03/10/2021

Dohajydh da, ha dynnargh dhe dhyllans an seythen ma ‘An Nowodhow’ war BBC Radyo Kernow.

Kuntelles leun Konsel Kernow re assentyas dhe dowlen jatel a 62.8 milvil a beunsow “mayth eneppo chalenjys erbysek meur,” dell leveris an awtorita. Hembrenkyas an Konsel, Linda Taylor, a leveris nag o “kevrin mann” ev dhe enebi y “settyans bojet an moyha chalenjus” es bythkweth. Dell leveris, y skrifsa hi dhe’n menyster nowydh rag kemenethow, Michael Gove, owth ynia warnodho surhe bos Kernow ragwirhes rag ober dhe genertha goberow hag askorruster. An dowlen jatel a veder orth digarbonhe drehevyansow oll an Konsel, hag orth provia moy a anedhow anbarghus rag an dus a’s teves edhom ragwirel. Y feu ynwedh y’n rol negys towlennow dhe surhe displegyansow nowydh dhe gevri dhe dowlen Kernow dhe dhos ha bos karbon-newtral bys 2030. Konseloryon a assentyas dhe brofyansow rag towl displegyans goredhom hin a gomprehend “policis rag skoodhya nerth glas, gwellhe an kerghynnedh, provia anedhyans moy effeythus, treusporth glassa, ha gwedhynder erbynn daldraow y’ga mysk chanj arvorek ha livans.”

Deklaryes veu an seythen ma kasys Koronavirus yn Kernow ha Syllan dhe ynkressya y’n seyth dydh bys an 26ves a vis Gwynngala dhyworth 271 dhe 357 orth 100,000 a dus. Tamm ughella yw hemma es an kresek a 337 rag Pow Sows ha Kernow war-barth.

Lostow orth petrolvaow re beu ow kawsya kudynnow rag mayni gwith. Yn-medh Ellen Mills, Dyghtyer Ranndiryel Tewynblustri rag Bluebird Care, “sprellek yw dhe weles skeusennow a dus ow lenwel aga harr hag ena kannow petrol.” Yn-medh gweyther gwith, Joanna Termets hy hanow, “Res yw dhymm porres drehedhes ena rag gweles an dus. Mar ny viv ena rag aga gweres, y fia wortiwedh edhom dhedha a’n servisyow goredhom.”

Delatyes re beu nebes fyttys pel-droos anunyans awos daldraow provians keunys, y’ga mysk fytt dy’Meurth yw passyes yn Aberplymm ynter Cita Truru ha Tre Kardhornwari.

David Harris, ishembrenkyas Konsel Kernow, re dheklaryas yn kuntelles konsel bos dhodho kanker an prostat, owth ynia war wer na skonnyons aswon a arwodhyow. Yn-medh ev, “Na vedhewgh mar wocki avellov, mar pleg. Mars eus dhywgh dout vyth, hwithrewgh e.” Mr Harris a leveris bos arwodhyow dhodho “nans yw nebes bledhynnyow” ha diagnosans a-varr dh’y lettya lesa “ogas ha certan”, ha kawsya “rann an diskonfort a berthis vy a-dhiwedhes.” Ev a verkyas unn gour yn mysk eth dhe berthi kanker an prostat y’ga bewnans.

Yma tus dhall ha gweles aperys yn Kernow ow kavos arta an Paper-Nowodhow Kewsel Kernow pub seythen wosa ev dhe hedhes dres an bewnans yn-dann alhwedh koronavirus, drefen bos aga studhla re vyghan rag ombellheans socyal. An servis dyghtyes gans alusenedh selyes yn Truru a dhanvon kyvyon kov gans nowodhow dhyworth Kernow oll, keffrys ha profya rann lyver termyn gans erthyglow, hwedhlow ha keswelyow. Yn-medh skrifennyas alusenedh, Louise Perry hy hanow, “A-dhia ban lehir tamm, y tehwelsyn ha’ga dyllo pub hanter-mis. Lemmyn yth eson ni owth oberi yn ta, hag ywa pub seythen.”

Yth esowgh hwi ow koslowes orth ‘An Nowodhow’ war BBC Radyo Kernow. An dowlen an seythen ma a veu skrifys ha presentys genev vy, Wella Morris. Steve Harris o an pennskrifer. Bys dy’Sul nessa, dydh da dhywgh hwi oll.