26/02/2023

An Nowodhow, an 26ves a vis Hwevrer 2023
Dohajydh da, ha dynnargh dhe dhyllans an seythen ma ‘An Nowodhow’ war BBC Radyo Kernow.Konsel Kernow re votyas dhe ynkressya an doll gonsel gans 4.99%, an ughboynt alowys gans an governans heb gwerinvota. Isledyer David Harris a leveris bos res an ynkressyans rag gwitha gonisyow. Yn-medh ev, “Nag ynkressya an doll gonsel gans ughboynt an myns alowys gans an governans a lehasa agan gallos spena y’n bledhynnyow a dheu.” An Gonis Derivas Gwerinieth Teythyek a leveris bos sewyans an towlennow an konsel dhe wul moy es £55m a erbysyon y’n vledhen a dheu ynwedh. Yn-medh Konseler Anserghek Julian German, “hembrenkysi an konsel a vynn ughboynthe an doll gonsel rag may hworrons arghans y’n withvaow.” Ledyer bagas Lavur Jayne Kirkham a leveris bos res dhe gonsels tre ha pluw ynkressya aga tholl gonsel rag pe rag lyvervaow, parkow ha privedhyow poblek hag o res dhedha aga degemeres dhyworth Konsel Kernow ma’s lestto rag degea.Tamm nessa yw towlen dhe dhrehevel kowbal tredanek yn Kernow, a wrussa oberi ynter Aberfala ha Lannvowsedh. Bagas ynjynoryon Marine Zero (Mann Morek) a leveris ev dhe seweni yn rann a gesstrif Asran Treusporth, hag a allsa gweres ow kavos 70% a’n arghasans rag an dowlen gowbal a £4.2m, Morvoren hy hanow. Res via dhe’n keskowethyans, y’ga mysk Kowbalow Dowr Fala ha Porth Aberfala, kavos an ken 30% a arghasans, dell leveris an bagas. Y krysir bos an Vorvoren kynsa y’n bys. Yn-medh leveryas Marine Zero, Tim Munn y hanow, “Hemm yw chons marthys rag may hallo Aberfala ha negisyow teythyek hembronk an fordh dhe dhigarbonhe treusporth morek y’n Ruvaneth Unys hag y’n bys oll.” An dowlen a wrussa devnydh a vorverk ankor tredanek ryb Porth Aberfala. Dyghtyoryon an vorfordh a leveris Heyl Fala dhe gavos y’n morlynn moy es milvil drethyas pub bledhen.Poll Yubile Pennsans re leveris y bennboll dhe wortos degys erbynn Pask rag may oberrer orth y bibow. Dyghtyoryon an poll a leveris y tegoodh bos asleys y glackow, usys dhe lenwel an poll gans mordhowr. Neuvyoryon a yll hwath gul devnydh a’n poll dordesel, hag y hwaytir hwarva oberow anius Lunweyth, pan yw degys an tyller.Yma towlen ow trehevel milhyntal rag diskwedhes diversita dororiethel Kernow. An milhyntal a 185 a dreys-hys (56m), Kerdroya y hanow, ogas dhe Greun Reskola war Woon Brenn, yw tybyans Will Coleman, neb a wrug an popet Yskynnell Den. Ev a leveris yth o towlys dhe gonsistya a 1,300 a dreys-hys (400m) a ge kernewek, ow kesunya meyn ha losowedh. Dell leveris, gul devnydh a veyn ha karrygi dihaval a dhiskwedhsa Kernow avel ranndir dororiethel pur gomplek. Desedhys re beu seulabrys gravyans y’n tyller a vydh kresen an milhyntal. Mr Coleman a dherivas dhe BBC Radyo Kernow yma ev ow hwithra samplow a bub men dres Kernow. An dowlen yn Goon Brenn a wrussa ynwedh “solempnya an filosofiethow a dekter a isyow keans diblans” dres Kernow, dell leveris dyghtyoryon.Klub Pel Droos Truru re sinas arager degowek Bristol Rovers, Harvey Greenslade y hanow, rag chevisyans a vis. Kavadow yw rag fytt dy’Meurth erbynn Poole Town. Yn-medh ev, “Mall yw genev a junya Truru ha’ga gweres y’ga batel dhe worfenna penn an vosen.”
Yth esowgh hwi ow koslowes orth ‘An Nowodhow’ war BBC Radyo Kernow. An dowlen an seythen ma a veu skrifys ha presentys genev vy, Wella Morris. Steve Harris o an pennskrifer. Bys dy’Sul nessa, dydh da dhywgh hwi oll.