28/05/2023

An Nowodhow, an 28ves a vis Me 2023Dohajydh da, ha dynnargh dhe dhyllans an seythen ma ‘An Nowodhow’ war BBC Radyo Kernow.Konsel Kernow re bassyas avis “troboyntel” may skootthyons tiogow der omri dhe gavos ragvewek trevas teythyek rag hwarvosow an konsel. An konsel a wra ynwedh ynia tus dhe brenassa teythyek ha dhe gemeres prow a “voos hag yw tevys tre, affordyadow ha magus.” Profyes veu an avis gans konseler Gwithyasel Nick Craker yn kuntelles a’n konsel leun yn Lys Kernow dy’Meurth. Passyes veu an avis yn keskolon. Mr Craker a leveris skoodhya tiogow ha tevyoryon dhe vos “essensek” rag erbysiedh Kernow. Ha skodhus a’n avis, yn-medh konseler Livrel Gwerinel Dominic Fairman, “Kyn poslev dres eghen an avis fatel yw posek kig ha jott rag dybri kompes,” res yw dhe’n konsel “skoodhya an tremenyans trohag amethyans natur-kowethek – owth askorra kig frankres ha gwelsek-megys ha kollenwel an gorholeth ow kressya, ledys gans an varghas, rag bosow losow-selyes.” An Keffrysyans Powdir a leveris bos an sewyans yn Kernow “trygh rag skians kemmyn” hag ynisa konsels powek erel dhe wul yndella.Yth omdennas kaderyer konsel eglos kernewek neb o kres hobadolya a reydhgasieth drefen i dhe argemynna ober rag pronter “gorow”. Mis Meurth y passyas Konsel Eglos Pluwek (PCC) Fowydh ervirans dhe argemynna rag pronter gorow. Yn kuntelles bledhynnyek an PCC dy’Sul eus passyes y teskrifas unn drigores an ervirans avel “reydhgasieth tien”. Kyns an kuntelles yth omdennas kaderyer Andy Virr ha dew esel erel an PCC. An PCC re dhefendsa y ervirans kyns avel “heb reydhgasieth”, ha leverel i dhe dhynerghi pronteryon benow rag dyski an Bibel ha ledya komun, mes mynnes pronter gorow yn Eglos Pluwek Fowydh. An kuntelles dy’Sul eus passyes a glewas a drigores neb a leveris hy bos “offendyes a-barth Fowydh” a’n ervirans na gaffa pronter benow, dell leveris an Gonis Derivas Gwerinieth Teythyek.Kowethyans fusen Syr Richard Branson, Virgin Orbit y hanow, re dhegeas yn tien, nyns yw lies mis wosa defowt bras a vedras. Ev re werthsa taklow a berghennas rag assaya treusvewa, y’ga mysk y jett treylyes Cosmic Girl, ha brassa rann a’y bennplas yn Kaliforni. Mis Genver, y gynsa medras lorell y’n Ruvaneth Unys a dhrehedhas efanvos, mes fyllel y resegva dewlys. An fusen a brevis digomposter hag a “worfennas kynsadhves” an kynsa losk. Dew vis wosa henna y “powesas” an kowethyans “oberyansow oll” rag assaya, dell hevelis, skoodhya y arghasow, ha danvenys tre veu ogas hag oll y arvethesigyon. Dell lever an bagas yn Porth Efanvos Kernow, ymons i owth oberi gans ken kowethyansow lonch, y’ga mysk Sierra Space, hag i a wra pesya gwruthyl ha maga bonni efanvos. Mes pennskrifer godhonieth an BBC, Rebecca Morelle, a lever bos anwirhaval lonch aral skon yn Kernow. Strothys yw an le yn Ayrborth Tewynblustri dhe lonchow gorwelyek – pan yskyn jynn ebron ow tegi fusen hag yw lonchyes ena kres neyj.Yma onan a’n destnansow an moyha gerys-da yn Kernow ow prederi “toll havysi”. Mer Porthia, Johnnie Wells y hanow, a leveris i dhe gewsel orth kowethyansow golyow a doll a-vodh, drefen bos edhom dhedha a janj a lagha rag tolli yn konstrinus.Yth esowgh hwi ow koslowes orth ‘An Nowodhow’ war BBC Radyo Kernow. An dowlen an seythen ma a veu skrifys ha presentys genev vy, Wella Morris. Steve Penhaligon o an pennskrifer. Bys dy’Sul nessa, dydh da dhywgh hwi oll.