08/10/2023

An Nowodhow: an 8ves a vis Hedra 2023

Dohajydh da, ha dynnargh dhe dhyllans an seythen ma 'An Nowodhow' war BBC Radyo Kernow.

An Vorladron Gernewek a alsa hedhi bos klub galwesik yn tien mar ny allons kavos an arghasans ewn nessa seson.

An Vorladron re arghasas (yn gis crowdfunding) rag gweres ow lenwel an bolgh a vydh gesys pan worfen Dicky Evans y skoodhyans nessa hav.

Hemm a dheu ha para aral an Kampyorieth, Jersey Reds, ow cessya kenwertha wosa unn bennfenten a arghans dhedha dhe hedhi drefen ansurneth yn kever termyn a dheu a’n nessa nivel.

“Hwath Fondyans Galwesik yn tien on ni ha gwynn agan bys Dicky a ri gweres arghans dhe henna rag lies bledhen,” a leveris pennweythresek, Rebecca Thomas hy hanow.

“Yma patronyow erel – an Kampyorieth yw folsys ha gwrys a glubys a ober yn gisyow dyffrans, yma tus a dhyskas oll a’n seythen hag ena a yskynna yn kyttrin ha dos yn-nans ha gwari.”

“Nyns yw dhe leverel ny wren ni an keth omma, y hyllir bos ni a wra oberi patron dyffrans a’n huni a wren ni yn pols ma.”

An Vorladron re beu skattys gans difyk Jersey Reds – yth ens gwaytys ostya an para an seythen usi passyes y’n Hanaf Rugbi Kampyorieth hag a wrug tyli rag an neyjow dhe degi an para dhe Jersey rag aga fytt nessa mis.

Mar na wra Jersey kavos kevarghow nowydh ha removys yns dhyworth an kesunyans an Vorladron a wrussa kelli fytt tre aral diwettha y’n seson, henna a styr koll a arghans dhyworth toknys ha gwestva.

Y teu ha termyn a dheu a’n Kampyorieth dres penn an seson ma ow remaynya ancertan, gans an Rugby Football Union dhe dheklarya aga thowlennow rag an kesstrif hwath po fatel vydh arghasys.

Parys Kampyorieth a welas aga arghasans kresel dhyworth an RFU terrys dhyworth moy ages pymp kans mil a beusnow y’n veldhen dew vil hag ugens dhe a-dro dhe gans ha deg mil ha dew ugens, ow kasa klubys dhe gavos fordhow rag lenwel an bolgh.

An diwettha arghantiow yn Bosvena a wra degea an keth jydh nessa bledhen.

An ugensves a Vis Metheven dew vil peswar warn ugens, an arghantiow Lloyds ha Halifax a wra degea aga thell yn fos ynwedh.

Both Arghanti Bosvena yw towlennys dhe vos oberansek erbyn ena, mes Bagas Arghanti Lloyds, neb a ober an dhew, a leveris y hwrussons gwitha an arghantiow ygor rag dewdhek mis mar po an both hwath anygerys.

Y leveris an bagas y fia an sodhva post kevadow rag bankya pubdedhyek ha’n tell yn fos heb kost yn ogas.

Sako Ali, dhyworth gwerthji barbour yn Stret Meur, a leveris ny wrons degemeres marnas pemonts yn mona ytho yma bern dhodho fatel wra ev ri mona dhe’n arghanti.

“Henn yw nowodhow drog rag Bosvena,” yn-medh ev.

“Yma meur a dus ow triga omma gans edhom a arghantiow, ha gans edhom a dhenagha mona.”

“Fatel wren ni dhenagha mona? A fydh edhom mos yn neb le avel Tewynblustri? Henna a via kales rag tus.”

Yma dhe Dennis Hawker hag y vyrgh Sahara negys war Stret Meur ynwedh.

Aga arghanti yn Bosvena yw degys seulabrys, ytho res yw dhe Sahara kuntel mona dhyworth Tewnblustri.

“Ny via marth dhymm mar lever wortiwedh an sodhva post ma na wrons handla mona namoy ” yn-medh Mester Hawker.

Yn derivas, kannas Bagas Arghanti Lloyds a leveris orth an BBC: “Drefen bos lies prener ow tewis gul aga ober arghanti warlinen po dres aga app klappkodh, vysytyansow dh’gan arghantiow Lloyds ha Halifax yn Bosvena re godhas y’n bledhynnyow a-dhiwedhes.”

*

Yth esowgh hwi ow koslowes orth ‘An Nowodhow’ war BBC Radyo Kernow. An dowlen an seythen ma a veu skrifys ha presentys genev vy Kensa Broadhurst. An pennskrifer o Steve Harris. Bys dy’ Sul nessa, dydh da dhywgh hwi oll.