Wararkii ugu dambeeyay dagaal beeleed dad badan ku dhinteen oo ka dhacay gobolka Galagduud iyo sida hadda xaaladdu tahay

Tebin toos ah

1. 9 Juunyo 2024Wasiirkii Dagaalka ee Israa’iil Benny Gantz oo xlikii iska casilay

   Wasiirkii Gaashaandhigga Israel oo ka tirsanaa gGlaha Wasiiradda Dagaalka ee Israa’iil, Benny Gantz ayaa iska casilay xilkii uu ka hayey dowladda.

   Shir jaraa’id oo uu qabtay ayuu ku sheegay in ra’iisul wasaare Benjamin Netanyahu uu ka hortagayo waxa uu ugu yeeray guul dhab ah oo laga gaaro dagaalka ka dhanka ah Xamaas, wuxuuna sheegay in ay tahay in uu muddeeyo waqtiga doorashada. Mr Gantz waxa uu damacsanaa in uu hadalkan jeediyo sabtida balse waxa uu dib ugu dhigay iyada oo la eegayey howlgalka soo furashada la haystayaasha Israa’iil.

   Ka bixitaanka xisbigiisa ma dumin doono dowladda, laakiin waxay kordhin doontaa cadaadiska Mr Netanyahu ee dhaleeceynta kaga imaaneyso gudaha iyo dibadda.

   Bishii la soo dhaafay, Mr Gantz ayaa 8 June u qabtay Mr Netanyahu si uu u qeexo sida Israa’iil ay ku gaari lahayd lixda qoddob ee "Himilooyinka istaraatiijiyadeed", oo ay ku jiraan dhammaadka xukunka Xamaas ee Gaza iyo sameynta maamul rayid ah oo caalami ah oo dhulka ah.

2. 9 Juunyo 2024Xulka kubadda cagta Gobalka Nogob oo ku guulaysatay tartankii 11aad ee koobka Kubadda Cagta DDS

   Xulka Ciyaartooyda kubadda cagta ee Gobalka Nogob ee Dolwad Deegaanka,DDS ayaa ku guulaystay tartankii 11aad ee koobka Kubadda Cagta ee DDS.

   Kadib ciyaar ka dhacday Garoonka Kubadda Cagta Magaalada Jigjiga, Ciyaarta oo ahayd kama dambays ayaa dhexmartay Gobollada Afdheer iyo Nogob, iyada oo ay guushu ku raacday kooxda kubadda cagta Gobolka Nogob kadib markii ay 2-1 kaga badisay Gobolka Afdheer.

   Madaxwayne kuxigeenka DDS, mudane Ibraahim Cusmaan Faarax, Wasiirka Xafiiska Madaxwaynaha DDS, Dr. Xuseen Xaashi iyo masuuliyiin kale ayaa ka qayb'galay gabagabadii ciyaaraha gobaallada DDS ee ay koobka ku qaaden Gobolka Nogob, halkaas oo lagu guddoonsiiyay abaalmarino kala duwan kooxihii kaalimaha horre galay.

3. 9 Juunyo 2024Maxaa ku dhacaya jirkaada haddii aad isticmaasho Caffeine badan?

   Caffeine waa walxo firfircoon oo ku jira qaar ka mid ah cabitaannada laga jecelyahay dunida oo dhan , waxayna saameyn xooggan ku leedahay aadanaha. Su'aashu waxay tahay, maxaa dhacaya haddii aan isticmaalno xaddi badan oo kCaffeine ah?

   Caffeine waxaa si dabiici ah looga helaa koob kafeega iyo shaaha subaxdii, ama waxaa lagu dari karaa cabitaanka tamarta aad jeceshahay, marka lagu daro joogitaanka cabitaano fudud oo badan oo caan ah. Qaar badan, qiyaasta caffeine waxay siin kartaa jidhka iyo maskaxda kor u qaadida lagama maarmaanka ah ee dhaqdhaqaaqa haddii ay dhacdo in la dareemo caajisnimo.

   Si kastaba ha ahaatee, Maraykanka ayaa dhawaan hakiyay dhaqdhaqaaqa mid ka mid ah shirkadaha caanka ah ee soo saara cabitaanka liinta-macaan kadib markii lagu eedeeyay wax-soo-saarkooda inuu ku jiro xaddi badan oo Caffeine ah oo khatar ku ah jirka, inkastoo ay jiraan warar sheegaya in badeecadan ay ku jirto qiyaasta lagu taliyey ee maalinlaha ah ee caffeine ee dadka waaweyn, dalka gudihiisa.

   Go'aanku wuxuu dhaliyay su'aalo ku saabsan qadarkaCaffeine ee noqon kara xad-dhaafka, iyo muhiim ma tahay in la ogaado halka laga keenay caffeine?

   Inkasta oo ay jiraan tiro badan oo cilmi baaris badan oo muujinaysa in qaar ka mid ah cabbitaannada Caffeine ay leeyihiin faa'iidooyin caafimaad, haddana waxa jirta aqoon la'aan gaar ah oo ku saabsan qadarka caffeine ee la isticmaalo.

4. 9 Juunyo 2024Somaliland oo sheegtay in ay aasaaseyso Shirkad Diyaaradeed oo la yiraa Somaliland Airlines

   Madaxweynahaha Jamhuuriyadda Iskeed ugu dhawaaqday madaxbanaanideeda Muuse Biixi, ayaa khudbaddii uu maantay ka jeediyay Baarlamaanka waxa uu kusoo hadal qaaday in ay aasaasayaan Shirkad Diyaaradeed oo la yidhaahdo Somaliland Airlines, taas oo uu sheegay in la bilaabay qorshihii lagu hir gelin lahaa oo ay u horreyso farsamo yaqaanadii iyo duuliyeyaashii ka shaqayn lahaa.

   “Maanta waxa Hargeysa yaalla 4 Diyaaradood oo ah kuwa tababarka duuliyeyaasha. Diyaaradahaas waxa leh Somaliland”. Waxa kale oo Hargeysa jooga duuliyeyaashii iyo farsamo-yaqaanadii ardayda ku tababbari lahaa” ayuu yidhi Madaxweyne Biixi.

   Madaxweyne Muuse Biixi ma sheegin wakhtiga rasmiga ah ee qorshahan hirgelayo, balse wuxuu ku doodday in tallaabada koowaad tahay qjaanib farsamo yaqaano ah oo Hargeysa u jooga tababbarka arday noqon doonta duuliyeyaal.

5. 9 Juunyo 2024Maxamuud Axmadi Najad oo ku hungoobay hammigiisii ahaa inuu u tartamo xilka madaxweynimo ee Iran

   Iran ayaa ogolaatay lix musharax inay u tartamaan doorashada madaxtinimo ee dhamaadka bishan. Liiska ay ansixiyeen Golaha Ilaalada ayaa waxaa ka mid ah afhayeenka baarlamaanka Iran ee hadda jira Maxamuud Bagher Ghalibaf iyo madaxweyne ku xigeenka hadda Amir-Hossein Ghazizadeh Hashemi.

   Magacyada caanka ah ee laga saaray liiska murashixiinta waxaa ka mid ah madaxweynihii hore ee Maxamuud Axmadi Najad iyo afhayeenkii hore ee baarlamaanka Cali Larijani.

   Doorashada ayaa la muddeeyay kadib markii uu shil diyaaradeedu uku geeriyooday bishii hore madaxweynihii Iran Ebrahim Raiisi.

   Sii aqri: Hoggaamiyihii Iran mar laga jeclaa oo mar kale u tartamaya madaxtinnimada dalkaas

6. 9 Juunyo 2024Howlgal ay Israa’iil kusoo badbaadisay la haystayaal oo ay ku dhinteen 274 Falastiiniyiin ah

   Wasaaradda caafimaadka ee Xamaas ee Gaza ayaa sheegtay in weerar ay Israa’iil ku qaadday xero qaxooti – kaas oo horseeday in la soo badbaadiyo afar lahayste – ay ku dhinteen 274 qof oo ay ku jiraan carruur iyo dad kale oo rayid ah.

   Sabtidii ciidamada Israa’iil oo taageero ka helaya duqaymo xagga cirka ah, ayaa dagaal xooggan oo hubaysan kula galay Xamaas gudaha iyo hareeraha xerada qaxootiga ee Nuseirat, halkaas oo ay kusoo furteen maxaabiistii.

   Noa Argamani, 26, Almog Meir Jan, 22, Andrei Kozlov, 27, iyo Shlomi Ziv, 41, kuwaas oo laga soo qafaashay bandhig faneedka Nova 7 October ayaa dib loogu celiyay Israel.

   Milatariga Israel ayaa ku qiyaasay in wax ka yar 100 qof ay ku dhinteen howlgalka.

   Laakiin tirooyinkii ugu dambeeyay ee ka soo baxay wasaaradda caafimaadka ee Xamaas ee maamusho Gaza ayaa, haddii la xaqiijiyo, ka dhigi doonta mid ka mid ah maalmihii ugu dhimashada badnaa colaadda ilaa hadda.

   Dadka deegaanka ayaa sheegay in ay maqlayeen dhawaqa rasaasta iyo madaafiicda ay is weydaarsanayaan labada dhinac.

   Nin lagu magacaabo Abdel Salaam Darwiish, ayaa BBC-da u sheegay in isagoo ku sugan suuq uu khudaar ka soo iibsanayay uu maqlay diyaarado dagaal oo xagga sare ka yimid iyo dhawaqa rasaasta.

   "Kadib, meydka dadka ayaa googo'ay, oo daadsan waddooyinka, dhiig ayaana wasakheeyay darbiyada," ayuu yiri.

7. 9 Juunyo 2024Weriyihii BBC ee la la’aa maalmihii lasoo dhaafay oo meydkiisa la helay

   Xaaska weriyihii BBC ee TV-ga iyo raadiyaha Dr Michael Mosley, oo lagu waayay jasiiradda Symi ee dalka Giriiga, ayaa ku sifeeysay "ninkeeda, mid cajiib ah, qosol badan, naxariista leh oo qurux badan"

   Hadal qoraal ah oo ay soo saartay Clare Bailey Mosley ayay ku sheegtay in ninkeeda " uu sameeyay in u fuulo meel sare oo uu qaaday waddo qaldan, uuna ku dhacay meel aan si fudud loo arki karin"

   Meyd ayaa laga helay goor soo horreysay maantay oo Axad ah agagaarka xeebta Agia Marina ka dib markii Mosley la waayay xilli uu fasax ku qaadanayay jasiiradda isaga iyo xaaskiisa.

   Wuxuu ka tagay xeebta Agios Nikolaos ka hor inta uusan u dhaqaaqin bartamaha jasiiradda maalintii Arbacada. Maalintaas aad bay u kululeeyd Symi, iyadoo heerkulku uu gaaray 40C galabtii

   Ilo ka tirsan booliiska ayaa BBC-da u sheegay in qofka dhintay uu meeyd ahaa"muddo maalmo ah"

   Weriyahan Telefishinka ayaa ahaa nin caan ah, wuxuu caan ku ahaa barnaamijyada BBC-da oo ay ka mid yihiin podcast-ka Just One Thing iyo taxanaha barnaamijka, Trust Me, I'm A Doctor.

   Baadi goobkiisa waxaa ka qeeyb qaatay dhinacyo badan oo ay ku jiraan diyaardaha qumaatiga u kaco.

8. 9 Juunyo 2024Muuse Biixi oo ku eedeeyey Xisbiga Waddani in uu hagardaameynayo deganaanshaha Somaliland

   Madaxweynahaha Jamhuuriyadda Iskeed ugu dhawaaqday madaxbanaanideeda, Muuse Biixi Cabdi oo mantay Khudbad ka jeediyay Baarlamaanka somaliland, ayaa ku eedeeyey Xisbiga Mucaaradka ah ee Waddani inuu hagardaameeyey geeddi-socodka deganaanshaha Somaliland, waxa uuna yiri “Dimuqraadiyadda iyo Doorashooyinku waxay leeyihiin xanaftooda".

   "Doorashadii Madaxtooyada ee 2017-kii Xisbigii guulaystay wuxuu dheeraa kii ku soo xigay Siddeetan Kun oo Cod (80,000), hase yeeshee Xisbigii laga helay Doorashada si dhab ah uguma qancin. Haddaba, Xisbigii laga helay wuxuu bilaabay talaabooyin dhawr ah oo hagardaamo ku ah geedi-socodka deganaanshaha siyaasadeed ee dalka.”

   Isaga oo hadalkiisa sii wata Muuse Biixi, waxa uu intaasi raaciyey “Iyada oo Qaranku uu u midaysan yahay difaaca dalka ayaa waxa dhacday 11-kii Bishii August 2023-kii Shir-qoolkii Buurta Gacan-libaax ee lagu laayey Ciidankii Booliska, dhagartaas laga galay qaranku waxay ahayd mid ugub ku ah Somaliland. Qaranku dhagartaa kuwii gaystay Caddaalada ayuu horkeeni doonaa.”

9. 9 Juunyo 2024Waxaa maanta deggan xaaladda goobihii shalay lagu dagaallamay ee Gobolka Galgaduud

   Wararka ka imaanaya goobihii dagaalladu ka dhaceen shalay ee waqooyiga Gobolka Galgaduud ayaa lasoo werinayaa in xaaladdu ay maanta deggentahay wax dagaal ahna uusan ka dhicin.

   Ciidamada Dowladda Federaalka iyo kuwa maamul goboleedka Galmudug ayaa kala dhexgalay labada dhinac,iyada oo maleeshiyo beeleedkii uu shalay dagaalka dhexmarayna ay kala joogaan furimhii ay shalay dagaalka kasoo kala qadeen.

   Dhimashada ayaa gaareeyso ugu yaraan 40 qof halka dhaawacuna uu intaas ka badanyahay.

   Dhanka kale Madaxweynaha Galmudug Axmed Cabdi Kaariye Qoor-Qoor ayaa magacaabay guddi wasiiro ah si ay waan waan nabadeed uga dhex dhaliyaan labada beelood ee dagaallamay.

10. 9 Juunyo 2024Nuxurka Khudbaddii Madaxweyne Muuse Biixi ka Jeediyey Baarlamaanka

    Madaxweynaha Jamhuuriyadda iskeed ugu dhawaaqday maadxbanaanideeda ee Somaliland Muuse Biixi Cabdi oo maanta khudbad sannadeedkii 2024-ka ka jeedinayey Barlamaanka, ayaa ka hadlay arrimo kala duwan oo ay ka mid tahay doorashooyinka, Heshiiskii Isfaham ee Somaliland iyo Itoobiya iyo siyaasadda gudaha.

    Madaxweyne Biixi ayaa sheegay in doorashooyinka isku sidkan ee Madaxtooyada iyo Ururrada la filayo in ay dhacaan bisha November ee sannadkan, kuwaas oo ay ku baxayso lacag gaareeyso 20 Milyan oo dollar. “Doorashooyinka Miisaaniyadda ku bixi doonta waxay noqoneysaa lacag dhan 20 million oo dollar, lacagtaasina waxay ka baxaysaa Miisaaniyadda Dowladda ee laga ururiyo cashuur-bixiyeyaasha dalka.”

    Muse Biixi mar uu ka hadlayey heshiiskii Isfaham ee Somaliland iyo Itoobiya, waxa uu yiri “Is-af-garadka Ethiopia iyo Somaliland dhex-maray 1-dii January waxa sal u ah laba dal oo midna Aqoonsi helayo, midna Saldhig Ciiidan Baddeed oo kiro ah helayo. Nuxurka wax-wada-qaybsigu waa horumarinta ganacsiga, iyada oo Dekedda Berbera ay u adeegi doonta dadka iyo dalka Ethiopia.”

    Madaxweyne Biixi oo ka hadlayey dooddii bilihii u dambeesyey ka taagnayd maamulka hawada Somalia ayaa yidhi “Somaliland waxay la wareegtay 100% Maamulka Hawada Sare ee Jihada Waqooyi. Sidoo kale waxay la wareegtay 50% Maamulka Hawada Sare ee Jihada Koonfureed. Taasi waxay muujinaysaa in Soomaaliya ay maamusho oo kaliya 250 Nautical Mile oo u dhiganta Kaliya 463 KM oo Hawada Sare ee dhulkii Jamhuuriyaddii duntay ee Somali Republic”

11. 8 Juunyo 2024Qaramada Midoobay oo militariga Israel ku dartay liiska hay’adaha xadgudubyada u geysta carruurta

    Waxaa sii xoogeysanaya khilaafka u dhaxeeya Israa’iil iyo Qaramada Midoobay kadib markii Qaramada Midoobay ay militariga dalkaas ku dartay liiska hay’adaha xadgudubyada u geysta carruurta, sida Xamaas.

    Ergeyga Qaramada Midoobay u qaabilsan Israa’iil ayaa warkan faafiyay toddobaad ka hor inta aan liiska golaha la horgeyn, Golaha Ammaanka (isagoo soo bandhigay muuqaal taleefoon oo uu soo diray sarkaal ka tirsan Qaramada Midoobay).

    Ra'iisul wasaaraha Israa'iil, Benjamin Netanyahu ayaa sheegay in Qaramada Midoobay ay tahay mid khiyaali ah. Laakiin afhayeenka xoghayaha guud ayaa sheegay in habka ay ku timid warbixinta uu ahaa mid si wanaagsan loo dhisay oo hufan.

    Xadgudubyada ayaa lagu soo waramayaa in ay ka mid yihiin weerraro lagu qaaday iskuulada iyo isbitaalada iyo diidmada gargaarka.

    Afhayeenka ayaa sidoo kale ku dhaleeceyay ergayga Israa’iil warka sirta ah, isagoo ku tilmaamay mid naxdin leh oo aan la aqbali karin.

12. 8 Juunyo 2024Cirbixiyeenkii Maraykanka ee qaaday sawirkii caanka noqday ee dhulka oo ku dhintay shil diyaaradeed

    Cirbixiyeenkii Apollo 8 Bill William Anders, oo qaaday mid ka mid ah sawirada ugu caansan ee laga soo qaaday hawada sare, ayaa ku dhintay shil diyaaradeed isagoo 90 jir ah.

    Saraakiisha ayaa sheegay in diyaarad yar oo uu la socday ay ku dhacday badda gobolka Washington.

    Wiilka Anders Greg ayaa xaqiijiyay in meydka aabihiis la helay galabnimadii Jimcaha.

    "Qoysku aad bay u murugeysanyihiin, wuxuu ahaa duuliye weyn, waa la tabi doonaa," ayaa lagu yiri qoraal ka soo baxay qoyska.

    Anders - oo ahaa duuliyaha dayaxa ee howlgalka Apollo 8 - ayaa qaaday sawirka astaanta u ah Earthrise, mid ka mid ah sawirada ugu xusuusta iyo dhiirigelinta badan ee Dhulka ee hawada sare laga qaaday.

13. 8 Juunyo 2024Afar lahayste oo lagusoo furtay howlgal milateri oo ka dhacay Gaza

    Afar la haystayaal oo ay Xamaas ka qafaasheen xafladii muusiga ee Nova intii lagu jiray weeraradii 7 October ayaa lagu soo badbaadiyay weerar maalinle ah oo ka dhacay bartamaha Gaza.

    Noa Argamani, 26, Almog Meir Jan, 22, Andrei Kozlov, 27, iyo Shlomi Ziv, 41, ayaa lagusoo furtay " hawlgal adag oo halis ah" oo ka dhacay laba dhismo oo kala duwan oo ku yaala aagga Nuseirat, sida ay sheegeen ciidamada difaaca Israel.

    IDF waxay sheegtay in afartaan qof xaaladooda caafimaad ay wanaagsan tahay, waxaana loo gudbiyay xarunta caafimaadka ee Sheba' Tel-HaShomer si baaritaanno caafimaad loogu sameeyo - halkaas oo lagu sawiray iyagoo isku duubaya ooh ab siinaya xubnaha qoyska ee ku sugaya xarunta.

    Tobaneeyo qof oo ay ku jiraan caruur ayaa dhaawac iyo dhimasho ay kasoo gaartay deegaanka howlgalkaasi uu ka dhacay, iyadoo muuqaallo laga soo qaaday ay muujinayaan qasaare aad u badan.

14. 8 Juunyo 2024Dowladda Soomaaliya oo baaq nabadeed u dirtay beelaha ku dagaallamaya Waqooyiga Galgaduud

    Dowladda Soomaaliya ayaa baaq nabadeed u dirtay beelaha ku dagaallamaya degaanka Laan dheer ee u dhexeeya Caabudwaaq iyo Xeraale oo waqooyiga Galgaduud.

    Wasaaradda arrimaha gudaha, Federaalka iyo dib u heshiisiinta XFS ayaa u baaqday labada beelood ee dagaallamaya in ay si deg deg ah ku joojiyaan dirirta isla markaana ay fursad siiyaan nabadda iyo wada hadalka.

    Baaqaasi nabadeed ayaa sidoo kale looga codsaday dadka wax garadka ah, sida odayaasha dhaqanka , culumaa’udiinka iyo bulshada inteeda kale, in ay nabadda u istaagaan oo ay kaalintooda ka qaataan sidii collaadaasi loo joojin lahaa.

    Baaqaasi nabadeed ee kasoo baxay Wasaaradda Arrimaha Gudaha, Federaalka iyo Dib u heshiisiinta ayaa sidoo kale loou baaqay dowlad goboleedka Galmudug in ay kaalintooda ka qaataan sidii collaadaasi loo joojin lahaa.

15. 8 Juunyo 2024Fadhigii Golaha Wakiillada Somaliland oo maanta u baaqday kooram la'aan

    Fadhigii Golaha Wakiillada Jamhuuriyadda iskeed ugu dhawaaqday madax-banaanideeda ee Somaliland ayaa maantay u baaqday kooram la'aan.

    Fadhigii Golaha Wakiillada ee Somaliland oo la filayey maanta in la horkeeno miisaaniyad sannaddeedka 2024-ka, oo horrey Madaxwayne Muuse Biixi u soo celiyey, ayaa u baaqday kooram la'aan, markii ay mudaneyaasha fadhigaas yimid ay gaari waayeen tiradii loo baahnaa oo ahayd 42 mudane.

    Golaha Wakiilada oo toddobaadkii u dambeeyey la isku dayey in la soo hordhigo miisaaniyadda 2024-ka, ayey suurto geli wayday markii xildhibaannada mucaaradku ay soo xaadiri waayeen fadhiyadii la doonayey in miisaaniyaddaas lagu ansixiyo.

    Golaha Wakiillada ayaa oddoroska miisaaniyadda 2024-ka ansixiyey bishii March horaanteedii iyaga oo wax ka beddel weyn ku sameeyey tii Xukuumaddu u soo gudbisay, balse madaxweynaha oo ka biyo diiday wax ka beddelkaas ayaa 17kii March dib ugu celiyey Golaha Wakiillada, isaga oo ku tilmaamay wax ka beddelkaas mid sharci darro ah oo aanay awood u lahayn.

    Xildhibaannada mucaaradka iyo kuwa muxaafidka ee Golahaas, ayaa si weyn ugu kala qaybsan soo celintan iyo go'aanka ay ka qaadanayaan, iyada oo kala qaybsanaantaas keentay in labadii bilood ee u dambeeyey la ansixin waayo miisaaniyaddaasi.

    Xildhibaan Cabdikariim Maxamed Muxumed, oo ka mid ah Xildhibaannada muxaafidka ee Xisbiga Kulmiye, ayaa u sheegay BBC-da sababaha kooramku u buuxsani waayey ay tahay xildhibaannada mucaaradka oo qaarkood iman waayeen fadhigaasi, kuwaas oo ka war-wareegaya ansixinta miisaaniyadda 2024-ka.

    "Madaxweynuhu xaq ayuu u leeyahay isaga oo qodobo sharciga adeegsanaya, inuu soo celiyo. Xildhibaannada waxa xaq loogu leeyahay in soo celinta madaxweynaha diidaan ama ogolaadaan, laakiin xildhibaanno dano gaar ah leh ayaa ka warwareegaya" ayuu yidhi Cabdikariim Muxumed.

    Xildhibaan Jamaal Cali Aadan, oo ka mid ah Xildhibaannada mucaaradka ayaa BBC-da u sheegay in ay doonayaan in miisaaniyadda 2024-ka, sidii Golaha Wakiilladu ku ansixiyeen loo meel mariyo, madaama ay ku jireen, sida uu sheegay mashaariic Gobolka Awdal ah iyo Ciidammo 2000 gaaraya oo Gobollada Bariga Somaliland laga qoray, taasoo uu sheegay in xukuumaddu diidan tahay. "Waxaanu diyaar u nahay ansixinta miisaaniyaddii hore goluhu u ansixiyey oo ay ku jiraan mashaariicdii aanu ku darnay ee Gobolka Awdal iyo Ciidamada Madaniga ah" ayuu yidhi Xildhibaan Jamaal Cali Aadan.

    Si kastaba ha ahaatee, miisaaniyadda 2024-ka ee Somaliland ayaa la isku mari la'yahay ansixinteeda, iyada oo sannadku kala bar yahay.

    Xildhibaannada muxaafidka ayaan haysan aqlabiyad ay miisaaniyadda ugu ansixiyaan sida xukuumaddu doonayso, halka mucaaradkuna aanay haysan weli aqlabiyad ay dib ugu celiyaan miisaaniyaddii ay hore u ansixiyeen.

16. 8 Juunyo 2024Faahfaahin ka soo baxaysa dagaal beeleed dad badan ku dhinteen oo ka dhacay gobolka Galgaduud

    Wararka ka imaanaya gobolka Galgaduud ayaa sheegaya in ugu yaraan 30 qof ay ku dhinteen tira intaasi ka badanna ay ku dhaawacntay, dagaal u dhaxeeya laba beelood oo oodwadaag ah kaas oo ka dhacay inta u dhaxeeysa Qalanqale iyo Laandheer oo ka tirsan gobolka Galgaduud.

    Dagaalka oo qarxay arroornimadii hore ee maanta ayaa waxaa uu salka ku hayaa aanooyin qabiil .

    Warku wuxuu intaasi ku darayaa in muddo bil iyo bar ka hor ah uu dagaal sidan oo kale ah uu dhexmaray labadan beelood ee hadda dagaalamaya. Maamulka Gobolka Galgaduud ayaa horrey isugu dayey in labada beelood ay wadahadallo dib u heshiisiin ah ku yeeshaan magaalada Dhuusamareeb si xal looga gaaro colaadda, balse aanay taasi ku guuleysan kadib markii ay labada beelood ka madax adeeygeen in ay aqbalaan gogoshii nabadeed ee loo fidiyay.

    Wararkii ugu dambeyay ayaa hadda sheegaya in ciidamada dowladda federaalka ah iyo kuwa Galmudug ay ku baxeen dagaalka oo ay ku sii socdaan goobta dagaalka, si ay u kala dhex galaan labada beeleed.

17. 8 Juunyo 2024Waxaa weli la baadigoobayaa weriye caan ah oo lagu la’yahay dalka Griigga

    Waxaa weli la baadigoobayaa weriye caan ah oo lagu magacaabo Michael Mosley oo BBC katirsanaa kaas oo lagu waayey dalka Griigga oo uu fasax nasasho ah ku joogay.

    Baadigoobka ayaa hadda u wareegay dhul buuraley ah oo fog oo ku yaalla jasiiradda Symi ee dalka Giriiga.

    67-jirka, oo caan ku ahaa barnaamijyadiisa TV-ga iyo BBC Radio 4 Just One Thing podcast, ayaa la waayay Arbacadii isagoo fasax ku jiray.

    Hawlgalka baadigoobka iyo samatabbixinta, oo ay ka qayb qaadanayaan diyaaradaha qumaatiga u kaca iyo kuwa aan duuliyaha lahayn, ayaa mar kale bilowday subaxnimadii Sabtida.

    Afartiisa caruur ah ayaa yimid Griigga si ay gacan uga geystaan ​​raadinta. Xaaskiisa Dr Clare Bailey Mosley ayaa sidoo kale ka baadi goobaysay jasiiradda iyada oo ay ku biireen saaxiibadeed Ingiriis ah, sidi uu sheegay duqa jasiiradda Symi.

18. 8 Juunyo 2024Al-shabaab oo culimo Dariiqada Suufiyada ah ka afduubtay Laanta Buuro

    Wararka ka imanaaya Laanta Buuro ee Galbeedka Muqdisho ayaa sheegay in Al-Shabaab ay afduubteen ilaa labaatan culimo ah oo ka tirsan dariiqada Suufiyada, culimadaas oo sanad walba iskugu yimaado kulan diimeed ka dhaca Laanta Buuro. Wararku wax ay sheegayaan in qar ka mid ah culimada ay u suurtagashay in ay baxsadaan oo ay ka badbaadaan afdubka.

    Al-shabaab ayaa muddo dheer ka soo horjeeday suufiyada oo ay u aragto inay ka soo horjeedaan mabaadi’dooda adag ee Islaamka, waxayna horrey u burburiyeen mowlacyo badan oo ay dariiqooyinka suufiyadu ay lahaayeen.

    Weli war rasmi ah, Al-shabaab kama soo saarin Afduubkaas.

19. 7 Juunyo 2024Biden iyo Zelensky oo ku kulansan Paris

    Madaxweyne Biden iyo dhiggiisa Ukraine, Volodymyr Zelensky, ayaa ku kulmaya Paris, maalin kadib markii ay labadooda ka qeyb galeen xuska dagaalkii labaad ee adduunka, maalintii ay ciidamadii isbahaysiga qabsadeen waqootiga Faransiiska.

    Mr Biden ayaa raalligelin ka bixiyay dib u dhacyada ku yimid gargaarka militari ee Ukraine la siin lahaa, taasoo ay sababeen xildhibaannada jamhuuriga ee aqalka kongareeska, balse wuxuu ballan qaaday in Mareykanku uusan cidlo uga tegi doonin Ukraine. Wuxuu ansixinayaa in ka badan labo boqol oo milyan oo doollar oo dheeraad ah si dib loogu dhiso korontada warshadda Ukraine ee Ruushku duqeynta ku waday.

    Madaxweyne Zelensky ayaa dhankiisa madaxweyne Biden uga mahad celiyay taageerada Mareykanka, wuxuuna sheegay in labada dal ay ka wada xaajoon doonaan difaaca hawada.

    Goor sii horreysay, Mr Zelensky ayaa ka digay khatarta uu duullaanka Ruushka u nugleeyay Yurub, mar uu khudbad ka jeednayay Golaha Qaranka ee Faransiiska. Wuxuu sidoo kale saacadaha soo socda la kulmi doonaan Madaxweyne Emmanuel Macron.

20. 7 Juunyo 2024Israa'iil oo sii wadda duqeynta Rafax

    Ciidamada Israa’iil ayaa sii wada inay Rafax ka duqeeyaan cirka iyo dhulka, iyadoo dadaallada xabbad-joojinta lguu soo dabbaalayo Gaza aysan u muuqan kuwo meel maraya.

    Dadka ku nool Rafax ayaa sheegay in taangiyada Israa’iil ayaa usii dhaqaaqeen xadka Masar, halka ay sidoo kale jireen dagaallo xooggan oo u dhaxeeya ciidamada Israa’iil iyo dagaalyahannada Xamaas.

    Iyadoo kooxaha gargaarka ay sii wadaan digniinta ah yaraanta cunnooyinka quutul daruuriga ah, warbaahinta Israa’iil ayaa ku warrameysa in marinka gargaarka ee Mareykanku ka sameeyay xeebta ay howlihiisa dib u bilaaban doonaan gelinka dambe ee maanta kadib markii ay saameysay cimilada xun.