Air chèilidh tha Eilidh NicChoinnich

Dà uair a thìde de chòmhradh agus ceòl air leth còmhla ri Iain Mac'illeMhìcheil, a' craoladh beò à Glaschu. An t-seachdain sa, bidh sinn a’ cur fàilte air Eilidh NicChoinnich, bhon teaghlach cliùteach de sheinneadairean à baile Ghriais ann an sgìre Bhac, Eilean Leòdhais. Tha Eilidh an-diugh ag obair do Fèisean nan Gàidheal.
Bha athair Eilidh, Rodney MacCoinnich aithnichte mar neach-ciùil a stèidhich agus a stiùir còisirean anns na h-Eileanan fad bliadhnaichean, a bharrachd air a bhith na thidsear ciùil. Bhiodh Eilidh agus a peathraichean Gillian agus Fiona riamh a seinn, an dà chuid leotha fhèin agus sa chòmhlan, MacKenzie.
Tha Eilidh an-diugh a' fuireach san Eilean Dubh far an do thog i fhèin san duine aice ceathrar chloinne. Na h-obair aig Fèisean nan Gàidheal, bhiodh i a' ruith bùithtean-obrach air feadh na sgìre mar oide ciùil mus deach a stèidheachadh na manaidsear aig a bhuidheann, a' coimhead às dèidh Fèisgoil.
Cluinnidh sinn seanchas Eilidh, agus ceithir roghainnean ciùil pearsanta. Mar as àbhaist cuideachd, bidh measgachadh math de sheinneadairean is còmhlain aig Mac'illeMhìcheil fhèin dhuinn. Tha iad sin uile air an taghadh eadar Country, Americana is ceòl traidiseanta, le seann òrain agus feadhainn a tha buileach ùr air an clàradh.