29/05/2022

An Nowodhow: an 29ves a vis Me 2022

 Dohajydh da, ha dynnargh dhe dhyllans an seythen ma 'An Nowodhow' war BBC Radyo Kernow.

Dasygerys vydh diw sodhva greslu yn Kernow dhe eseli a’n werin kyns penn an vledhen ma.

 Desedhegores kreslu ha galweyth, Alison Hernandez, re dheklaryas y fydh an sodhvaow yn Pennsans hag Aberfala ygor dy’Lun dhe dhy’Sadorn, ha bos sodhogyon greslu kavadow rag kewsel gans eseli a’n werin yntra deg eur myttinweyth ha teyr eur wosa hanterdydh.

 Dres henna, an sodhva greslu yn Tewynblustri, nag yw ygerys marnas treweythyow y’n eur ma, a vydh ygor dres an keth euryow ma.

 Degys veu an sodhvaow yn dew vil ha peswardhek avel rann a dowlen rag erbysi arghans, hag y krysir an kost a dhasygeri an sodhvaow yn Kernow, keffrys ha re erel yn Dewnens, dhe vos a-dro dhe gans, hwegh ha peswar-ugens a vilyow a beunsow y’n vledhen arghansek ma.

 Yn-medh Ms Hernandez, “Sodhvaow Kreslu a brof harber rag fethesigow, ha le may hyll an kreslu omdava orth an werin a wrons i aga servya”.

 Yma govenek dhe’n kreslu may hallo sodhvaow erel y’n ranndir soth west ygeri aga ‘desk a-rag’ dhe eseli a’n werin y’n bledhynnyow a dheu.

An Governans re wrontyas moy es milvil beuns dhe Gonsel Kernow dhe dhisplegya towlow rag hyns nowydh ynter Pennrynn hag Aberfala rag kerdhoryon ha diwrosoryon.

 Yma hwans dhe’n konsel gwruthyl hyns, unn poynt seyth mildir y hys, ynter an dhiw dre, hag y fydh unn poynt dew milvil beuns kavadow dhedha dhyworth Arghas Viajya Byw an governans rag y dhesinya.

Yma an konsel ow tisplegya profyansow erel dhe wellhe an servisyow kyttrin a-dro dhe Aberfala ha Pennrynn dre lehe kost an toknys ha berrhe termyn an viajys.

An konsel a leveris y hwrussa an hyns nowydh “ri dewisyow dhe dus may hallens gwellhe aga yeghes ha’n kerghynnedh hag i ow viajya”.

 Para Rugbi Kernow a wra dehweles dhe Twickenham hevlena rag defendya aga thitel avel Kampyoryon Gonteth, wosa fetha Pow Hertford hanterkans poynt dhe beswar poynt warn ugens.

Nyns esa marnas dew boynt ynter an parys orth hanter termyn, Kernow ow ledya unn poynt warn ugens dhe nownsek. Mes yn nessa hanter an fytt, y skoryas Kernow peswar assay yn unn rew rag gwaynya gans es.

Kernow a waynyas an diwettha kampyorieth dhe vos gwariys, yn dew vil ha nownsek, mes dileys re beu an kesstrif dres an dhiw vledhen eus passyes awos an pandemek Kovid.

An fytt finel erbynn Pow Ger a hwer an peswora a vis Metheven hag y fydh hemma an seythves tro yn eth kampyorieth y hwra Kernow disputya hanaf Bill Beaumont orth Twickenham.

Dres henna, para benynes Kernow re hedhas fytt finel a’ga Hampyorieth Konteth – Hanaf Gill Burns.

Gwariys vydh an fytt orth Klub Rugbi Richmond, an keth jydh ha’n wer, erbynn para kesunys a Bowyow Nottingham, Lincoln ha Derby.

Dre studhya choghys yn Kernow, godhonydhyon re dhiskudhas aga bos kroaduryon fest demokratek.

Yn gwav, choghys a omguntel yn hesow bras ha klusya war-barth yn gwydh, treweythyow keniver ha dew-ugens mil edhen yn unn hes.

Myttinweyth, i a wra votya gans aga lev hag i owth ervira dhe by eur y tal dhe’n hes gasa aga neyth.

Pan vo neb chogha parys dhe neyja, ev a dhalleth gelwel ha pan vo tros gwrys gans an hes ughel lowr, i a dhiberth oll war-barth kepar ha komolen dhu y’n ebron wav.

An wodhonydhyon dhyworth Pennskol Karesk a dhiskudhas hemma dre rekordya an choghys ha musura an nivel a son gwrys gansa myttin a-varr hag i ow kwavi yn Kernow.

Yth esowgh hwi ow koslowes orth ‘An Nowodhow’ war BBC Radyo Kernow. An dowlen an seythen ma a veu skrifys ha presentys genev vy, Steve Penhaligon. An pennskrifer o Wella Morris. Bys dy’ Sul nessa, Duw genowgh hwi oll.