ay sii xoogeysatay xiisadda gobolka.

    Wasaaradda Arrimaha Dibadda ee Imaaraadka ayaa sheegtay in go’aanka uu ka dhashay dagaalka sii kordhaya oo khatar ku ah nabadda iyo amniga gobolka iyo caalamkaba.

    Saacado ka hor inta aan go’aanka la shaacin, Wasaaradda Difaaca Imaaraadka ayaa sheegtay inay ogaatay laba gantaal oo ballistic ah oo Iran laga soo tuuray oo ku wajahnaa Imaaraadka.

    Sida ay wasaaraddu sheegtay, mid ka mid ah gantaallada wuxuu ku dhacay meel ka baxsan biyaha dhuleed ee Imaaraadka, halka kan kalena uu ku dhacay meel ka mid ah ciidda Imaaraadka.

    Tan iyo markii ay bilowdeen weerarrada Mareykanka iyo Israa’iil ee ka dhanka ah Iran, Imaaraadku wuxuu ka mid ahaa dalalka gobolka ee ay saameeyeen weerarrada Iran.

    Xiisadda cusub ayaa hadda mar kale sare u qaaday khatarta amni ee Imaaraadka, iyadoo labada dhinac ay hore ugu jireen xaalad dagaal iyo xiisad aad u daran.

  4. War deg deg ah, Mareykanka oo qaaday tallaabo ka dhan ah Maxkamadda ICC

    .

    Xigashada Sawirka, Reuters

    Xoghayaha Arrimaha Dibadda ee Mareykanka, Marco Rubio, ayaa ku dhawaaqay cunaqabateyn lagu soo rogay madaxweynaha iyo qareen sare oo ka tirsan Maxkamadda Caalamiga ah ee Dambiyada dagaalka ee ICC.

    Tani waa tallaabadii ugu dambeysay ee sii kordhineysa ololaha maamulka Trump uu ku doonayo inuu “burburiyo” maxkamadda, oo in ka badan 120 dal awood u siiyeen inay baaritaan ku sameyso dambiyada dagaalka.

    Rubio wuxuu sheegay in Mareykanku cunaqabateyn saaray madaxweynaha ICC, Tomoko Akane oo u dhalatay Japan, iyo qareenka sare ee dacwadaha ICC, Abdoulaye Seye oo u dhashay Senegal. Cunaqabateyntu waxay xannibeysaa hantida ay ku leeyihiin Mareykanka, sidoo kalena waxay xaddideysaa xiriirkooda nidaamka maaliyadeed ee Mareykanka.

    Dhanka kale, ICC ayaa sheegtay in tallaabooyinka ay dowladuhu ku bartilmaameedsanayaan garsoorayaasheeda, dacwad-oogayaasheeda iyo shaqaalaheeda ay wiiqayaan ku dhaqanka sharciga iyo madaxbannaanida garsoorka.

  5. Weli BBC-Somali ayaad nagala socotaan, waxaan halkaan idinkugu soo gudbinaynaa wararkii ugu dambeyay ee dunida iyo deegaannada Soomaalida.

  6. War deg deg ah, Faahfaahin ka soo baxaysa weerar lagu dilay dad Afghanistiyiin ah

    .

    Saddex muwaadin oo Afghanistiyiin ah ayaa lagu dilay, mid kalena waa lagu dhaawacay weerar ay magaalada Quetta ee caasimadda gobolka Balochistan ku qaadeen rag hubaysan oo aan la aqoonsan.

    Saraakiisha booliiska ayaa xaqiijiyay dhacdadan, waxayna sheegeen in weerarku uu dhacay maanta meel u dhow isgoyska Hazarganji.

    Khizar Hayat, oo ah sarkaalka ku-xigeenka booliiska deegaanka, ayaa BBC-da telefoonka ugu sheegay in afar muwaadin oo Afghanistiyiin ah ay maanta Quetta uga yimaadeen deegaanka Dalbandin ee degmada Chagai, kan atirsan dalka Pakistaan isla markaana xuduud la leh Afghanistan.

    Wuxuu sheegay in afartan qof ay Quetta uga sii gudbi lahaayeen deegaanka Gulistan ee Qila Abdullah, oo ah degmo kale oo ka tirsan Balochistan.

    Wuxuu sheegay in dadkaasi ay fadhiyeen duleedka magaalada Quetta, gaar ahaan isgoyska Hazar Ganji, iyagoo doonayay inay u safraan Gulistan, markaas oo laba nin oo aan la aqoonsan oo mooto watay ay u yimaadeen oo rasaas ku fureen.

    Laba ka mid ah afarta muwaadin ee Afghanistiyiinta ah ayaa goobta lagu dilay, halka labada kale loo qaaday isbitaal si loogu daweeyo. Mid ka mid ah labadaas qof ayaa markii dambe u geeriyooday dhaawacyadii soo gaaray.

    Wuxuu sheegay in baaritaannadii hordhaca ahaa ay muujinayaan in dadkaasi ay Dalbandin qof u shaqayn jireen, ayna Quetta u yimaadeen si ay uga sii gudbaan Gulistan.

  7. Ra'iisul Wasaaraha Israa'iil oo falcelin adag kala kulmay sawirkii Erdogan ee uu adeegsaday

    .

    Xigashada Sawirka, Reuters

    Ra'iisul Wasaaraha Israa'iil Benjamin Netanyahu, oo isu diyaarinaya doorashada guud ee la qabanayo 27-ka Oktoobar, ayaa ololihiisa doorashada ku isticmaalay boor ay ku jiraan sawirka iyo hadalladii Madaxweyne Recep Tayyip Erdoğan oo isaga ku saabsan.

    Xisbiga Likud ee Netanyahu ayaa Isniintii, shalay, qabanayay doorasho hordhac ah oo ay ka qaybgalayaan xubnaha xisbiga, si loo go'aamiyo liiska musharraxiinta xisbiga ee doorashada baarlamaanka Israa'iil ee Knesset.

    Sii akhri: Netanyahu oo sawirka Erdogan u isticmaalay ololihiisa doorashada

  8. War deg deg ah, War Cusub: Trump oo la shaaciyay inuu wajahayo hoos u dhac ka dhashay dagaalka Iran uu la galay

    .

    Xigashada Sawirka, AFP/Getty Images

    Ra’yi-ururin cusub oo ay sameeyeen Reuters iyo Ipsos ayaa muujinaysa in heerka taageerada madaxweynaha Mareykanka Donald Trump uu hoos ugu dhacay 33 boqolkiiba, taas oo ah heerkii ugu hooseeyay tan iyo markii uu xilka qabtay.

    Sahanku wuxuu sidoo kale muujiyay in dagaalka Iran uu ka mid yahay arrimaha sida weyn ay uga walaacsanyihiin dadka Mareykanka, iyadoo 80 boqolkiiba ay sheegeen inay ka cabsi qabaan suurtagalnimada dagaal daba dheeraada oo dhex mara Mareykanka iyo Iran.

    Si kastaba ha ahaatee, kaliya 33 boqolkiiba ayaa ansixiyay sida Trump u maamulayo xukuumaddiisa, halka 64 boqolkiiba ay sheegeen inaysan ku qanacsanayn habka uu hoggaamintiisa u wado.

    Heerka taageerada Trump ayaa hoos uga dhacay 35 boqolkiiba bishii hore, taasoo ku dhow heerkii ugu hooseeyay ee caannimadiisa xilligii madaxweynenimadiisii ugu horreysay, kaas oo la diiwaangeliyay Diseembar 2017.

    Tan iyo markii Trump amray weerar wadajir ah oo ay Mareykanka iyo Israa’iil ku qaadeen Iran, taageeradiisa dadweynaha ayaa sanadkan si weyn hoos ugu sii dhacaysay.

    Dagaalka u dhexeeya Mareykanka iyo Israa’iil oo isku dhinac ah iyo Iran ayaa sidoo kale sababay in la xiro Marinka Hormuz, oo ah marin muhiim ah oo loo adeegsado gaadiidka qiyaastii shan-meelood meel saliidda cayriin ee dunida. Tallaabadan ayaa sababtay in qiimaha saliiddu si aad ah sare ugu kaco gudaha Mareykanka.

  9. War deg deg ah, Gobollada Mareykanka qaarkood oo dalab culus dul-dhigay Instagram iyo Facebook

    .

    Xigashada Sawirka, PA Media

    Gobollada Mareykanka ee dacwadda ka gudbiyay Meta ma dalbanayaan oo keliya boqolaal bilyan oo doollar, balse waxay sidoo kale doonayaan in shirkaddu isbeddello waaweyn ku sameyso Instagram iyo Facebook.

    Waxay ku doodayaan in qaar ka mid ah adeegyada iyo farsamooyinka barahaasi loo sameeyay si gaar ah loogu hayo isticmaalayaasha, gaar ahaan carruurta iyo dhallinyarada, muddo dheer iyo si joogto ah.

    Waxay Meta ka dalbanayaan:

    • In la hirgeliyo xaqiijinta waalidka marka ay da’yartu sameysanayaan akoonnada.
    • In wax laga beddelo talo-bixinta ee la sheegay inay saameeyaan dareenka iyo rabitaanka isticmaalayaasha.
    • In laga saaro qaar ka mid ah filterrada sawirrada wax ka beddela muuqaalka qofka.
    • In la joojiyo muuqaalada si toos ah isaga bilowda.
    • In la mamnuuco sameysashada akoonno badan.
    • In la joojiyo qoraallada iyo muuqaalada muddo kooban kadib baaba’a, sida Instagram iyo Stories-ka.

    Astaamahan ayaa laf-dhabar u ah habka ay dadka u isticmaalaan Instagram iyo Facebook.

    Meta ayaa mar walba beenisay eedeymaha ah inay si ula kac ah barayaasheeda uga dhigto kuwo qabatin abuura, gaar ahaan carruurta iyo dhallinyarada, si ay u kordhiso isticmaalayaasha iyo dakhligeeda.

  10. War deg deg ah, Iran iyo Faransiiska oo xiisad diblumaasiyadeed ka dhex qaraxday

    Faransiiska ayaa sheegay inuu maalmaha soo socda dalka ka saarayo laba diblomaasi oo Iiraaniyiin ah.

    Wasiirka Arrimaha Dibadda Faransiiska, Jean-Noël Barrot, ayaa arrintan ku shaaciyay qoraal uu maanta ku baahiyay barta X.

    Tallaabadan ayaa timid maalin kaddib markii Wasaaradda Arrimaha Dibadda Iran ay sheegtay in laba shaqaale oo ka tirsan safaaradda Faransiiska ee Tehran oo ku lug lahaa khilaaf diblomaasiyadeed bishii Luulyo aan loo oggolaan doonin inay dib ugu laabtaan Iran.

    Wasaaradda Arrimaha Dibadda Faransiiska ayaa bishii hore sheegtay in labada shaqaale lagu xiray Tehran, loona geystay hanjabaado iyo tacaddi jireed.

  11. War deg deg ah, Shirkadda Meta oo wajahaysa dacwado culus iyo malaayiin lacag ah oo lagu xukumay

    Baraha bulshada

    Xigashada Sawirka, Getty Images

    Marka laga soo tago dacwadda maanta bilaabatay, shirkadda Meta waxay Mareykanka ku wajahaysaa kumannaan dacwadood oo ay soo gudbiyeen mas’uuliyiin iyo qoysas, kuwaas oo la xiriira badbaadada carruurta.

    Horaantii bishan, garsoore ka tirsan gobolka New Mexico ayaa Meta ku amray inay bixiso $567 milyan, kaddib markii lagu helay inay ku guuldarreysatay inay bulshada uga digto khataraha ay baraha shirkaddu u keeni karaan carruurta.

    Lacagtaas ayaa lagu daray $375 milyan oo Meta hore loogu xukumay isla kiiskaas. Tani waxay noqotay ganaaxii ugu weynaa ee shirkadda lagu soo rogo arrimaha badbaadada carruurta.

    Garsoore Bryan Biedscheid ayaa xilligaas Meta ku tilmaamay “dhibaato bulshada oo dhan saameysa”, isagoo baraha shirkadda la barbardhigay wasakhowga hawada. Wuxuu sheegay in lacagta lagu shubo sanduuq loogu talagalay in lagu yareeyo waxyeellada mustaqbalka.

    Afhayeen u hadlay Meta ayaa markaas sheegay: “Waan diidanahay xukunka, waxaana ka qaadan doonnaa racfaan.”

    Bishii Maarso, Meta ayaa sidoo kale looga adkaaday dacwad muhiim ah oo ka dhacday Los Angeles, taas oo lagu go’aamiyay in shirkadda lagula xisaabtami karo dhismaha baraha bulshada ee dadka ku abuura qabatinka.

  12. War deg deg ah, Madaxweynihii hore ee Suuriya Bishar al-Asad walalkii oo dil lagu xukumay

    Suuriya

    Xigashada Sawirka, Getty Images

    Maxkamad ku taalla Suuriya ayaa xukun dil ah ku ridday nin la dhashay madaxweynihii hore ee dalkaas, Bishar al-Assad, kaddib markii lagu helay dambiyo dagaal iyo xadgudubyo ka dhan ah xuquuqda aadanaha.

    Wassim al-Assad ayaa la xiray bishii Juun ee sanadkii hore. Waxaa muddo dheer lala xiriirinayay kooxo ka ganacsada mukhaadaraadka, balse maxkamaddu waxay sheegtay in eeddaas aan lagu helin caddeymo ku filan.

    Xukunka ayaa yimid toddobaad kaddib markii Bishar al-Assad isna lagu xukumay dil, xilli uu qarka u saarnaa in loo masaafuriyo Ruushka.

    Tallaabadan ayaa loo arkaa isku day ay Suuriya ku doonayso in caddaalad loo helo dhibbanayaashii sannadihii colaadda.

  13. War deg deg ah, Xuutiyiinta oo weerarro ku qaaday xaruumo shidaal oo Sacuudigu leeyahay

    Xuutiyiinta

    Xigashada Sawirka, Reuters

    Xuutiyiinta ayaa maanta beegsaday warshad shidaal oo ku taalla xeebta Badda Cas ee koonfurta Sacuudiga.

    Sida wararku sheegayaan, kooxda ayaa dhowr diyaaradood oo aan duuliye lahayn ku weerartay warshad ay leedahay shirkadda Aramco, iyagoo sheegay in weerarku ahaa “jawaab ka dhan ah xadgudubka hawada ee gobollada Saada iyo Xajjah.”

    Tan iyo markii uu billowday dagaalka cusub, Xuutiyiintu waxay weerarro ka geysteen Badda Cas, iyagoo bartilmaameedsaday maraakiib shidaal oo Sacuudiyaan ah iyo ciidamada dowladda Yemen.

    Waxay sidoo kale dhowr jeer weerarro ku qaadeen kaabayaasha shidaalka iyo garoomada diyaaradaha ee Sacuudiga.

  14. Ku soo dhawaada wararkii ugu dambeyay ee dunida oo BBC-du halkaan idinkugu soo gudbbin doonto.

  15. War deg deg ah, Iran oo gantaallo ku weerartay Imaaraadka Carabta

    Iran

    Imaaraadka Carabta ayaa sheegay in Iran ay laba gantaal oo ballistic ah ku soo ridday dalka Imaaraadka.

    Wasaaradda Difaaca Imaaraadka ayaa sheegtay in midkoodna uusan ku dhicin dhulka Imaaraadka.

    War-saxaafadeed ay Wasaaraddu ku baahisay barta X ayaa lagu sheegay in nidaamka difaaca cirka ee Imaaraadku uu ogaaday labada gantaal ee Iran soo ridday.

    Wasaaraddu waxay sheegtay in gantaalkii koowaad uu ku dhacay meel ka baxsan biyaha dhuleed ee Imaaraadka, halka kan labaad uu ku dhacay dhul ka tirsan dalka.

    Iran weli kama aysan hadlin eedeyntan.

  16. Degdeg: Rodri oo si rasmi ah ugu biiray kooxda Barcelona

    .

    Xigashada Sawirka, Getty Images

    Barcelona ayaa ku dhawaaqday inay Manchester City kala soo wareegtay khadka dhexe ee Rodri, heshiis lagu qiyaasay 65 milyan oo gini.

    Rodri oo ku guuleystay abaalmarinta Ballon d'Or 2024, ayaa Barcelona u saxiixay heshiis afar sano ah. Wuxuu sidaas ugu soo laabtay kubadda cagta Spain markii ugu horreysay tan iyo 2019, markaas oo uu u ciyaarayay Atletico Madrid.

    Rodri oo 30 jir ah ayaa Manchester City ka tagaya kaddib toddobo xilli ciyaareed oo uu kooxda joogay, isagoo u saftay 298 kulan kuna guuleystay 12 koob oo waaweyn, oo ay ku jiraan afar horyaal oo Premier League ah, laba FA Cup, saddex EFL Cup iyo Champions League 2023.

    Labadii xilli ciyaareed ee ugu dambeeyay ee uu City joogay waxaa saameeyay dhaawacyo, balse waxa uu qaab ciyaareedkiisii ugu fiicnaa ku soo laabtay Koobkii Adduunka ee xagaagan, halkaas oo loo doortay xiddigii tartanka, iyadoo Spain ay markii labaad ku guuleysatay koobka.

  17. Maraykanka oo joojinaya sharci ilaalinayey kumannaan Itoobiyaan ah

    Garsoore federaal ah oo ku sugan Maraykanka ayaa u oggolaaday maamulka Trump in uu soo afjaro ilaalintii sharciyeed ee ay haysteen in ka badan 5,000 oo Itoobiyaan ah.

    Barnaamijka loo yaqaan Temporary Protected Status (TPS) ayaa u oggolaanayay inay ku noolaadaan oo ka shaqeeyaan Maraykanka iyaga oo aan ka cabsi qabin in dalka laga masaafuriyo.

    Go’aankan ayaa meesha ka saaray caqabaddii ugu dambeysay ee dhanka garsoorka ee hortaagnayd qorshaha maamulka Trump ee lagu joojinayo ilaalinta loo fidiyo muwaadiniinta dalal gaar ah, kaddib markii Maxkamadda Sare ay oggolaatay tallaabooyin la mid ah oo saameeyay dadka u dhashay Haiti iyo Suuriya.

  18. Imaaraadka oo sheegay inuu ka hortagay “halis gantaal”oo ku soo aaddan dalkooda

    Wasaaradda Gaashaandhigga Isutagga Imaaraadka Carabta ayaa sheegtay in nidaamyadeeda difaaca cirka ay ogaadeen halis gantaal oo lala beegsanayay dalkaas, iyada oo xaqiijisay in ciidamadeedu ay diyaar u yihiin inay wax ka qabtaan hanjabaad kasta oo ku aaddan iyaga si loo ilaaliyo amniga, madaxbannaanida iyo xasilloonida dalka.

    Bayaan ay wasaaraddu ku baahisay barteeda rasmiga ah ee X, ayay ugu baaqday muwaadiniinta iyo dadka dalka deggan inay raacaan digniinaha iyo wararka ay soo saaraan hay’adaha rasmiga ah.

    Waxay sheegtay in dhawaaq kasta oo laga maqli karo deegaanno kala duwan uu ka dhashay tallaabooyinka ay qaadeen nidaamyada difaaca cirka si ay uga hortagaan halistaas.

    Wasaaradda Gaashaandhigga ayaa xaqiijisay in ciidamadeedu ay ku jiraan heegan buuxa, isla markaana ay diyaar u yihiin inay wax ka qabtaan khatar kasta, iyadoo tallaabooyinka lagama maarmaanka ah ay sii wadi doonaan si loo ilaaliyo ammaanka dalka iyo dhulkiisa.

    Dhanka kale, digniin ay soo saartay Wasaaradda Arrimaha Gudaha ayaa lagu yiri: “Xaaladda hadda jirta awgeed, waxaa jirta halis suurtagal ah. Fadlan isla markiiba gabaad ka raadsada dhisme ammaan ah...”

  19. Orgi caanka ka noqday dal Afrikaan ah oo dadku isku buurtaan si ay sawiro uga qaadaan - hadiyad ay hooyo u keentay wiilkeeda

    Markii Promise Okoro uu ka baxay imtixaankii jaamacadda ee heerka koowaad horraantii bishan, wuxuu si buuxda u filayay dabaaldega caadiga ah ee dhammaadka jaamacadda.

    Saaxiibadiis farxsanaa badan ayaa durba dibadda soo dhoobtay iyagoo muusig aad u weyn shiday oo duubaya oo qaab heeseed caanka ah Nigeria oo aad loo jecel yahay.

    Shaatiyadooda cad waxaa ka buuxay farriimo ay qoreen ardayda fasalka.

    Laakiin, dadkii badnaa dhexdooda, waxaa timid hooyada Promise, Chinyere, oo jiidaysa orgi.

    Galabkii farxad ahaa wuxuu daqiiqad gudaheed isu badalay, mid ay Promise iyo asxaabtiisu aysan waligood iloobi doonin.

    Orgi caanka ka noqday dal Afrikaan ah oo dadku isku buurtaan si ay sawiro uga qaadaan - hadiyad ay hooyo u keentay wiilkeeda

  20. Fannaanka caanka ah ee Kanye West oo Ruushka bandhig ku qabanaya kaddib markii Yurub loo diiday

    .

    Xigashada Sawirka, Getty Images

    Fannaanka raabka ah Ye, oo hore loo oran jiray Kanye West, ayaa lagu wadaa inuu laba bandhig ku qabto magaalada St Petersburg ee Ruushka bisha Oktoobar, taasoo ka dhigaysa xiddigga reer Galbeed ee ugu weyn ee dalkaas bandhig ku qabta tan iyo markii Ruushku afar sano ka hor duullaan ku qaaday Ukraine.

    Tigidhada bandhigyada lagu qabanayo Gazprom Arena, oo qaadda 70,000 oo qof, ayaa dhammaaday saacado gudahood markii lagu dhawaaqay Isniintii. Qiimayaashoodu waxay u dhexeeyeen 9,000 ruble, oo u dhiganta 78 doollar, ilaa 160,000 ruble, oo ah ku dhowaad 1,394 doollar.

    Bandhigyadan ayaa imanaya xilli West uu isku dayayo inuu dib u hagaajiyo sumcaddiisa, kaddib sannado uu sameeyay hadallo naceyb Yuhuudda ah iyo kuwo taageero u muuqday uu u sameeyey Naasiyiinta. Bishii Janaayo ayuu raalli-gelin ka bixiyay hadalladiisa, isaga oo ku sababeeyay dhaawac maskaxeed.

    Balse socdaal weyn oo uu xagaagan ku mari lahaa Yurub ayaa hakad galay, iyada oo dhowr bandhig laga baajiyay kaddib caro ka dhalatay aragtidiisa.

    Boqortooyada Midowday ee UK, xafladdii muusigga ee Wireless Festival, oo muddo dheer la qabanayay, ayaa la baajiyay kaddib markii West, loo qorsheeyay inuu qayb ka ahaado bandhiggaas, oo loo diiday inuu dalka galo.