14/05/2023

An Nowodhow: an 14ves a vis Me 2023

Dohajydh da, ha dynnargh dhe dhyllans an seythen ma 'An Nowodhow' war BBC Radyo Kernow.

*

Yth esa seyth kanores dhyworth Keur Penneglos Truru y’n keur hag a ganas yn Abatti Westminster rag Kurunyans Myghtern Charles an Tressa.

Lies mis yth esa an mowysi ow praktisya an ilow. I eth dhe Loundres rag diw seythen a assays finel gans an keuryow erel kyns an solempnyans y honan.

Hemm o an kynsa tro may kanas mowysi yn servis kurunyans.

An gwrians dres eghen yw moy marthys an deyth awos peder a’n mowysi dhe wul aga apposyansow A Level kyns neppell.

*

Skath hir, may fydh trigys dell waytir pymp kans divroek ynno re beu halyas orth porth Kernewek.

An Bibby Stockholm, dhyworth Itali, a dheuth yn porth lestri yn Aberfal dy’Meurth, kyns hwithrans hag ober daswul.

Yma towl dhe’n governans dhe movya an skath hir dhe Portland rag dalleth triga an dhivroegyon.

Alusennow ha politegoryon re jujyas an towl mes an Pennvenyster, Rishi Sunak y hanow a leveris yth erbyssa arghans toll wober ha lehe poos war ostelyow.

An skath hir a vydh usys rag dalleth triga tus andhemedhys hag i ow kortos aga chalenjys harber dhe vos dyghtys.

Hi a wra oberi dres etek mis dhe’n lyha, herwydh Sodhva an Stat.

*

Benyn a veu sawys dhywar a benn tour eglos an ughella yn Kernow.

Hi a dheuth ha bos klav wosa yskynna an tour yn treveglos Lannbrobus, ogas dhe Druru, dohajydhweyth dy’Sul usi passyes herwydh sawysi.

An tour re bia ygor orth an boblek avel rann a’n solempnyansow Kurunyans a Vygtern Charles an Tressa.

Drefen an tyller kales, tro askel a’n Withysi Alsyow ha bagasow sawyans alsyow o omvyskys ynwedh, keffrys ha tro askel klavji, an Kreslu ha tangasoryon.

An tour, a-dro dhe’n pymthegves kansvledhen y oos, yw an ughella eglos plu yn Kernow. Kans ha hwegh troos-hys warn ugens yw y ughelder herwydh konsel an plu.

*

Onan a’n hwarvosow hengovek a Gernow moy a vri a veu synsys dy’Gwener an pympes a-vis Me rag avoydya kontradians gans an Kurunyans a Vyghtern Charles an Tressa.

Dydh an Dons Feri yn Hellys a veu gwaytys dhe hwarvos dy’Sadorn, mes an restroryon a warnyas chanj a’n jydh mis Hedra usi passys.

Dell yw usys, Dydh an Dons Feri yw synsys an ethves a-vis Me, marnas hemm yw dy’Sul po dy’Lun, yn kas na synsys yw an dy’Sadorn kyns.

An jydh a verk dalleth gwenton hag omdhiskwedhes donsyow der an dre.

Tus a furvyas linyow y’n stretys rag goslowes orth Bagas Brest Hellys neb a sonas ilow hengovek hag arbennik dres an jydh, gans gwerthjiow ha chiow afinys gans bleujyow ha losow.

*

Askeller Chifys Karesk, neb a wari rag Pow Sows ha’n Lewyon Vretennek hag Iwerdhonek, Jack Nowell y hanow re ros gras orth an klub ha’y skodhyoryon.

An Kernow a wra gasa an Jifys an hav ma rag gwaya gwaytys dhe’n para Frynkek La Rochelle.

Nowell a waynyas hwegh kappa ha dew ugens rag Pow Sows hag a warias yn dew fytt prov rag an Lewyon.

Ev a skoryas peswar assay ha dew ugens yn pymp fytt hag eth ugens rag Karesk.

“Dell dybav, pub tra da a dheu dhe benn wortiwedh,” y skrifas Nowell war vedya socyal.

“Y’n gwettha prys, ow thermyn orth Exeter Chiefs yw gorfennys ha pana dermyn a gevyn vy.”

“Dh’gan skodhyoryon, hwi yw yn hwir an gwella,” a leveris Nowell, neb a weresas Karesk orth dew ditel Pennroweth ha gwayn Hanaf Kampyorieth Europa yn diw vil hag ugens.

*

Yth esowgh hwi ow koslowes orth ‘An Nowodhow’ war BBC Radyo Kernow. An dowlen an seythen ma a veu skrifys ha presentys genev vy Kensa Broadhurst. An pennskrifer o Duncan McIntosh. Bys dy’ Sul nessa, dydh da dhywgh hwi oll.