15/05/2022

An Nowodhow: an 15ves a vis Me 2022

Dohajydh da, ha dynnargh dhe dhyllans an seythen ma 'An Nowodhow' war BBC Radyo Kernow.

Dydh Furri Hellys re hwarvas rag an kynsa prys adhia diw vil ha nownsek an pennseythen eus passys.

Dydh Furri a verk dalleth gwenton yn Hellys hag ev a omdhiskwedh nebes donsyow dres an fordhow ha’n gwerthjiow.

Yth esa kansow a dus ow sevel yn rew y’n fordhow, may ma drehevyansow afinys gans bleujyow, garlons ha baneryow.

An kynsa dons o dhe seyth eur myttinweyth, gans golowboyntyow erel Hal-an-Tow ha’n dons hanter dydh.

Iskaderyer an kessedhek furri Nigel Pascoe y hanow, a leveris: “A-dhia seyth bloodh, mars owgh hwi nebonan dhyworth Hellys, po mars eus dhywgh neb kolm dhe Hellys, po nebonan neb eth dhe skol yn Hellys, yma’n dons gweskys ynnowgh.”

Band Brest Hellys a sen an ilow dons furry arbennek dres oll an jydh, hag yma chiow ha gwerthjiow afinys gans bleujyow splann ha losow glas.

Giles Clotworthy a veu apoyntys dhe ledya dons hanter dydh yn diw vil ha nownsek, mes ev a dorras y arr, ytho res o dhodho gortos bys lemmyn dhe lenwel an rann.

Yn-medh ev: “my a drigas oll a-dro dhe’n vro ha my a assayas styrya pyth yw Dydh Furri ha pur gales yw dhe gonveya. Mes dh’y ledya yn hwir yw splann. My a vynn leverel, pubonan a lever yw honor, hag yth yw.”

“Yth esa meur a dus orth ow neshe yn Tesco, tus na wrug vy kewsel gansa kyns, hemm yw fatel omglewer bos Tom Cruise yn Tesco Hellys.”

Tus dhyworth Hellys neb a vovyas dhe-ves yn hengovek dhewel dhe’n dre rag Dydh Furri

Russell Harvey a sonas yn Band Brest Hellys rag an kynsa prys yn mil naw kans peswar ha dew ugens, pan o ev naw bloodh, hag ev a wra seni an vledhen ma.

Y leveris ev: “Dydh splann yw. An dons dhe seyth eur myttinweyth yw an gwella dons a’n jydh ragov.”

*

Hwithroryon a leveris niver kerri-klavji ow kortos a-ves dhe Glavji Kernow Riel dhe vos “mater bras.”

Para dhyworth Desedhek Kwalita Gwith a vysytyas asran waluster ha goredhom mis-Meurth hag a gavas dre vras y “hevelis rewlys” ha bos restrys yn kever da.

An para a vysytyas asrannow gwith medhek ha goredhom yn Klavji Kernow West ynwedh.

Hwithroryon a braysyas an veni mes y leveris lies anedha dhe dybi delays kerri-klavji dhe nasa diwedhow godhevysi.

Mis Hwevrer an trest klavji a leveris aga bos moy bysi esens i ages neb point aral vyth dres an pandemek, ha hwarvedhyans kritikel gwith soycal a veu deklarys mis Genver.

Yn lies kas nyns o possybyl diskarga godhevysi neb o parys dhe vos drefen nag esa fardellow gwith sewya kavadow.

Lyther dhyworth an DKG a styryas an delays dhe gavos effeyth war an veni.

Mayni an asrann gans klavjioryon o “mater” ha’n lyther a golowboyntyas “chanj meni a vri.”

Byttegyns rann an lyther war an asrann goredhom a gonkludyas ow leverel: “sprallans an veni orth pub nivel a dhiskwedhas fatel yns i synsys ha mall gansa gwitha rag godhevysi.”

“Yth esa godhevysi orth kres gwith.”

“An wodhevysi may kewsyn ni gansa a braysyas an gwith re dhegemersons i.”

*

Pyskador re ros pysk dhyworth y skath dhe withva voos leel.

Chris Gill a re viajys pyskessa diskontys dy’Gwener, mes res yw dh’y brenyoryon yn keschanj rag gasa a-dherlergh an puskes a gachyons, an pyth a re ev dhe’n ragdres yn Lannbrobus.

Mester Gill, dhyworth Lanvorek a leveris “pur lowen o an dus dh’y gemeres.”

Ev a leveris orth BBC Radyo Kernow “ni a dhalathas gans unn tallyour hepken drefen nag esen ni sur mar kemersa an dus pysk fresk.”

“An seythen usi passys ni a ros tri thallyour – a-dro dhe dri ugens kilogramm – hag yma mall gansa kavos an keth an seythen ma.”

*

Yth esowgh hwi ow koslowes orth ‘An Nowodhow’ war BBC Radyo Kernow. An dowlen an seythen ma a veu skrifys ha presentys genev vy Kensa Broadhurst. An pennskrifer o Duncan McIntosh. Bys dy’ Sul nessa, dydh da dhywgh hwi oll.