An Dr Iain Mac a' Ghobhainn

B’ ann air an teilidh, uaireigin sna trì ficheadan, a chunnaic Jo NicDhòmhnaill an Dr Iain Mac a’ Ghobhainn an toiseach. Cha robh air ach paidhir pyjamas agus bha e na shuidhe air ciste-teatha! Bha adhbhar airson sin, mar a chuala sinn, nach robh idir co-cheangailte na dhreuchd mar dhotair teaghlaich. A bharrachd air a bhith na dhotair tha Iain Mac a’ Ghobhainn air mòran a chur ri soirbheachas An Lanntair, an t-ionad ealain ann a Steòrnabhagh, agus tha e aithnichte am measg phìobairean mar eòlaiche agus mar bhritheamh, ’s chan eil a sin ach cuspair no dhà air an tug e fhèin 's Jo tarraing sa chòmhradh a bh' aca thairis air na trì prògraman san t-sreath.

Sa phrògram mu dheireadh, tha e ag innse mar a bha cùisean a thaobh Seirbhis na Slàinte nuair a thill e dhan eilean agus seanchas èibhinn na dhà mu bheatha na dhotair. Cluinnidh sinn cuideachd mar a chaidh e an luib saoghal pìobaireachd, mu sheòladh agus mu obair an cois An Lanntair.