04/12/2022

An Nowodhow: an 4a a vis Kevardhu 2022

Dohajydh da, ha dynnargh dhe dhyllans an seythen ma 'An Nowodhow' war BBC Radyo Kernow.

*

An Sodhva rag Statystygyon Kenedhlek re dhallathas dielvenna an niveryans a veu dyghtys warlena ha dyllo an sewyansow.

Y’n niveryans ma, yth o esya dhe omdheklarya avel kernewek hag y hallas ynwedh gorthebi dhodho y’n yeth kernewek.

Ytho, ogas ha kans mil dhen, a-dreus dhe’n Ruvaneth Unys, a dheklaryas aga bos kernewek, po yn tien, po yn rann. Henn yw kressyans a voy es tredhek warn ugens a vilyow a dus a-dhia an diwettha niveryans, yn dew vil hag unnek.

Yn Kernow, peswardhek kansran a’n poblans, neb peswar-ugens mil dhen, a dheklaryas aga bos kernewek yn tien, ha naw mil dhen aral a leveris aga bos kernewek yn rann. Dres henna, peswar kans, unnek ha tri-ugens a dus a dherivas bos kernewek aga yeth jif.

Hag, a-ves dhe Gernow, tamm moy es tredhek mil dhen a leveris ynwedh aga bos kernewek.

Yma govenek dhe’n Sodhva rag Statysygyon Kenedhlek dyllo derivadow pella y’n vledhen a dheu ow ri manylyon a yeghes, anedhow, ober hag adhyskans yn Kernow.

*

Yma edhom dhe Japel Methodek Porthenys sevel a-dro dhe bymp kans mil beuns rag y ewnhe, a dherivas y skodhyoryon an seythen ma.

Degys veu an chapel dres an pandemek ha lemmyn yma kudynnow bras dhodho, y’ga mysk pryv prenn ha breynder sygh. Kyn feu ev dasygerys yn mis Ebrel hevlena, res veu y dhegea arta yn skon drefen nag o salow lowr.

Selys veu an chapel y’n vledhen mil seyth kans, peswar ha peswar ugens, mes diswrys veu ha dastrehevys yn mil, eth kans, tredhek warn ugens, hag y’n dedhyow ma, kovskrifys yw an drehevyans avel Gradh Dew gans Steren.

Rag sevel arghans, skodhyoryon an chapel a vynn gwertha an drehevyans Skol dy’Sul ha re dhallathas kaskyrgh routh-arghasa.

Yn-medh Laura Newton, skrifenyades an chapel, “Kyn teffo tus ha gordhya po na wrellons, ev a dal y sawya, y ewnhe hag y witha rag an termyn a dheu”.

An Eglos Vethodek a leveris y fynna ev “oberi gans an fydhyadoryon rag ewnhe an drehevyans ha surhe y vos sostenadow dres termyn hir a dheu”.

*

Y’n termyn eus passyes, an konsel re guntelas gwydh Nadelik heb kost dhyworth mayniow Kernow mes, hevlena, ev a lever bos an kost a wul yndella re ughel.

Byttegyns, ev a wra pesya degemeres gwydh dhyworth mayniow a be ragbren dhe’n konsel rag kuntel skoll aga lowarth dres an vledhen. Re erel a dal kemeres aga gwydh dhe gresen eylgylghya.

Kost a ragbren dhe’n servis ma yw ynter deg peuns warn ugens ha hanterkans peuns pub bledhen.

Leveryades a-barth an konsel, Carol Mould, a avowas y fedha nebes tus diswaytys. Yn-medh hi, “Mar mynn tus kavos gwedhen Nadelik wir, ni a ynni warnedha prederi yn-rag ha dismygi fatel wrons i omryddya anedhi”.

*

De, rag solempnya Sadorn Negysyow Byghan, Konsel Kernow a ros kummyas dhe onan hag oll parkya heb kost yn y barkow kerri dres oll an jydh.

Y hallas prenoryon parkya yn pub park kerri dyghtys gans an konsel yn Kernow hag ynwedh gul devnydh a’n kyttrinyow ‘Parkya ha Vyajya’ yn Truru.

Yma hwans dhe’n konsel skoodhya negysyow leel dre genertha prenoryon dhe wul devnydh a werthjiow yn trevow a-dreus dhe Gernow y’n dedhyow kyns Nadelik.

Philip Desmonde, a-barth an konsel, a leveris y hyllir kavos toknys kyttrin dedhyek ha seythennyek a bris isel lemmyn hag ev a ynias war bubonan pesya gul devnydh a garyans poblek y’n dedhyow a dheu.

*

Yth esowgh hwi ow koslowes orth ‘An Nowodhow’ war BBC Radyo Kernow. An dowlen an seythen ma a veu skrifys ha presentys genev vy, Steve Penhaligon. An pennskrifer o Wella Morris. Bys dy’ Sul nessa, Duw genowgh hwi oll.