24/04/2022

An NowodhowSunday 24 April 2022Dohajydh da, ha dynnargh dhe dhyllans a’n seythen ma ‘An Nowodhow’ war BBC Radyo Kernow.*Parys sawyans a-dro dhe arvor Kernow, a worthebis lies hwarvedhyans yn dy’Sadorn Pask bysi.Gwithysi Alsyow Aberfala a leveris y kevis y bara unnek galow, ha skathow sawyans gelwys ethgweyth, hag y withysi bewnans hwegh gweyth.Der unn hwarvedhyans, deg person a veu sawys dhyworth mortid skwardya dhe Dreth Lanngorrow ogas dhe Dewynblustri.Gill Rylance, dhyworth an withysi alsyow a ynnias tus dhe wul devnydh a dreth gwithys, ha holya aga avis.Ms Rylance a leveris an sawyans dhe Lanngorrow, ma nag eus gool bys yn mis Me, dhe vos onan an hwarvedhyans may feu an gwithysi alsyow gelwys dhodho.Bodhogyon a Glub Sawyans Bewnans Mordardha Lanngorrow a leveris re biens ow provia arhwithrans dres pennseythen Bask.Eseli an klub keffrys ha gwithysi RNLI dhyworth Tewynblustri ha Big Green Surf School a veu omvyskys y’n sawyans.Ms Rylance a leveris y vos “dydh pur vysi”. Keffrys hi a ughboyntyas an poos a holya avis a vaneryow ha gwithysi alsyow.*Moy es kans den re gewsis erbynn profyansow rag kampva brivedh dhe dyller tekter yn Kernow.Mike Kerwin ha Jeremy Richards, dhwyorth Shrewsbury, a vynn devnydhya an tyller dhe Drerin ogas dhe Bennsans rag dew garavan, dew dylda, ha parkyans.Yma an tyller yn Ranndir a Veur Dekter Naturel Kernow, hag a worwel dres treth Pedn Vounder.Somm a dredhek kampol ha pymp ugens re beu degemerys a-dro dhe’n profyans, keniver onan naghans.Yma an gampva brofys a-ji dhe belder kerdhes a dreveglos Tredhin.Rebecca Ley, neb usi erbynn an towlow, a leveris aga bos “torrva gler y’n porpos a henwel avel Ranndir a Veur Dekter Naturel – dhe witha nebes a’n unikka ha’n gwella gwithys tirwedhow a’n pow”.Hi a dheskrifas an displegyans avel “hakter a chalet hujes, keffrys ha karavan, tyldaow ha parkyans rag kerri”, herwydh Gonis Derivas Gwerinieth Leel.Derivas, res gans profyans dhe Gonsel Kernow a leveris re brensa Mester Kerwin ha Mester Richards an tiredh a-gynsow, hag usi ogas ha kampva Bargen Tir Tredhin.“Chanj hewul yn devnydh yw rag dygol termyn berr rag dew deylu”, y leveris. “Aswonnys yw y styr devnydh an gwel moghheans yn anedhyans dres termynyow berr, mes effeyth war dus leel a vydh an lyha,” yn medh ev.*Baner Ukrayn an pyth re bia ow neyja mes a Lys Kernow, avel diskwedhyans skoodhyans, res eth dhe goll, dell lever an konsel. Postyans media socyal dhyworth an Konsel a leveris y vos “tristhes” awos fyllel an baner.Y leveris y vydh an baner arlehes kettooth ha possybyl, hag y sav warbarth gans pobel Ukrayn”.*Ha wortiwedh hedhyw, hensodhek RAF Nessa Bresel an Bys, nownsek bloodh ha peswar ugens hy oos, res eth dhe’n ebron yn jynn-slynkya dhe sevel arghans rag alusen lu.Kate Orchard, neb yw trigys yn Kammbronn, a ascendyas dhyworth Klub Slynkya Seahawk dhe RNAS Kulros ogas dhe Hellys.Gwelys gans hy theylu war an tir, Mestres Orchard a leveris na fynnis hi “saw neyja dhe-ves”.Yth esa Mestres Orchard ow sevel arghans rag Help for Heroes dre wul an neyj.Kate Orchard a dhrehedhas degre a Sodhek Warrant a-ji dhe’n Ayrlu Riel.Soodh Mestres Orchard dres an vresel o avel plottyer.Hy charj o kovskrifa gwelyow a jynnow ebron, rag may kevarwotther lu kowethek erbynn jynnow ebron a’n eskar.Genys veu hi dhe deylu bras Sows-Eyndek a dredhek broder ha hwor, hy thas owth oberi avel pennhwithrer pellskrif war hynsow horn Eynda.Yn mil naw kans onan ha dew ugens [1941], Eynda a wrug Corps Heweres Benenes (Eynda), ow kavos benenes rag gweres assay an vresel. Mestres Orchard, ha diw a’y hwor a dheuth ha bos bodhogyon.Wosa bledhen diwettha, yth esa hi owth oberi yn Kresen Defens Ayr, stevel sidhel yn Madras, kesoberi gans Ayrlu Riel hag Ayrlu Eyndek, avel plotter/teller war wool peswar our warn ugens, ow plottya kostennow jynn ebron ha danvon sinellow dhe gevreythyow gwarnyans ayr.Hi a vetyas hy gour, Bill dres an vresel, neb usi ow servya yn Eynda gans Artylleri Riel kyns bos danvenys diwettha dhe Burma.Wosa an vresel, yn mil naw kans hwegh ha dew ugens, an kopel a vovyas dhe dre Mester Orchard yn Kernow.*Yth esowgh hwi ow koslowes orth ‘An Nowodhow’ war BBC Radyo Kernow. An dowlen an seythen ma a veu skrifys genev vy, Duncan McIntosh. An pennskrifer o Steve Harris. Bys dy’Sul nessa, dohajydh da dhywgh hwi oll.