Y GLÊR: Soned neu delyneg (heb fod dros 18 llinell): Seremoni

Martsia’r munudau yn araf fel mwg
o’r clochdy stond. Tros rai aeth fesul gyrr
i'r meysydd, gweddïwn nid rhag pob drwg
ond rhag bod pob diniweidrwydd mor fyr.
Carthwn y ffosydd o'r wleidyddiaeth sgrech
a'u hagorodd; nyddwn babïau punt
i wisgoedd ein plant. Diolchwn mai trech
gair na gwn; bod Awst yn lân ar y gwynt.
A dadebrwn i gyfeiliant corn gwlad
a'i ryfelgri; yn goch gan iaith plediwn
achos ein hogiau ni ar faes y gad.
Ac os felly eleni ni chroeswn,
o dan faner sy'n hanner cyhwfan,
fyth y tir neb at galon cyflafan.

Osian Rhys Jones (Eurig Salisbury yn darllen)
10