Pennill Ysgafn: Gair o gyngor i athro neu athrawes.

Athrawon annwyl Cymru,
os ydi’r hen blant bach
yn haedddu cael eu boddi
fel cathod hyll mewn sach;

Os ydi plant eich dosbarth
mor dwp â chaib a rhaw
a chithau’n disgwyl hawndi tri
ers chwartar wedi naw;

Os ydi amser chwarae
yn debyg iawn i’r Somme
a’r wythien ar eich talcen
yn tician fel tae’n fom;

Na phoenwch! Mae cyfiawnder,
mi fydd y salaf sydd
yn mynd fel chi’n athrawon
ar blantos gwaeth rhyw ddydd!

Gruffudd Owen

9