'ත්රිකුණාමලය වෙරළ තීරයේ විහාරයක අනවසර ඉදිකිරීම්' සම්බන්ධයෙන් බලංගොඩ කස්සප හිමි ඇතුළු 9ක් රිමාන්ඩ්
ඡායාරූප මූලාශ්රය, Facebook/Balangoda Kassapa Thero
- Author, බීබීසී සිංහල
ත්රිකුණාමලය වෙරළ තීරයේ අනවසර බෞද්ධ ආගමික ඉදිකිරීම් සිදු කිරීම සහ නව බුද්ධ ප්රතිමාවක් ස්ථාපනය කිරීම සම්බන්ධයෙන් පූජ්ය බලංගොඩ කස්සප හිමි ඇතුළු සැකකරුවන් 9 දෙනෙකු රක්ෂිත බන්ධනාගාරගත කර තිබේ.
එලෙස රක්ෂිත බන්ධනාගාරගත කෙරුණේ, බලංගොඩ කස්සප හිමි ඇතුළු භික්ෂූන් වහන්සේලා සිව් දෙනෙකු සහ තවත් පුද්ගලයින් පස් දෙනෙකි.
වෙරළාරක්ෂක දෙපාර්තමේන්තුව සහ වෙරළ සම්පත් සංරක්ෂණ දෙපාර්තමේන්තුව විසින් ගොනු කරන ලද මෙම නඩුව ත්රිකුණාමලය මහේස්ත්රාත් එම්.එස්.එම්. සම්සුදීන් හමුවේ බදාදා (ජන. 14) වන දා කැඳ වූ අතර මහේස්ත්රාත්වරයා නියෝග කළේ විත්තිකරුවන් ජන. 19 වන දින දක්වා රක්ෂිත බන්ධනාගාරගත කරන ලෙස ය.
විත්තිකරුවන්ට එල්ල වන චෝදනාව කුමක් ද?
වෙරළ ආරක්ෂණ ආඥා පනත උල්ලංඝනය කරමින් 2025 වසරේ නොවැම්බර් මාසයේදී වෙරළ තීරයේ ව්යුහයක් ඉදිකර පිළිමයක් තැබීම සම්බන්ධයෙන් සැකකරුවන්ට එරෙහිව චෝදනා ගොනු කර තිබේ.
විත්තිකරුවන් කවුද?
ත්රිකුණාමලය කොටුව විහාරයේ විහාරාධිපති පූජ්ය බලංගොඩ කස්සප හිමි, සම්බුද්ධ ජයන්ති විහාරාධිපති මිහිඳුපුරේ කල්යාණවංශ තිස්ස හිමි, පූජ්ය සුකිත්ත වංශ හිමි, සිරිමාපුර විහාරයේ පූජ්ය නන්ද හිමි මෙන් ම කොටුව විහාරයේ විධායක කමිටු සාමාජිකයින් වන දීපානි ලියනගේ, විදුරංග ලොකු ගලප්පත්ති, එල්.ටී. පෙරේරා, පියලාල් ප්රේමසිරි සහ තේකුම් දුලාර යන පිරිස විත්තිකරුවන් ලෙස නම් කර ඇත.
ඊට අමතරව, සුතිප්ප ලියනගේ සහ සුගත් ප්රසන්න යන අය ද විත්තිකරුවන් ලෙස නම් කර ඇති නමුත් ඔවුහු බදාදා අධිකරණයේ හමුවේ පෙනී නොසිටියහ.
අධිකරණය නිවේදනය කළේ, මේ දෙදෙනා සම්බන්ධයෙන් ජනවාරි 19 වන දා තීරණයක් ගන්නා බව ය.
'ඇප ලබා දීමට මහේස්ත්රාත් අධිකරණයට බලයක් නැහැ'
වෙරළාරක්ෂක දෙපාර්තමේන්තුව වෙනුවෙන් නීතිපති දෙපාර්තමේන්තුවේ නීතිඥවරයෙක් සහ පොලිස් දෙපාර්තමේන්තුවේ නීතිඥවරයෙක් අධිකරණයේ පෙනී සිටියහ.
විත්තිය වෙනුවෙන් පෙනී සිටි නීතිඥවරුන් ඔවුන්ට ඇප ලබා දෙන ලෙස ඉල්ලා සිටිය ද මහේස්ත්රාත්වරයා දැනුම් දුන්නේ, වෙරළාරක්ෂක ආඥා පනත යටතේ ඇප ලබා දීමට මහේස්ත්රාත් අධිකරණයට බලයක් නොමැති අතර ඇප ලබා දීමට බලය ඇත්තේ මහාධිකරණයට පමණක් බව ය.
මේ අතර, මෙම නඩුවට අදාළව තවත් පුද්ගලයින් සිව් දෙනෙකු සැකකරුවන් වශයෙන් නම් කර එම සැකකරුවන් අත්අඩංගුවට ගෙන ඉදිරිපත් කරන ලෙස අධිකරණය නියෝග කළ බව පොලිස් මාධ්ය කොට්ඨාසය නිවේදනයක් නිකුත් කරමින් සඳහන් කළේ ය.
