12/11/2023

An Nowodhow: an 12ves a vis Du 2023

Dohajydh da, ha dynnargh dhe dhyllans an seythen ma 'An Nowodhow' war BBC Radyo Kernow.

*

Yma Konsel Kernow ow kenertha tus yowynk dhe ombrofya y’n etholansow rag Konsel Yowynkneth Kernow.

An Konsel Yowynkneth yw bagas a beswar yonker warn ugens a vynn ri lev dh’aga farow y’gan kemenethow, ha kanasedhi aga avisyow hag edhommow dhe Gonsel Kernow.

Etholansow rag dewdhek esedh a vydh synsys nessa bledhen ynter an nawves warn ugens a vis Genver ha kalan Meurth.

Res yw dhe skolyow omkovskrifa rag synsi etholansow, ha yonkers, ynter unnek bloodh hag etek bloodh neb a vynn ombrofya, a dal y wul kyns an tressa a vis Kevardhu.

Yn-medh Konselores Barbara Ellenbroek, “Gothus dres eghen ov vy a’n fordh may hwra an konsel yowynkneth gelwel an awtorita leel ma dhe ri akont anodho y honan”.

Ha Sasha, pymthek bloodh hy oos, a geworras, “An konsel yowynkneth a weresas dhymm ow tevi yn kemmys fordh”.

*

Anedhysi gwig gernewek re arvreusis ervirans konsel an bluw dhe dhegea park-gwari leel awos prederow a-dro dhe salowder.

Y kevir an park-gwari yn Boslova, ogas dhe Gelliwik, hag yma hwans dhe Gonsel Pluw Dirklym y dhegea kyns diwedh an mis ma.

Leveryas a-barth an konsel a dherivas bos an park peryllus rag fleghes drefen y vos yn tyller klos na allas bos gorwelys yn es, ogas dhe gosow ha “hen wonisyow bal”.

Kar leel, Madeleine Craig hy hanow, a leveris, “Yth eson ni oll fest serrys drefen na wrussons i bythkweth govyn orthyn mar kwren ni devnydh anodho yn fenowgh, ha nyns eus dewis aral y’n wig”.

Konseler Nigel Cooper a leveris y vos “diswaytys” bos an anedhysi serrys mes y hyllens i ri aga breusow yn nessa kuntelles an konsel an ugensves a vis Du.

*

*

Ayrlinen Skybus re dheklaryas y fynn hi provia le a neyjow ynter Syllan ha’n tir meur nessa bledhen, ha’n kowethyans a warnyas y lewyadoryon ma na vo martesen soodh rag pub lewyador yw arvethys ganso y’n eur ma.

Herwydh derivas dyllys gans perghennow Skybus, Bagas Gorhel Tan Syllan, y fynna an kowethyans pesya provia neyjow dhe’n enesow pub dydh oll, hag y fedha prisyow arbennik rag an enesogyon.

An bagas a leveris bos an kost a brovia an servis dhe Syllan pupprys ow kressya, hag y fynna ev metya gans y lewyadoryon “rag omgussulya a-dro dhe dhewisyow ow tochya lehe kostow ha delivra ayrlinen lesek ha sostenadow”.

Kowethas Anserghek an Lewyadoryon a leveris y vos “prederys yn feur” hag ev a warnyas may halla an chanjyow ma kressya prisyow viaj ayr.

Ev a geworras bos derivas Skybus “argasus heb res”.

*

Dyski sleynethow awenek a yll dri prow dhe dhyskyblon ha dh’aga dyskadoryon ynwedh, herwydh hwithransow gwrys gans Pennskol Karesk ha Kollji Pennrynn.

An arhwithroryon a gesoberas gans bagas a skolyow yn Kernow West, aswonys avel Keskowethyans Pennrynn, ha dismygi bos “kressyansow nosedhek” yn sleynethow awenek an dyskyblon. Dres henna, an dhyskadoryon aga honan a dhisplegyas fordhow nowydh a sordya awenekter y’ga dyskyblon.

Yn-medh onan a’n dhyskadoryon, “An studhyans ma a gonfirmyas dhymm bos essensek gul termyn ha spas lowr rag awenekter yn stevel an klass mar mynnyn darbari degowogyon gans an eghennow a sleynethow yw res dhedha rag an termyn a dheu”.

An hwithransow ma yw rann a dowl arbrovel arghesys gans Konsel an Artys ha Fondyans

Freelands, hag yma govenek dhe’n arhwithroryon may fo dyskadoryon oll-dreus dhe’n Ruvaneth Unys awenys gans an studhyans ma.

*

Yth esowgh hwi ow koslowes orth ‘An Nowodhow’ war BBC Radyo Kernow. An dowlen an seythen ma a veu skrifys ha presentys genev vy, Steve Penhaligon. An pennskrifer o Steve Harris. Bys dy’ Sul nessa, Duw genowgh hwi oll.