15/10/2023

An Nowodhow, an 15ves a vis Hedra 2023
Dohajydh da, ha dynnargh dhe dhyllans an seythen ma ‘An Nowodhow’ war BBC Radyo Kernow.Delatyes re beu ygeryans a dhrehevyans gans obervaow rag negysyow awenek yn Pennsans. Towlennys re bia Bush Awenek Pennsans (Penzance Creative Cluster), yn Pennkons (Causewayhead), dhe ygeri kynnyav 2023, mes Konsel Kernow re dhellos dedhyas nowydh a hav 2024. An drehevyans a wra provia bys yn deg warn ugens a studhleow arnowydh hag obervaow hebleth may fons devnydh anedha kowethyansow liesek.Yn-medh Louis Gardner, synsyas plegell Konsel Kernow rag erbysiedh: “Kyn fiv sur nowodhow a dhelays a’n dedhyans-ygeri dhe dhiswaytyas meur a dus y’n dre, y fynnav vy afydhya dhe drigoryon agan bos omres – agan kevambosoryon Kier ynwedh – dhe worfenna an dowlen ma skonna gallen. Ni re dhegemeras seulabrys bern bras a negysyow hag a vynn bos selyes omma, hag omres on ni dhe surhe an kynsa gobrenoryon dhe oberi dhyworth an drehevyans yn hav 2024.”Yn-medh Tim Dwelly, Esel Konsel Kernow rag Pennsans Est: “Rag dasvewa agan pennstretys, res yw dhyn dri negysyow, ha dre sewyans, oberennow dhe gres agan trevow. Henn yw prag yth yw mar dhe les an drehevyans Bush Awenek Pennsans dhe’n dre. Yma dhe Gernow moy a dus owth oberi y’n diwysyansow awenek es ranndiryow powek erel y’n Ruvaneth Unys, ha ni a wor bos chons dhe vrashe an ranngylgh ma moy dre brovia obervaow kres an dre a vri ughel. Hedre vo lestansek an delays, pes da ov vy gweles bos an drehevyans ygor y’n hav.”Y tiskwedhir pel gowrek an norvys y’n ayr yn Penneglos Truru. Gaia yw hanow an artweyth, 7 meter y vraster, kregys ughel, gwrys gans Luke Jerram. Tewlys yw pel an norvys, golowhes a-bervedh, dhe wruthyl skians an Effeyth Ughwel (Overview Effect), prevys gans stervarnoryon ow kweles an Norvys dhyworth efander, dell leveris y wrier. Ev a leveris y hwaytyas ev an ober, displetyes yn Kernow bys yn dy’Sadorn an 28ves a vis Hedra, dhe vrosa omglewans a reowta rag an planet. Senys war-barth gans an gravyans yw komposyans a son-kerghynna gans komposydh Dan Jones, BAFTA y bewas, rag keworra myns pella dhe’n prevyans-mires, dell leveris dyghtyoryon an dowlen. Mr Jerram a leveris y fynnas aweni godrigoryon dhe prederi a fordhow may hyllyn gwitha “agan tre unnik”. Yn-medh ev: “Govenek a’m beus godrigoryon dhe weles fatel yw teg dres eghen ha ker an planet le may trigyn.”Karr tredanek, drehevys gans bagas a studhyoryon dhyworth Kernow, re waynyas res keswlasek, ha gul rekord kesstrif nowydh. Skol Nessa Richard Lander yn Truru a fethas moy es kans bagas dhyworth powyow y’ga mysk Brasil ha Portyngal yn pennwari keswlasek Greenpower yn Goodwood. Chalenjyes veu an etek studhyer dhe dhesina ha drehevel kerri tredanek ha dhe resek ynna. Y kesstrivyons i dhe hedhes an brassa pellder yn deg mynysen ha peswar ugens. Yth yw an pympes tro Skol Nessa Richard Lander dhe waynya an kesstrif yn rew.Yth esowgh hwi ow koslowes orth ‘An Nowodhow’ war BBC Radyo Kernow. An dowlen an seythen ma a veu skrifys ha presentys genev vy, Wella Morris. Steve Harris o an pennskrifer. Bys dy’Sul nessa, dydh da dhywgh hwi oll.