28/11/2021

An Nowodhow: an 28ves a vis Du 2021
Dohajydh da, ha dynnargh dhe dhyllans an seythen ma 'An Nowodhow' war BBC Radyo Kernow.
*Herwydh derivas Asran Karyans, an governans re afydhyas y hwra ev ri gweres arghans dhe Gonsel Kernow, dres an dhiw vledhen a dheu, rag mentena neyjow ynter Ayrborth Tewynblustri ha Loundres.
Yn sommen, Konsel Kernow a wra degemeres unn poynt eth milvil a beunsow rag surhe y fydh servis ynter Kernow ha Loundres kavadow dres an vledhen oll.
Y’n termyn yw passyes, proviys veu an servis gans an ayrlinen Flybe bys pan dheuth ha bos an kowethyans skatt yn mis Meurth dew vil warn ugens. Ha warlena, British Airways a dhallathas provia neyjow dres an hav.
Byttegyns, a-dhia an nawves a vis Kevardhu hevlena, y fydh an servis dyghtyes gans Eastern Airways hag a dal provia neyjow ynter Kernow ha Loundres dres an vledhen oll rag degemeres an gweres arghans dhyworth an konsel.
An arghasans ma a veu degemerys yn ta gans Philip Desmonde, esel kabinet Konsel Kernow. Yn medh ev, “Posek dres eghen yw, rag anedhysi ha’n gemeneth negys, may fo neyjow didro mentenys ynter Tewynblustri ha Loundres”.
*
Konsel Kernow a dheklaryas y hwra ev ri barlenellow ha tabletys yn kendon dhe’n re dhiannedh ha dhe dus na yll junya dhe’n kesrosweyth.
An konsel a wra oberi gans an aluseneth Sen Petroc’s hag a vynn ri an jynnow-amontya yn kendon dhe’n re yw skoodhys gensi ha provia trenyans dhedha. 
Herwydh derivas an konsel, y’n vledhen dew vil ha nownsek, ny wrussa tredhek kansran a anedhysi Kernow ha Syllan gul devnydh a’n kesrosweyth bythkweth kyns, ha ny’n jevo unn tevesik yn peswar sleynethow bysyel selvenel.
An derivas a geworras, “Ha trenyans, yegheswith, ha servisyow erel ow mos moy ha moy warlinen, res yw porres nag yns i gesys war agan lergh”.
Sen Petroc’s a dal provia kedhlow dhe’n konsel may hallo ev determya effeythow an ragdres.
Richard Pears, leveryas a-barth an konsel, a dherivas bos mall dhodho oberi gans kesparow erel, hag y hylli py kowethyans pynag ombrofya avel kespar y’n ragdres ma.
**
Konsel Kernow a wra omgussulya a-dro dhe dhegea nebes kresennow diskwithans yn Kernow orth kuntelles leun a’n konsel, wosa milvilyow a dus dhe sina petisyon yn y gever.
Lonchys veu an petisyon a-barth an dhadhel gans bagas a gonseloryon anserghek ha sinys veu gans moy es pymp mil dhen. Yn sewyans, synsys vydh an kuntelles an degves warn ugens a vis Du.
An kresennow yn Aberfala, Lannstevan, Essa, Ponswad ha Sen Austel, a alsa bos deges drefen an kowethyans a wra aga dyghtya, Greenwich Leisure Limited y hanow, dhe leverel na alsa ev pesya dhe wul yndella heb skoodhyans arghansel.
Byttegyns, an konsel a leveris nag esa bojet dhodho rag servisyow termyn syger nag yw erghys dre lagha.
Yma hwans dhe’n bagas a gonseloryon anserghek may fo an mater dedhlys gans an konsel leun, a-der gans an kabinet a dheg person hepken. Yn-medh kyns ledyer an konsel, Julian German, “Degea an kresennow diskwithans yw mater posek, ow tochya meur a anedhysi, ha gwiw yw may fo ev dedhlys gans an konsel leun”.
*
Milva Tewynblustri re leveris y fydh hy lewyon removys dhe Vilva Paignton y’n gwenton a dheu.
An dhiw vilva yw dyghtys gans an aluseneth Trest Planet Gwyls, Wild Planet Trust yn Sowsnek, ha, dell hevel, yma fest moy spas kavadow dhe’n lewyon yn Paignton. 
An trest a wodhya y fedha vysytoryon ha mayni an vilva trist warlergh an lewyon mes yth esa war y dowl kavos nebes enevales dihaval rag gorra y’ga le.
*
Yth esowgh hwi ow koslowes orth ‘An Nowodhow’ war BBC Radyo Kernow. An dowlen an seythen ma a veu skrifys ha presentys genev vy, Steve Penhaligon. An pennskrifer o Wella Morris. Bys dy’ Sul nessa, dydh da dhywgh hwi oll.