08/05/2022

An Nowodhow: an 8ves a vis Me 2022

Dohajydh da, ha dynnargh dhe dhyllans an seythen ma 'An Nowodhow' war BBC Radyo Kernow.

Gool Pennow Glas a dhehwelis dhe stretow Lannwedhenek an seythen ma, wosa bos dileys dres an dhiw vledhen eus passyes awos Kovid nownsek.

An dhew vargh, an eyl afinys gans snodow glas ha’y gila gans snodow rudh, a veu dynerghys gans bush bras a dus herdhys war-barth yn stretow ynn an dre.

Hag i ow payoni dres an dre, kerghynnys ens gans parys a dhonsyoryon, gwiskys yn dillas gwynn, hag ilewydhyon ow seni ilow hengovek war dabours ha karjel.

Nyns yw aswonys yn kewar styr an gool ma, mes y krysir bos ev synsys rag solempnya dalleth an hav ha, martesen, yma kevren gans an gool hengovek keltek, Beltan.

An diwettha prys y feu synsys Gool Pennow Glas, y’n vledhen dew vil ha nownsek, gweskys dre wall veu benyn yowynk, Laura Smallwood hy hanow, gans onan a’n vergh hag, y’n gwettha prys, merwel a wrug.

An kuruner, Andrew Fox, a erviras Ms Smallwood dhe verwel dre wall, mes mar brederys veu gans dyghtyans an gool may skrifas ev dhe’n governans yn y gever. Ev a gussulyas may fe selys unn kowethyans unnik rag dyghtya an gool dien ha keskomunya gans an kreslu, keffrys ha bagasow erel, dhe surhe bos an hwarvos salow.

Dehweles ynwedh hevlena re wrug hwarvosow erel posek y’n bewnans gonisogethel a Gernow, y’ga mysk, Kampyorieth Gyg Brennyas an Bys, Dons Feri Hellys ha Gool Kern Me yn Pennsans.

*

Synsys ynwedh a-gynsow re beu Gool Keswlasek Kernow rag Keuryow a Wer yn kig yn kneus wosa bos restrys warlinen warlena.

Y teuth tri-ugens keur dhe Gernow dhyworth powyow a-dreus dhe’n bys, y’ga mysk Kanada, Rewenys, Almayn, Pow Swiss ha powyow erel a’n Ruvaneth Unys.

Restrys veu keskanow, a-dreus dhe Gernow oll, hag a dennas moy es deg mil warn ugens a dus dhe woslowes orth an keuryow.

Keur a Almanyon yowynk, Ffortissibros y hanow, a veu synsys gans an breusysi dhe vos an gwella keur y’n gool kyn na wrussons i bythkweth kana yn kesstrifow keswlasek kyns.

*

Trenyer Klub Kesunyans Rugbi Kernow nowydh, Neil Kelly y hanow, a leveris bos res dh’y warioryon leel omaswiwa dhe vos rann a bara galwesik.

An furv a rugbi hengovek gwariys yn Kernow yw Unyans Rugbi, ytho chevisyes re beu an brassa rann a’n para dhyworth klubys kepar ha Wigan, Leeds ha Bradford yn Pow Sows kledh.

Sinys ynwedh re beu nebes gwarioryon bodhesik leel, hag yma govenek dhe Vester Kelly may tallatthons ha gwari hag omdhegi y’n maner moy galwesik yn skon. Ev a geworras bos y amkan askorra ha displegya oll y warioryon yn Kernow yn le trestya dhe glubys sowsnek.

Selys yw an para nowydh yn Pennrynn hag yma nebes ober dhe vos gwrys – i re gollas oll aga fyttow an seson ma erbynn parys dhworth Pow Sows ha Kembra.

*

Yma Trest Bewnans Gwyls Kernow ow pysi lowarthoryon a wul “fordhow meur sortes” ynter aga lowarthow may hallo an enevales rosyas le may fynnons heb lett vyth.

Yma an niver a sortes kevys y’n Ruvaneth Unys ow lehe yn feur ha, herwydh derivas dyllys a-gynsow, kodha re wrug aga niverow dre gemmys ha pymthek kansran ha tri-ugens yn nebes ranndiryow powek a-dhia an vledhen dew vil.

Ytho, rag gul agan lowarthow moy hegar dhe sortes, an trest a’n jeves an profyansow a sew:

· treghi toll yn pub kloos po ke rag gwruthyl “fordhow meur sortes”

· gasa kornel vyghan a’gas lowarth dhe dhos ha bos gwylvos

· na wra treghi keow po felghya prysk heb checkya rag sortes

· gul tre wiw may hallo sortes gwavgoska ynni

*

Yth esowgh hwi ow koslowes orth ‘An Nowodhow’ war BBC Radyo Kernow. An dowlen an seythen ma a veu skrifys ha presentys genev vy, Steve Penhaligon. An pennskrifer o Steve Harris. Bys dy’ Sul nessa, Duw genowgh hwi oll.