01/05/2022

An Nowodhow: an 1a a vis Me 2022

Dohajydh da, ha dynnargh dhe dhyllans an seythen ma 'An Nowodhow' war BBC Radyo Kernow.

*

Servis kowbalhyns nerthys gans hidrojen a allsa dalleth ynter Swansea ha ’n soth-west a Bow Sows.

 Dedhlys yw an viaj, hag a wrussa travalya dres an Mor Keltek rag kelmi Kembra gans Kernow ha Dewnens, gans an konsels y’n kontethow.

Dell levirir yth yw an tybyans orth poynt a-varr, byt tegyns, ha manylyon yw boghes yn pols ma.

Nyns usi menek vydh ynwedh mar kwrussa bos an kowbalhyns rag gwara ha karg keffrys.

Mes, mar po res an kummyas, ledyer Konsel Swansea, Rob Stewart y hanow, a leveris y fydh “ken nerth pur vras rag tornyaseth ha negys.”

Y leveris Mester Stewart bos an tybyans da ganso hag y hallsa “treghi termyn viajya dhe Dhewnens ha Kernow dre hanter.”

“Y fia lesow kerghynedhel ynwedh: ow kemeres kerri dhe-ves an fordhow ha dres komendya kowbalow nerthys yn maner gwer.”

*

Arghant ti koth yn Resrudh a wra dasygeri avel tre anbarghus rag negysyow leel kyns ev dhe dhos ha bos kresen rag avonsya diwrosa.

An drehevyans HSBC war Stret Meur a dhegeas yn dew vil ha seytek pan dhegeas an arghant ti skorr a-dreus dhe’n Ruvaneth Unys – hag a-ban ev re remaynyas gwag.

Dhyworth mis Est ev a wra gwitha negysyow y’n Varghasamanyn y’n eur ma, le may hwyrvydh displegyans.

Yn gwenton dew vil peswar warn ugens, an arghant ti a wra dos ha bos kresen rag avonsya diwrosa.

Arghasans dhyworth Pow Sows Istorek a veu proviys dhe dowlen Tyller Gwrians Ertach Stret Meur Resrudh rag an ragdres.

Yma’n tyller drehevyansow an Varghasamanyn ow tos dastiplegyes yn towlen a dri milvil a beunsow rag gwitha drehevyansow istorek gwrys gans negysyow leel yn kres an dre Resrudh.

Ha’n dowlen gwrys yn dew vil peswar warn ugens, an drehevyans arghant ti a vydh pennplas Kowethyans Les Kemeneth Diwrosa Sen Piran.

Ev a wra avonsya diwrosa orth pub nivel ha dos ha bos kresen rag drehedhes hensyow ha lerghow war ha dhe-ves fordhow y’n ranndir ma a Gernow herwydh an konsel.

*

An arghantti diwettha war Syllan a dhegeas an seythen ma.

Arghantti Lloyds war An Nor a dhegeas y skorr en peswar bledhen wosa Barclays dhe dhegea y skorr en enys.

Res yw dhe drigoryon an enesow neyja po kemeres gorhel dhe’n arghantti an nessa yn Pen nsans.

Herwydh Arghantti Lloyds an ervirans o drefen bos prenoryon ow usya an skorr en le menowgh.

Yma gwaytyans an sodhva post leel dhe lenwel an bolgh rag materyow aghansel byghan yn mysk trigoryon an enesow a dhew vil ha tri ugens a berson s.

Dell dybir, a-dro dhe kans ha pymp warn ugens mil a dus a vysyt an enesow pub vledhen.

*

Golan lader a veu skeusenys ow tybri gwaren ladrys dhyworth gwerthji yeghes.

Dell hevel an golen a veu kachyes war jynn skeusen gans barr nerth yn Pennsans.

An golan a veu henwys Frank gans gweythoryon an gwerthji Holland ha Barrett, neb a leveris ev dhe entra dhe’n gwerthji rag ladra krowst pub dydh.

Herwydh an negys ny veu Frank kachyes na hwath gans y veni hag ev a skeusas pub sewyans dre neyja dhe-ves.

Dyghtyer an gwerthji kyns, Jason Dawes y hanow, a leveris orth BBC Radyo Kernow, bos an gwella krowst Frank barr nerth choklet tewl gans alamand ha pistachio.

Kannas Holland ha Barrett a leveris bos an golan aswonnys yn ta avel lader reyth orth an gwerthji yn Stret Marghas Yow.

*

Yth esowgh hwi ow koslowes orth ‘An Nowodhow’ war BBC Radyo Kernow. An dowlen an seythen ma a veu skrifys ha presentys genev vy Kensa Broadhurst. An pennskrifer o Wella Morris. Bys dy’ Sul nessa, dydh da dhywgh hwi oll.