බස් කොන්දොස්තරවරයෙකුගේ සිට සුපිරි තරුවක් දක්වා: රැජිණිකාන්ත් ඉන්දීය සිනමාවේ 50 වසරක් සපුරයි
ඡායාරූප මූලාශ්රය, Sun Pictures
- Author, සුධා ජී. තිලක්
- Role, දිල්ලි
සිනමා කර්මාන්තයේ දීර්ඝ කාලීන ජනප්රියත්වයක් පවත්වා ගැනීම අතිශය දුෂ්කර සන්ධිස්ථානයකි.
ඉන්දියානු සුපිරි තරුව රැජිණිකාන්ත් සම්බන්ධයෙන් ගත් කල චිත්රපට ක්ෂේත්රයේ වසර 50ක් යනු පැවැත්ම පිළිබඳ කරුණක් පමණක් නොවේ - එය සිනමා ශාලා කෝවිල් බවටත් ප්රේක්ෂකයින් බැතිමතුන් බවටත් පත් කරන නොබිඳුණු පාලනයක් පිළිබඳ කතාවකි. ඔහුගේ බොහෝ සිනමා කෘති සමෘද්ධිමත් දෙමළ භාෂා චිත්රපට කර්මාන්තයට සම්බන්ධ වී ඇති අතර, එහිදී ඔහුගේ චිත්රපට පරම්පරා ගණනාවක ආකර්ෂණයට ලක්ව තිබේ.
1975 දී, ශිවාජි රාඕ ගයික්වාඩ් නමැති තරුණයා මදුරාසියේ (දැන් චෙන්නායි) අපූර්වා රාගංගල් නමැති චිත්රපටය රූගත කිරීමේ ස්ථානයකට ගියේ ය. එහි ඔහු ආඩම්බර රස්තියාදු පෙම්වතෙකුගේ චරිතයක් රඟපෑවේ ය. ඉන්පසුව සුළු කාලයක් තුළදී ලෝකය පුරා රැජිණිකාන්ත් ලෙස ප්රසිද්ධියට පත්වූයේ, ඔහු ය.
දශක පහකට ආසන්න කාලයක් තුළ චිත්රපට 170ක රඟපෑමෙන් පසු, රැජිණිකාන්ත්ගේ නවතම චිත්රපටය වන කුලී (Coolie) අගෝස්තු 14 වන දින ප්රදර්ශනයට එක් විය. එය ඔහුගේ ම ජීවිතය පිළිබිඹු කරන කතාවකින් ඔහුගේ සිනමා ගමන සමරයි. ඔහු එහි ධනවත්, පීඩාකාරී දුෂ්ටයෙකු සමග සටන් කරන කම්කරු පන්තියේ වීරයෙකු ලෙස රඟපායි.
74 හැවිරිදි මෙම සුපිරි තරුව අද්විතීය චරිතයකි - ඔහු වෙනුවෙන් ඉදිකරන ලද කෝවිල්වල වන්දනාමාන කටයුතු සිදු කෙරේ. චිත්රපට ප්රවර්ධන අතරතුර ඔහුගේ රැව රැගත් පෝස්ටර් ගුවන් යානාවල රැගෙන යනු ලැබේ. සාමාන්යයෙන් දේශීය සුපිරි චරිත සඳහා පමණක් අවධානය යොමු කරන ඈත පිහිටි ජපානයේ පවා ඔහුට ආකර්ෂණයක් පවතී.
රැජිණිකාන්ත්ගේ කතාව ඉන්දියානු සිනමාවේ වඩාත් ම ආදරණීය අභ්යන්තරිකයෙකු බවට පත්වූ පිටස්තරයෙකුගේ කතාවකි - භාෂාව, පන්තිය සහ භූගෝලය හරහා ආකර්ෂණය ලබා ගන්නා කම්කරු පන්තියේ වීරයෙකි. ඔහුගේ ජීවිතය අසාමාන්ය දුෂ්කර තත්ත්වයක සිට ධනවත් දැවැන්තයෙකු දක්වා පැමිණි ගමනකි. අතිශය දිළින්දෙකුගේ සිට අසමසම සුපිරි තරුවක් දක්වා පැමිණි ගමනකි. ඔහුට ඉන්දියාවේ ඉහළ ම සිනමා ගෞරවය වන දාදාසහෙබ් ෆාල්කේ සම්මානය සහ දෙවන ඉහළ ම සිවිල් සම්මානය වන පද්ම විභූෂණ සම්මානය හිමි විය.
මිලියන සංඛ්යාත රසිකයින්ට සහ 50,000ක් පමණ වන රසික සමාජ සඳහා, මෙම සංවත්සරය ඔවුන්ගේ වීරයා සැමරීමට තවත් අවස්ථාවක් වී තිබේ.
ඔහු පිළිබඳ ඇති දැවැන්ත පෞරුෂය හේතුවෙන් ඔහු ඔවුන්ට අර්ධ වශයෙන් දෙවියෙකි. "දෙවිවරු සමහරුන්ගේ ස්වරූපයෙන් පෙනී සිටිනවා," රැජිණිකාන්ත්ගේ ප්රබල රසිකයෙකු වන ඒ රාජේන්ද්රන් පවසයි.
"රජිනිකාන්ත්ට අපිට ඔහු දිහා ඉහළින් බලන්න පොළඹවන බලයක් තියෙනවා."
ඡායාරූප මූලාශ්රය, The India Today Group via Getty Images
උණුසුම් පුවත්, විශ්ලේෂණ සහ විශේෂ විශේෂාංග ඔබේ දුරකතනය වෙත ඍජුව ම ලබා ගන්න.
සම්බන්ධ වීමට link එක click කරන්න
End of podcast promotion
Rajinikanth: A Definitive Biography ග්රන්ථයේ කතුවරයා වන නාමන් රාමචන්ද්රන් සඳහන් කරන්නේ, රැජිණිකාන්ත්ගේ රසිකයන් Wall Street බැංකුකරුවන්ගේ සිට තමිල්නාඩුවේ රෙදි සෝදන කාන්තාවන් දක්වා විහිදී ඇති බව ය. ඔහුගේ තිරයේ මැජික් එක පවතින්නේ, කෙනෙකුගේ මනුෂ්යත්වය නැති කර නොගෙන නරක පරාජය කරමින් දුප්පතුන්ගේ සිහිනය නිරූපණය කිරීම තුළ බව රාමචන්ද්රන් ලියා තිබේ.
රින්කු කැල්සි සහ ජෝයෝජීත් පාල් විසින් නිෂ්පාදනය කරන ලද "For the Love of a Man" නම් සුපිරි තරුව පිළිබඳ 2015 වාර්තා චිත්රපටය, චිත්රපට එළි දැක්වීම් ජීවිතයේ එක් වරක් පමණක් සිදුවන උත්සව ලෙස සලකා රසිකයන් සිය නිවාස උකස් කරමින්, පවුලේ රත්තරන් විකිණීමෙන් දක්වන මෙම උද්යෝගයේ ගැඹුර ග්රහණය කර තිබේ.
"මේ රසික පිරිසක් නෙවෙයි," කැල්සි පැහැදිලි කළා ය. "ඒක අනන්යතාවක්. ඔහු නියෝජනය කරන්නේ ඔවුන් අපේක්ෂා කරන දේ - නිහතමානී, සදාචාරාත්මක, නමුත් අවශ්ය අවස්ථාවේදී අයුක්තියට එරෙහිව නැගී සිටින චරිතයක්."
චෙන්නායිහි ඔහුගේ නිවස, අලුත උපන් බිළිඳෙකු පෙන්වීමක්, ආශීර්වාද ගැනීමක් හෝ නම් තැබීමක් අපේක්ෂා කරන දහස් ගණනක් රසිකයින් සඳහා සිද්ධස්ථානයක් බවට පත්ව ඇත. 2016 දී, එයාර් ඒෂියා ගුවන් සේවය ඔහුගේ චිත්රපටයක් වූ කබාලි නිකුත් කිරීම සනිටුහන් කිරීම සඳහා ඔහුගේ මුහුණ සහිත පුවරුවලින් සරසන ලද ගුවන් යානයක් පියාසර කරවීය. ඔහුගේ ප්රතිරූපයට අහස හරහා චිත්රපටයක් රැගෙන යා හැකි බව ඉන් සංකේතවත් කෙරිණි.
ඔහු කෙරෙහි ඇති භක්තිය බොහෝවිට ඔහුගේ රසික සමාජ මගින් ඔහුගේ නමින් ලේ දන්දීමේ කඳවුරු, සහන සේවා, ප්රජා උත්සව සංවිධානය කිරීම මගින් සමාජ කාර්යයන් දක්වා ද විහිදේ. අයිශ්වර්යා රැජිණිකාන්ත් ඇගේ Standing on an Apple Box ග්රන්ථයේ ලියා ඇත්තේ මෙසේ ය: "මගේ තාත්තා කවදාවත් ගෙදරදී සුපිරි තරුවක් වගේ හැසිරෙන්නේ නැහැ... ඔහුගේ චිත්රපටවල හැර."
රැජිණිකාන්ත්ගේ රසික සංස්කෘතිය සිනමාව සහ ජීවිතය අතර සම්මිශ්රණයකි.
සෑම චිත්රපටයක ම මංගල දර්ශනය චාරිත්රානුකූල දර්ශනයක් බවට පත්වේ. නවක වාර්තාකරුවෙකු ලෙස, පළමු දිනයේ ම උමතු රසිකත්වය අත්දකිමින්, පළමු ප්රදර්ශන මම බොහෝ විට නරඹා ඇත්තෙමි: තිරය මතට කාසි විසි කිරීම, කපුරු පුළුස්සා දැමීම, මල් ඉසීම, කිරිවලින් නාවන ලද කටවුට්, රසිකයන් ඔහුගේ නම කියා කෑගැසීම සුලබ දසුනක් විය.
ඡායාරූප මූලාශ්රය, The India Today Group via Getty Images
රැජිණිකාන්ත්ගේ චිත්රපටයක් නැරඹීම යනු අදාළ ප්රජාවේ ගෞරවය, කම්කරු පන්තියේ ආඩම්බරය, සාමූහික විනෝදය සහ ප්රීතිමත් ප්රීතිය මිශ්ර වූ ප්රදර්ශනයකි.
පැය තුනක මනුෂ්යත්වය ඉක්මවූ යුක්තිය, හාස්යය, ප්රේමය සහ පළිගැනීම් දර්ශනවලින් පසු, සිනමා ශාලා කොන්ෆෙටි වැනි පොප්කෝන්වලින් පිරී ඇති අතර, රසිකයන් වීදිවලට විසිරී, උත්ප්රාසාත්මක ප්රීතියෙන් ඝෝෂා කරති.
මේ වසරේදී සැමරුම්වල උච්චතම අවස්ථාවට පැමිණ තිබේ: මදුරෙයි දිස්ත්රික්කයේ, රසිකයෙකු මෙම සුපිරි තාරකාවගේ පිළිමයකට යාච්ඤා කරමින් පෝස්ටර් සහ ඡායාරූප 5,500කට අධික සංඛ්යාවකින් සරසා ඇති දේවමාලිගාවක් ඉදිකර තිබේ.
දරුවන් හතර දෙනෙකුගේ පවුලක සාමාජිකයෙකු වූ රැජිණිකාන්ත් දරිද්රතාවයේ පීඩාවන් මැද හැදී වැඩිණි; ඔහුගේ පියා පොලිස් කොස්තාපල්වරයෙකි. "මම ඉස්කෝලෙන් අයින් වුණාට පස්සෙ, මගේ තාත්තා මාව කුලී [මුට්ට කර ගසන්න්නෙකු] විදිහට වැඩට යැව්වා," ඔහු සිහිපත් කළේ ය. පසුව ඥාතියෙකු ඔහුට බස් කොන්දොස්තරවරයෙකු වීමට උපකාර කළේ ය.
රඟපෑම කෙරෙහි ඇති ආශාව දුටු ඔහුගේ මිතුරෙකු, ඔහුව රජයේ චිත්රපට පාසලක් වන මැඩ්රාස් චිත්රපට ආයතනයට යැවීමට මුදල් එක්රැස් කළේ ය. එම ආයතනයේදී, දෙමළ චිත්රපට නිෂ්පාදක කේ. බාලචන්දර් ඔහුගේ දක්ෂතා හඳුනාගෙන 1975 දී ඔහුට පළමු චරිතය ලබා දුන්නේ ය.
එම්.ජී. රාමචන්ද්රන් වැනි දෙමළ සිනමා පුරාවෘත්තයන්ගේ සුදුමැලි සමක් ඇති, මෘදු ලෙස කතා කරන වීරයාගේ මූලාකෘතියෙන් රැජිණිකාන්ත් වෙනස් විය. ඔහුගේ සමෙහි අඳුරු පැහැය, ගැමි පෙනුම සහ ආඩම්බරකාර ස්වභාවය ඔහුගේ සිනමා අනන්යතාවට අත්යවශ්ය අංග විය.
ඡායාරූප මූලාශ්රය, India Today Group via Getty Images
රැජිණිකාන්ත්ගේ නොනවතින ආකර්ෂණයේ කොටසක් වන්නේ, ඔහු තෝරා ගන්නා කතා සහ ඔහු රඟපෑ චරිත පරාසය යි.
අපූර්වා රාගංගල්, මූන්ඩෘ මුඩිචු, පතිනාරු වයතිනිලේ වැනි චිත්රපටවල වීරයාට එරෙහි සහ දුෂ්ට චරිතවලින් ආරම්භ වූ ඔහු අවර්ගල්, ජොනී, මුල්ලුම් මලරුම් වැනි චිත්රපටවල සදාචාරාත්මක වශයෙන් සංකීර්ණ චරිත මෙන් ම බුවානා ඔරු කෙල්විකුරි චිත්රපටය වැනි චිත්රපට කිහිපයක දුක්ඛාන්ත චරිත ද නිරූපණය කළේ ය.
1980 වසරේ තිරගත වූ අතිශය ජනාදරයට පත් බිල්ලා චිත්රපටයෙන් රැජිණිකාන්ත් සිය ක්රියාදාම වීරත්වය තහවුරු කර ගත්තේ ය.
ඔහු ජනප්රිය දෙමළ චිත්රපටවල, ජනප්රිය බොලිවුඩ් චිත්රපටවල සහ ඇමරිකානු චිත්රපටයක් වන Bloodstoneහි ආරාධිත චරිතයකට පවා දායක විය.
1990 ගණන්වල සිට, ඔහු ශ්රී රාඝවේන්ද්රර් සහ බාබා වැනි ආධ්යාත්මික චරිත නිරූපණය කිරීම සහ ජීවිතයට වඩා විශාල සුපරීක්ෂාකාරී චරිත සඳහා ප්රසිද්ධ විය. 1998 දී, මුතු අනපේක්ෂිත ලෙස ජපානය තුළ අවධානයට ලක් විය.
ඔහු රොබෝවරයෙකු ලෙස රඟපෑ සිවාජි සහ එන්තිරන් වැනි චිත්රපට අතිශය ජනප්රිය වූ අතර, සෞඛ්යමය අභියෝග මධ්යයේ වුව ද, ඔහු රඟපෑ චිත්රපට විශාල වාණිජමය සාර්ථකත්වයක් අත්කර ගත්තේ ය.
රැජිණිකාන්ත් යනු සිගරැට්ටුව කරකවන, අව් කණ්ණාඩි කරකවන සහ රැවටිලිකාර හාස්යය මුසු වූ තියුණු සංවාදවලට පමණක් ප්රසිද්ධ "ස්ටයිල්කාරයෙකු" බව පවසමින් ඇතැම් විචාරකයෝ ඔහු විවේචනයට ලක් කළහ. එහෙත්, ඔහුගේ චරිත මූර්තිමත් කරන වටිනාකම් - පක්ෂපාතීත්වය, ධෛර්යය, හාස්යය සහ යුක්තිය - සදාකාලික මෙන් ම විශ්වීය අගයක් ගනී.
ඔහු සමග චිත්රපට 25ක වැඩ කළ චිත්රපට නිෂ්පාදක එස්.පී. මුත්තුරාමන් පවසන පරිදි, ඔහුගේ සාර්ථකත්වයට හේතු වී ඇත්තේ "වෙහෙස මහන්සි වී වැඩ කිරීම, කැපවීම, හොඳ හිත සහ සහෝදර නළුවන්, නිෂ්පාදකයින්, චිත්රපට බෙදාහරින්නන් කෙරෙහි පළ කළ වගකිවයුතු හැසිරීම" ය.
තමිල්නාඩුවේ, ඔහුගේ සම වයසේ සිනමා මිතුරන් බොහෝ දෙනෙකු දේශපාලනයට පිවිස ඇති අතර, රැජිණිකාන්ත් එම ක්ෂේත්රයට පිවිසි නමුත් කිසි විටෙකත් පක්ෂයක් ආරම්භ කර හෝ මැතිවරණවලට ඉදිරිපත් වී නැත. මේ අනුව ඔහු අද්විතීය අවකාශයක් අත්පත් කරගෙන ඇත - කිසි විටෙකත් සම්පූර්ණ දේශපාලනඥයෙකු නොව, ඔහුගේ රසිකයින්ට සැමවිට ම සදාචාරාත්මක ආලෝකයක් ලෙස ඔහු ජීවත් වී ඇත.
සිනමා ඉතිහාසඥ තියඩෝර් බාස්කරන් පවසන්නේ, දෙමළ සිනමාවේ ශ්රේෂ්ඨතම තරු, ජනතා විශ්වාසයන්හි අන්තර්ගත වී ඇති දේවත්වයේ ලා සැලකෙන බව ය.
කීර්තිමත් පුද්ගලයෙකුට වඩා, රැජිණිකාන්ත්ගේ බලපෑම, අලුයම් කාලයේදී කිරි සහ මල්මාලා රැගෙන පෙළ ගැසී සිටින රසිකයින්ගේ භක්තියක් නිර්මාණය කර තිබේ. ඔවුන්ගේ නිර්භීත වීරයාට ඔවුන්ගේ සිහිනවලට වර්ණයක් එක් කළ හැකි බවත්, ඔවුන්ගේ ජීවිතවලට මායාවක් එක් කළ හැකි බවත් ඔවුහු විශ්වාස කරති.
