27/11/2022

An Nowodhow, an 27ves a vis Du 2022
Dohajydh da, ha dynnargh dhe dhyllans an seythen ma ‘An Nowodhow’ war BBC Radyo Kernow.Konsel Kernow a spen moy es £40,000 pub dydh rag ostyans a woredhom rag tus dhiannedh. Derivys veu an myns ma dhe guntelles kessedhek towlennans, dell leveris an Gonis Derivas Gwerinieth Teythyek. Y terivis dhe gonseloryon bos 737 a vayni – 1400 a dus – yn ostyans anbarghus a woredhom. An konsel re leveris bos barras annedh, re dheu gweth dres hag a-dhia an pandemik Kovid-19. Meur a ostys re astelas rentya, rag may hwerthons aga anedhow po aga threylya yn chiow golyow. Konsel Kernow re settyas seulabrys yn aga thyller krowjiow anbarghus rag tus dhiannedh, owth assaya lehe spenans war weli ha hansel po yn ostelyow a bris isel. Yma nebes krowjiow ryb Lys Kernow ha Lys Koth Kernow yn Truru, hag yma an konsel ow towlenna moy anedha yn Kammbronn ha Tewynblustri, keffrys hag ogas dhe Bennsans.Better Leisure, hag a dhyght 268 a gresennow diskwithans dres an Ruvaneth Unys, dhyworth Porthia bys yn Newcastle-upon-Tyne, re leveris an kost owth ynkressya a vewnans dhe wul dhodho lehe y euryow ygeri yn “towlen anbarghus gwav”. An chanjyow, hag a dhalleth mis Kevardhu ha pesya bys Pask, a wra styrya “nebes kresennow dhe ygeri unn our diwettha po degea unn our a-varra, nebes dedhyow. Hemma a wra agan gasa skwychya yn farow golowyans, jynnweyth ha daffar pan yw hi yeynna ha tewla. Hemm yw ynwedh pan on ni an lyha bysi.” Yn ken le yn Europa, yma Pow Frynk ow lehe tempredh y bollow-neuvya poblek gans unn gradh Celsius. Yth eder ow finwetha an tommheans yn brassa rann a dhrehevyansow poblek yn Pow Frynk, Spayn hag Almayn orth 19C rag gweres ow tyghtya an barras. Yma Itali ynwedh ow finwetha an tommheans yn drehevyansow poblek.Delays a gerri klavji yn Kernow a “lehas yn feur” chonsyow den dhe dreusvewa shora ympynnyon, dell glewas hwithrans. Tony Reedman, 54 bloodh y oos, a verwis peswar dydh wosa perthi shora ympynnyon hag ev yn dy’gol yn Kernow, mis Metheven 2021. An hwithrans a glewas ev dhe wortos ogas ha dew our ha hanter bys may’n kemmer karr klavji dhyworth y bennti dy’golyow dhe Glavji Kernow Riel yn Truru. Yn derivas dhe Skrifennyas rag Yeghes, Steve Barclay, Andrew Cox, pennguruner rag Kernow, a leveris bos lettyans gweliow ha delays a gerri klavji “themys ow taswul” y’n kasys. Ev a skrifas lewydh medhegel Trest Gonis Karr Klavji Soth West dhe dherivas dhodho kerri klavji “erghys rag gorthebow a woredhom dhe vos parkyes yn mes a Glavji Kernow Riel ha godhevysi a-bervedh dres termynyow hir.” Yn kesvenegyans y ros Kesva With Ewngemyskys Kernow ha Syllan, Konsel Kernow, Trest NHS Klavjiow Kernow Riel, ha Trest Fondyans NHS Gonis Karr Klavji Soth West aga heskalarow kolonnek dhe deyluyow a wodhevysi kampollys y’n derivas.Duk Kernow a wrug y gynsa godrik sodhogel dhe Gernow dy’Yow. An Pryns William a vysytyas Avalennek Tewynbleustri (Newquay Orchard), towlen gemenethel yn tir an dhuketh. An duk a junyas bodhogyon ena y’n Lowarth, le may hyll tus dyski sleyghnethow nowydh rag gwellhe aga yeghes fisegel ha brysel. Kyns, an pennsevik re leveris bos gwitha an kerghynnedh naturel onan a’y bennragwiryow.Gool Ilow ha Mordardha Boardmasters re dheklaryas bos Liam Gallagher ha Florence + The Machine pennartydhyon y’n gool yn Tewynblustri an 9ves bys an 13ves a vis Est 2023. Synsys yw an gool, hag a denn ogas dhe 50,000 a dus, dell yw usys, yn Porth Tregurien ha Treth Fystal.Yth esowgh hwi ow koslowes orth ‘An Nowodhow’ war BBC Radyo Kernow. An dowlen an seythen ma a veu skrifys ha presentys genev vy, Wella Morris. Steve Harris o an pennskrifer. Bys dy’Sul nessa, dydh da dhywgh hwi oll.