Warka farxadda leh ee ay heshay shirkadda Samsung iyo is bedelka lama filaanka ah ee kuyimid

Shirkadda Samsung ayaa ku dhawaaqday inay rajaynayso faa'iidadeeda saddexdii bilood ee ugu horreeysay sanadkan 2024-ka inay kor u kacdo in ka badan 10 jeer, marka la barbar dhigo sannadkii hore.

Tani waxay imaanaysaa iyadoo iyadoo shirkaddu ay kasoo kabsaneyso hoos u dhacii ka dhashay masiibada, iyo baahida qalabka la xiriira sirdoonka macmal ah oo kor u kacday.

Shirkadda Samsung oo fadhigeedu yahay dalka Kuuriyada Koonfureed ayaa ah shirkadda ugu weyn ee samaysa qalabka kaydka xusuusta, telefoonnada casriga ah iyo telefishinnada adduunka laga isticmaalo.

Shirkadda ayaa loo qorsheeyay inay soo saarto warbixin maaliyadeed oo faahfaahsan 30-ka Abriil.

Shirkadda weyn ee tignoolajiyadeed ayaa ku qiyaastay in faa'iidada shaqadeeda ay kor u kacday 6.6 trillion oo ay ku guuleystay ($ 4.9 bilyan) 2023-kii. Tani waxay dhaaftay filashooyinka falanqeeyayaasha qiyaastii 5.7 boqolkiiba. Hal tirilyan ayaa ah dheeraad marka loo eego intii la filayay.

Faa'iidadeeda ayaa la filayaa in lagu kordhiyo soo kabashada qiimaha alaabaha qaar ee suuqyada caalamiga ah, kadib hoos u dhac weyn oo ku yimid sannadkii hore.

Waxa lagu qiyaasaa in qiimaha kaydiyeyaasha xasuusaha ee adduunka uu kor u kacay ilaa shan meelood meel sannadkii hore.

Qaybta soo saarka kaydiyeyaasha ee Samsung inta badan waa isha dakhliga ugu weyn ee shirkadda.

Baahida qalabkan ayaa sidoo kale la filayaa inay sii ahaato mid xooggan sanadkan, taas oo ay ugu wacan tahay kobcinta tignoolajiyada sirdoonka macmalka ah.

Dhulgariirkii ku dhuftay Taiwan 3-dii Abriil ayaa yarayn kara qalabka qaar ee adduunka, taasoo u oggolaan karta Samsung inay sare u qaaddo qiimaha.

Taiwan waxay hoy u tahay dhowr shirkadood oo waaweyn oo soo saara qaybo kamid ah qalabka kaydinta, oo ay ku jiraan TSMC alaab-qeybiyaha Apple iyo NVIDIA.

Halka TSMC ay sheegtay in dhulgariirku uusan saameyn weyn ku yeelan wax soo-saarkeeda, haddana waxaa jirta in howleheeda ay ku yimaadeen carqalado aan badneyn oo uu sababay dhul gariirka.

Samsung ayaa sidoo kale la filayaa inay faa’iido badan ka hesho iibka taleefannadeeda casriga ah ee cusub ee Galaxy S24, kaas oo la soo bandhigay bishii Janaayo ee la soo dhaafay.

Dalka Taiwan ayaa Arbacadii waxaa ka dhacay dhul gariir cabbirkiisu dhan yahay 7.4, waana dhulgariirkii ugu xoogganaa muddo 25 sano ah.

Dhismayaasha ku yaalla caasimadda Taipei iyo nawaaxigeeda ayaa si xooggan u ruxmay, waxaana laga cabsi qabaa in tirada waxyeelladu ay badantahay, gaar ahaan magaalada Hualien, oo u dhow xuddunta.

Qalabka kaydinta ee horumarsan waxa loo adeegsadaa in lagu xoojiyo kombuyuutarrada waaweyn, qalabka sirdoonka macmalka ah iyo qalabka milatariga.

Mareykanka ayaa doonaya in uu xaddido awoodda Shiinaha uu ku heli karo qalabkan elektaroonigga ah, kuwaas oo loo arko in ay yihiin qayb muhiim ah oo ka mid ah dhammaan aaladaha elegtarooniga ah, laga bilaabo taleefannada casriga ah ilaa hubka iyo qalabka militariga.

Bishii Oktoobar 2022-kii, Washington waxay ku dhawaaqday qaar ka mid ah xayiraadaha dhoofinta ee ugu ballaaran, taasoo ka dhigaysa shirkadaha doonaya inay u dhoofiyaan Shiinaha in looga baahan yahay inay helaan shatiga dhoofinta.

Xayiraadaha waxaa ka mid ahaa qalabkan muhiimka ah, iyadoo la isticmaalayo qalabka kombuyuutarka Mareykanka ama software oo aan loo eegin ama la ogaan Karin meesha adduunka looga isticmaalay.

Xayiraadaha ayaa sidoo kale ka hortagaya muwaadiniinta Mareykanka iyo dadka haysta kaarka cagaaran inay u shaqeeyaan qaar ka mid ah shirkadaha Shiinaha. Dadka haysta kaarka cagaaran waa deganeyaal rasmi ah oo Maraykan ah waxayna xaq u leeyihiin inay ka shaqeeyaan dalka.