19/09/2021

An Nowodhow: an 19ves a vis Gwynngala 2021 
Dohajydh da, ha dynnargh dhe dhyllans an seythen ma 'An Nowodhow' war BBC Radyo Kernow. *Trest klavji a dhifennas dres pols pub leuvvedhegneth tewlys hag yniadow drefen poos dhe besya.Trest Klavjiow Kernow Riel a leveris y hwrug an ervirans kales drefen materyow, niveryow a wodhevysi Kovid-19 y’ga mysk. Sewyans an ervirans yw an arvethesigyon a yll gwitha an dus gans edhom a amyttyans goredhom dhedha. 
Kevarwodher medhegel an trest, Dr Allister Grant y hanow, a leveris: “Gans amyttyansow gans Kovid-19 ow kortos niverus ha servisyow yeghes ha gwith yn-dann boos, ni a gemeras an ervirans kales dhe dhifen leuvvedhegneth tewlys hag yniadow y’gan penn-klavjiow, may hyll agan parys medhegvael gwitha an dus gans edhom a amyttyans goredhom.
Nyns eus hedh yn demond hag yma moy ages dew ugens godhevysi genen y’n klavji gans Kovid-19, ha ogas dhe dheg ha dew ugens moy yw kestavow gans edhom a dhos ha bos enyshes.”
Ny wodhva lies a’n wodhevysi ma i dhe gavos Kovid pan vons amyttyes, mes yma edhom hwath dh’ga gwitha a-dhiworth godhevysi erel.
An posow re nassa oll an tri klavji dyghtys gans an trest: Klavji Kernow Riel yn Truru, Sen Myghal yn Heyl ha Kernow West yn Pennsans.
Dr Grant a leveris “Ni a wra pesya gans leuvvedhegneth troboyntel rag an dus gans kanker, ha dyghtyansow ow sawya bewnans ha gwel.
Ni a wra pesya agan ober gans Klavji Duketh yn Truru ynwedh rag gul myns leuvvedhegneth avel possybyl ena.”
Ev a leveris ynwedh yma “moy ages kans den yn agan tri klavji parys dhe dhos tre mes gans edhom a fardellow gwith ha skoodhyans.
“Ni a ober gans agan kowethyadesow dres an NHS, yn servisyow gwith socyal ha bodhek rag esya agan posow ni.” 
*Den, neb a wodhevis shora kolon war dreth yn Kernow re dhewelas rag grassa an re a sawyas y vewnans.David Smith a wrug dyskans mordhardha gans y fleghes wynn pan dhiskaras ev dhe dreth Porth Heylyn mis-Est an vledhen eus passys.Dyskadoryon vordhardha, Lee Griffin ha Jago Griffiths aga henwyn, a usyas defibrillator ha performya CPR rag gwitha Mester Smith yn fyw.Mester Smith a leveris “pur amovyansek” o omvetya gans an re re wrussa y sawya.
*
Para rugbi Leicester Tigers re sinas higenner Tom Cowan-Dickie war ambos berrdermyn dhyworth An Vorladron Gernewek.Cowan-Dickie yw broder kottha Luke Cowan-Dickie, neb a wari rag Karesk, Pow Sows ha’n Lewyon Vretennek.Tom re dhallathas y resegva gans an Vorladron ha, wosa ev dhe dhasjunya dhyworth Aberplym yn diwvil ha seytek, ev a warias moy ages tri ugens fytt rag an klub.“Tom yw gwarior kales, diwysyk ha eksperyansys , ha pes da on ni dh’y dhynnerghi” a leveris Pennkenerther Leicester, Steve Borthwick y hanow. *Teylu re adoptyas ki peswardhek bloodh hy oos, peswardhek bledhen wosa i dhe adoptya broder an ki dhyworth an keth torras.Teyla Anna Cirant-Carr, dhyworth Tewynblustri, a adoptyas Eric yn diwvil ha seth, hag ev o ki dov dhedha bys ev dhe verwel yn diwvil hag etek. Pan dheuth ha bos ki owth omheveli Eric kavadow y’n keth kresen RSPCA, hi a dhiskudhas hi dhe vos hwor Eric dhyworth an keth torras.Anna Cirant-Carr a leveris: “Pur, pur splann yw, pub prys hi a gerdh y’n stevel, dres pols byghan my a dyb yth yw Eric.”An ki nowydh, Tandie hy hanow, a veu adoptys yn diwvil ha seth ynwedh, mes hy ferghen a verwis a-dhia.*Yth esowgh hwi ow koslowes orth ‘An Nowodhow’ war BBC Radyo Kernow. An dowlen an seythen ma a veu skrifys ha presentys genev vy Kensa Broadhurst. An pennskrifer o Steve Harris. Bys dy’ Sul nessa, dydh da dhywgh hwi oll.