02/07/2023

An Nowodhow - 02/07/2023

Dohajydh da, ha dynnargh dhe dhyllans a’n seythen ma ‘An Nowodhow’ war BBC Radyo Kernow.

*

Diw alusen withva voos hag a skoodh tus yn Kernow re warnyas a dhemond ughel dres eghen orth withvaow boos, hag ynnia kowethyansow dhe argevri.

FareShare South West, hag a omdowl gans nown ha skoll boos, a skoodh peswar kans alusen yn ranndir, ow lesranna boos dhe skovvaow, kresennow rehab ha gwithvaow boos.

Gene Joyner, pennweythresek an alusen, hag yw selys yn Brystow, a leveris aga bos synsys yn feur dh’aga skodhoryon a-lemmyn yn diwysyans boos, mes bos demond soweth brassa ages provians.

Ev a dhevynnas an vresel yn Ukrayn, kudynnow kadon-brovia, ha kostys nerth ughel dhe vos faktorow hag a nas hedhas a’n bobel dhe voos.

Y pys lemmyn tiogow hag askororyon ha gwerthoryon boos a ri boos an pyth a via skollys poken.

Yn kettermyn, Simon Fann, dhyworth Gwithva Voos Truru a leveris y hwelsa myns “heb par kyns” a dus ow kul devnydh a’y wonisyow.

An niver a dus neb a hwila gweres dhyworta re dhobelhas yn teyr bledhen ha moy es deg kansrann ha tri ugens a dhevnydhyoryon a’n withva dhe vos arvethys.

Leveryas Tresorva YV [HM] a leveris: “Ni a wor bos prisyow boos prederus rag mayni a-dro dhe’n pow, ha rakhenna hantera hwythans hevlena ha dehweles dhe’n amkan a dhew kansrann yw agan ragwir.”

*

Yma galowyow dhe dhilea tollow war an pons ha’n kowbal hag a jun Dewnans ha Kernow a-dreus an Tamar.

Pons fordh Tamar a jun Aberplymm hag Essa, hag an kowbalow a jun an cita ha Penntorr.

Y’n eur ma, tus a be dew beuns ha tri ugens diner, po unn beuns deg dinar warn ugens gans diskont TamarTag. Prisyow a voghha herwydh poos a’n degador.

Perghennys war-barth yw an pons hag an kowbal gans Konsel Kernow ha Konsel Cita Aberplymm.

Y teu Kalan Genver hevlena, moghheans a dheg kansrann warn ugens komendys gans Skrifennyas Karyans.

Perghen negys Essa A&B Potatoes, Ben Ruby y hanow, a lever y gowethyas dhe spena a-dro dhe vil beuns pub mis rag treusi an avon, ha henna gans diskont.

Leveryas rag Bagas Gwrians Toll Tamar a leveris y feu tollow rag lies pons a-dreus an pow dileys.

I a leveris bos aga amkan dileans yn tien a’n tollow dhe dreusi an Tamar dre bons po dre gowbal.

Leveryas rag oberor Tamar Crossings a leveris: “diskont a hanterkans peuns yw profys dre dowlen DamarTag, hag a iselha an kost a dreusi rag an re na a’n devnydh an moyha.

Asran rag Karyans a leveris “ervirans vyth dhe ughelhe po iselhe tollow a via neppyth rag an awtoritys leel perthynek.”

Y keworras yth aswonnons i bos posow war erbysieth Tamar Crossings ha pesya dhe oberi gans konsels dhe hwithra dewisyow laghel hag a allsa gorra an dreusva war rond arghansel moy fast.

*

Yma onan a’n kowbalow Penntorr owth oberi arta wosa nowedhyans meur.

An Plym yw onan a’n tri howbal war an hyns.

An lester, hag a dheg kerri ha trethysi, a veu kemeres mes a wonis yn mis Ebrel rag “ragdres kompleth” dhe ystyn moyha galla y vewnans.

Yma nowedhyans dhe bub a’n tri howbal pub pymp bledhen. Tamar yw towlys rag y nowedhyans yn mis Ebrel 2024, ha Lynher yn Ebrel 2025.

*

An Vorladron Gernewek re sinas gwarier Jersey kyns, Tom Pittman y hanow.

An keynor, peswar bloodh warn ugens y oos, hag a yll gwari hanterer ‘mes po kres, re akordyas ambos a unn vledhen gans an Vorladron.

Pittman yw an diwettha gwarier dhe junya a’n klub y’n mis eus passyes. Dewdhek Chifys Karesk re akordyas kevambosow diw-govskrifans, ha peswar gwarier Ealing re junyas rag tro.

*

Ha wortiwedh hedhyw, fleghes gans kesstudhyow varwel yn halladow re omlowenhas yn gorthugher arbennik yn Milva Tewynblustri.

Tri hans a dus, ow komprehendya teyluyow a’n fleghes, a dheuth dhe’n hwarvedhyans, ‘Nos Hunros y’n Vilva’.

I a veu gelwys dhyworth Klavji Fleghes Little Harbour yn Sen Austell, alusen skoodhyans Ellie’s Haven yn Logh, hag Unses Onkologieth Klavji Kernow Riel.

‘Nos Hunros y’n Vilva’ yw towlen ollvysel hag a dhallathas y’n Iseldiryow.

*

Yth esowgh hwi ow koslowes orth ‘An Nowodhow’ war BBC Radyo Kernow. An dowlen an seythen ma a veu skrifys genev vy Duncan McIntosh, an pennskrifer o Wella Morris. Steve Penhaligon a vydh genowgh dy’Sul nessa, bys ena dhyworthiv vy, re bo seythen da genowgh.