Wararkii u dambeeyay caleema-saarka iyo madaxda ugu sarreysa dowladda federaalka oo Laascaanood joogta

Tebin toos ah

1. 17 Jannaayo 2026Hoggaamiyaha ruuxiga ah ee Iiraan oo qirasho sameeyay

   Hoggaamiyaha sare ee Iran ayaa markii ugu horreysay si cad u qirtay in kumannaan qof lagu dilay, "qaarna loola dhaqmay si bini'aadantinimada ka baxsan oo arxan darro ah", intii ay socdeen dibadbaxyadii dhawaan dhacay.

   Jawaabta rabshadaha wadata ee looga fal-celiyay kacdoonka ayaa galaafatay nolosha 3,090 qof, sida ay sheegtay Wakaaladda Wararka u dhaqdhaqaaqa Xuquuqda Aadanaha ee Iran (HRANA) oo fadhigeedu yahay dalka Mareykanka, iyadoo kooxaha u dhaqdhaqaaqa xuquuqda qaarkood ay sheegayaan in khasaaruhu uu intaas aad uga badan yahay. In internet-ka laga gooyay dalka ayaa ka dhigtay mid aad u adag in la helo macluumaad cad.

   Khudbad uu jeediyay maanta, Ayatollah Ali Khamenei wuxuu sheegay in kumannaan qof la dilay, isagoo dhimashadaasna dusha uga tuuray dowladda Mareykanka.

   Madaxweynaha Mareykanka Donald Trump ayaa dhawaan ku boorriyay dibadbaxayaasha Iran inay "sii wadaan mudaaharaadka," isagoo ugu hanjabay faragelin militari haddii ciidamada ammaanku ay dilaan bannaanbaxayaasha.

2. 17 Jannaayo 2026War deg deg ah, Trump oo tallaabo ka qaaday dalal waaweyn oo Yurub ah

   Madaxweynaha Mareykanka Donald Trump ayaa ku dhawaaqay canshuuro cusub oo lagu soo rogay dalal badan oo badeecadaha u dhoofiya Mareykanka, taasoo bilaabaneysa 1-da Febraayo.

   Trump ayaa sheegay in kuwani ay sii jiri doonaan ilaa "waqtiga heshiiska laga gaarayo iibsashada Greenland oo dhameystiran iyo tan Mareykanka"

   Qoraal uu ku qoray baraha bulshada, Trump wuxuu sheegay in dalal ay ka mid yihiin Denmark, Norway, Sweden, France, Germany, UK, Netherlands, iyo Finland "laga qaadi doono 10% canshuur ah" marka ay badeecado u diraan Mareykanka.

   Kowda Juunyo, tan waxaa la kordhin doonaa 25%, ayuu ku qoray Truth Social.

   Xusuusin, taariifadu waa canshuuraha laga qaado badeecadaha la soo dejiyo, waxaana inta badan dowladda siiya shirkado keena badeecado shisheeye.

3. 17 Jannaayo 2026Dib u milicsi: Booqashadii Madaxweyne Siyaad Barre 1984

   Madaxweynihii hore ee Soomaaliya, Maxamed Siyaad Barre waxa uu ahaa hoggaamiyihii xilka madaxweynenimo la wareegay kaddib geeridii Madaxweyne Cabdirashiid Cali Sharmaarke, oo lagu dilay magaalada Laascaanood sanadkii 1969-kii. Sidaas awgeed, booqashadii uu Maxamed Siyaad Barre ku tagay Laascaanood sannadkii 1984-kii waxay lahayd miisaan taariikhi ah iyo muhiimad gaar ah, maadaama ay ahayd markii labaad oo madaxweyne qaran uu cagta dhigo deegaannada Waqooyi-bari tan iyo dilkii naxdinta lahaa ee loo geystay AUN Madaxweyne Cabdirashiid Cali Sharmaarke.

   Booqashadaasi waxa ay ku soo beegantay xilli uu dalku ku jiray marxalad siyaasadeed oo xasaasi ah, isla markaana xukuumaddii markaas jirtay ay dadaal ku bixinaysay xoojinta midnimada qaranka iyo joogitaanka dawladda ee gobollada dalka. Madaxweyne Maxamed Siyaad Barre waxa uu safarkiisu ahaa mid dhulka ah, isaga oo ka soo galay dhinaca gobolka Togdheer, taas oo muujinaysay muhiimadda uu u arkayay socdaalka iyo sida uu ugu talo-galay in uu si dhow ula kulmo shacabka deegaannada uu marayey.

   Booqashadaas waxay qayb ka ahayd safarradii uu ugu kuurgalayay xaaladda gobollada iyo dhismaha mashaariicda horumarineed ee xilligaas ka socday dalka.

4. 17 Jannaayo 2026Madaxweyne Xasan Sheekh oo farriin adag u diray raysal wasaaraha Israa’iil

   Madaxweynaha oo khudbaddiisa sii wata ayaa ka hadlay aqoonsigii ay dhowaan Israa'iil aqoonsatay Jamhuuriyadda Iskeed ugu Dhawaaqday Madaxbannaanida ee Somaliland.

   “Waxaan cod dheer ku leeyahay marna suurtogal ma aha in Israa’iil ay ka sameysato Soomaaliya dhexdeeda dowlad fulisa istaraatiijyaddeeda gurracan. Suurtogal ma aha in istaraatijayadahaas gurracan ay gobolkan ka hana qaadaan ama dowlad Israa’iil wakiil uga noqota, u shaqeysa sidii ay iyadu rabto suurtogal nagama ah.

   "Dabcan sida ay rabtana waan garaneynaa dhammaanteen. Netanyahu waxaan leennahay dadka Soomaaliyeed waa diideen arrintan dunida oo dhanna waa diidday damacaagga gurracan. Waxaan leeyahay Gobolkan ma ahan meel si qasab ah loogu soo raro dulmanayaasha reer qasa ee guryahoodaii la dumiyay, dhulkoodii la qaatay, inta kalena in la qaato la rabo hadda. Sidoo kalena ma aha meel la rabo in loo soo rararo collaadda gaamurtay ee muddada dheer ka jirtay Bariga Dhexe." Ayuu yiri.

5. 17 Jannaayo 2026Madaxweyna Xasan Sheekh: Laascaanood waa astaantii Soomaalinimada

   Madaxweynaha dowladda federaalka Soomaaliya oo khudbad ka jeediyay munaasabadda caleema-saarka madaxweynaha maamul-goboleedka Waqooyi Bari Soomaaliya ayaa ka hadlay arrimo kala duwan.

   “Waa taariikh na gudbineysa kala qeybsanaantii ay qababtay isticmaarkii inoona gudbineysa midnimada dadkeenna iyo dalkeenna, astaan aan fiicneyn oo ah in hore nasiib darro noogu dhacday oo dalkeenna lakal qebiyay. In isticmaar hore u jiray uu kala qeybsaday inay astaan noqoto oo adigana hebelaa ku gumeysan jiray anna hebelaai gumeysan jiray aan sataan ka dhiganno waxay ahayd nasiib darro waayadii dambe aad noogu weynaa.

   Waxaan rabaa inaan mar kale hambalyo u diro dowlad-goboleedka Wqooyi Bari oo o diidday astaantaas taariikhda xun ah,” ayuu yiri.

   Wuxuu sheegay in taariikh cusub ay u tahay Soomaaliya, isagoo hambalyo u diray maamul-goboleedkaas.

   “Maamulka cusub iyo dadka reer-waqooyi bari waan u hambalyeynayaa. Waxaan mar kale halkan ka xoojinayaa oo ku dhawaaqayaa in Laascaanood ay tahay astaanta midnimada Soomaaliya,” ayuu yiri.

   Wuxuu intaa ku daray in Waqooyi-bari ay leedahay dhammaan xuquuqda maamul-goboleedyada.

   “Dowladda federaalka Soomaaliya waxay ka saacideysaa maamulka cusub dhinaca amniga iyo degganaanshiyaha deegaannada Waqooyi Bari,”. Ayuu yiri.

6. 17 Jannaayo 2026Duqeymo ka dhacay Itoobiya oo ay dad badan ku dhinteen

   Ugu yaraan 36 qof ayaa lagu dilay weerar loo adeegsaday diyaaradaha aan duuliyaha lahayn oo lagu qaaday xubno ka tirsan maleeshiyaadka oo ka qaybgalayay kulan ay lahaayeen qowmiyadda Wag Khumra ee gobolka Amxaarada, sida ay BBC-da u sheegeen hoggaanka degmada Sehala Seyyemt, khubaro caafimaad iyo dadka deegaanka.

   Maamulka degmada ayaa ku dhawaaqay in weerarkaas ay ku dhaawacmeen 16 qof, isla markaana lagu burburiyay xeradii iyo hubkii ku jiray dhexdeeda.

   Hoggaanka degmada iyo dadka deegaanka ayaa sheegay in taliyayaasha ciidamada difaaca deegaanka ay ku tilmaameen weerarkaas mid "aan ku talogal ahayn."

   Weerarka drones-ka ayaa dhacay subaxnimadii Khamiista, kaas oo lala beegsaday xero maleeshiyo oo ku taal degmada Sehala Seyyemt ee Maamulka Qaranka Wag Khumra, sida ay xaqiijiyeen shan ilo-wareed oo ay la hadashay BBC-du.

7. 17 Jannaayo 2026War deg deg ah, Museveni oo ku guuleystay doorashada Uganda

   Madaxweynaha Uganda, Yoweri Museveni, ayaa si rasmi ah ugu guuleystay doorashadii guud ee dalkaas isagoo helay 71.65% wadarta codadkii la dhiibtay (7,946,772 cod).

   Madaxweynaha xilka haya ayaa hadda lagu wadaa inuu xilka sii hayo 5 sano oo kale, isagoo kordhinaya xukunkii 40-ka sano ahaa ee uu ku maamulayay dalkaas ku yaalla Bariga Afrika.

   Bobi Wine, oo ahaa musharraxa sida weyn u loollamayay, ayaa galay kaalinta labaad isagoo helay 24.72% (2,741,238 cod) ee wadarta codadka. Codadkii soo harayna waxaa qaybsaday 6 musharax oo kale.

   Wadarta guud ee codadka la dhiibtay waxay ahaayeen 52.5% dadka is-diiwaangeliyay (11,366,201 qof).

   Ku dhawaaqistan ayaa lagu sameeyay shir jaraa’id oo uu qabtay guddiga doorashada ee Uganda.

8. 17 Jannaayo 2026Somaliland: "Reer Laascaanood, nimaan kuu furi doonin yaanu kuu rarin"

   Wasiirka Gaashaandhigga Jamhuuriyadda Iskeed ugu Dhawaaqday Madaxbannaanida Somaliland Maxamed Yuusuf oo ka hadlayay munaasabad tababar loogu soo xirayay askar ayaa ka hadlay joogitaanka madaxda dowladda federaalka Soomaaliya ee Laascaanood.

   Wuxuu sheegay in madaxweynaha dowladda federaalka Soomaaliya Xasan Sheekh Maxamuud iyo wafdigiisa "xasarad wadaan" wuxuuna baaq u diray shacabka Laascaanood, isagoo yiri: "Waxaan leeyahay diyaarad bey ku yimaadeen shalay galab, galabtana diyaarad bey ku tagayaan. Soomaalida waxay ku maahmaahdaa nimaan kuu fureynin yaanu kuu rarin, waxaan leeyayay reer Laascaanood, Xasan wuu tagayaa laakiinse hareeraha waxaa idinka xiga Somaliland iyo Puntland oo la idiin kala tagayo," ayuu yiri.

   "Waxay halkan u yimaadeen kala qeybin iyo inay bulshada ku abuureen dhibaato iyo colaad." Ayuu intaa ku daray.

   Magaalada Laascaanood ee gobolka Sool waxaa ku sugan wufuud isugu jirta madax ka socota dowladda federaalka ah, madax dhaqameed iyo dadyow kale oo dhamaantood ka qayb galaya xafladda caleema-saarka madaxweynaha maamulka Waqooyi Bari Soomaaliya Cabdulqaadir Aw Cali Firdhiye.

   Madaxweyne Firdhiye ayaa la doortay shan bilood ka hor, waxaana muddo la sugayay tagitaanka Madaxweyne Xasan ee Laascaanood.

9. 17 Jannaayo 2026"Trump ayaa mas'uul ka ah"

   Hoggaamiyaha ruuxiga ah ee Iran, Ayatollah Ali Khamenei, ayaa sheegay in madaxweynaha Mareykanka Trump uu mas’uul ka yahay dhimashada dadka mudaaharaadayay ee dhawaan dalkaasi ka dhacay.

   Waxa uu sheegay in Iiraan ay Trump u aragto dembiilaha ugu weyn ee dagaalka sababay.

   Ayatollah Khamenei ayaa ku eedeeyay ragga - xiriirka la leh Israa'iil iyo Mareykanka - inay dileen kumanaan rayid ah iyo ciidamada ammaanka.

   Waxa uu intaa ku daray in cidina aanay ahayn in ay Iiraan dagaal ku soo jiiddo, "balse dembiilayaasha gudaha iyo dibaddaba ay tahay inay la kulmaan ciqaab."

10. 17 Jannaayo 2026Waa kuwee dalalka taageeray midnimada Soomaaliya ee hadda dhisanaya isbahaysi difaac oo xooggan?

    Wasiiru dowladaha difaaca Pakistan , Raza Hayat Haraj, ayaa xaqiiiyey nuqulka heshiiska qaybo ah oo difaac oo la gabagabeyey, kasa oo u dhaxeeya dalalka Pakistan, Sacuudi Carabiya iyo Turkeyga ka dib sano wadahadallo ah.

    Si kastaba ha ahaatee heshiiskan wuxuu ka madax-bannaan yahay heshiiska ammaanka ee Pakistan iyo Sacuudi Carabiya ay saxiixeen sanadkii hore.

    Hadalka Reza Hayat Haraj ayaa ku soo aaday xilli wasiirka arrimaha dibadda ee Turkiga Hakan Fidan uu khamiistii shalay shir jaraa'id oo uu ku qabtay Istanbul ku sheegay in wada-hadallo ku saabsan suurtagalnimada heshiis dhanka difaaca ah oo ay la yeelanayaan Sacuudiga iyo Pakistan ay socdaan, balse weli wax heshiis ah aan laga gaarin arrintan.

    Wasiirka arrimaha dibadda ee Turkiga oo la waydiiyay in uu jiri karo isbahaysi ayaa sheegay in "haddii dalalku ay isku kalsoonaadaan" la xalin karo arrimaha ballaaran ee gobolka.

    Wuxuu sheegay in fikradda Madaxweyne Erdogan ay tahay 'in la dhiso aasaaska madal ballaaran oo dhammaystiran.'

    Sii akhri....

11. 17 Jannaayo 2026Minneapolis: Garsoore xaddiday awoodda ay ciidamada ICE u adeegsan karaan mudaharadayaasha

    Garsoore Maraykan ah ayaa xaddiday xeeladaha ay adeegsadaan ciidamada laanta socdaalka federaalka ee ka hawlgala Minneapolis marka ay la macaamilayaan mudaaharaadayaasha.

    Garsooraha ayaa mamnuucay in ay xiraan ama ay sunta dadka ilmaysiisa u adeegsadaan mudaaharaadayaal nabadeed, ama ay joojiyaan baabuurtooda, haddii aanay jirin shaki loo qaateen ah.

    Waxay kaloo sheegtay in kaliya la socodka ama daawashada hawlaha ciidamadu ay tahay arrin sharci ah.

    Kumanaan saraakiil laanta socdaalka ah ayaa la buux dhaafiyay Minneapolis oo ay maamulaan Dimuqraadiyiintu, taasoo dhalisay mudaaharaadyo sii xoogaystay tan iyo markii mid ka mid ah saraakiisha uu toddobaad kahor toogasho ku dilay haweeney.

    Wasaaradda caddaaladda ee Maraykanka ayaa baaritaan ku wadda duqa magaalada (Jacob Frey) iyo guddoomiyaha gobolka (Tim Walz), iyadoo looga shakisan yahay inay hadalladooda ku carqaladeeyeen hawlaha ciidamada ICE.

12. 17 Jannaayo 2026Ciidamada Uganda oo beeniyay wararka sheegaya afduub loo geystay Bobi Wine

    Ciidamada ammaanka ee Uganda ayaa beeniyay warar sheegaya in hoggaamiyaha mucaaradka Bobi Wine iyo xaaskiisa laga afduubtay gurigooda oo ku yaalla caasimadda Kampala.

    Afhayeenka booliska qaranka ayaa sheegay in eedeymahaasi yihiin kuwo aan sax ahayn, isagoo ku adkaystay in Wine uu joogo gurigiisa. Ciidanka milatariguna sidoo kale way diideen wararka sheegaya in lagu hayo xabsi guri.

    Horey, wiilka Wine ayaa ku eedeeyay in aabbihiis uu ka baxsaday weerar lagu qaaday guriga, halka hooyadiisna la xiray, askartuna ay xireen waddooyinka loo maro hoygooda.

    Iyadoo inta badan codadkii laga dhiibtay doorashadii madaxtinimada ee Khamiistii la tiriyay, Madaxweyne Yoweri Museveni ayaa lagu soo waramayaa inuu si weyn u horreeyo dadaalkiisa ku aaddan helitaanka mar kale xilka, markii toddobaad, natiijooyinkana la filayo in la shaaciyo goor dambe maanta.

13. 17 Jannaayo 2026Somaliland oo sheegtay 6 kun oo askari ay tababar ugu soo xirtay Sool

    Jamhuuriyadda iskeed madax banaanida ugu dhawaaqday ee Somaliland ayaa sheegtay ciidamo ay tababar ugu soo xirtay gobalka Sool.

    Sida uu baahiyay Telefishinka Qaranka Somaliland, ciidamadan ayaa gaaraya in ka badan lix kun, inkastoo aan la sheegin halka ay ka tahay gobolka Sool.

    Waxa ay ku soo beegmaysaa xilli magaalada Laascaanood ee xarunta gobolka Sool uu ku sugan yahay madaxweynaha DF Soomaliya Xasan Sheekh Maxamuud oo ka qayb galaya caleema-saarka madaxweynaa Waqooyi Bari.

    Sidoo kale waxa ay imaanaysaa iyada oo Madaxweynaha Somaliland Cabdiraxmaan Maxamed Cabdullaahi (Cirro) uu sheegay "in tagitaanka madaxda dowladda federaalka Soomaaliya ee Laascaanood ay tahay "daan-daansi iyo faragelin qaawan oo aan geed loogu soo gamban,".

    Madaxweynaha Somaliland ayaa beesha caalamka ku wargeliyay in tallaabooyinka ay qaadayso dowladda Soomaaliya ay yihiin "kuwa saameyn ku yeelan doona nabadda iyo xasilloonida geeska Afrika".

14. 17 Jannaayo 2026Boqor Burhaan iyo Safiirada dalalka Sucuudiga iyo Turkiga oo gaaray Laascaanood

    Magaalada Laascaanood ayaa lagu soo dhoweeyay qaar kamid ah safiirada Soomaaliya u jooga dalalka Turkiga, Sacuudiga iyo Suudaan, kuwaasi oo ka qayb galaya caleema saarka Madaxweynaha Waqooyi Bari Soomaaliya.

    Boqor Burhaan Boqor Muuse oo kamid ah odoyaal dhaqameedka Soomaaliyeed ayaa qayb ka ahaa socdaalka safiirada gaaray Laascaanood.

15. 17 Jannaayo 2026Trump oo soo jeediyay inuu ka dhexdhexaadiyo Masar iyo Itoobiya khilaafka Wabiga Niil

    Madaxweynaha Maraykanka Donald Trump ayaa Jimcihii ku dhawaaqay inuu diyaar u yahay inuu dhexdhexaadiyo khilaafka biyaha Wabiga Niilka ee u dhexeeya Masar iyo Itoobiya.

    "Waxaan diyaar u ahay inaan dib u bilaabo dhexdhexaadinta Mareykanka ee u dhaxaysa Masar iyo Itoobiya si si masuuliyad leh loogu xalliyo su’aasha ‘Qaybsiga Biyaha Niilka’ hal mar iyo dhammaan," ayuu ugu qoray Madaxweynaha Masar Abdel Fattah al-Sisi warqad, isaga oo sidoo kale ku daabacay akoonkiisa Truth Social.

    Furitaanka Biyo-xireenka Dib-u-soo-kabashada Weyn ee Itoobiya (Grand Ethiopian Renaissance Dam) ee Addis Ababa 9-kii Sebtembar ayaa caro ka dhaliyay Masar, oo kamid ah waddamada uu maro webiga Niilka.

    Itoobiya, oo ah dalka labaad ee ugu dadka badan qaaradda Afrika oo dadkeedu gaarayo 120 milyan oo qof, ayaa $5 bilyan ku kharash garaysay biyo-xireenkeeda Niilka taas oo ay sheegtay inay tahay mid muhiim u ah himilooyinkeeda dhaqaale ee dalkeeda.

    Masar waxay sheegtay in biyo-xireenka uu jebinayo heshiisyada caalamiga ah isla markaana sababi karo abaaro iyo fatahaado, taas oo Itoobiya diidday.

    Trump ayaa hore u ammaanay Sisi, oo ay ku jirto safar uu ku tagay Masar bishii Oktoobar si uu u saxiixo heshiis la xiriira khilaafka Qaza. Hadaladiisa, Trump wuxuu ka tarjumay welwelka Masar ee ku saabsan arrinta biyaha.

16. 17 Jannaayo 2026Muddadii uu tababaraha ka ahaa City, Guardiola waxa uu ka adkaaday Shan tababare oo Manchester United ah

    Marka Pep Guardiola Maanta oo Sabti ah kasoo muuqdo Old Trafford kulanka 198-aad ee labada Manchester ee loo yaqaan derby-ga, wuxuu wajihi doonaa tababarihii lixaad ee kala duwan ee United, ku dhowaad toban sano oo uu hoggaaminayay Manchester City.

    Michael Carrick ayaa ah ninka ugu dambeeya ee fadhiya kursiga tababarenimo ee Manchester United, kulankanna waa kii ugu horreeyay tan iyo markii loo magacaabay tababare ku-meel-gaar ah, kaddib markii xilka laga eryay Ruben Amorim.

    Xilli-ciyaareedkii hore wuxuu ahaa mid ku adag City oo wajahday hoos u dhac, maadaama ay ku guuldarreysteen inay ku guuleystaan koob weyn, balse hadda way kusoo laabteen heerkii ugu fiicnaa.

    Tobankii sano ee la soo dhaafay, United waxaa soo maray tababarayaal badan: “Ninka Gaarka ah” Jose Mourinho, jawigii Ole Gunnar Solskjaer, xukunkii ku-meel-gaarka ahaa ee Ralf Rangnick, xeel-dheeraha Erik ten Hag, iyo rajadii da’da yareyd ee Amorim.Dhammaantood way yimaadeen, ugu dambayntiina Guardiola ayaa ka adkaaday, isaga oo ku biiray City bishii Luulyo 2016.

    Ruud van Nistelrooy iyo Darren Fletcher ayaa sidoo kale xilka qabtay waqtiyo gaaban oo ku-meel-gaar ah, halka ciyaaryahankii hore ee khadka dhexe ee Red Devils, Carrick, uu mar labaad hoggaanka la wareegayo.

17. 17 Jannaayo 2026Sacuudi Carabiya, Masar iyo Soomaaliya oo yeelanaya isbahaysi Milatari

    Sida ay daabacday mareegta Blooberg Sacuudi Carabiya ayaa gabagabaynaysa heshiis cusub oo ku saabsan isbahaysi milatari oo ay la yeelanayso Soomaaliya iyo Masar, qayb ka mid ah dadaalkeeda ‘’lagu xakameynayo saameynta Imaaraadka Carabta ee gobolka’’ ayaa lagu yiri.

    Qoraalka Bloomber ayaa intaa raaciyay in Madaxweynaha Soomaaliya, Xasan Sheekh Maxamuud uu dhowaan u safraya Sacuudi Carabiya si uu u dhammeystiro heshiiska, kaasoo ujeedkiisu yahay in la xoojiyo iskaashiga istiraatiijiyadeed ee ammaanka Badda Cas iyo sidoo kale wada shaqeyn milatari oo qoto dheer, sida ay sheegeen’ laba qof oo xog ogaal ah’

    Toddobaadkan, Soomaaliya waxay laashay heshiisyadii ammaanka iyo dekedaha ay la lahayd Imaaraadka Carabta, iyadoo ku eedeysay dalka Gacanka inuu xadgudub ku sameeyay madaxbannaanideeda.

18. 17 Jannaayo 2026Ilhaan Cumar ‘’Arrintan weligeed kuma saabsanayn fulinta sharciga mar walba waxay ku saabsanayd aargoosi siyaasadeed.’’

    Xildhibaanad Ilhaan Cumar oo laga soo doorto gobolka Minnesota ayaa sheegtay in Dastuurka Maraykanka uu dhinacooda yahay ayna dagaalami doonaan si ay u difaacaan, iyada oo ku eedeysay maamulka Trump aargoosi siyaasadeed.

    Barteeda bulshada ayay kusoo qortay ‘’Trump iyo maamulkiisa socdaalka kama badbaadin doonaan weerarada ay ku hayaan gobolkeena. Arrintan weligeed kuma saabsanayn fulinta sharciga — mar walbana waxay ku saabsanayd aargoosi siyaasadeed’’

    Waxay intaasi ku dartay Trump iyo fulinta sharciyadiisa socdaalka kama badbaadi doonaan weerarradooda sharci-darrada ah ee ay ku hayaan gobolkeenna. Dastuurku waa dhinaceenna, waxaanan u dagaallami doonnaa inaan difaacno annagoo adeegsanayna wax kasta oo aan hayno’’

19. 17 Jannaayo 2026Dawada Paracetamol-ka ee Trump uga digay haweenka oo la sheegay wax dhib ah aysan lahayn

    Dib-u-eegis weyn oo lagu sameeyay caddaynta sayniska ayaa lagu ogaaday in uusan jirin wax xiriir ah oo qaadashada paracetamol-ka oo saamaynaya uurka, autism-ka, ADHD ama naafanimada maskaxda ee carruurta.

    Natiijooyinkani waxay ka hor imaanayaan sheegashooyinkii Madaxweynaha Trump sanadkii hore ee ahaa in haweenka uurka leh ay ka fogaadaan qaadashada daawadan oo Maraykanka looga yaqaan Tylenol – taasoo caadi ahaan loo isticmaalo in lagu yareeyo xanuunka iyo qandhada.

    Cilmi-baarayaashu waxay eegeen 43 daraasadood oo ay ku lug leeyihiin boqolaal kun oo haween ah.

    Waxay sheegeen in haweenka la dejin karo oo lagu kalsoonaan karo in paracetamol si nabad ah loo isticmaali karo. Waaxda caafimaadka ee Maraykanka ayaa dhaleeceysay daraasadda, iyaga oo sheegay in khubaro kale ay muujiyeen walaac.

20. 17 Jannaayo 2026Qoyska hoggaamiyaha Mucaaradka Uganda oo sheegay Bobi Wine la la'yahay meel la geeyay

    Wiilka uu dhalay hoggaamiyaha mucaaradka Uganda, Bobi Wine, ayaa sheegay in ciidanka iyo xoogagga gaarka ah ay qafaasheen labadiisa waalid oo geeyeen meel aan la garanayn.

    Goor sii horaysay, Bobi Wine wuxuu sheegay in lagu hayay xayiraad guri ka dib markii uu ka cabanayay khiyaano ka dhacday doorashadii madaxweynaha ee Khamiista.

    Dowladdu kama aysan bixin wax faallo ah, iyada oo ay jirto xannibaada internet-ka oo guud, taasi oo ay ka dhigay mid adag in la helo faahfaahino dheeri ah.

    Iyadoo ku dhowaad dhammaan codadkii la tiriyay, wararka ayaa sheegaya in Madaxweyne Museveni uu si wanaagsan ugu horeeyo nitiijooyinka soo baxaya, iyada oo markii toddobaad uu doonayo inuu dalkaasi hoggaamiyo.