Jeffrey Epstein: kumuu ahaa ninkaan xiriirka la lahaa dadka ugu awoodda badan dunida?

Epstein wuxuu ku dhintay qolka uu kaga xirnaa xabsiga New York 10 kii Agoosto 2019 isagoo sugaya, maxkamadeyntiisa eedeymaha ka ganacsiga galmada, iyada oo aan fursad loo siin dammaanad uu banaanka ku joogo.

Waxay timid in ka badan toban sano ka dib markii lagu xukumay inuu galmoo la sameeyay ilmo aan qaan-gaarin, kaas oo loo diiwaan geliyay dembiilaha galmada.

Markan, waxaa lagu eedeeyay inuu maamulo "shabakad aad u ballaaran" oo ka shaqaysa galmada gabdhaha da'doodu yar tahay. Wuxu diiday dambiga.

Bishii Noofambar 2025, labada aqal ee Congress-ka Mareykanka ayaa si weyn u ansixiyay Xeerka Daah-furnaanta Faylasha Epstein. Wax yar ka dib, madaxweyne Donald Trump ayaa saxiixay sharciga ku amraya waaxda cadaaladda inay sii daayaan 19 ka Diseembar dhammaan faylalka ay ku jiraan baaritaannada dambiyada ee ka dhacay Epstein.

Qaar ka mid ah faylasha ayaa la daabacay maalinta kama dambaysta ah, waxaana jiray sii deyno xigay toddobaadyadii xigay.

'Terrific guy'

Wuxuu ku dhashay kuna koray New York, isag oo isla magalada ka noqday macalin xisaab iyo fiisigis gaar ahaan dugsiga gaarka loo leeyahay ee Dalton bartamihii 1970- aadkii. Isaga laftiisu waxa uu bartay cilmiga fiisigiska iyo xisaabta jaamacadda, inkasta oo aanu waligii qalin jabin.

Aabaha mid ka mid ah ardaydiisa ayaa la sheegay inuu aad ula dhacay Epstein kadibna waxa uu baray masuul sare oo wax ka leh bankiga Bear Stearns ee ku yaalla wadada Wall Street.

Sanado gudahood waxa uu wada shaqayn la yeeshay bankiga. Sannadkii 1982, wuxuu abuuray shirkad u gaar ah oo lagu magacaabo J Epstein iyo Co.

Shirkaddu waxay maamushay hantida macaamiisheeda oo qiimaheedu ka badan yahay $1bn (£800m) waxayna ahayd guul degdeg ah. Epstein wuxuu markiiba bilaabay inuu hantidiisa oo ay ku jiraan dabaq ah oo ku yaal Florida, beer ku taal New Mexico, iyo guriga ugu weyn ee gaarka loo leeyahay ee New York uu ku bixiyo dhaxgalka iyo isfahan dadka caanka ah, fanaaniin iyo siyaasiyiin.

"Waxaan aqaanay Jeff muddo 15 sano ah "Shaki kuma jiro - Jeffrey wuxuu ku raaxaysanayaa noloshiisa bulsho."

Madaxwaynuhu waxa uu mar danbe sheegay in labadoodu kala lumeen horraantii 2000-nadii, sanado ka hor intaan la xirin Epstein. Wuxuu si joogto ah u diiday in uu sameeyay wax khalad ah oo la xiriira Epstein.

Aqalka Cad ayaa sheegay in Trump uu Epstein mar ka eryay naadigiisa "toban sano ka hor kadib markii uu si aan wanaagsan ula dhaqmay gabdho u shaqaynayay".

Trump laftiisa ayaa sheegay in Epstein uu "xaday" hablo da'yar oo ka shaqayn jiray naadigiisa xeebta Mar-a-Lago. "Mar haddii uu sidaas sameeyay, waxay noqotay dhamaadkiisa."

Sida Trump oo kale, Epstein waxaa la og yahay in uu lahaa saaxiibo kale oo magac sare leh, in kasta oo aysan muujinayn wax khalad ah oo ay sameeyeen dadkaasi.

Sannadkii 2002 dii, waxa uu u duuliyay Afrika Madaxweynihii hore ee Bill Clinton iyo jilayaasha Kevin Spacey iyo Chris Tucker iyaga oo racaay diyaarad khaas ah oo loo diyaariyay. Waxa uu sameeyay dalab aan lagu guulaysan oo uu ku iibsanayo majaladda New York isaga iyo soo saaraha filimaanta Harvey Weinstein sanadkii 2003 - isla sanadkaas waxa uu $30m ugu deeqay jaamacadda Harvard.

Waxa uu sidoo kale saaxiib la ahaa siyaasiga UK Peter Mandelson – saaxiibtinimadii uu Mandelson sheegay inuu ka qoomameeyay, taasoo ku kalliftay in uu iska casilo shaqadiisa safiirnimo ee Maraykanka 2025. Mandelson wuxuu mar dambe iska casili doonaa xisbiga shaqaalaha.

In kasta oo ay jiraan saaxiibo heer sare ah, Epstein wuxuu sidoo kale ku dadaalay inuu noloshiisa ka dhigo mid gaar ah, isagoo la sheegay inuu ka fogaaday dhacdooyinka bulshada iyo cashada makhaayadaha.

Waxa uu shukaansaday dumar ay ka mid tahay Miss Sweden Eva Andersson Dubin iyo Ghislaine Maxwell, gabadha uu dhalay qoraaga Robert Maxwell, in kasta oo aanu waligii guursan.

Rosa Monckton, oo ah maamulihii hore ee Tiffany & Co, ayaa ku sheegtay maqaal 2003 dii uu daabcay Vanity Fair in Epstein uu ahaa "nin aan la saadaalin karin" iyo "mid hoos u qodan".