21/11/2021

An Nowodhow: an 21ves a vis Du 2021

Dohajydh da, ha dynnargh dhe dhyllans an seythen ma 'An Nowodhow' war BBC Radyo Kernow.

Kowethyans bern kemeneth re veu restrys rag gweres ow kwitha kresen dhiskwithans tre ygor ha gwitha penn tir yn hy herghyn rag displegyans.

Pendennis Leisure a veu formys wosa Konsel Kernow a leveris bos possybyl Kresen Ship’s ha Castles yn Aberfala dhe dhegea, gans peder kresen moy yn Kernow.

An oberador, Greenwich Leisure Limited, a leveris na alsons aga dyghtya namoy heb skoodhyans arghansel.

Kaskyrghoryon a leveris i dhe vynnes gul kas negys rag gwitha an pol neuvya.

Ben Leach, dhyworth Pendennis Leisure, a leveris: “An godros gwir yw Konsel Kernow a allsa hy gwertha rag milvilyow a beunsow hag y fydh treow gorlanwesek kowrek ena, ha kellys vydh an penn tir bys vykken.

Yth esa pana skoodhyans y’n gemeneth leel, yma govenek dhymm may hwryllyn kavos digolm.”

Kabinet Konsel Kernow a wra metya mis Kevardhu rag ervira tenkys an kresennow. Yma’n kresennow erel yn-dann wodros yn Ponswad, Lanstefan hag Essa, ha pol hydrotherapy yn Sen Austell ynwedh.

*

Mester kowbal re omdennys wosa ev dhe gowlwul pelder kemmys deg gweyth warn ugens a-dro dhe’n bys y’n kowbal.

Mester Pete Crawford, tri ugens bloodh, a wrug y dhiwettha viaj war an Scillonian Tri dhyworth Sen Maria war Syllan dhe Bennsans, wosa nownsek seson warn ugens.

Ev a wolyas ogas dhe hwegh kans ha tri ugens mil a vilyow war an kowbal hag ev a wrug moy ages naw mil viaj mos ha dos, herwydh Kowethas Gorhel Tan Enesow Syllan.

Mester Crawford a leveris gweles orcas, morviles humpback ha pyffyers o ughboyntow.

Yn-medh ev: “Yth esa onan a’n gwella sodhvaow y’n bys dhymm… My a gar an lester,” mes ev a leveris ynwedh nebes viajyow re bia “pur gales rag an nervennow.”

“Lester ikonek kowal yw. My a wor yma meur a wask drog dhodho drefen bos an Keynvor Atlantek ha’n dreusva a yll garow, mes an dus a yll kavos kleves an mor yn neb le” ev a leveris.

Mester Crawford a drig yn Pennsans gans y wreg. Ev a leveris na wrug ev kavos kleves an mor bythkweth.

“Unn tra arbennek, ny wrav vy ankevi y’m oos yw morvil pur anusadow, morvil Sowerby y hanow, ow kwari y’n tonnow lamm berr a’n enesow a’n howldrevel nans yw martesen pymp bledhen warn ugens,” ev a borthas kov.

Ev a borthas kov a gavos an Bennsevigyon William ha Harry war’n kowbal hag i fleghes, hag a-dhiwedhes tus meur aga hanow y’ga mysk an wariores Kate Winslet ha’n keginer Rick Stein.

Herwydh Stuart Reid, pennweythresek Kowethas Gorhel Tan Enesow Syllan, Mester Crawford re dhisplegyas “junyans pur nes” gans an kemenethow Pennsans ha Syllan hag “y skoodhyans hag omrians dhe’n Kowethas Gorhel Tan re bia dres eghen.”

 *

Yma keun moy ow pos dyghtys yn maner fell po forsakyes drefen effeythyow an pandemek Kovid-19 herwydh an RSPCA.

Sewyans an demond ughel rag kelyn ha ni yn-dann naw alhwedh o meur a gelyn dhe vos genys ha lemmyn yma nebes torasow yn gwith an alusen yn Kernow.

Lies ki lank a veu ros rag kavos tre nowydh drefen an berghennow dhe dheweles dh’ga ober.

Kresen an alusen dhe Sen Kolom Veur a welas ynkressyans a-dro dhe ugens kans rann yn niverow a geun y’n etek mis usi passys.

Y’n pols ma yma kans ha peswardhek eneval dhedha, seytek ha dew ugens anedha yw keun.

Kannas RSPCA rag an soth-west, Sammy Howard hy hanow, a leveris nyns esa marnas rann byghan kavadow rag adoptyans drefen bos materyow omdhegyansek dhe lies ki.

Yth esowgh hwi ow koslowes orth ‘An Nowodhow’ war BBC Radyo Kernow. An dowlen an seythen ma a veu skrifys ha presentys genev vy Kensa Broadhurst. An pennskrifer o Steve Harris. Bys dy’ Sul nessa, dydh da dhywgh hwi oll.