ਮਲਕੀਤ ਸਿੰਘ: ਜਦੋਂ ਬਰਤਾਨੀਆ ’ਚ ਸਾਜਿੰਦੇ ਨਹੀਂ ਮਿਲਦੇ ਸੀ ਉਸ ਵੇਲੇ ਮਲਕੀਤ ਨੇ ਕਿਵੇਂ ਤੂੰਬੀ ਤੇ ਢੋਲ ਉੱਤੇ ਵਿਦੇਸ਼ੀ ਨਚਾਏ ਸੀ
ਤਸਵੀਰ ਸਰੋਤ, Getty Images
- ਲੇਖਕ, ਜਸਪਾਲ ਸਿੰਘ
- ਰੋਲ, ਬੀਬੀਸੀ ਪੱਤਰਕਾਰ
“ਚੰਗਾ ਸੰਗੀਤ ਸਰ੍ਹੋਂ ਦੇ ਸਾਗ ਤੇ ਮੱਕੇ ਦੀ ਰੋਟੀ ਵਰਗਾ ਹੈ ਜੋ ਹਮੇਸ਼ਾ ਹਰ ਜੁੱਗ ਵਿੱਚ ਪਸੰਦ ਕੀਤਾ ਜਾਂਦਾ ਹੈ। ਵਕਤ ਦੇ ਹਿਸਾਬ ਨਾਲ ਸੰਗੀਤ ਨੂੰ ਬਦਲਣ ਦੀ ਲੋੜ ਨਹੀਂ ਹੈ।”
ਇਹ ਬੋਲ ਗੋਲਡਨ ਸਟਾਰ ਵਜੋਂ ਜਾਣੇ ਜਾਂਦੇ ਪੰਜਾਬੀ ਗਾਇਕ ਮਲਕੀਤ ਸਿੰਘ ਦੇ ਹਨ ਜਿਨ੍ਹਾਂ ਦਾ ਪੰਜਾਬੀ ਮਿਊਜ਼ਿਕ ਇੰਡਸਟਰੀ ਵਿੱਚ ਇੱਕ ਲੰਬਾ ਕਰੀਅਰ ਰਿਹਾ ਹੈ।
1980ਵਿਆਂ ਵਿੱਚ ‘ਗੁੜ ਨਾਲੋਂ ਇਸ਼ਕ ਮਿੱਠਾ’ ਵਰਗੇ ਗੀਤਾਂ ਨਾਲ ਆਪਣਾ ਸਫ਼ਰ ਸ਼ੁਰੂ ਕਰਨ ਵਾਲੇ ਮਲਕੀਤ ਨੇ ਕਈ ਹਿੱਟ ਗਾਣੇ ਦਿੱਤੇ ਹਨ ਤੇ ਅੱਜ ਵੀ ਉਹ ਆਪਣੇ ਗੀਤਾਂ ਰਾਹੀਂ ਪੰਜਾਬੀ ਇੰਡਸਟਰੀ ਵਿੱਚ ਕਾਇਮ ਹਨ।
ਸਾਲ 1962 ਵਿੱਚ ਪੰਜਾਬ ਦੇ ਹੁਸੈਨਪੁਰ ਵਿੱਚ ਜਨਮੇ ਮਲਕੀਤ ਸਿੰਘ ਸਾਲ 1984 ਵਿੱਚ ਬ੍ਰਿਟੇਨ ਦੇ ਬਰਮਿੰਘਮ ਵਿੱਚ ਆ ਕੇ ਵਸ ਗਏ ਸਨ।
ਮਲਕੀਤ ਸਿੰਘ ਨੂੰ ਬ੍ਰਿਟੇਨ ਦੀ ਮਹਾਰਾਣੀ ਵੱਲੋਂ 2008 ਵਿੱਚ ਐੱਮਬੀਈ ਦਾ ਖਿਤਾਬ ਵੀ ਮਿਲ ਚੁੱਕਿਆ ਹੈ। ਇਸ ਤੋਂ ਇਲਾਵਾ ਸਾਲ 2012 ਵਿੱਚ ਮਲਕੀਤ ਸਿੰਘ ਨੂੰ ‘ਬਰਮਿੰਘਮਜ਼ ਬ੍ਰੌਡ ਸਟ੍ਰੀਟ ਵਾਕ ਆਫ ਸਟਾਰਜ਼ ਨਾਲ ਵੀ ਸਨਮਾਨਿਆ ਗਿਆ ਸੀ।
ਗਾਇਕੀ ਕਰਕੇ ਸਕੂਲ ’ਚ ਦਾਖ਼ਲਾ ਮਿਲਿਆ
ਤਸਵੀਰ ਸਰੋਤ, Getty Images
ਗਾਇਕੀ ਦੇ ਸ਼ੁਰੂਆਤੀ ਸਫ਼ਰ ਬਾਰੇ ਜਦੋਂ ਮਲਕੀਤ ਸਿੰਘ ਨੂੰ ਪੁੱਛਿਆ ਤਾਂ ਉਨ੍ਹਾਂ ਦੱਸਿਆ ਕਿ ਬਚਪਨ ਵਿੱਚ ਹੀ ਉਨ੍ਹਾਂ ਨੇ ਗਾਣਾ ਸ਼ੁਰੂ ਕਰ ਦਿੱਤਾ ਸੀ।
“ਚਾਰ ਸਾਲ ਦੀ ਉਮਰ ਵਿੱਚ ਹੀ ਮੈਂ ਗਾਣਾ ਸ਼ੁਰੂ ਕਰ ਦਿੱਤਾ ਸੀ। ਮੇਰੇ ਮਾਪੇ ਦੱਸਦੇ ਸੀ ਕਿ ਟੀਚਰਾਂ ਨੇ ਮੈਨੂੰ ਮੇਰੇ ਗਾਣੇ ਲਈ ਹੀ ਸਕੂਲ ਵਿੱਚ ਦਾਖ਼ਲਾ ਦਿੱਤਾ ਸੀ।”
“ਪਹਿਲਾਂ ਤਾਂ ਮੇਰੇ ਮਾਪੇ ਵੀ ਚਾਹੁੰਦੇ ਸੀ ਕਿ ਕੁਝ ਪੜ੍ਹ ਲਿਖ ਕੇ ਕੋਈ ਅਫ਼ਸਰ ਬਣ ਜਾਵਾਂ ਪਰ ਜਦੋਂ ਮੈਂ ਟਰਾਫ਼ੀਆਂ ਜਿੱਤ ਕੇ ਆਉਣ ਲੱਗਿਆ ਤਾਂ ਉਨ੍ਹਾਂ ਨੂੰ ਲੱਗਾ ਕਿ ਮੈਂ ਇਸ ਖੇਤਰ ਵਿੱਚ ਕੁਝ ਕਰ ਸਕਦਾ ਹਾਂ ਤੇ ਉਨ੍ਹਾਂ ਨੇ ਮੈਨੂੰ ਸਪੋਰਟ ਕੀਤੀ।”
‘ਮੈਂ ਲੋਕਾਂ ਦਾ ਗਾਇਕ ਹਾਂ’
ਤਸਵੀਰ ਸਰੋਤ, Getty Images
ਮਲਕੀਤ ਸਿੰਘ ਨੂੰ ਜਦੋਂ ਉਨ੍ਹਾਂ ਦੇ ਕਾਲਜ ਦੇ ਦਿਨਾਂ ਦੀ ਗਾਇਕੀ ਬਾਰੇ ਪੁੱਛਿਆ ਤਾਂ ਉਹ ਕਹਿੰਦੇ, “ਮੈਨੂੰ ਲਗਦਾ ਹੈ ਕਿ ਅਸੀਂ ਲੋਕਾਂ ਦੇ ਗਾਇਕ ਹਾਂ। ਸਾਨੂੰ ਲੋਕਾਂ ਨੇ ਗਾਇਕ ਬਣਾਇਆ, ਮੈਨੂੰ ਸਟੂਡੈਂਟਾਂ ਨੇ ਗਾਇਕ ਬਣਾਇਆ।”
“ਅੱਜ ਵੀ ਵਿਦੇਸ਼ਾਂ ਵਿੱਚ ਮੈਂ ਸ਼ੋਅਜ਼ ਕਰਨ ਲਈ ਜਾਂਦਾ ਹਾਂ ਤਾਂ ਖਾਲਸਾ ਕਾਲਜ, ਜਲੰਧਰ ਦੇ ਮੇਰੇ ਸਾਥੀ ਮੈਨੂੰ ਆਪਣੇ ਪਰਿਵਾਰਾਂ ਨਾਲ ਮਿਲਦੇ ਹਨ।”
“ਮੈਂ ਉੁਨ੍ਹਾਂ ਨੂੰ ਕਹਿੰਦਾ ਹਾਂ ਕਿ ਮੈਂ ਤੁਹਾਡਾ ਕਰਜ਼ਦਾਰ ਹਾਂ। ਤੁਸੀਂ ਹੀ ਮੈਨੂੰ ਸਟਾਰ ਬਣਾਇਆ ਹੈ।”
“ਜਦੋਂ ਮੈਂ ਯੂਨੀਵਰਸਿਟੀ ਵਿੱਚ ਗਾਉਂਦਾ ਹੁੰਦਾ ਸੀ, ‘ਗੁੜ ਨਾਲੋਂ ਇਸ਼ਕ ਮਿੱਠਾ’ ਤਾਂ ਕੁੜੀਆਂ ਅਤੇ ਮੁੰਡਿਆਂ ਨੇ ਕਹਿਣਾ ‘ਓਹੋ, ਹਾਏ-ਹਾਏ’। ਇਸੇ ਕਾਰਨ ਉਹ ਗਾਣਾ ਮੇਰੇ ਰਿਕਾਰਡ ਕਰਨ ਤੋਂ ਪਹਿਲਾਂ ਹੀ ਪੰਜਾਬ ਵਿੱਚ ਹਿੱਟ ਸੀ। ਸਾਰੇ ਕਹਿੰਦੇ ਸੀ ਕਿ ਖਾਲਸਾ ਕਾਲਜ ਜਲੰਧਰ ਦੇ ਮੁੰਡੇ ਮਲਕੀਤ ਸਿੰਘ ਦਾ ਗਾਣਾ ਹੈ।”
ਬ੍ਰਿਟੇਨ ਵਿੱਚ ਕੀਤੀ ਪਹਿਲੀ ਰਿਕਾਰਡਿੰਗ
ਤਸਵੀਰ ਸਰੋਤ, Getty Images
ਮਲਕੀਤ ਸਿੰਘ ਨੇ ਬਰਮਿੰਘਮ ਵਿੱਚ ਡੈਨਿਮ ਦੀ ਫੈਕਟਰੀ ਵਿੱਚ ਕੰਮ ਕੀਤਾ ਸੀ।
ਮਲਕੀਤ ਸਿੰਘ ਕਹਿੰਦੇ ਹਨ, “ਗਾਣਾ ਗਾਉਣਾ ਮੇਰਾ ਪਹਿਲਾਂ ਦਾ ਸ਼ੌਂਕ ਸੀ। ਫਿਰ ਮੈਂ ਬ੍ਰਿਟੇਨ ਆ ਗਿਆ। ਉੱਥੇ ਮੈਂ ਕਾਫੀ ਮਿਹਨਤ ਕੀਤੀ। ਮੇਰੇ ਦੋਸਤ-ਮਿੱਤਰ ਮੈਨੂੰ ਕਹਿੰਦੇ ਤੁਸੀਂ ਪੰਜਾਬ ਵਿੱਚ ਤਾਂ ਕਾਫੀ ਚੰਗਾ ਗਾਉਂਦੇ ਸੀ, ਇੱਥੇ ਵੀ ਕੁਝ ਰਿਕਾਰਡਿੰਗ ਕਰੋ।”
“ਉਸ ਵੇਲੇ ਲੰਡਨ ਵਿੱਚ ਸਾਜ਼ ਵਜਾਉਣ ਵਾਲੇ ਨਹੀਂ ਹੁੰਦੇ ਸੀ। ਫਿਰ ਇੰਡੀਆ ਤੋਂ ਇੱਕ ਭੰਗੜੇ ਦੀ ਟੀਮ ਲੰਡਨ ਆਈ ਜਿਸ ਵਿੱਚ ਇੱਕ ਢੋਲ ਵਾਲਾ ਸੀ, ਇੱਕ ਹਰਮੋਨੀਅਮ ਵਾਲਾ ਸੀ। ਤੂੰਬੀ ਮੈਂ ਖੁਦ ਵਜਾ ਲੈਂਦਾ ਸੀ।”
“ਗੁੜ ਨਾਲੋਂ ਇਸ਼ਕ ਮਿੱਠਾ ਮੈਂ ਬਰਮਿੰਘਮ ਵਿੱਚ ਰਿਕਾਰਡ ਕੀਤਾ। ਜਦੋਂ ਮੈਂ ਇਹ ਗੀਤ ਰਿਲੀਜ਼ ਕੀਤਾ ਤਾਂ ਲੋਕਾਂ ਨੇ ਬਹੁਤ ਪਸੰਦ ਕੀਤਾ। ਅਸੀਂ ਵੀ ਜੋਸ਼-ਜੋਸ਼ ਵਿੱਚ 11-12 ਮਿੰਟ ਦਾ ਗਾਣਾ ਰਿਲੀਜ਼ ਕਰ ਦਿੱਤਾ।”
“ਲੋਕ ਨੱਚਣਾ ਚਾਹੁੰਦੇ ਸੀ। ਗੁੜ ਨਾਲੋਂ ਇਸ਼ਕ ਮਿੱਠਾ ਗਾਣਾ ਇੰਨਾ ਮਸ਼ਹੂਰ ਹੋਇਆ ਕਿ ਮੈਨੂੰ ਕੌਂਸਰਟ ਮਿਲਣੇ ਸ਼ੁਰੂ ਹੋ ਗਏ। ਫਿਰ ਮੈਂ ਇੱਕ ਗਾਇਕ ਬਣ ਗਿਆ ਤੇ ਮੇਰੀ ਪ੍ਰੋਫੈਸ਼ਨਲ ਲਾਈਫ ਸ਼ੁਰੂ ਹੋ ਗਈ। ਫਿਰ ਤੂਤਕ-ਤੂਤਕ ਤੂਤੀਆਂ ਗਾਣਾ ਹਿੱਟ ਹੋ ਗਿਆ।
‘ਬੀਬੀਸੀ ਨਾਲ ਮੇਰਾ ਪੁਰਾਣਾ ਨਾਤਾ’
ਤਸਵੀਰ ਸਰੋਤ, Getty Images
ਬ੍ਰਿਟੇਨ ਵਿੱਚ ਆਪਣੇ ਕਰੀਅਰ ਬਾਰੇ ਮਲਕੀਤ ਸਿੰਘ ਕਹਿੰਦੇ ਹਨ, “ਤੂਤਕ-ਤੂਤਕ ਤੂਤੀਆਂ ਤੱਕ ਮੈਂ ਕੰਮ ਕਰਦਾ ਰਿਹਾ। ਉਸ ਵੇਲੇ ਬੀਬੀਸੀ ਹੀ ਮੁੱਖ ਤੌਰ ਉੱਤੇ ਹੁੰਦਾ ਸੀ। ਬੀਬੀਸੀ ਉੱਤੇ ਸਾਡੇ ਗਾਣੇ ਲਗਦੇ ਸਨ। ਹੁਣ ਤਾਂ ਹੋਰ ਵੀ ਪੰਜਾਬੀ ਰੇਡੀਓ ਬ੍ਰਿਟੇਨ ਵਿੱਚ ਆ ਗਏ ਹਨ।”
“ਅਸੀਂ ਬੀਬੀਸੀ ਨਾਲ ਕਈ ਪ੍ਰੋਗਰਾਮ ਕੀਤੇ ਸਨ ਜਿਨ੍ਹਾਂ ਵਿੱਚ ਕਈ ਚੈਰਿਟੀ ਪ੍ਰੋਗਰਾਮ ਵੀ ਸਨ। ਪਹਿਲਾਂ ਸਾਡਾ ਗਾਣਾ ਕੇਵਲ ਢੋਲ ਤੇ ਤੁੰਬੀ ਦੇ ਨਾਲ ਥੋੜ੍ਹੇ ਮਿਊਜ਼ਿਕ ਨਾਲ ਹੀ ਰਿਕਾਰਡ ਹੋਇਆ ਸੀ।”
“ਜਦੋਂ ਉਸ ਵੇਲੇ ਕਈ ਨੌਜਵਾਨਾਂ ਨੇ ਗਾਣਾ ਬੀਬੀਸੀ ਉੱਤੇ ਸੁਣਿਆ ਤਾਂ ਉਹ ਕਹਿੰਦੇ ਕਿ ਸਾਡਾ ਮਿਊਜ਼ਿਕ ਗੋਰਿਆਂ ਵਰਗਾ ਸਾਊਂਡ ਕਿਉਂ ਨਹੀਂ ਕਰਦਾ। ਇਹ ਤਾਂ ਥੋੜ੍ਹਾ ਦਮਦਾਰ ਹੋਣਾ ਚਾਹੀਦਾ ਹੈ।”
“ਫਿਰ ਅਸੀਂ ਦੂਜੀ ਐਲਬਮ ਵਿੱਚ ਡਰੱਮ ਬੇਸ ਗਿਟਾਰ ਤੇ ਹੋਰ ਸਾਜਾਂ ਦੀ ਵਰਤੋਂ ਕੀਤੀ। ਇਨ੍ਹਾਂ ਸਾਜਾਂ ਦੀ ਵਰਤੋਂ ਕਰਨ ਵਾਲੇ ਅਸੀਂ ਪਹਿਲੇ ਸੀ।”
“ਇਸ ਮਗਰੋਂ ਅਸੀਂ ਲੋਕ ਗੀਤਾਂ ਤੇ ਅੰਗਰੇਜ਼ੀ ਮਿਊਜ਼ਿਕ ਨੂੰ ਮਿਕਸ ਕਰਦੇ ਰਹੇ ਜੋ ਲੋਕਾਂ ਨੂੰ ਪਸੰਦ ਆਇਆ। ਅਸੀਂ ਬੋਲ ਉਹੀ ਰੱਖੇ ਤੇ ਪਹਿਰਾਵਾ ਵੀ ਨਹੀਂ ਬਦਲਿਆ ਬਸ ਮਿਊਜ਼ਿਕ ਵਿੱਚ ਬਦਲਾਅ ਕੀਤਾ ਤਾਂ ਜੋ ਨੌਜਵਾਨਾਂ ਨੂੰ ਪਸੰਦ ਆ ਸਕੇ।”
ਬ੍ਰਿਟੇਨ ’ਚ ਪਛਾਣ ਮਿਲਣੀ ਸ਼ੁਰੂ ਹੋਈ
ਤਸਵੀਰ ਸਰੋਤ, Getty Images
ਮਲਕੀਤ ਸਿੰਘ ਦੱਸਦੇ ਹਨ ਕਿ ਉਨ੍ਹਾਂ ਨੇ ਨਾਈਟ ਕਲੱਬਾਂ ਵਿੱਚ ਵੀ ਕਾਫੀ ਪੇਸ਼ਕਾਰੀਆਂ ਦਿੱਤੀਆਂ ਸਨ।
ਉਸ ਵੇਲੇ ਨੂੰ ਯਾਦ ਕਰਦਿਆਂ ਮਲਕੀਤ ਸਿੰਘ ਕਹਿੰਦੇ ਹਨ, “ਅਸੀਂ ਉਨ੍ਹਾਂ ਨਾਈਟ ਕਲੱਬਾਂ ਵਿੱਚ ਵੀ ਪਰਫੌਰਮ ਕੀਤਾ ਹੈ ਜਿੱਥੇ ਕਦੇ ਕਿਸੇ ਭਾਰਤੀ ਨੇ ਪੇਸ਼ਕਾਰੀ ਨਹੀਂ ਦਿੱਤੀ ਸੀ।”
“ਰਾਤ 12-12 ਵਜੇ ਤੱਕ ਨਾਈਟ ਕਲੱਬਾਂ ਦੇ ਬਾਹਰ ਲੋਕਾਂ ਦੀਆਂ ਲਾਈਨਾਂ ਲੱਗੀਆਂ ਹੁੰਦੀਆਂ ਸਨ। ਮੈਂ ਕਈ ਵਾਰ ਸਵੇਰੇ ਤਿੰਨ-ਤਿੰਨ ਵਜੇ ਸਟੇਜ ਉੱਤੇ ਚੜ੍ਹਦਾ ਹੁੰਦਾ ਸੀ। ਅਸੀਂ ਅੰਗਰੇਜ਼ਾਂ ਨੂੰ ਦੱਸ ਦਿੱਤਾ ਸੀ ਕਿ ਸੋਲਡ ਆਊਟ ਸ਼ੋਅ ਦੇ ਲਈ ਪੰਜਾਬੀ ਮਿਊਜ਼ਿਕ ਬੇਹੱਦ ਜ਼ਰੂਰੀ ਹੈ।”
“ਅਸੀਂ ਨਾਈਟ ਕਲੱਬਾਂ ਵਿੱਚੋਂ ਲੋਕਾਂ ਨੂੰ ਬਾਹਰ ਕੱਢ ਕੇ ਉਨ੍ਹਾਂ ਨੂੰ ਪੰਜਾਬੀ ਮਿਊਜ਼ਿਕ ਨਾਲ ਜੋੜਿਆ। ਅਸੀਂ ਦੱਸਿਆ ਕਿ ਅੰਗਰੇਜ਼ੀ ਰੈਪਿੰਗ ਤੋਂ ਪਰੇ ਹੋ ਕੇ ਵੀ ਤੁਸੀਂ ਪੰਜਾਬੀ ਗੀਤਾਂ ਉੱਤੇ ਨੱਚ ਸਕਦੇ ਹੋ।”
ਗੀਤ ਬਾਰੇ ਮਲਕੀਤ ਕਿਹੜੀਆਂ ਗੱਲਾਂ ਚੇਤੇ ਰੱਖਦੇ
ਤਸਵੀਰ ਸਰੋਤ, Getty Images
ਮਲਕੀਤ ਸਿੰਘ ਨੂੰ ਜਦੋਂ ਪੁੱਛਿਆ ਕਿ ਉਹ ਗੀਤ ਬਣਾਉਣ ਵੇਲੇ ਕਿਹੜੀਆਂ ਗੱਲਾਂ ਦਾ ਧਿਆਨ ਰੱਖਦੇ ਹਨ ਤਾਂ ਉਨ੍ਹਾਂ ਨੇ ਗੱਲ ਲਫ਼ਜ਼ਾਂ ਤੋਂ ਸ਼ੁਰੂ ਕੀਤੀ।
ਉਹ ਕਹਿੰਦੇ, “ਮੈਂ ਗਾਣੇ ਖੁਦ ਲਿਖਦਾ ਹਾਂ। ਮੈਂ ਧਿਆਨ ਰੱਖਦਾ ਹਾਂ ਕਿ ਗਾਣੇ ਦੇ ਬੋਲ ਚੰਗੇ ਤੇ ਖਿੱਚਵੇਂ ਹੋਣ। ਮੈਂ ਇਸ ਗੱਲ ਨੂੰ ਵੀ ਤਰਜੀਹ ਦਿੰਦਾ ਹਾਂ ਕਿ ਮੇਰੇ ਗਾਣੇ ਦੇ ਬੋਲ ਕਿਸੇ ਵੀ ਤਰੀਕੇ ਦੇ ਨਾਲ ਵਿਵਾਦਿਤ ਨਾ ਹੋਣ।” “ਇੱਕ ਵੀ ਲਫ਼ਜ਼ ਅਜਿਹਾ ਨਾ ਹੋਵੇ ਜੋ ਕਿਸੇ ਦੇ ਦਿਲ ਨੂੰ ਦੁਖਾਏ ਜਾਂ ਇੱਕ ਵੀ ਲਫ਼ਜ਼ ਅਸ਼ਲੀਲਤਾ ਦੇ ਨੇੜੇ ਨਾਲ ਹੋਵੇ ਜਾਂ ਦੋਹਰੇ ਮਤਲਬ ਵਾਲਾ ਨਾ ਹੋਵੇ।”
ਸ਼ਬਦਾਂ ਦੀ ਚੋਣ ਤੋਂ ਬਾਅਦ ਮਲਕੀਤ ਸਿੰਘ ਗਾਣੇ ਦੀ ਧੁਨ ਵੱਲ ਜ਼ੋਰ ਦੇਣ ਦੀ ਗੱਲ ਕਹਿੰਦੇ ਹਨ। ਉਹ ਕਹਿੰਦੇ ਹਨ, “ਗਾਣੇ ਦੀ ਕੰਪੋਜ਼ੀਸ਼ਨ ਉੱਤੇ ਮੈਂ ਬਹੁਤ ਹੀ ਜ਼ੋਰ ਲਗਾਉਂਦਾ ਹਾਂ। ਗਾਣੇ ਦੀ ਧੁੰਨ ਬਹੁਤ ਖਿੱਚਵੀਂ ਹੋਵੇ, ਜੇ ਗੱਲ ਨਹੀਂ ਬਣਦੀ ਤਾਂ ਮੈਂ ਸੋਚਦਾ ਹਾਂ ਕਿਸੇ ਹੋਰ ਤਰੀਕੇ ਨਾਲ ਕਰੀਏ।”
“ਫਿਰ ਸੰਗੀਤ ਦੀ ਚੋਣ ਕਰਦੇ ਹਾਂ ਕਿ ਜਿਵੇਂ ਇਸ ਵਿੱਚ ਵਾਜਾ ਚਾਹੀਦਾ, ਢੋਲਕ ਚਾਹੀਦੀ ਹੈ ਜਾਂ ਤਬਲਾ ਚਾਹੀਦਾ। ਇਨ੍ਹਾਂ ਸਾਰੀਆਂ ਚੀਜ਼ਾਂ ਨੂੰ ਜੋੜ ਕੇ ਗਾਣਾ ਬਣਦਾ ਹੈ ਤੇ ਇਸ ਮਗਰੋਂ ਵੀਡੀਓ ਬਣਦੀ ਹੈ।”
ਮਲਕੀਤ ਸਿੰਘ ਕਹਿੰਦੇ ਹਨ ਕਿ ਵੀਡੀਓ ਬਣਾਉਣ ਵੇਲੇ ਵੀ ਉਹ ਕਾਫੀ ਬਾਰੀਕੀ ਨਾਲ ਫੈਸਲੇ ਲੈਂਦੇ ਹਨ।
ਮਲਕੀਤ ਕਹਿੰਦੇ ਹਨ, “ਗਾਣੇ ਦੀ ਵੀਡੀਓ ਦੀ ਚੋਣ ਵੇਲੇ ਮੈਂ ਅਦਾਕਾਰਾ ਦੀ ਚੋਣ ਵੀ ਗਾਣੇ ਦੇ ਹਿਸਾਬ ਨਾਲ ਕਰਦਾ ਹਾਂ। ਇਸ ਮਗਰੋਂ ਡਾਂਸਰਾਂ ਦੇ ਕੱਪੜੇ ਕਿਹੜੇ ਹੋਣਗੇ, ਮੇਰੇ ਕੱਪੜੇ ਕੀ ਹੋਣਗੇ, ਇਨ੍ਹਾਂ ਸਾਰਿਆਂ ਦਾ ਖਿਆਲ ਰੱਖਦਾ ਹਾਂ।”
ਮਲਕੀਤ ਸਿੰਘ ਕਹਿੰਦੇ ਹਨ ਕਿ ਉਹ ਕਿਸੇ ਕੰਪਨੀ ਲਈ ਨਹੀਂ ਗਾਉਂਦੇ ਹਨ ਤੇ ਉਹ ਖੁਦ ਲਈ ਹੀ ਗਾਉਂਦੇ ਹਨ ਇਸ ਲਈ ਉਹ ਆਪਣੇ ਕੰਮ ਲਈ ਖੁਦ ਜ਼ਿੰਮੇਵਾਰ ਹਨ।
‘ਪੰਜਾਬ ਦੀ ਖੁਸ਼ਬੂ ਗਾਣੇ ਤੋਂ ਆਉਣੀ ਚਾਹੁੰਦੀ ਹੈ’
ਤਸਵੀਰ ਸਰੋਤ, Getty Images
ਗਾਣਿਆਂ ਵਿੱਚ ਸੱਭਿਆਚਾਰ ਦੀ ਛਾਪ ਬਾਰੇ ਮਲਕੀਤ ਸਿੰਘ ਕੀ ਕਹਿੰਦੇ ਹਨ।
ਮਲਕੀਤ ਸਿੰਘ ਮੁਤਾਬਕ ਗਾਣੇ ਵਿੱਚੋਂ ਪੰਜਾਬ ਦੀ ਖੁਸ਼ਬੂ ਆਉਣੀ ਚਾਹੀਦੀ ਹੈ। ਇਹ ਪਤਾ ਲੱਗਣਾ ਚਾਹੀਦਾ ਹੈ ਕਿ ਪੰਜਾਬੀ ਗਾਣਾ ਹੈ।
ਉਹ ਕਹਿੰਦੇ ਹਨ, “ਗਾਣਾ ਜਦੋਂ ਟੀਵੀ ਉੱਤੇ ਲੱਗੇ ਜਾਂ ਰੇਡੀਓ ਉੱਤੇ ਲੱਗੇ ਤਾਂ ਪਤਾ ਲੱਗਣਾ ਚਾਹੀਦਾ ਹੈ ਕਿ ਗਾਣਾ ਪੰਜਾਬੀ ਹੈ। ਅੱਜ ਦੇ ਗਾਣਿਆਂ ਵਿੱਚ ਕਈ ਵਾਰ ਪਤਾ ਹੀ ਨਹੀਂ ਲਗਦਾ ਕਿ ਗਾਣਾ ਪੰਜਾਬੀ ਹੈ ਜਾਂ ਹਿੰਦੀ।”
ਮਲਕੀਤ ਸਿੰਘ ਮੰਨਦੇ ਹਨ ਕਿ ਚੰਗੇ ਗਾਣੇ ਦਾ ਕੋਈ ਜੁੱਗ ਨਹੀਂ ਹੁੰਦਾ ਹੈ। ਉਹ ਕਹਿੰਦੇ ਹਨ, “ਲੋਕ ਕਹਿੰਦੇ ਹਨ ਕਿ ਉਹ ਮਾਡਰਨਾਈਜ਼ ਹੋ ਗਏ ਹਨ ਪਰ ਮੈਨੂੰ ਲਗਦਾ ਹੈ ਕਿ ਕੁਝ ਵੀ ਮਾਡਰਨਾਈਜ਼ ਨਹੀਂ ਹੋਇਆ ਹੈ। ਲੋਕ ਮੇਰੇ ਉਹੀ ਗੀਤ ਪਸੰਦ ਕਰਦੇ ਹਨ ਜੋ ਉਹ 40 ਸਾਲ ਪਹਿਲਾਂ ਸੁਣਨਾ ਚਾਹੁੰਦੇ ਸਨ।”
“ਮੈਂ ਜਾਗੋ ਆਈ ਗਾਇਆ, ਮਾਮਾ ਬੜਾ ਗ੍ਰੇਟ ਗਾਇਆ ਉਹ ਲੋਕਾਂ ਨੂੰ ਕਾਫੀ ਪਸੰਦ ਆਇਆ। ਕਈ ਗੀਤ ਮੈਂ ਵੱਖ-ਵੱਖ ਮਿਊਜ਼ਿਕ ਡਾਇਰੈਕਟਰਾਂ ਨਾਲ ਮਾਰਡਨ ਮਿਊਜ਼ਿਕ ਉੱਤੇ ਗਾਏ ਪਰ ਉਹ ਲੋਕਾਂ ਨੂੰ ਪਸੰਦ ਨਹੀਂ ਆਏ।”
ਮਲਕੀਤ ਸਿੰਘ ਕਹਿੰਦੇ ਹਨ ਕਿ ਜਿਵੇਂ ਲੋਕ ਅੱਜ ਵੀ ਸਰੋਂ ਦਾ ਸਾਗ ਤੇ ਮੱਕੇ ਦੀ ਰੋਟੀ ਖਾਣਾ ਪਸੰਦ ਕਰਦੇ ਹਨ ਉਵੇਂ ਹੀ ਮਿਊਜ਼ਿਕ ਨੂੰ ਜ਼ਿਆਦਾ ਮਾਰਡਰਨ ਕਰਨ ਦੀ ਲੋੜ ਨਹੀਂ ਹੈ। ਚੰਗਾ ਸੰਗੀਤ ਲੋਕ ਹਮੇਸ਼ਾ ਹੀ ਸੁਣਨਾ ਪਸੰਦ ਕਰਦੇ ਹਨ।
“ਜਦੋਂ ਗਾਣੇ ਦੇ ਬੋਲ ਲੋਕਾਂ ਨੂੰ ਸਮਝ ਆਉਣਗੇ ਤਾਂ ਹੀ ਗਾਣਾ ਚੱਲਦਾ ਹੈ।”
ਕਲਾਕਾਰ ਦੇ ਲੰਬੇ ਕਰੀਅਰ ਲਈ ਕੀ ਜ਼ਰੂਰੀ ਹੈ
ਤਸਵੀਰ ਸਰੋਤ, Getty Images
ਮਲਕੀਤ ਸਿੰਘ ਦਾ ਮਿਊਜ਼ਿਕ ਵਿੱਚ ਇੱਕ ਲੰਬਾ ਕਰੀਅਰ ਹੈ। ਮਲਕੀਤ ਸਿੰਘ ਨੂੰ ਇਹ ਵੀ ਪੁੱਛਿਆ ਕਿ ਆਖ਼ਰ ਹਰ ਪੀੜ੍ਹੀ ਤੁਹਾਡੇ ਨਾਲ ਜੁੜੀ ਰਹੀ, ਇਸ ਮੁਕਾਮ ਲਈ ਇੱਕ ਕਲਾਕਾਰ ਨੂੰ ਕੀ ਕਰਨਾ ਪੈਂਦਾ ਹੈ।
ਇਸ ਬਾਰੇ ਮਲਕੀਤ ਸਿੰਘ ਕਹਿੰਦੇ, “ਗੀਤ ਉਹੀ ਹੈ ਜੋ ਤੁਹਾਡੇ ਮਾਪਿਆਂ ਨੂੰ ਵੀ ਪਸੰਦ ਹੋਵੇ, ਤੁਹਾਨੂੰ ਵੀ ਪਸੰਦ ਹੋਵੇ ਤੇ ਤੁਹਾਡੇ ਬੱਚਿਆਂ ਨੂੰ ਵੀ ਪਸੰਦ ਹੋਵੇ।”
“ਗੀਤ ਉਦੋਂ ਤੱਕ ਕਾਮਯਾਬ ਨਹੀਂ ਹੋ ਸਕਦਾ ਜਦੋਂ ਤੱਕ ਗੀਤ ਪਰਿਵਾਰ ਨੂੰ ਪਸੰਦ ਨਹੀਂ ਆਉਂਦੇ, ਤੁਸੀਂ ਇਕੱਲੇ ਨੌਜਵਾਨਾਂ ਉੱਤੇ ਫੋਕਸ ਨਹੀਂ ਕਰ ਸਕਦੇ ਹੋ।”
“ਇਹ ਗੱਲ ਲਾਈਵ ਸ਼ੋਅਜ਼ ਉੱਤੇ ਵੀ ਲਾਗੂ ਹੁੰਦੀ ਹੈ ਜੇ ਪਰਿਵਾਰ ਨਾਲ ਗੱਡੀਆਂ ਭਰ ਕੇ ਆਉਣਗੀਆਂ ਤਾਂ ਹੀ ਸ਼ੋਅਜ਼ ਦੀਆਂ ਟਿਕਟਾਂ ਵਿਕਣਗੀਆਂ ਨਹੀਂ ਤਾਂ ਸ਼ੋਅਜ਼ ਖਾਲੀ ਜਾਣਗੇ।”
“ਜਦੋਂ ਮੈਂ ਗੀਤ ਗਾਉਂਦਾ ਹਾਂ ਤੇ ਮੇਰੀ ਕੋਸ਼ਿਸ਼ ਹੁੰਦੀ ਹੈ ਕਿ ਮੇਰਾ ਗੀਤ ਬੱਚੇ ਨੂੰ ਵੀ ਪਸੰਦ ਆਏ ਤੇ ਉਸ ਦੀ ਸਮਝ ਵਿੱਚ ਆਵੇ।”
“ਮੈਂ ਕਈ ਤਜਰਬੇ ਵੀ ਕੀਤੇ ਹਨ। ਮੈ ਨਾਈਟ ਕਲੱਬਾਂ ਵਾਲੇ ਗਾਣੇ ਵੀ ਗਾਏ, ਮਾਵਾਂ ਠੰਢੀਆਂ ਛਾਵਾਂ ਵਰਗੇ ਗੀਤ ਵੀ ਗਾਏ।”
ਮਲਕੀਤ ਲਈ ਹਿੱਟ ਗੀਤ ਦੀ ਪਰਿਭਾਸ਼ਾ ਕੀ ਹੈ
ਤਸਵੀਰ ਸਰੋਤ, Getty Images
ਜਦੋਂ ਮਲਕੀਤ ਸਿੰਘ ਨੂੰ ਪੁੱਛਿਆ ਕਿ ਯੂਟਿਊਬ ਤੇ ਵਿਊਜ਼ ਦੇ ਜ਼ਮਾਨੇ ਵਿੱਚ ਮਲਕੀਤ ਲਈ ਹਿੱਟ ਹੋਣ ਦਾ ਮਤਲਬ ਕੀ ਹੈ ਤਾਂ ਮਲਕੀਤ ਕਹਿੰਦੇ, “ਜਦੋਂ ਤੁਸੀਂ ਲਾਈਵ ਪਰਫੌਰਮ ਕਰਦੇ ਹੋ ਤਾਂ ਤੁਹਾਨੂੰ ਜੋ ਤਾਰੀਫ ਮਿਲਦੀ ਹੈ ਉਸ ਦਾ ਕੋਈ ਤੋੜ ਨਹੀਂ ਹੈ।”
“ਜਦੋਂ ਬਜ਼ੁਰਗ ਬੀਬੀਆਂ ਮੇਰੇ ਸਿਰ ਉੱਤੇ ਹੱਥ ਫੇਰ ਕੇ ਕਹਿੰਦੀਆਂ ਹਨ ਕਿ ਸਾਨੂੰ ਤੇਰਾ ਮਾਂ ਦੇ ਹੱਥਾਂ ਦੀਆਂ ਪੱਕੀਆਂ ਰੋਟੀਆਂ ਗਾਣਾ ਬਹੁਤ ਚੰਗਾ ਲਗਦਾ ਹੈ, ਤਾਂ ਉਹੀ ਗਾਣਾ ਹਿੱਟ ਹੈ।”
“ਹੁਣ ਅੱਜਕਲ੍ਹ ਨੌਜਵਾਨਾਂ ਨੂੰ ਹੁੰਦਾ ਹੈ ਕਿ ਇੰਨੇ ਵਿਊਜ਼ ਆਉਣੇ ਚਾਹੀਦੇ ਹਨ ਜਾਂ ਇੰਨੇ ਆ ਗਏ ਹਨ। ਅਸਲ ਵਿੱਚ ਪੈਮਾਨਾ ਇਹ ਹੈ ਕਿ ਕਲਾਕਾਰ ਕੋਲ ਕੰਮ ਕਿੰਨਾ ਹੈ, ਕੀ ਲੋਕ ਉਸ ਨੂੰ ਜਾਣਦੇ ਹਨ ਜਾਂ ਉਹ ਲੋਕਾਂ ਵਿੱਚ ਕਿੰਨਾ ਮਸ਼ਹੂਰ ਹੈ।”
“ਕਈ ਵਾਰ ਲੋਕਾਂ ਨੇ ਗਾਣਾ ਸੁਣਿਆ ਨਹੀਂ ਹੁੰਦਾ ਹੈ ਤੇ ਗਾਣੇ ਦੇ ਵਿਊਜ਼ 20 ਮਿਲੀਅਨ ਹੁੰਦੇ ਹਨ, ਇਸ ਨਾਲ ਕੋਈ ਫਾਇਦਾ ਨਹੀਂ ਹੁੰਦਾ ਹੈ।”
“ਗਾਣਾ ਉਹ ਹੈ ਜੋ ਪਾਰਟੀ ਵਿੱਚ ਦੋ-ਤਿੰਨ ਵਾਰ ਰਿਪੀਟ ਹੋਏ। ਇਸ ਦਾ ਮਤਲਬ ਹੈ ਕਿ ਲੋਕ ਉਸ ਨੂੰ ਪਸੰਦ ਕਰ ਰਹੇ ਹਨ।”
ਮਲਕੀਤ ਸਿੰਘ ਨੇ ਦੱਸਿਆ ਕਿ ਉਹ ਸ੍ਰੀ ਦਰਬਾਰ ਸਾਹਿਬ, ਅੰਮ੍ਰਿਤਸਰ ਉੱਤੇ ਵੀ ਇੱਕ ਗੀਤ ਲੈ ਕੇ ਆਉਣ ਦੀ ਤਿਆਰੀ ਵਿੱਚ ਹਨ।
ਉਹ ਕਹਿੰਦੇ, “ਮੈਨੂੰ ਸ੍ਰੀ ਦਰਬਾਰ ਸਾਹਿਬ ਵਰਗਾ ਸਕੂਨ ਕਿਤੇ ਹੋਰ ਨਹੀਂ ਮਿਲਦਾ। ਦਰਬਾਰ ਸਾਹਿਬ ਆ ਕੇ ਮੈਂ ਬਹੁਤ ਭਾਵੁਕ ਹੋ ਜਾਂਦਾ ਹੈ। ਮੈਂ ਇੱਕ ਗੀਤ ਲਿਖਣਾ ਚਾਹੁੰਦਾ ਹੈ। ਮੈਂ ਵਿਦੇਸ਼ੀਆਂ ਨੂੰ ਵੀ ਦਰਬਾਰ ਸਾਹਿਬ ਬਾਰੇ ਦੱਸਦਾ ਹਾਂ ਤੇ ਸਾਨੂੰ ਪਰਮੋਟ ਵੀ ਕਰਨਾ ਚਾਹੀਦਾ ਹੈ।”
