Maxaan ka ognahay toogashadii ka dhacday Minneapolis?

Ciidamo ka tirsan dowladda Federaalka ayaa Sabtidii nin ku toogtay magaalada Minneapolis, waana qofkii labaad ee si xun loogu toogto magaalada intii uu socday howlgalka maamulka Trump ee dhaqangelinta socdaalka bishan.

Saraakiisha deegaanka ayaa ninkan magaciisa ku sheegay Alex Pretti oo 37 jir ah, wuxuuna heystaa dhalashada Mareykanka, wuxuuna ku noolaa magaalada Minneapolis, wuxuuna ka ahaa kalkaaliye caafimaad.

Waxaa soo baxay muuqaallo u muuqday kuwo muujinaya gacan ka hadal dhexmaray wakiillada iyo ninkii hoggaaminayay ilaa toogashada. Waaxda Amniga Gudaha (DHS) ayaa sheegtay in wakiillada ay rasaas isku difaacayeen ka dib markii Pretti, oo ay sheegeen in uu haystay qori gacmeed, uu iska caabbiyay isku daygii ay ku doonayeen in ay hubka uga dhigaan. Maamulka deegaanka ayaa su'aal ka keenay arrintaas.

Dhacdadan, oo timid labo toddobaad kadib toogashadii dhimashada sababtay ee Renee Nicole Good oo uu gaystay wakiilka socdaalka, ayaa horseedday mudaaharaadyo dheeraad ah iyo baaqyo cusub oo ka imanaya hoggaamiyeyaasha maxalliga ah oo ku baaqaya in wakiilada federaalku ay baxaan.

Waa kan waxa aan ognahay.

Xoogaa kahor toogashada

Toogashada ayaa ka dhacday agagaarka waddada Nicollet Avenue iyo 26th Street ee koonfurta Minneapolis abbaare 09:000 xilliga maxalliga ah.

Greg Bovino, Taliyaha Ilaalada Xudduudaha, ayaa sheegay in wakiilladu ay wadeen hawlgal "la beegsaday" oo lagu fulinayay socdaalka markii ninku uu u dhawaaday wakiillada isagoo wata bastoolad.

Wakiilladu waxay isku dayeen inay hubka ka dhigaan, ayuu yiri Bovino, laakiin "si xoog ayuu isaga caabbiyay" kadibna wakiilka Ilaalada Xudduudaha ayaa "riday rasaas is difaac ah".

Muuqaallo laga soo qaaday daqiiqado ka hor toogashada ayaa muujinaya Pretti oo duubaya wakiillada isaga oo taleefoonkiisa ku heysta bartamaha waddada. Foori iyo qeylo ayaa laga maqlayaa dadka meesha ka ag dhawaa.

Hal xagal, wakiil ayaa u muuqda inuu ku riixayo haweeney. Marka kaamaradu dib ugu noqoto Pretti, waxa la arkayaa isaga oo isku duubay haweeneyda. Wakiilka ayaa markaa u dhaqaaqaya si uu u riixo haweeney labaad. Isla mar ahaantaana, Pretti waxa uu fidiyay gacantiisa isaga oo kala dhex galay iyada iyo wakiilka.

Ka dib wakiilku walxo ayuu ku buufiyaa indhihiisa. Pretti wejigiisii ​​wuu leexiyay oo hal gacan ayuu kor u taagayaa. Waxa uu u muuqdaa in uu talefankiisa ku heysto gacanta kale.

Fiidiyow kale oo xagal kale ka yimid ayaa muujinaya wakiilka oo gacanta ku dhegaya Pretti, ka hor intaysan wakiillo badan ku soo biirin. Waxaa jiray dagaal dhex maray isaga iyo Pretti ka hor inta aan dhulka la dhigin. Dhowr xabbadood ayaa markaas la maqlay.

Xoghayaha Amniga Gudaha Kristi Noem ayaa tiri sidaas.

Kumuu ahaa qofka la toogtay?

Pretti wuxuu ahaa muwaadin Maraykan ah oo caddaan ah, wuxuuna degganaa Minneapolis, sida ay saraakiishu sheegeen. Booliisku waxay ku tilmaameen inuu yahay mulkiilaha qoriga sharciga ah, kaas oo la macaamilka kaliya ee la og yahay ee uu la lahaa sharci fulinta ay la xiriirto tigidhada baarkinka.

Hal muuqaal oo ay BBC-du xaqiijisay oo laga soo duubay gudaha dukaan kafeega oo ku yaal waddada Nicollet Avenue ayaa muujinaya xilliga ay wakiilladu ku hareeraysan yihiin oo ay dhulka dhigeen isaga. Mid ka mid ah ayaa u muuqda inuu dhowr jeer xabbad ku dhuftay ka hor inta aan la maqlin rasaasta. Pretti ayaa markaas dhulka ku dhacay.

Waaxda amniga gudaha ee Mareykanka ayaa sidoo kale soo wadaagtay sawirka waxa ay ku sheegtay qoriga uu sitay.

Waxa ay maamulka federaalku dheheen

Waaxda Amniga Gudaha ayaa xaqiijisay in sarkaal federaal ah uu nin ku dilay Minneapolis 9:05 xilliga maxalliga ah (15:05 GMT) ee 24-kii Janaayo.

Afhayeenkooda Tricia McLaughlin ayaa sheegtay in saraakiisha ilaalada xudduudaha ay fulinayeen "hawlgal qorsheysan" oo lagu qaaday "shisheeye sharci darro ah oo geysanayay weerar gacan ka hadal ah" markii qof uu lasoo baxay bastoolad 9mm ah.

"Saraakiishu waxay isku dayeen inay hubka ka dhigaan tuhmanaha laakiin tuhmanaha hubaysan ayaa si ba'an isaga caabbiyay," McLaughlin ayaa tiri.

"Isaga oo u baqaya naftiisa iyo nafta iyo badbaadada askarta kale, wakiil ayaa riday rasaas difaac ah. Dhakhaatiirta goobta ayaa isla markiiba gargaar caafimaad gaarsiisay goobta, laakiin waxaa la sheegay inuu ku dhintay goobta."

Shir jaraa'id oo uu qabtay ka dib, taliyaha ilaalada xudduudaha Greg Bovino ayaa sheegay in wakiilku "riday rasaas is difaacid ah".

Waxa ay maamulka gobolka iyo magaalada dheheen

Barasaabka gobolka Minnesota Tim Walz oo ka tirsan xisbiga Dimuqraadiga ayaa qoraal soo dhigay baraha bulshada isagoo sheegay in uu Aqalka Cad u sheegay in Minnesota "ay waajib ku tahay inay hoggaamiso baaritaanka" dhacdada kaddib.

Shir jaraa'id oo uu qabtay duqa magaalada Dimuqraadiga ee Minneapolis Jacob Frey waxa uu sheegay in hawlgallada ICE aysan ahayn kuwo abuuraya badbaado gudaha magaaladeenna, isaga oo ku sifeeyay hawlgallada kuwo "duullaan" ah oo ay soo qaadeen wakiillo wejiyada soo duubtay oo aan dareen lahayn.

Frey ayaa ku boorriyay madaxweynaha Mareykanka Donald Trump inuu "Minneapolis ku daro, ololaha Ameerika kow ka dhig" oo "hadda tallaabo qaado oo meesha ka saaro wakiilladan federaalka ah".

Waxa uu Trump yiri

Qoraal uu soo dhigay baraha bulshada, Trump wuxuu ku wadaagay sawirka bastoolad ay saraakiisha federaalku sheegeen inuu watay tuhmanaha.

"Aaway Booliskii deegaanka? Maxaa loo oggolaan waayay inay ilaaliyaan Saraakiisha ICE? Duqa magaalada iyo Gudoomiyaha ayaa celiyay? Waxaa la sheegay in qaar badan oo ka mid ah Booliskan loo oggolaan waayay inay shaqadooda qabsadaan, taasna ay keentay inay ICE naftooda difaacdo — waana wax aan sahlanayn!" ayuu qoray.

Iyadoo aanu soo xigan wax caddayn ah, Trump wuxuu ku eedeeyey mas'uuliyiinta deegaanka "qarin" ay ku qarinayaan xatooyo iyo khiyaano.

Wuxuu intaas raaciyey: "Duqa magaalada iyo guddoomiyuhu waxay hurinayaan kacdoon, iyagoo adeegsanaya hadallo is-qaad-qaad ah, khatar ah, oo kibir badni ku jiro... U DAAYA WADDANIYIINTEENNA ICE INAY SHAQADOODA QABTAAN!"