12/12/2021

An Nowodhow: an 12ves a vis Kevardhu 2021

Dohajydh da, ha dynnargh dhe dhyllans an seythen ma 'An Nowodhow' war BBC Radyo Kernow.

Kowsik law temprek gwrys gans fleghes skol yn Kernow a veu ygerys yn sodhogel yn seythen gwedhen kenedhlek.

A-dro dhe dhew vil wedhen a veu plensys a-dro kelghvusur park skol dhe Akademi Sen Colom.

Pub studhyer a veu omvyskys gans an ragdres, gans pub studhyer ow plansa teyr po peder gwedhen.

An benndyskadores, Emma Vyvyan hy hanow, a leveris an fleghes dhe vos pur wothus dhe “wul bewva nowydh.”

Rag gul an gowsik law, an skol a oberas gans SUGi, kowethyans alusenek neb a blans gwedhegi kemeneth.

Aga fordh a vysk gul gwedhek tewa ha moy bewdivers.

Nyns yw usyes marnas eghennow a wedhen a wra tevi yn maner gnasek y’n ranndir.

*

Konseloryon Syllan re akordyas prena drehevyans hag a vydh treylyes dhe anedhyans fordhadow rag assaya attamya goredhom anedhyans.

An gwesti kens o dhe brena rag seyth kans pymp ha dew ugens mil a beunsow.

Konselor, Tim Dean y hanow, a leveris an prenas dhe vos unn fordh rag an konsel dhe “esya an goredhom anedhyans.”

Yma dhe Gonsel Syllan towl drehevel nebes anedhyans fordhadow, mes i a erviras prena an drehevyans avel “gwaya termyn berr rag gweres an re gans edhom.”

Yma a-dro dhe dri ugens mayni war rol wortos an konsel dell leveris an pennkonselor rag anedhyans.

Ev a leveris anedhyans “re beu kudyn omma pub termyn” ha rag kavos chi “res yw dhewgh kavos meur a arghans ha gobrow omma yw isel.”

“Yn tevri kepar hag yn Kernow yma fowt a jiow yn marghas rent privedh rag gweythoryon po nebonan a drig omma. Treyles vons i dhe drevow dy’gol po gwerthys rag gul an gwella a’n varghas anedhyans.”

*

Milva re dhasygoras wosa damach a bris a ledyas dhe dhegeans dres unn seythen.

Kannas Milva Dewynblustri a leveris hager-awel Arwen dhe gawsya “nivel a bris a dhamach orth agan isframweyth ha servisyow.”

Hemma a gomprehendyas damach orth lies gwedhen vras. Unn wedhen a godhas yn lynn hag a wrug fordh dhiank galadewder rag lemurs, neb a drig war enesow y’n dowr.

Herwydh an vilva, pub eneval yw salow hag yn yeghes da, ha ny skapsa eneval vyth.

An gannas a leveris “ewnhe an damach o oberen gales” mes an wedhen godhys a veu dileas lemmyn.

An vilva a wodhva gras a’n huni omvyskys y’n glanheans hag i a leveris “yma govenek dhedha dynnerghi godrigoryon arta.”

*

Kost devydhya Pons Tamar ha Kowbal Penntorr a alsa ynkressya awos an effeyth a Goronavirus.

Kessedhek kevals Pons Tamar ha Kowbal Penntorr a leveris “daromres yw le ages deg kansrann ha peswar ugens nivelyow kyns-Kovid hwath.”

Ev a brof ynkressya tollow a dhew beuns dhe dhew beuns ha tri ugens dinar rag devnydhyoryon mona, hag a unn peuns unn beuns ha deg dinar warn ugens rag taggys diskontyas.

An kessedhek a leveris yma “chalenjys arghansel bythkweth dhedha” ha keskusulyans war an chanjyow a wra dalleth mis Genver.

*

Tus re neyjas a-hys gwivren-zip a-ugh dhe’n Edenva rag sevel arghans rag diberthva glavji fleghes.

Hag i omwiskys avel Tas Nadelik, skodhyoryon klavji Derriford yn Aberplym a neyjas a-hys an “slynk Santa.”

Herwydh restroryon moy ages tredhek mil peuns a veu sevys bys an pols ma.

An arghans a vydh usyes rag prena gwariellow nowydh ha tylli rag aktivitys rag gweres didhana an fleghes.

Yth esa govenek tyli a-dro dhe gans den dhe wul an slynk Santa, mes drefen bos gwynsow krev nebes tus a usyas yn y le an lesk lovan dhe’n Edenva.

Yth esowgh hwi ow koslowes orth ‘An Nowodhow’ war BBC Radyo Kernow. An dowlen an seythen ma a veu skrifys ha presentys genev vy Kensa Broadhurst. An pennskrifer o Steve Harris. Bys dy’ Sul nessa, dydh da dhywgh hwi oll.