ਯੂਕਰੇਨ ਰੂਸ ਜੰਗ: ਰੂਸ ਨੇ ਕਿਹਾ ਕੀਵ ਵਿੱਚ ਜੰਗੀ ਕਾਰਵਾਈਆਂ 'ਘਟਾਈਆਂ ਜਾਣਗੀਆਂ'

ਯੂਕਰੇਨ - ਰੂਸ ਵਿਚਾਲੇ ਕਈ ਦਿਨਾਂ ਤੋਂ ਜੰਗ ਜਾਰੀ ਹੈ ਤੇ ਉਸੇ ਵਿਚਾਲੇ ਦੋਹਾਂ ਦੇਸਾਂ ਵਿੱਚ ਗੱਲਬਾਤ ਵੀ ਚੱਲ ਰਹੀ ਹੈ।

ਲਾਈਵ ਕਵਰੇਜ

29 ਮਾਰਚ 2022ਸਾਡੇ ਨਾਲ ਜੁੜਨ ਲਈ ਧੰਨਵਾਦ
ਅਸੀਂ ਆਪਣਾ ਅੱਜ ਦਾ ਲਾਈਵ ਪੇਜ ਇੱਥੇ ਹੀ ਖ਼ਤਮ ਕਰ ਰਹੇ ਹਾਂ। ਸਾਡੇ ਨਾਲ ਜੁੜਨ ਲਈ ਧੰਨਵਾਦ। ਇਹ ਸੀ ਅੱਜ ਦਾ ਮੁੱਖ ਘਟਨਾਕ੍ਰਮ:-
- ਰੂਸ ਦੇ ਉਪ ਰੱਖਿਆ ਮੰਤਰੀ ਅਲੈਗਜ਼ੈਂਡਰ ਫੋਮਿਨ ਨੇ ਕਿਹਾ ਹੈ ਕਿ ਰੂਸ "ਆਪਸੀ ਵਿਸ਼ਵਾਸ ਨੂੰ ਹੁਲਾਰਾ ਦੇਣ ਲਈ ਕੀਵ ਅਤੇ ਚੇਰਨੀਹੀਵ ਖੇਤਰਾਂ ਵਿੱਚ ਜੰਗੀ ਕਾਰਵਾਈਆਂ ਨੂੰ ਘੱਟ ਕਰੇਗਾ।"
- ਰੂਸ ਦੀ ਸਰਕਾਰ ਨੇ ਰੂਸੀ ਅਰਬਪਤੀ ਰੋਮਨ ਅਬਰਾਮੋਵਿਚ ਨੂੰ ਜ਼ਹਿਰ ਦਿੱਤੇ ਜਾਣ ਨਾਲ ਜੁੜੀਆਂ ਖ਼ਬਰਾਂ ਨੂੰ ‘ਇਨਫਾਰਮੇਸ਼ਨ ਵਾਰ’ ਦਾ ਹਿੱਸਾ ਦੱਸਿਆ ਹੈ।
- ਯੂਕਰੇਨ ਵਿੱਚ ਬੱਚਿਆਂ ਨੂੰ ਯੁੱਧ ਦੇ ਸਾਇਰਨਾਂ ਸਬੰਧੀ ਟ੍ਰੇਨਿੰਗ ਦਿੱਤੀ ਜਾ ਰਹੀ ਹੈ।
- ਰੂਸ ਦੀਆਂ ਫ਼ੌਜਾਂ ਨੇ ਖਾਰਕੀਵ ਨਜ਼ਦੀਕ ਮਿਜ਼ਾਈਲ ਨਾਲ ਹਮਲੇ ਕੀਤੇ ਹਨ। ਯੂਕਰੇਨ ਵੱਲੋਂ ਕੀਤੇ ਦਾਅਵਿਆਂ ਮੁਤਾਬਕ ਇਨ੍ਹਾਂ ਹਮਲਿਆਂ ਕਾਰਨ ਕਈ ਘਰ ਤਬਾਹ ਹੋਏ ਹਨ।
29 ਮਾਰਚ 2022ਰੂਸ-ਯੂਕਰੇਨ ਜੰਗ: 'ਗੱਲਬਾਤ ਦੇ ਸਿੱਟੇ ਸਾਰਥਕ ਜਾਪਦੇ ਹਨ'
ਤਸਵੀਰ ਸਰੋਤ, Reuters
ਬੀਬੀਸੀ ਮੱਧ ਪੂਰਬ ਪੱਤਰਕਾਰ ਟੌਮ ਬੇਟਮੈਨ ਦੀ ਰਿਪੋਰਟ ਮੁਤਾਬਕ, ਤੁਰਕੀ ਦੇ ਇਸਤਾਂਬੁਲ ਵਿੱਚ ਹੋਈ ਰੂਸ ਅਤੇ ਯੂਕਰੇਨ ਵਿਚਾਲੇ ਗੱਲਬਾਤ ਉਮੀਦ ਤੋਂ ਇਕ ਘੰਟਾ ਪਹਿਲਾਂ ਹੀ ਮੁੱਕ ਗਈ।
ਯੂਕਰੇਨ ਦੇ ਕੁਝ ਵਫ਼ਦ ਮੀਡੀਆ ਨਾਲ ਗੱਲ ਕਰਨ ਲਈ ਸਾਹਮਣੇ ਆਏ। ਉਸ ਸਮੇਂ ਇਹ ਮਹਿਸੂਸ ਹੋਇਆ ਕਿ ਹੋਰ ਵੀ ਬੁਰੀ ਖ਼ਬਰ ਹੋ ਸਕਦੀ ਹੈ।
ਪਰ ਹਮਲਾ ਸ਼ੁਰੂ ਹੋਣ ਤੋਂ ਬਾਅਦ ਇਹ ਸਭ ਤੋਂ ਮਹੱਤਵਪੂਰਨ ਕੂਟਨੀਤਕ ਪਲ ਬਣ ਗਿਆ ਹੈ।
ਰੂਸ ਦਾ ਬਿਆਨ ਕਿ ਇਹ ਕੀਵ ਅਤੇ ਚੇਰਨੀਹੀਵ ਦੇ ਆਲੇ ਦੁਆਲੇ ਲੜਾਈ ਦੀਆਂ ਕਾਰਵਾਈਆਂ ਨੂੰ "ਬਹੁਤ ਘੱਟ" ਕਰੇਗਾ, ਇਹ ਦਰਸਾਉਂਦਾ ਹੈ ਕਿ ਇਹ ਵਿਚਾਰ-ਵਟਾਂਦਰੇ ਦੀ ਗਤੀ ਹੈ, ਹੁਣ ਇਹ ਦੇਖਣਾ ਹੋਵੇਗਾ ਕਿ ਜ਼ਮੀਨੀ ਪੱਧਰ 'ਤੇ ਕੀ ਕਾਰਵਾਈ ਹੁੰਦੀ ਹੈ।
ਯੂਕਰੇਨ ਦੇ ਪ੍ਰਤੀਨਿਧੀ ਮੰਡਲ ਨੇ ਸਪੱਸ਼ਟ ਕੀਤਾ ਕਿ ਕਿਵੇਂ ਉਹ ਇੱਕ ਨਿਰਪੱਖ ਸਥਿਤੀ ਦੇ ਐਲਾਨ ਦੇ ਬਦਲੇ ਪੱਛਮ ਤੋਂ ਸੁਰੱਖਿਆ ਗਾਰੰਟੀ ਚਾਹੁੰਦੇ ਹਨ ਅਤੇ ਇਹ ਰੂਸ ਦੀ ਮੁੱਖ ਮੰਗ ਹੈ।
29 ਮਾਰਚ 2022ਰੂਸ ਨੇ ਕਿਹਾ ਕੀਵ ਵਿੱਚ ਜੰਗੀ ਕਾਰਵਾਈਆਂ ਘਟਾਈਆਂ ਜਾਣਗੀਆਂ
ਤਸਵੀਰ ਸਰੋਤ, Getty Images
ਰੂਸ ਦੇ ਉਪ ਰੱਖਿਆ ਮੰਤਰੀ ਅਲੈਗਜ਼ੈਂਡਰ ਫੋਮਿਨ ਨੇ ਕਿਹਾ ਹੈ ਕਿ ਰੂਸ "ਆਪਸੀ ਵਿਸ਼ਵਾਸ ਨੂੰ ਹੁਲਾਰਾ ਦੇਣ ਲਈ ਕੀਵ ਅਤੇ ਚੇਰਨੀਹੀਵ ਖੇਤਰਾਂ ਵਿੱਚ ਜੰਗੀ ਕਾਰਵਾਈਆਂ ਨੂੰ ਘੱਟ ਕਰੇਗਾ।"
ਇਸ ਦੇ ਨਾਲ ਹੀ ਯੂਕਰੇਨ ਦੇ ਵਾਰਤਾਕਾਰਾਂ ਨੇ ਕਿਹਾ ਕਿ ਇਹ ਸੁਰੱਖਿਆ ਗਾਰੰਟੀ ਦੇ ਬਦਲੇ ਨਿਰਪੱਖ ਸਥਿਤੀ ਨੂੰ ਅਪਣਾਏਗਾ, ਮਤਲਬ ਕਿ ਇਹ ਕਿਸੇ ਵੀ ਫੌਜੀ ਗਠਜੋੜ, ਜਿਵੇਂ ਕਿ ਨਾਟੋ, ਜਾਂ ਮੇਜ਼ਬਾਨ ਫੌਜੀ ਠਿਕਾਣਿਆਂ ਵਿੱਚ ਸ਼ਾਮਲ ਨਹੀਂ ਹੋਵੇਗਾ।
ਇਸ ਬਾਰੇ ਤੁਰਕੀ ਨੇ ਕਿਹਾ ਕਿ ਯੁੱਧ ਸ਼ੁਰੂ ਹੋਣ ਤੋਂ ਬਾਅਦ ਇਹ ਕਦਮ "ਸਭ ਤੋਂ ਸਾਰਥਕ " ਹਨ।
29 ਮਾਰਚ 2022ਰੂਸ ਅਤੇ ਯੂਕਰੇਨ ਵਿਚਾਲੇ ਗੱਲਬਾਤ ਦਾ ਕੀ ਸਿੱਟਾ ਰਿਹਾ
ਤਸਵੀਰ ਸਰੋਤ, EPA
ਤੁਰਕੀ ਨੇ ਕਿਹਾ ਹੈ ਕਿ ਰੂਸ ਅਤੇ ਯੂਕਰੇਨ ਵਿਚਾਲੇ ਹੋਈ ਹੁਣ ਤੱਕ ਦੀ ਗੱਲਬਾਤ ਸਾਰਥਕ ਰਹੀ।
ਤੁਰਕੀ ਦੀ ਰਾਜਧਾਨੀ ਇਸਾਂਤਬੁਲ ਵਿੱਚ ਮੰਗਲਵਾਰ ਨੂੰ ਰੂਸ ਅਤੇ ਯੂਕਰੇਨ ਦੇ ਪ੍ਰਤੀਨਿਧੀਆਂ ਵਿਚਾਲੇ ਗੱਲਬਾਤ ਹੋਈ।
ਤੁਰਕੀ ਦੇ ਵਿਦੇਸ਼ ਮੰਤਰੀ ਮੇਵਲੁਤ ਕਾਵੁਸੋਗਲੂ ਨੇ ਕਿਹਾ ਕਿ ਕੁਝ ਮੁੱਦਿਆਂ ‘ਤੇ ਦੋਵਾਂ ਦੇਸ਼ਾਂ ਵਿੱਚ ਸਮਝ ਵਿਕਸਿਤ ਹੋਈ ਹੈ ਅਤੇ ਉਹ ਇਸ ਦਾ ਸਵਾਗਤ ਕਰਦੇ ਹਨ।
ਉਨ੍ਹਾਂ ਨੇ ਇਹ ਗੱਲ ਦੁਹਰਾਈ ਕਿ ਯੁੱਧ ਛੇਤੀ ਤੋਂ ਛੇਤੀ ਖ਼ਤਮ ਹੋਣਾ ਚਾਹੀਦਾ ਹੈ।
29 ਮਾਰਚ 2022ਰੂਸੀ ਅਰਬਪਤੀ ਨੂੰ ਜ਼ਹਿਰ ਦਿੱਤੇ ਜਾਣ ਦੀਆਂ ਖ਼ਬਰਾਂ ਨੂੰ ਦੱਸਿਆ 'ਇਨਫਾਰਮੇਸ਼ਨ ਵਾਰ’ ਦਾ ਹਿੱਸਾ
ਤਸਵੀਰ ਸਰੋਤ, Getty Images
ਰੂਸ ਦੀ ਸਰਕਾਰ ਨੇ ਰੂਸੀ ਅਰਬਪਤੀ ਰੋਮਨ, ਅਬਰਾਮੋਵਿਚ ਨੂੰ ਜ਼ਹਿਰ ਦਿੱਤੇ ਜਾਣ ਨਾਲ ਜੁੜੀਆਂ ਖ਼ਬਰਾਂ ਨੂੰ ‘ਇਨਫਾਰਮੇਸ਼ਨ ਵਾਰ’ ਦਾ ਹਿੱਸਾ ਦੱਸਿਆ ਹੈ।
ਸਮਾਚਾਰ ਏਜੰਸੀ ਰੌਇਟਰਸ ਮੁਤਾਬਕ, ਰੂਸੀ ਸਰਕਾਰ ਨੇ ਕਿਹਾ ਹੈ ਕਿ ਇਸ ਮਹੀਨੇ ਦੀ ਸ਼ੁਰੂਆਤ ਵਿੱਚ ਸ਼ਾਂਤੀ ਵਾਰਤਾ ਦੌਰਾਨ ਰੂਸੀ ਅਰਬਪਤੀ ਰੋਮਨ ਅਬਰਾਮੋਵਿਚ ਨੂੰ ਕਥਿਤ ਤੌਰ ‘ਤੇ ਜ਼ਹਿਰ ਦਿੱਤੇ ਜਾਣ ਦੀਆਂ ਖ਼ਬਰਾਂ ਦਾ ਸੱਚਾਈ ਨਾਲ ਕੋਈ ਵਾਸਤਾ ਨਹੀਂ ਹੈ।
ਰੂਸ ਨੇ ਇਸ ਨੂੰ “ਇਨਫਾਰਮੇਸ਼ਨ ਵਾਰ” ਦਾ ਹਿੱਸਾ ਦੱਸਿਆ ਹੈ।
ਰੂਸ ਸਰਕਾਰ ਨੇ ਇਹ ਵੀ ਕਿਹਾ ਹੈ ਕਿ ਅਬਰਾਮੋਵਿਚ ਤੁਰਕੀ ਵਿੱਚ ਰੂਸੀ ਦਲ ਦੇ ਅਧਿਕਾਰਤ ਮੈਂਬਰ ਨਹੀਂ ਹਨ, ਹਾਲਾਂਕਿ, ਯੂਕਰੇਨ ਦੇ ਮੁੱਦੇ ‘ਤੇ ਵਾਰਤਾ ਦੌਰਾਨ ਮੌਕੇ ‘ਤੇ ਉਨ੍ਹਾਂ ਦੀ ਮੌਜੂਦਗੀ ਬਿਆਨ ਕਰਨ ਵਾਲੀਆਂ ਤਸਵੀਰਾਂ ਸਾਹਮਣੇ ਆਈਆਂ ਹਨ।
ਦੱਸ ਦਈਏ ਕਿ ਇਸ ਤੋਂ ਪਹਿਲਾਂ ਖ਼ਬਰਾਂ ਆਈਆਂ ਸਨ ਕਿ ਬੇਲਾਰੂਸ ਵਿੱਚ ਯੂਕਰੇਨ-ਰੂਸ ਵਾਰਤਾ ਵਿੱਚ ਹਿੱਸਾ ਲੈਣ ਤੋਂ ਬਾਅਦ ਪਰਤਣ ਰੂਸੀ ਅਰਬਪਤੀ ਰੋਮਨ ਅਬਰਾਮੋਵਿਚ ‘ਤੇ ਸ਼ੱਕੀ ਜ਼ਹਿਰ ਦੇ ਅਸਰ ਦੇ ਲੱਛਣ ਦਿਖਾਈ ਦਿੱਤੇ ਹਨ। ਇਹ ਜਾਣਕਾਰੀ ਉਨ੍ਹਾਂ ਨੇ ਇੱਕ ਕਰੀਬੀ ਸੂਤਰ ਨੇ ਦਿੱਤੀ ਸੀ।
29 ਮਾਰਚ 2022ਰੂਸ ਨਾਲ ਵਾਰਤਾ ਦੌਰਾਨ ਕੁਝ ਖਾਣਾ-ਪੀਣਾ ਨਹੀਂ: ਯੂਕਰੇਨੀ ਮੰਤਰੀ
ਇਸਤਾਂਬੁਲ ਵਿੱਚ ਅੱਜ ਦੀ ਗੱਲਬਾਤ ਸ਼ੁਰੂ ਹੋਣ ਤੋਂ ਪਹਿਲਾਂ, ਯੂਕਰੇਨ ਦੇ ਵਿਦੇਸ਼ ਮੰਤਰੀ ਦਮਿਤਰੋ ਕੁਲੇਬਾ ਨੇ ਰੂਸੀ ਫੈਡਰੇਸ਼ਨ ਨਾਲ ਗੱਲਬਾਤ ਕਰਨ ਵਾਲੇ ਕਿਸੇ ਵੀ ਵਿਅਕਤੀ ਨੂੰ "ਕੁਝ ਵੀ ਨਾ ਖਾਣ ਅਤੇ ਪੀਣ ਦੀ ਸਲਾਹ ਦਿੱਤੀ, ਅਤੇ ਤਰਜੀਹੀ ਤੌਰ 'ਤੇ ਕਿਸੇ ਵੀ ਸਤਹ ਨੂੰ ਛੂਹਣ ਤੋਂ ਬਚਣ" ਦੀ ਸਲਾਹ ਦਿੱਤੀ।"
ਉਨ੍ਹਾਂ ਨੇ ਇਸ ਬਾਰੇ ਯੂਕਰੇਨ ਦੇ ਨਿਊਜ਼ ਚੈਨਲ ਯੂਕਰੇਨੀਆ 24 'ਤੇ ਗੱਲ ਕੀਤੀ।
ਇਹ ਚੇਤਾਵਨੀ ਇਸ ਮਹੀਨੇ ਦੇ ਸ਼ੁਰੂ ਵਿੱਚ ਯੂਕਰੇਨ-ਬੇਲਾਰੂਸ ਸਰਹੱਦ 'ਤੇ ਸ਼ਾਂਤੀ ਵਾਰਤਾ ਦੌਰਾਨ ਰੂਸੀ ਅਰਬਪਤੀ ਰੋਮਨ ਅਬਰਾਮੋਵਿਚ ਅਤੇ ਯੂਕਰੇਨੀ ਵਾਰਤਾਕਾਰਾਂ ਨੂੰ ਜ਼ਹਿਰ ਦੇਣ ਦੇ ਸ਼ੱਕ ਤੋਂ ਬਾਅਦ ਆਈ ਹੈ।
29 ਮਾਰਚ 2022ਰੂਸ-ਯੂਕਰੇਨ ਵਿਵਾਦ: ਆਪਣੇ ਤੋਂ 10 ਗੁਣਾਂ ਛੋਟੇ ਮੁਲਕ ਯੂਕਰੇਨ ਨਾਲ ਕਿਉਂ ਝਗੜ ਰਿਹਾ ਹੈ ਰੂਸ
ਤਸਵੀਰ ਸਰੋਤ, Reuters
ਰੂਸ ਯੂਕਰੇਨ ਦਰਮਿਆਨ ਜਾਰੀ ਜੰਗ ਨੂੰ ਇੱਕ ਮਹੀਨੇ ਤੋਂ ਉੱਪਰ ਦਾ ਸਮਾਂ ਹੋ ਗਿਆ ਹੈ ਪਰ ਯੂਕਰੇਨ ਨਾਲ ਰੂਸ ਕਿਉਂ ਲੜ ਰਿਹਾ ਹੈ, ਸਮਝਣ ਲਈ ਪੜ੍ਹੋ ਬੀਬੀਸੀ ਦੀ ਇਹ ਰਿਪੋਰਟ।
29 ਮਾਰਚ 2022ਯੂਕਰੇਨ ਵਿੱਚ ਬੱਚਿਆਂ ਨੂੰ ਦਿੱਤੀ ਜਾ ਰਹੀ ਹੈ ਯੁੱਧ ਦੇ ਸਾਇਰਨਾਂ ਸਬੰਧੀ ਟ੍ਰੇਨਿੰਗ
ਯੂਕਰੇਨ ਉਪਰ ਹਮਲੇ ਤੋਂ ਬਾਅਦ ਸੋਮਵਾਰ ਨੂੰ ਕੁਝ ਸਕੂਲ ਪਹਿਲੀ ਵਾਰ ਖੁੱਲ੍ਹੇ ਹਨ।
ਸੋਲੋਮੀਆ ਬੋਇਕੋਵਿਚ ਜੋ ਯੂਕਰੇਨ ਵਿੱਚ ਛੋਟੇ ਬੱਚਿਆਂ ਦੇ ਸਕੂਲ ਚਲਾਉਂਦੇ ਹਨ,ਨੇ ਬੀਬੀਸੀ ਨੂੰ ਦੱਸਿਆ ਕਿ ਇਹ ਜੰਗ ਤੋਂ ਬਾਅਦ ਉਨ੍ਹਾਂ ਨੇ ਛੋਟੇ ਬੱਚਿਆਂ ਨੂੰ ਸਾਇਰਨ ਬਾਰੇ ਟ੍ਰੇਨਿੰਗ ਦੇਣੀ ਸ਼ੁਰੂ ਕੀਤੀ ਹੈ।
ਅਜਿਹਾ ਇਸ ਲਈ ਕੀਤਾ ਹੈ ਤਾਂ ਜੋ ਬੱਚਿਆਂ ਨੂੰ ਪਤਾ ਹੋਵੇ ਕਿ ਸਾਇਰਨ ਵੱਜਣ 'ਤੇ ਉਨ੍ਹਾਂ ਨੇ ਕੀ ਕਰਨਾ ਹੈ।
"ਅਸੀਂ ਇਸ ਇਸ ਦਾ ਅਭਿਆਸ ਕੀਤਾ ਹੈ। ਜਦੋਂ ਬੱਚੇ ਸ਼ਰਨ ਲੈਣ ਲਈ ਜਾ ਰਹੇ ਸਨ ਉਨ੍ਹਾਂ ਵਿਚ ਕੋਈ ਡਰਿਆ ਨਕਾਰਾਤਮਕ ਭਾਵਨਾਵਾਂ ਨਹੀਂ ਸਨ।"
"ਬੱਚਿਆਂ ਨੇ ਇਸ ਨੂੰ ਇੱਕ ਖੇਡ ਵਾਂਗ ਲਿਆ ਅਤੇ ਉਹ ਸੈਂਟਰ ਵਿੱਚ ਜਾ ਕੇ ਵੀ ਖੇਡਣ ਲੱਗ ਗਏ।"
ਉਨ੍ਹਾਂ ਨੇ ਅੱਗੇ ਦੱਸਿਆ ਕਿ ਜੰਗ ਕਾਰਨ ਯੂਕਰੇਨ ਵਿਚ ਬੱਚਿਆਂ ਦੀ ਪੜ੍ਹਾਈ ਬਹੁਤ ਪ੍ਰਭਾਵਿਤ ਹੋਈ ਹੈ।
29 ਮਾਰਚ 2022ਕਿਉਂ ਖਰੀਦਦਾ ਹੈ ਭਾਰਤ ਰੂਸ ਤੋਂ ਤੇਲ
ਤਸਵੀਰ ਸਰੋਤ, Getty Images
ਚੀਨ ਅਤੇ ਅਮਰੀਕਾ ਤੋਂ ਬਾਅਦ ਭਾਰਤ ਦੁਨੀਆਂ ਵਿੱਚ ਤੇਲ ਦਾ ਸਭ ਤੋਂ ਵੱਡਾ ਖਪਤਕਾਰ ਹੈ ਅਤੇ ਭਾਰਤ ਦਾ 80% ਤੇਲ ਦਰਾਮਦ ਕਰਦਾ ਹੈ।
ਭਾਰਤ ਨੇ 2021 ਵਿੱਚ ਰੂਸ ਤੋਂ ਇੱਕ ਕਰੋੜ ਵੀਹ ਲੱਖ ਬੈਰਲ ਤੇਲ ਬਰਾਮਦ ਕੀਤਾ ਹੈ।
ਰੂਸ ਵੱਲੋਂ ਯੂਕਰੇਨ ਉਪਰ ਹਮਲੇ ਕਰਨ ਤੋਂ ਬਾਅਦ ਰੂਸ ਦੇ ਤੇਲ ਦੇ ਅੰਤਰਰਾਸ਼ਟਰੀ ਬਾਜ਼ਾਰ ਵਿੱਚ ਗਾਹਕ ਘਟ ਗਏ ਹਨ ਅਤੇ ਇਸ ਕਰਕੇ ਰੂਸ ਦੇ ਤੇਲ ਦੀ ਕੀਮਤ ਵੀ ਘਟੀ ਹੈ।
ਰੂਸ ਉੱਪਰ ਪੱਛਮੀ ਦੇਸ਼ਾਂ ਦੀਆਂ ਪਾਬੰਦੀਆਂ ਤੋਂ ਬਾਅਦ ਭਾਰਤ ਇਨ੍ਹਾਂ ਹਾਲਾਤਾਂ ਦਾ ਫਾਇਦਾ ਲੈਣ ਦੀ ਕੋਸ਼ਿਸ਼ ਕਰ ਰਿਹਾ ਹੈ। ਜਨਵਰੀ ਅਤੇ ਫਰਵਰੀ ਵਿੱਚ ਭਾਰਤ ਨੇ ਰੂਸ ਤੋਂ ਕੋਈ ਤੇਲ ਦਰਾਮਦ ਨਹੀਂ ਕੀਤਾ ਪਰ ਉਸ ਤੋਂ ਬਾਅਦ ਸੱਠ ਲੱਖ ਬੈਰਲ ਤੇਲ ਦਾ ਆਰਡਰ ਦਿੱਤਾ ਗਿਆ ਹੈ।
ਇਸ ਦੀ ਪੁਸ਼ਟੀ ਕੈਪਲਰ ਨੇ ਕੀਤੀ ਹੈ ਜੋ ਕਿ ਇੱਕ ਰਿਸਰਚ ਗਰੁੱਪ ਹੈ।
ਭਾਰਤ ਸਰਕਾਰ ਦਾ ਕਹਿਣਾ ਹੈ ਕਿ ਰੂਸ ਤੋਂ ਦਰਾਮਦ ਹੋਣ ਵਾਲਾ ਤੇਲ ਭਾਰਤ ਦੀ ਜ਼ਰੂਰਤਾਂ ਇੱਕ ਛੋਟਾ ਹਿੱਸਾ ਹੈ।
ਕੈਪਲਰ ਵਿਖੇ ਇੱਕ ਮਾਹਿਰ ਮੈਟ ਸਮਿੱਥ ਦਾ ਕਹਿਣਾ ਹੈ ਕਿ ਅਜਿਹੇ ਹਾਲਾਤਾਂ ਵਿੱਚ ਭਾਰਤ ਤੇ ਚੀਨ ਰੂਸ ਤੋਂ ਘੱਟ ਕੀਮਤਾਂ ਤੇ ਉਨ੍ਹਾਂ ਦਾ ਤੇਲ ਖ਼ਰੀਦ ਸਕਦੇ ਹਨ।
29 ਮਾਰਚ 2022ਖਾਰਕੀਵ ਵਿੱਚ ਰੂਸ ਨੇ ਕੀਤੇ ਮਿਜ਼ਾਈਲੀ ਹਮਲੇ
ਸੋਮਵਾਰ ਨੂੰ ਰੂਸ ਦੀਆਂ ਫ਼ੌਜਾਂ ਨੇ ਖਾਰਕੀਵ ਨਜ਼ਦੀਕ ਮਿਜ਼ਾਈਲ ਨਾਲ ਹਮਲੇ ਕੀਤੇ ਹਨ।
ਯੂਕਰੇਨ ਵੱਲੋਂ ਕੀਤੇ ਦਾਅਵਿਆਂ ਮੁਤਾਬਕ ਇਨ੍ਹਾਂ ਹਮਲਿਆਂ ਕਾਰਨ ਕਈ ਘਰ ਤਬਾਹ ਹੋਏ ਹਨ।
ਖਾਰਕੀਵ ਦੇ ਸਥਾਨਕ ਪ੍ਰਾਸੀਕਿਊਟਰ ਦਾ ਕਹਿਣਾ ਹੈ ਕਿ ਇਸ ਹਮਲੇ ਦੌਰਾਨ ਸੱਤ ਲੋਕ ਜ਼ਖ਼ਮੀ ਵੀ ਹੋਏ ਹਨ ਅਤੇ ਇੱਕ ਨਾਗਰਿਕ ਦੀ ਮੌਤ ਹੋਈ ਹੈ।
ਤਸਵੀਰ ਸਰੋਤ, Kharkiv regional administration
ਤਸਵੀਰ ਸਰੋਤ, Kharkiv regional administration
29 ਮਾਰਚ 2022ਯੂਕਰੇਨ ਦਾ ਵਫ਼ਦ ਬੈਠਕ ਲਈ ਪਹੁੰਚਿਆ ਤੁਰਕੀ
ਤਸਵੀਰ ਸਰੋਤ, Getty Images
ਤਸਵੀਰ ਕੈਪਸ਼ਨ, ਰੂਸ ਅਤੇ ਯੂਕਰੇਨ ਦਰਮਿਆਨ ਬੈਠਕ ਦੀ ਫਾਇਲ ਫੋਟੋ
ਰੂਸ ਅਤੇ ਯੂਕਰੇਨ ਦਰਮਿਆਨ ਜੰਗ ਜਾਰੀ ਹੈ ਅਤੇ ਇਸੇ ਵਿਚਾਲੇ ਯੂਕਰੇਨ ਦਾ ਇੱਕ ਵਫਦ ਇਸ ਸ਼ਾਂਤੀ ਵਾਰਤਾ ਲਈ ਤੁਰਕੀ ਦੇ ਇਸਤਾਂਬੁਲ ਪਹੁੰਚਿਆ ਹੈ।
ਇਹ ਵਫ਼ਦ ਰੂਸੀ ਨੁਮਾਇੰਦਿਆਂ ਨਾਲ ਬੈਠਕ ਕਰੇਗਾ।
ਇਸ ਵਫ਼ਦ ਦੀ ਅਗਵਾਈ ਯੂਕਰੇਨ ਦੇ ਰੱਖਿਆ ਮੰਤਰੀ ਕਰ ਰਹੇ ਹਨ ਅਤੇ ਯੂਕਰੇਨ ਦੇ ਰਾਸ਼ਟਰਪਤੀ ਦਫਤਰ ਦੇ ਮੁਖੀ ਵੀ ਮੌਜੂਦ ਹਨ।
ਦੋਹਾਂ ਦੇਸ਼ਾਂ ਦਰਮਿਆਨ ਪਹਿਲਾਂ ਵੀ ਕਈ ਬੈਠਕਾਂ ਹੋਈਆਂ ਹਨ ਪਰ ਕੋਈ ਸਿੱਟਾ ਨਹੀਂ ਨਿਕਲਿਆ।
ਪਿਛਲੇ ਦੋ ਹਫ਼ਤਿਆਂ ਤੋਂ ਬਾਅਦ ਇਹ ਪਹਿਲੀ ਬੈਠਕ ਹੈ। ਇਸ ਵਾਰਤਾ ਦੀ ਮੇਜ਼ਬਾਨੀ ਤੁਰਕੀ ਦੇ ਰਾਸ਼ਟਰਪਤੀ ਤਈਅਪ ਐਰਡੋਗਨ ਕਰਨਗੇ ਅਤੇ ਇਹ ਬਾਅਦ ਦੁਪਹਿਰ ਸ਼ੁਰੂ ਹੋਵੇਗੀ।
29 ਮਾਰਚ 2022ਖਾਰਕੀਵ ਦੇ ਮੈਟਰੋ ਸਟੇਸ਼ਨ ਦੀ ਸ਼ਰਨ ਵਿੱਚ ਯੂਕਰੇਨ ਨਿਵਾਸੀ-ਵੇਖੋ ਤਸਵੀਰਾਂ
ਰੂਸ ਦੇ ਯੂਕਰੇਨ ਉੱਪਰ ਹਮਲੇ ਤੋਂ ਬਾਅਦ ਹਜ਼ਾਰਾਂ ਖਾਰਕੀਵ ਵਾਸੀਆਂ ਨੇ ਮੈਟਰੋ ਸਟੇਸ਼ਨ ਵਿੱਚ ਸ਼ਰਨ ਲਈ ਹੋਈ ਹੈ।
ਜੰਗ ਦੀ ਸ਼ੁਰੂਆਤ ਤੋਂ ਹੀ ਲੋਕ ਮੈਟਰੋ ਸਟੇਸ਼ਨ ਵਿਖੇ ਲੁਕੇ ਹੋਏ ਹਨ।
ਸੰਯੁਕਤ ਰਾਸ਼ਟਰ ਮੁਤਾਬਕ ਹੁਣ ਤੱਕ ਇੱਕ ਕਰੋੜ ਤੋਂ ਵੱਧ ਲੋਕ ਯੂਕਰੇਨ ਛੱਡ ਕੇ ਜਾ ਚੁੱਕੇ ਹਨ।
ਤਸਵੀਰ ਸਰੋਤ, Getty Images
ਤਸਵੀਰ ਸਰੋਤ, Getty Images
ਤਸਵੀਰ ਸਰੋਤ, Getty Images
ਤਸਵੀਰ ਸਰੋਤ, Getty Images
29 ਮਾਰਚ 2022ਰੂਸ-ਯੂਕਰੇਨ ਬੈਠਕ ਵਿੱਚ ਸ਼ਾਮਲ ਰੂਸੀ ਪੂੰਜੀਪਤੀ ਵਿੱਚ ਕਥਿਤ ਜ਼ਹਿਰ ਦੇ ਲੱਛਣ
ਤਸਵੀਰ ਸਰੋਤ, Reuters
ਤਸਵੀਰ ਕੈਪਸ਼ਨ, ਰੋਮਾਨ ਅਬਰਾਮੋਵਿਚ
ਰੂਸੀ ਪੂੰਜੀਪਤੀ ਅਤੇ ਰੂਸ ਯੂਕਰੇਨ ਬੈਠਕ ਵਿੱਚ ਹਿੱਸਾ ਲੈਣ ਲੈਣ ਵਾਲੇ ਰੋਮਾਨ ਅਬਰਾਮੋਵਿਚ ਵਿੱਚ ਕਥਿਤ ਜ਼ਹਿਰ ਦੇ ਕਈ ਲੱਛਣ ਨਜ਼ਰ ਆਏ ਹਨ ।
ਅਜਿਹੇ ਹੀ ਲੱਛਣ ਸ਼ਾਂਤੀ ਵਾਰਤਾ ਵਿੱਚ ਮੌਜੂਦ ਯੂਕਰੇਨ ਦੇ ਨੁਮਾਇੰਦਿਆਂ ਵਿੱਚ ਵੀ ਆਏ ਹਨ।
ਯੂਕਰੇਨ ਦੇ ਰਾਸ਼ਟਰਪਤੀ ਦੀ ਉਨ੍ਹਾਂ ਨੂੰ ਮਿਲੇ ਸਨ ਪਰ ਉਨ੍ਹਾਂ ਵਿੱਚ ਅਜਿਹੇ ਕੋਈ ਲੱਛਣ ਨਹੀਂ ਹਨ।
ਇੱਕ ਅਮਰੀਕੀ ਅਧਿਕਾਰੀ ਨੇ ਖ਼ਬਰ ਏਜੰਸੀ ਰਿਊਟਰਜ਼ ਨੂੰ ਦੱਸਿਆ ਹੈ ਕਿ ਯੂਕਰੇਨੀ ਅਤੇ ਰੂਸੀ ਨੁਮਾਇੰਦਿਆਂ ਵਿੱਚ ਇਹ ਲੱਛਣ ਜ਼ਹਿਰ ਕਰਕੇ ਨਹੀਂ ਹਨ ਸਗੋਂ ਵਾਤਾਵਰਣ ਕਰਕੇ ਹਨ।
ਇਸ ਦੇ ਨਾਲ ਹੀ ਉਨ੍ਹਾਂ ਨੇ ਆਖਿਆ ਕਿ ਇਹ ਖਤਰਨਾਕ ਨਹੀਂ ਹਨ।
29 ਮਾਰਚ 2022ਮਾਰੀਓਪੋਲ ਤੋਂ 1000 ਤੋਂ ਵੱਧ ਲੋਕਾਂ ਨੂੰ ਸੁਰੱਖਿਅਤ ਕੱਢਿਆ ਗਿਆ
ਤਸਵੀਰ ਸਰੋਤ, Getty Images
ਯੂਕਰੇਨ ਦੇ ਸ਼ਹਿਰ ਮਾਰੀਓਪੋਲ ਵਿਖੇ ਲੱਖ ਤੋਂ ਵੱਧ ਲੋਕ ਫਸੇ ਹੋਏ ਹਨ ਅਤੇ ਸੋਮਵਾਰ ਨੂੰ 1000 ਤੋਂ ਵੱਧ ਲੋਕਾਂ ਨੂੰ ਸੁਰੱਖਿਅਤ ਕੱਢਿਆ ਗਿਆ ਹੈ।
ਇਸ ਦੀ ਪੁਸ਼ਟੀ ਯੂਕਰੇਨ ਦੇ ਰਾਸ਼ਟਰਪਤੀ ਦਫ਼ਤਰ ਦੇ ਉਪ ਮੁਖੀ ਨੇ ਕੀਤੀ ਹੈ। ਉਨ੍ਹਾਂ ਮੁਤਾਬਕ 1099 ਲੋਕਾਂ ਨੂੰ ਸੁਰੱਖਿਅਤ ਕੱਢਿਆ ਗਿਆ ਹੈ।
ਸੋਮਵਾਰ ਨੂੰ ਅੰਤਰਰਾਸ਼ਟਰੀ ਰੈੱਡ ਕਰਾਸ ਸੰਸਥਾ ਨੇ ਵੀ ਆਖਿਆ ਸੀ ਕਿ ਲੋਕਾਂ ਨੂੰ ਸੁਰੱਖਿਅਤ ਕੱਢੇ ਜਾਣ ਲਈ ਰਾਹ ਨਹੀਂ ਦਿੱਤਾ ਜਾ ਰਿਹਾ ਅਤੇ ਉਹ ਪਾਣੀ, ਬਿਜਲੀ, ਦਵਾਈਆਂ ਦੀ ਕਮੀ ਨਾਲ ਜੂਝ ਰਹੇ ਹਨ।
29 ਮਾਰਚ 2022ਯੂਕਰੇਨ - ਰੂਸ ਜੰਗ ਬਾਰੇ ਹੁਣ ਤੱਕ ਦੇ ਅਹਿਮ ਘਟਨਾਕ੍ਰਮ
ਤਸਵੀਰ ਸਰੋਤ, Getty Images
ਯੂਕਰੇਨ-ਰੂਸ ਵਿਚਾਲੇ ਜੰਗਬੰਦੀ ਨੂੰ ਲੈ ਕੇ ਗੱਲਬਾਤ ਲਈ ਦੋਵੇਂ ਦੇਸਾਂ ਦੇ ਵਫ਼ਦ ਤੁਰਕੀ ਵਿੱਚ ਹਨ।
ਯੂਕਰੇਨ ਦਾ ਕਹਿਣਾ ਹੈ ਕਿ ਗੱਲਬਾਤ ਵਿੱਚ ਉਨ੍ਹਾਂ ਦੀ ਸਭ ਤੋਂ ਵੱਡੀ ਤਰਜੀਹ ਜੰਗਬੰਦੀ ਨੂੰ ਅਮਲ ਵਿੱਚ ਲਿਆਉਣਾ ਹੈ ਪਰ ਯੂਕਰੇਨ ਤੇ ਅਮਰੀਕਾ ਨੂੰ ਗੱਲਬਾਤ ਤੋਂ ਵੱਧ ਉਮੀਦਾਂ ਨਹੀਂ ਹਨ।
ਯੂਕਰੇਨ ਦੇ ਰਾਸ਼ਟਰਪਤੀ ਜ਼ੇਲੇਂਸਕੀ ਨੇ ਦੁਨੀਆਂ ਦੇ ਦੇਸਾਂ ਨੂੰ ਰੂਸ ਉੱਤੇ ਹੋਰ ਸਖ਼ਤ ਪਾਬੰਦੀਆਂ ਲਗਾਉਣ ਦੀ ਅਪੀਲ ਕੀਤੀ ਹੈ।
ਰੂਸੀ ਧਨਾਢ ਰੋਮਨ ਐਬਰਾਮੋਵਿਚ ਨੂੰ ਇਸ ਮਹੀਨੇ ਸ਼ਾਂਤੀ ਦੀ ਗੱਲਬਾਤ ਮਗਰੋਂ ਸ਼ੱਕੀ ਜ਼ਹਿਰ ਦੇਣ ਦੇ ਲੱਛਣ ਨਜ਼ਰ ਆਏ ਹਨ।
ਅਮਰੀਕੀ ਰਾਸ਼ਟਰਪਤੀ ਜੋਅ ਬਾਇਡਨ ਦਾ ਕਹਿਣਾ ਹੈ ਕਿ ਉਨ੍ਹਾਂ ਵੱਲੋਂ ਦਿੱਤਾ ਗਿਆ ਬਿਆਨ ਕੀ ਪੁਤਿਨ ਨੂੰ ਸੱਤਾ ਵਿੱਚ ਨਹੀਂ ਰਹਿਣਾ ਚਾਹੀਦਾ, ਇੱਕ ਨਿੱਜੀ ਬਿਆਨ ਸੀ ਨਾ ਕਿ ਅਮਰੀਕੀ ਨੀਤੀ ਦਾ ਹਿੱਸਾ।
ਰੂਸ ਦਾ ਕਹਿਣਾ ਕਿ ਉਹ ਇਸ ਬਾਰੇ ਤਿਆਰੀ ਕਰ ਰਿਹਾ ਹੈ ਕਿ ਗ਼ੈਰ-ਦੋਸਤਾਨਾ ਰਵੱਈਏ ਵਾਲੇ ਦੇਸਾਂ ਦੇ ਲੋਕਾਂ ਨੂੰ ਰੂਸ ਵਿੱਚ ਦਾਖਿਲ ਨਾ ਹੋਣ ਦਿੱਤਾ ਜਾਵੇ।
29 ਮਾਰਚ 2022ਬੀਬੀਸੀ ਪੰਜਾਬੀ ਦੇ ਲਾਈਵ ਪੇਜ ’ਤੇ ਤੁਹਾਡਾ ਸਵਾਗਤ ਹੈ
ਯੂਕਰੇਨ - ਰੂਸ ਵਿਚਾਲੇ ਜਾਰੀ ਜੰਗ ਨਾਲ ਜੁੜੇ ਹਰ ਅਹਿਮ ਅਪਡੇਟ ਲਈ ਇਹ ਬੀਬੀਸੀ ਪੰਜਾਬੀ ਦਾ ਲਾਈਵ ਪੇਜ ਹੈ। ਯੂਕਰੇਨ - ਰੂਸ ਜੰਗ ਨਾਲ ਜੁੜੀਆਂ ਜਾਣਕਾਰੀਆਂ ਬੀਬੀਸੀ ਪੱਤਰਕਾਰ ਜਸਪਾਲ ਸਿੰਘ ਤੇ ਅਰਸ਼ਦੀਪ ਕੌਰ ਸਾਂਝੀਆਂ ਕਰ ਰਹੇ ਹਨ। 28 ਮਾਰਚ ਦੇ ਅਪਡੇਟ ਤੁਸੀਂ ਇਸ ਲਿੰਕ ’ਤੇ ਵੇਖ ਸਕਦੇ ਹੋ।