17/04/2022

An Nowodhow: an 17ves a vis Ebrel 2022

Dohajydh da, ha dynnargh dhe dhyllans an seythen ma 'An Nowodhow' war BBC Radyo Kernow.

Hembrenkysi negysyow tornyasek yn Kernow re leveris bos lies kudyn orth aga enebi dres Pask hag an seson a dheu.

An diwysyans tornyasek re gollas meur a vayni dres an pandemek ha kales yw lemmyn dhe arveth moy. Craig Holman, dyghtyer ostel byghan yn Porthust, a leveris bos edhom dhodho a bymp den moy rag dy’golyow Pask mes ny allas ev aga havos.

“Kavos mayni yw ‘ki ow tybri ki’”, yn-medh ev, “mes ni yw da lowr, ni re’gan beu termynyow moy prederus.”

Yma ev owth assaya dynya mayni nowydh dre brofya diskontow hel, parkya heb kost ha boos hag i owth oberi.

Kudyn aral yw an goredhom anedhyans yn Kernow. Nyns yw es rag neb a vynn oberi y’n diwysyans tornyasek kavos chi dh’y rentya po prena orth pris resnadow.

Orth Park Golyow Poll Fenten, ogas dhe Lannwedhenek, yma an perghen ow profya tri chi golyow dh’y vayni mes ny yll pub negys gul yndella.

Leveryas a-barth an Asran rag Anedhyans ha Kemenethow a dherivas hi dhe brovia moy es tri-ugens mil a jiow affordyadow y’n ranndir Soth West dres an deg bledhen eus passyes hag y hwre an ranndir degemeres ynwedh bilvil beuns rag drehevel moy y’n termyn a dheu.

Ev a geworras an asran dhe restra ragdres rag gweres prenoryon nowydh hag oberoryon alhwedh ow prena chi dre brofya anedhow orth diskont a dheg kansran warn ugens.

Byttegyns, Kate Nicholls, penndhyghtyores an kowethyans UK Hospitality a leveris bos dewgemmys a sodhow kavadow y’n diwysyans tornyasek lemmyn ha dell o kyns an pandemek.

An seythen ma, lehes veu an kost a viajya dre gyttrin yn Kernow.

Keskowethyans ledys gans Karyans rag Kernow re dhegemeras arghasans a’n governans, tri warn ugens poynt pymp milvil a beunsow y dalvosogeth, hag ev a vynn gul devnydh a’n arghans ma rag kressya an niver a dus ow viajya dre gyttrin a-dreus dhe Gernow.

Dres an pandemek, an niver a drethysi a godhas yn feur, ha lemmyn yma edhom dhe dhyghtyoryon servisyow kyttrin a genertha eseli a’n poblek dhe wul devnydh a gyttrinyow moy menowgh.

Ytho, lehes re beu kost a viajys berr gans ugens kansran, ha nebes viajys hirra gans kemmys ha dew-ugens kansran. Dres henna, y hyllir lemmyn prena tokyn rag viajya py le pynag yn Kernow orth kost a bymp peuns an jydh, yn le naw peuns dell o kyns. Kost nowydh a dokyn seythenyek a vydh ugens peuns.

An towl arbrov ma a wra pesya dres peder bledhen hag yma govenek dhe Garyans rag Kernow kressya an niver a drethysi gyttrin gans deg kansran.

Richard Stevens, penndhyghtyer kowethyans karyans Go South West a leveris bos henna “nowodhow marthys”. Yn-medh ev, “Ny allas hemma dos orth termyn gwell. Yma Kernow ow ledya an fordh owth assaya kavos patron karyans powek sostenadow”.

Milva Tewynblustri re dhynerghis kath pyskessa nowydh, Ozil y hanow, avel koweth rag aga hathes, Freya, ha leveryades a-barth an vilva a dherivas bos govenek dhedhi may hwrellens omdhon nebes kathigow y’n termyn a dheu.

Kevys yw an kathes ma, naneyl bras na byghan aga braster, y’n tiryow glyb a Eynda gledh hag Asi Soth Est. Lehe a wra aga niverow, hag an Kesunyans Keswlasek rag Gwithans Natur re’s gorras war y Rol Rudh a Eghennow Godrosys.

Neuvya fest yn ta a yll an kathes hag i a helgh aga freydh dre lamma warnedha yn dowr bas.

Yn-medh Megan McEvoy, “Gans Ozil, y’s tevydh vysytyoryon dewgemmys an chons a weles an eneval teg ma”.

Yth esowgh hwi ow koslowes orth ‘An Nowodhow’ war BBC Radyo Kernow. An dowlen an seythen ma a veu skrifys ha presentys genev vy, Steve Penhaligon. An pennskrifer o Wella Morris. Bys dy’ Sul nessa, Pask Lowen dhywgh hwi oll.