ਦੰਦ ਸਾਫ਼ ਕਰਦੇ ਸਮੇਂ ਬੁਰਸ਼ ਗਲੇ 'ਚ ਕਿਵੇਂ ਫਸ ਗਿਆ ਅਤੇ ਡਾਕਟਰਾਂ ਨੇ ਕਿਵੇਂ ਬਚਾਈ ਸ਼ਖ਼ਸ ਦੀ ਜਾਨ?
- ਲੇਖਕ, ਤਾਰਕਾ ਸਨਮਾਨਾ
- ਰੋਲ, ਬੀਬੀਸੀ ਪੱਤਰਕਾਰ
- ਪੜ੍ਹਨ ਦਾ ਸਮਾਂ: 4 ਮਿੰਟ
ਦੰਦਾਂ ਨੂੰ ਬੁਰਸ਼ ਨਾਲ ਸਾਫ਼ ਕਰਨਾ ਇੱਕ ਬਹੁਤ ਹੀ ਆਮ ਗੱਲ ਹੈ ਪਰ ਸ਼੍ਰੀਲੰਕਾ ਦੇ ਪ੍ਰੇਮਲਾਲ ਲਈ ਇਹ ਕਰਨਾ ਖਤਰਨਾਕ ਸਾਬਤ ਹੋਇਆ।
ਉਨ੍ਹਾਂ ਨੂੰ ਤੁਰੰਤ ਸਰਜਰੀ ਕਰਵਾਉਣੀ ਪਈ।
ਡਾਕਟਰਾਂ ਨੇ ਪ੍ਰੇਮਲਾਲ ਦੇ ਗਲੇ ਵਿੱਚ ਫਸੇ ਬੁਰਸ਼ ਦੇ ਉੱਪਰਲੇ ਹਿੱਸੇ ਨੂੰ ਕੱਢਣ ਲਈ ਇੱਕ ਗੁੰਝਲਦਾਰ ਸਰਜਰੀ ਕੀਤੀ, ਜਿਸ ਨਾਲ ਉਸਦੀ ਜਾਨ ਬਚ ਗਈ।
ਪ੍ਰੇਮਲਾਲ ਨੇ ਬੀਬੀਸੀ ਨੂੰ ਦੱਸਿਆ, "ਦਸ ਦਿਨ ਪਹਿਲਾਂ ਬਾਥਰੂਮ ਵਿੱਚ ਬੁਰਸ਼ ਕਰਦੇ ਸਮੇਂ ਮੈਂ ਗਲਤੀ ਨਾਲ ਡਿੱਗ ਪਿਆ। ਮੇਰੇ ਮੂੰਹ ਵਿੱਚ ਟੁੱਥਬ੍ਰਸ਼ ਦੋ ਟੁਕੜਿਆਂ ਵਿੱਚ ਟੁੱਟ ਗਿਆ। ਉਸ ਦਾ ਇੱਕ ਟੁਕੜਾ ਮੇਰੇ ਗਲੇ ਵਿੱਚ ਫਸ ਗਿਆ। ਮੈਂ ਉਸ ਨੂੰ ਕੱਢਣ ਦੀ ਕਈ ਵਾਰ ਕੋਸ਼ਿਸ਼ ਕੀਤੀ, ਪਰ ਜਦੋਂ ਇਹ ਬਾਹਰ ਨਹੀਂ ਆਇਆ ਤਾਂ ਮੈਨੂੰ ਸਥਿਤੀ ਦੀ ਗੰਭੀਰਤਾ ਦਾ ਅਹਿਸਾਸ ਹੋਇਆ।"
ਪ੍ਰੇਮਲਾਲ ਨੇ ਕਿਹਾ, "ਮੈਂ ਤੁਰੰਤ ਨੇੜਲੇ ਸਰਕਾਰੀ ਹਸਪਤਾਲ ਗਿਆ ਅਤੇ ਸਥਿਤੀ ਬਾਰੇ ਦੱਸਿਆ। ਉਨ੍ਹਾਂ ਨੇ ਤੁਰੰਤ ਮੈਨੂੰ ਦਾਖਲ ਕਰ ਲਿਆ ਅਤੇ ਇਲਾਜ ਸ਼ੁਰੂ ਕਰ ਦਿੱਤਾ।"
ਅਧੂਰੇ ਇਲਾਜ ਮਗਰੋਂ ਘਰ ਭੇਜਿਆ
ਪ੍ਰੇਮਲਾਲ ਨੇ ਦੱਸਿਆ ਕਿ ਡਾਕਟਰਾਂ ਨੇ ਪਹਿਲਾਂ ਉਸ ਦੇ ਢਿੱਡ ਅਤੇ ਛਾਤੀ ਦੀ ਜਾਂਚ ਕੀਤੀ ਪਰ ਉਨ੍ਹਾਂ ਨੂੰ ਬੁਰਸ਼ ਦਾ ਕੋਈ ਹਿੱਸਾ ਨਹੀਂ ਮਿਲਿਆ।
ਜਦੋਂ ਡਾਕਟਰਾਂ ਨੇ ਉਨ੍ਹਾਂ ਨੂੰ ਕਿਹਾ ਕਿ ਉਹ ਇਲਾਜ ਖਤਮ ਹੋਣ ਤੋਂ ਬਾਅਦ ਦਸਤਖ਼ਤ ਕਰਕੇ ਘਰ ਜਾ ਸਕਦਾ ਹੈ ਤਾਂ ਉਨ੍ਹਾਂ ਨੇ ਅਜਿਹਾ ਹੀ ਕੀਤਾ ਅਤੇ ਹਸਪਤਾਲ ਤੋਂ ਚਲੇ ਗਏ।
ਘਰ ਪਹੁੰਚਣ ਤੋਂ ਇੱਕ ਘੰਟੇ ਬਾਅਦ ਪ੍ਰੇਮਲਾਲ ਨੂੰ ਆਪਣੇ ਗਲੇ ਵਿੱਚ ਜਕੜਨ ਮਹਿਸੂਸ ਹੋਈ। ਉਹ ਦੂਜੇ ਹਸਪਤਾਲ ਗਏ ਅਤੇ ਆਪਣੀ ਹਾਲਤ ਦੱਸੀ। ਉਨ੍ਹਾਂ ਨੇ ਡਾਕਟਰਾਂ ਨੂੰ ਦੱਸਿਆ ਕਿ ਉਸ ਦਾ ਗਲਾ ਖਰਾਬ ਹੈ, ਉਨ੍ਹਾਂ ਨੂੰ ਖੰਘ ਆ ਰਹੀ ਹੈ ਅਤੇ ਉਹ ਖੂਨ ਥੁੱਕ ਰਹੇ ਹਨ। ਉੱਥੋਂ ਦੇ ਡਾਕਟਰਾਂ ਨੇ ਉਨ੍ਹਾਂ ਨੂੰ ਤੁਰੰਤ ਐਕਸ-ਰੇਅ ਕਰਵਾਉਣ ਦੀ ਸਲਾਹ ਦਿੱਤੀ।
ਐਕਸ-ਰੇਅ ਤੋਂ ਪਤਾ ਲੱਗਾ ਕਿ ਟੁੱਥਬ੍ਰਸ਼ ਦਾ ਅਗਲਾ ਹਿੱਸਾ ਉਨ੍ਹਾਂ ਦੇ ਗਲੇ ਵਿੱਚ ਫਸ ਗਿਆ ਸੀ।
ਪ੍ਰੇਮਲਾਲ ਨੇ ਕਿਹਾ, "ਐਕਸ-ਰੇਅ ਤੋਂ ਪਤਾ ਲੱਗਾ ਕਿ ਬੁਰਸ਼ ਦਾ ਅਗਲਾ ਹਿੱਸਾ ਗਲੇ ਦੇ ਅੰਦਰ ਸੀ। ਪਿਛਲੇ ਹਸਪਤਾਲ ਵਿੱਚ ਮੈਨੂੰ ਦੱਸਿਆ ਗਿਆ ਸੀ ਕਿ ਪਲਾਸਟਿਕ ਦੀਆਂ ਚੀਜ਼ਾਂ ਐਕਸ-ਰੇਅ 'ਤੇ ਨਹੀਂ ਦਿਖਦੀਆਂ। ਪਰ ਇੱਥੇ, ਇਹ ਐਕਸ-ਰੇਅ 'ਤੇ ਸਾਫ਼ ਦਿਖਾਈ ਦੇ ਰਿਹਾ ਸੀ।"
ਮਤਾਰਾ ਤੋਂ ਗਾਲੇ ਤੱਕ
ਇੱਕ ਡਾਕਟਰ ਦੀ ਸਲਾਹ 'ਤੇ ਪ੍ਰੇਮਲਾਲ ਆਪਣੇ ਪੁੱਤਰ ਨਾਲ ਕੰਨ, ਨੱਕ ਅਤੇ ਗਲੇ ਦੇ ਡਾਕਟਰ ਅਨਿਰੁੱਧ ਵਿਕਰਮਸਿੰਘੇ ਨੂੰ ਮਿਲਣ ਲਈ ਮੱਤਰਾਈ ਤੋਂ ਗਾਲੇ ਗਏ।
ਜਦੋਂ ਉਹ ਪਹੁੰਚੇ ਤਾਂ ਡਾ. ਅਨਿਰੁੱਧ ਉੱਥੇ ਨਹੀਂ ਸਨ, ਇਸ ਲਈ ਪ੍ਰੇਮਲਾਲ ਨਿਰਾਸ਼ ਹੋ ਗਏ।
ਬੁਰਸ਼ ਫਸੇ ਹੋਣ ਦੇ ਬਾਵਜੂਦ ਪ੍ਰੇਮਲਾਲ ਆਮ ਵਾਂਗ ਬੋਲ ਰਹੇ ਸਨ
ਤਸਵੀਰ ਸਰੋਤ, Getty Images
ਪ੍ਰੇਮਨਾਲ ਨੇ ਕਿਹਾ, "ਸਥਿਤੀ ਦੀ ਗੰਭੀਰਤਾ ਨੂੰ ਸਮਝਦੇ ਹੋਏ ਮੈਡੀਕਲ ਸਟਾਫ ਨੇ ਤੁਰੰਤ ਮੇਰਾ ਐਕਸ-ਰੇਅ ਅਤੇ ਮੈਡੀਕਲ ਰਿਪੋਰਟ ਲਈ ਅਤੇ ਮੈਨੂੰ ਦਾਖਲ ਕਰ ਲਿਆ।"
ਬੁਰਸ਼ ਗਲੇ ਵਿੱਚ ਫਸਣ ਦੇ ਬਾਵਜੂਦ ਪ੍ਰੇਮਲਾਲ ਆਮ ਵਾਂਗ ਬੋਲ ਰਹੇ ਸਨ।
ਗਾਲੇ ਨੈਸ਼ਨਲ ਹਸਪਤਾਲ ਵਿੱਚ ਦਾਖਲ ਪ੍ਰੇਮਲਾਲ ਦੀ ਸਵੇਰੇ 9 ਵਜੇ ਡਾ. ਅਨਿਰੁੱਧ ਦੀ ਨਿਗਰਾਨੀ ਹੇਠ ਐਂਡੋਸਕੋਪੀ ਕੀਤੀ ਗਈ। ਉਹ ਟੁੱਟੇ ਹੋਏ ਬੁਰਸ਼ ਦੇ ਅਗਲੇ ਹਿੱਸੇ ਦੀ ਪਛਾਣ ਨਹੀਂ ਕਰ ਸਕੇ।
ਪ੍ਰੇਮਲਾਲ ਨੇ ਡਾਕਟਰ ਨੂੰ ਦੱਸਿਆ ਕਿ ਦਰਦ ਕੁਝ ਸਮੇਂ ਲਈ ਘੱਟ ਗਿਆ ਸੀ ਅਤੇ ਉਹ ਆਮ ਵਾਂਗ ਬੋਲ ਰਹੇ ਸਨ। ਹਾਲਾਂਕਿ ਕੁਝ ਸਮੇਂ ਬਾਅਦ, ਪੁਰਾਣੇ ਲੱਛਣ ਦੁਬਾਰਾ ਸਾਹਮਣੇ ਆਏ ਅਤੇ ਉਸ ਦੇ ਗਲੇ ਵਿੱਚੋਂ ਫਿਰ ਖੂਨ ਵਹਿਣ ਲੱਗ ਪਿਆ।
ਡਾ. ਅਨਿਰੁੱਧ ਦੀ ਸਲਾਹ 'ਤੇ ਪ੍ਰੇਮਲਾਲ ਦਾ ਮੁੜ ਐਕਸ-ਰੇਅ ਕੀਤਾ ਗਿਆ। ਡਾਕਟਰਾਂ ਨੇ ਪੁਸ਼ਟੀ ਕੀਤੀ ਕਿ ਟੁੱਥਬ੍ਰਸ਼ ਦਾ ਟੁੱਟਿਆ ਹੋਇਆ ਹਿੱਸਾ ਗਲੇ ਦੇ ਅੰਦਰ ਸੀ। ਉਨ੍ਹਾਂ ਨੇ ਸੀਟੀ ਸਕੈਨ ਵੀ ਕੀਤਾ। ਹਾਲਾਂਕਿ, ਡਾਕਟਰ ਪ੍ਰੇਮਲਾਲ ਨੂੰ ਆਮ ਵਾਂਗ ਗੱਲਾਂ ਕਰਦੇ ਅਤੇ ਖਾਂਦੇ ਦੇਖ ਕੇ ਹੈਰਾਨ ਰਹਿ ਗਏ।
ਪ੍ਰੇਮਲਾਲ ਨੇ ਫਿਰ ਗਲੇ ਦੀ ਸਰਜਰੀ ਕਰਵਾਈ।
ਪ੍ਰੇਮਲਾਲ ਨੇ ਯਾਦ ਕਰਦੇ ਹੋਏ ਕਿਹਾ, "ਡਾਕਟਰਾਂ ਨੇ ਮੈਨੂੰ ਦੱਸਿਆ ਕਿ ਸ਼੍ਰੀਲੰਕਾ ਵਿੱਚ ਅਜਿਹੀ ਘਟਨਾ ਪਹਿਲਾਂ ਕਦੇ ਨਹੀਂ ਵਾਪਰੀ। ਉਨ੍ਹਾਂ ਨੇ ਕਿਹਾ ਕਿ ਇਹ ਬਹੁਤ ਘਾਤਕ ਸੀ।"
ਉਨ੍ਹਾਂ ਅੱਗੇ ਕਿਹਾ, "ਆਪ੍ਰੇਸ਼ਨ ਸਵੇਰੇ 11:45 ਵਜੇ ਸਫਲਤਾਪੂਰਵਕ ਪੂਰਾ ਹੋ ਗਿਆ। ਮੈਨੂੰ ਓਪਰੇਟਿੰਗ ਰੂਮ ਤੋਂ ਇੰਟੈਂਸਿਵ ਕੇਅਰ ਯੂਨਿਟ ਲਿਜਾਇਆ ਗਿਆ। ਮੇਰੇ ਕੋਲ ਅਜੇ ਵੀ ਟੁੱਥਬ੍ਰਸ਼ ਦਾ ਟੁੱਟਿਆ ਹੋਇਆ ਹਿੱਸਾ ਹੈ।"
'ਛੋਟੀਆਂ-ਛੋਟੀਆਂ ਚੀਜ਼ਾਂ ਵੀ ਜਾਨਲੇਵਾ ਹੋ ਸਕਦੀਆਂ ਹਨ'
ਪ੍ਰੇਮਲਾਲ ਦਾ ਇੱਕ ਹਫ਼ਤੇ ਤੱਕ ਹਸਪਤਾਲ ਵਿੱਚ ਇਲਾਜ ਚੱਲਿਆ।
ਪ੍ਰੇਮਲਾਲ ਨੇ ਬੀਬੀਸੀ ਨੂੰ ਦੱਸਿਆ,"ਸਾਡੇ ਰੁਝੇਵਿਆਂ ਭਰੇ ਸਮਾਂ-ਸਾਰਣੀ ਵਿੱਚ, ਸਾਡੀ ਰੋਜ਼ਾਨਾ ਜ਼ਿੰਦਗੀ ਵਿੱਚ ਵੀ, ਅਸੀਂ ਬਹੁਤ ਸਾਰੀਆਂ ਛੋਟੀਆਂ-ਛੋਟੀਆਂ ਗਲਤੀਆਂ ਕਰਦੇ ਹਾਂ ਜੋ ਘਾਤਕ ਸਾਬਤ ਹੋ ਸਕਦੀਆਂ ਹਨ। ਮੈਂ ਚਾਹੁੰਦਾ ਹਾਂ ਕਿ ਇਹ ਨਾ ਸਿਰਫ਼ ਸ਼੍ਰੀਲੰਕਾ ਵਿੱਚ, ਸਗੋਂ ਦੁਨੀਆ ਦੇ ਵੱਖ-ਵੱਖ ਹਿੱਸਿਆਂ ਵਿੱਚ ਵਿਅਸਤ ਲੋਕਾਂ ਲਈ ਇੱਕ ਉਦਾਹਰਣ ਬਣੇ।"
ਬੀਬੀਸੀ ਲਈ ਕਲੈਕਟਿਵ ਨਿਊਜ਼ਰੂਮ ਵੱਲੋਂ ਪ੍ਰਕਾਸ਼ਿਤ
