Dabka Los Angeles oo sii fidaya iyo dadka ku dhimanaya oo laga cabsi qabo in tiradoodu ay kororto

Tebin toos ah

1. 10 Jannaayo 2025Maraykanka oo kordhiyay lacagta la siinayo cidda keenta xog horseeda in la soo xiro madaxweynaha maanta markii sedexaad xilka loo dhaariyay dalka Venezuela

   

   Xigashada Sawirka, Getty Images

   Maraykanka ayaa ku dhawaaqay in uu gaarsiiyay lacagta la siinayo cidda keenta xog horseeda in la soo xiro madaxweynaha Venezuela Nicolás Maduro oo maanta markii sedexaad loo dhiiraiyay xilka madaxweynaha wadankaasi $25 milyan.

   Xafaladda caleema saarka madaxweyne Nicolás Maduro waxan xaadirin madax ka socota dunida iyo hoggaamiyayaasha mucaaradka.

   Sidoo kale waxa abaal marin la siin doonaa cidda xog lagu soo qabto keenta wasiirka arimaha gudaha Diosdado Cabello.

   Waxa kale oo $15 milyan la siin doonaa qofka xog ka keena wasiirka difaaca Vladimir Padrino.

   Dawladda UK ayaa iyana cunaqabatayno ku soo rogtay illaa 15 xubnood oo xilal sare ka haya dawladda Venezuela gaar ahaan garsoorka, ciidamada iyo xoogagga ammaanka.

   Xafiiska horumarinta barwaaqo sooranka UK ayaa sheegay in kuwa cunaqataynta lagu soo rogay ay ka masuul ahaayeen “dimoqaraadiyadda oo la wiiqo, sharciga oo lagu tunto iyo xadgudubyo ka dhan ah xuquuqda aadamaha”.

   Xoghayaha arimaha dibadda UK David Lammy ayaa ku tilmaamay taliska Maduro mid “khaa’in ah”.

2. 10 Jannaayo 2025Ra’isul Wasaare Abiy Axmed oo gambaleelka u yeeriyay suuqii ugu horeeyay ee saamiyada ee ay Itoobiya yeelato tan iyo xiligii boqor Xayle Salaase

   

   Xigashada Sawirka, barta facebook Abiy Ahmed Ali

   Ra’isul Wasaaraha Itoobiya Abiy Axmed ayaa maanta si rasmi ah u furay suuqa saamiyada ee Itoobiya oo ah kii ugu horeeyay ee laga sameeyo mid kamid ah wadamada ugu koboca badan dhaqaalaha Afrika muddo konton sano ah.

   Kadib markii uu gambaleelka u yeeriyay suuqa cusub ayaa ra’isul wasaare Abiy waxa uu hoosta ka xariiqay in tani tahay yool gaaris taariikhi ah oo uu gaaray dhaqaalaha Itoobiya iyo hannaanka maaliyadda ee dalkaasi.

   “Waxan si rasmi ah gambaleelka ugu yeerinay furitaanka suuqa saamiyada – suuqii ugu horeeyay ee saamiyada ee dalkeena. Maalgalinta Itoobiya – koboca dhakhsaha leh ee dhaqaalaha iyo firfircoonida aan u qaadnay dhinaca barwaaqada,” ayuu ku qoray Abiy barihiisa bulshada.

   Itoobiya ayaa lahayd suuq saami muddo 14 sano ah xiligii boqor Xayle Salaase, balse waxa meesha ka saartay 1974-kii dawladdii milatariga ahayd ee isaga afgambisay.

3. 10 Jannaayo 2025Booliska dalka Koonfur Afrika oo soo badbaadiyay muhaajiriin iyagoo qaawan afduub loo haystay

   

   Xigashada Sawirka, Getty Images

   Booliska dalka Koonfur Afrika ayaa soo badbaadiyay 26 muhaajiriin ah oo la rumeysan yahay in ay ahaayeen Itoobiyaan, kuwaas oo afduub loogu haystay guri ku yaala magaalada Johannesburg.

   Shan iyo toban kamid ah muhaajiriinta waxa laga helay guri iyagoo qaa qaawan, halka 11 kale oo dhaawacyo yaryar qaba laga helay meel ku dhaw guriga.

   Hawlgalka lagu soo badbaadiyay dadkan ayaa ka dhacay habeenimadii Khamiista daafaha waqooyi bari ee magaalada, kadib markii xog laga helay dadka jaarka la ahaa sida boolisku sheegay. Sedex qof ayaa la xiray.

   Ma cadda sida muhaajiriintan ay ku yimaadeen dalka Koonfur Afrika balse maamulka ayaa baaraya haddii ay dhibanayaal u yihiin kuwa ka ganacsada tahriibinta.

   Bayaan ka soo baxay booliska ayaa lagu sheegay in ay burburiyeen “shabakad dadka tahriibisa”.

   Saraakiishu faahfaahin dheeraada kama bixin xaaladdaha lagu haystay muhaajiriinta ama sababta qaarkood ay u qaawanaayeen.

   Intii hawlgalku socday qaar baa daaqaddaha ka booday sida boolisku sheegay, waxana gaaray dhaawacyo, waxana loo qaaday isbitaalka.

4. 10 Jannaayo 2025Israa’iil oo qorsheynaysa in milatari ahaan iyo mukhaabaraad ahaanba ku qabsato deegaan cusub gudaha Suuriya

   

   Xigashada Sawirka, Getty Images

   Masuuliyiin sare oo Israa’iiliyiin ah ayaa laga soo xigtay in Israa’iil u baahan tahay joogitaankeeda Suuriya, iyadoo gudaha ugu sii dhaadhacaysa illaa 15 km (9.3 Mile) si ay damaanad ugu hesho in aanay u suurtagalin kooxaha taageersan maamulka cusub in gantaallo ku soo ridaan dhulka sare ee buurraha golan.

   Wargayska Israa’iil ka soo baxa ee Diot Ahronot ayaa masuuliyiin ka soo xigtay in lagama maarmaan tahay in gudaha loo galo Suuriya illaa 60 km (37 Mile) iyadoo mukhaabaraadka Israa’iil uu arinta gacanta ku hayn doono si loola socdo dhaqdhaqaaqyada iyo ka hortaga khatar soo fool leh.

   Wargeyska ayaa intaa ku daray in masuuliyiinta Israa’iil la yaaban yihin sida reer galbeedku “isakaga indha tirayaan” nidaamka cusub ee Suuriya ka hanaqaaday ee uu hoggaaminayo Axmed Al-Sharci (oo horey loogu aqoon jiray Abuu Maxamed Al-Guulaani).

   Wargeyska ayaa diiradda saaray taariikhda hoggaamiye Axmed Al-Sharci iyo xiriirkii uu horey ula lahaa ururka Al-Qaacida kahor inta aanu iska bari yeelin, waxayna masuul Israa’iil ah ka soo xigatay isagoo oranaya; “Maraykanka, Ingiriiska iyo Jarmalku waxay sharciyad siinayaan nin dad qalato ah”, waa sida uu hadalka u dhigaye.

5. 10 Jannaayo 2025Madaxweyne ay si weyn u diidan yihiin Maraykanka iyo Dawladdaha Reer Galbeedka oo maanta markii sedexaad xilka loo dhaarinayo

   

   Xigashada Sawirka, AFP

   Madaxweynaha Venezuela Nicolas Maduro oo xafiiska joogay tan iyo 2013-kii ayaa lagu wadaa in maanta oo Jimce ah markii sedexaad loo dhaariyo xilka, inkastoo mucaaradad xoog leh ay kaga imaanayso gudaha iyo dibaddaba.

   Hoggaamiyaha mucaaradka Maria Corina Machado oo dhuumasho ku jirtay ayaa dibadda is keentay iyadoo hoggaaminaysay isu soo baxyadii shalay ka dhacay caasimadda Caracas sida ay ku warantay wakaaladda warrarka ee AFP.

   Hoggaamiyahan ayaa muddo kooban xirnayd kadib markii lagu dhawaaqay natiijada doorashada oo mugdi badan iyo wax isdaba marin hareysay.

   Dawladda ayaa diiday eedeynta xariga.

   Madaxweynaha la doortay ee Maraykanka Donald Trump ayaa ku tilmaamay hoggaamiyayaasha mucaaradka halgamayaal xornimo doon.

   Waxa uu yiri “waa in aan la dhibaatayn, waa in ay nabad ahaadaan oo ay noolaadaan” ayuu ku qortay barta bulshada ee loo yaqaano True.

   Muddo xileedkii hore ee madaxweyne Trump waxa uu cunaqabtayno ad adag ku soo rogay taliska madaxweyne Maduro oo uu sheegay in uu ka horyimid nidaamka dimoqaraadiyada.

   Cunaqabataynada qaar ayaa waxa qaaday madaxweynihii isaga badalay ee Joe Biden, waxana laga yaabaa in Trump uu markale soo celiyo.

6. 10 Jannaayo 2025Madaxweynaha Rwanda oo iska fogeyay in dowladdiisu ay taageerto fallaagada M23 ee ka dagaallanta Congo

   

   Xigashada Sawirka, Reuters

   Madaxweynaha Rwanda Paul Kagame ayaa ku adkeystay in fallaagada M23 ee dagaallada ka wada Jamhuuriyadda dimuquraadiga ah ee Congo aysan wax dhaqaale ah ka helin dowladdiisa sida uu sheegay.

   Madaxweyne Kagame ayaa ku macneeyay in dagaalka ka socda bariga Kongo uu sanado badan soo socday, waxaana uu waydiiyay “Dadka halkan jooga miyaanay ogayn sida uu dagaalkani ku bilowday, dagaalkani waxa uu bilowday sanado badan ka hor mana ka iman dalka Rwanda”.

   Waxa uu intaasi ku daray “Xitaa ma hayo wax aan sheego sababtoo ah dagaalka waxaa bilaabay kooxo ku sugnaa Congo oo laga yaabo in qaarkood ay asal ahaan ka soo jeedaan Rwanda balse u soo haajiray Congo ilaa xilligii gumeysiga”.

   Madaxweyne Kagame ayaa sheegay in inkasta oo madaxda Congo ay u muuqdeen kuwo qiraya in fallaagada ay ka soo jeedaan Kongo, haddana waxaa la yaab leh in ay ku andacoonayaan in dagaalkan ay taageerto Rwanda.

   Si kastaba ha ahaatee, wuxuu carrabka ku adkeeyay in dagaalyahannada aysan ka imaan Rwanda, balse ay yihiin kuwo salka ku haya taariikh hore oo la xiriirta xilligii gumeysiga.

   Hadalka Madaxweyne Kagame ayaa imaanaya kadib markii kooxda M23 ay saddex maalmood ka hor la wareegeen magaalada Masisi ee bariga Jamhuuriyadda Dimuqraadiga ah ee Congo.Dadka dhaleeceeya Rwanda ayaa ku eedaynaya inay M23 u adeegsato macdanta laga soo saaro bariga Jamhuuriyadda Dimuqraadiga ah ee Congo, sida dahabka, iyo macdanno kale, kuwaas oo lagu sameeyo telefoonnada gacanta iyo baytariyada baabuurta korontada.

   Bishii hore, Jamhuuriyadda Dimuqraadiga ah ee Congo waxay sheegtay inay shirkadda Apple ku dacwaynayso isticmaalka "macdanta ", taas oo keentay in shirkadda weyn ee tignoolajiyada ay sheegto inay joojisay macdantii ay ka heli jirtay labada waddan.

   Rwanda ayaa beenisay in ay qayb ka tahay dhoofinta sharci darrada ah ee macdanta Jamhuuriyadda Dimuqraadiga ah ee Congo.

7. 10 Jannaayo 2025Galmudug iyo Puntland oo sheegay in ay xal ka gaareen dagaal beeleedyo muddo ka dhacayay qaybo ka tirsan gobolka Mudug

   

   Xigashada Sawirka, FACEBOOK

   Maamullada Galmudug iyo Puntland ayaa xal ka gaaray colaad in muddo ah ka dhex jirtay beelo wada dega deegaanno ka tirsan gobolka Mudug.

   Wasiirro iyo madax dhaqameed ka kala socday maamullada Puntland iyo Galmudug oo maalmahaanba ku howlanaa xalinta dagaalladan ayaa ugu dambeyn shalay ka soo saaray qodobbo meesha looga saarayo coladdaas iyo waxyaabihii dhaliyay.

   Beelaha dagaallamay oo ka soo kala jeeda magaalada Galdogob iyo Koonfurta Gaalkacyo ayaa dagaalkoodu soo noqnoqday, waxaana uu salka ku hayay dhul-daaqsimeed.

   Dad badan ayaa labada dhinacba kaga geeriyooday dagaalladaas mararka kala duwan dhacay.Marar hore oo xal laga gaaray ma noqon tallaabooyinkaasi kuwa sii shaqeya.

8. 10 Jannaayo 2025Booliska Los Angeles oo xiray nin la sheegay inuu doonayay inuu dab qabadsiiyo deegaan cusub

   

   Xigashada Sawirka, Getty Images

   Booliska Los Angeles ayaa sheegay in ay xireen nin looga shakisan yahay in uu doonayay inuu dab qabadsiiyo deegaanka Woodland Hills ee magaaladaas.

   War qoraal ah ayaa lagu sheegay in saraakiishu heleen taleefoon ku saabsan " tuhmanaha la sheegay inuu doonayay inuu dab qabadsiiyo deegaanka Woodland Hills, kadibna sidaa ayay ugu baxeen oo ay u soo qabteen

   "Eedaysanuhu waa xiranyahay hadda waxaana loo sii qaaday Saldhigga Topanga." ayaa lagu yiri qoraalka la soo saaray.

   Waddada Ybarra oo loo maleynayo in eedaysanuhu uu dab ka kicin rabay waxay waqooyiga ka xigtaa aagga uu dabku ka holcayo ee Palisades tan iyo Talaadadii, laakiin booliisku waxay tilmaameen in baaritaan uu socdo si loo xaqiijiyo wax dhabta ah ee jira.

9. 10 Jannaayo 2025Tirada dadka ku dhintya dabka ka holcaya Los Angeles oo korortay

   

   Xigashada Sawirka, John Sudworth / BBC

   Tirada dhimashada dabka ka holcaya Los Angeles ayaa kor u dhaaftay 10 qof, sida ay masuuliyiintu sheegeen - laba jibaar tirada lagu dhawaaqay saacado ka hor.

   Mas‘uuliyiinta caafimaadka ee Los Angeles ayaa sheegay in haraadiga dadkan weli la raadinayo.

   "Aqoonsigu dadka wuxuu qaadan karaa dhowr toddobaad maadaama Waaxda Baarista Caafimaadku aanay awoodin inay ka jawaabto dhammaan xaaladaha dhimashada sababo la xiriira jawiga dabka iyo welwelka oo sarreeya," ayaa lagu yiri war ka soo baxay mas’uuliyiinta magaalada.

10. 10 Jannaayo 2025Daawo: Sawirro muujinaya baaxadda khasaaraha iyo burburka dabku ka gaystay Los Angeles

    Sawirro laga soo qaaday goobaha dabku cagta mariyay ee magaalada Los Angeles ayaa muujinaya burbur baaxd leh oo dabku gaystay, iyadoo dadkii lahaa guryaha gubtay iyo dhismayaasha halkaa laga daadgureyay.

    Dabka ayaan weli lagu guuleysan in la xakameeyo maadaama ay socdaan dabeylo xooggan oo keenay in hadba aag cusub uu ka kaco.

    

    Xigashada Sawirka, Getty Images

    

    Xigashada Sawirka, Getty Images

    

    Xigashada Sawirka, Getty Images

    

    Xigashada Sawirka, Getty Images

    

    Xigashada Sawirka, Getty Images

11. 10 Jannaayo 2025Dabka Los Angeles oo sii faafaya iyo mas'uuliyiinta magaalada oo xaaladda la warbixiyay

    

    Xigashada Sawirka, US Pool

    Duqa magaalada Los Angeles Karen Bass ayaa warbaahinta u sheegtay in dab cusub uu ka kacay halka lagu magacaabo West Hills, waxayna cabsi ka muujisay in si degdeg ah uu faafo maadaama ay jiraan dabeylo xooggan. Dadka magaalada Los Angeles ayay ku boorisay inay raacaan amarada daadgureynta.

    Madaxa waaxda dab damiska ee Los Angeles Kristin Crowley ayaa iyana sheegtay in labo dhimasho ah la diiwaan galiyay dabka deegaanka Palisades. Waa dhimashadii ugu horreysay ee la xaqiijiyay ee ka dhalatay dabka cusub. Balse irada guud ee dhimashada guudahaan dabka ayaa hadda maraysa toddobo qof.

12. 10 Jannaayo 2025Ku soo dhawaada tebinteenna tooska ah.