Air chèilidh tha Ali Dòmhnallach à Èirisgeigh

Dà uair a thìde de chòmhradh agus ceòl air leth còmhla ri Iain Mac'illeMhìcheil, a' craoladh beò à Glaschu. An t-seachdain sa, bidh sinn a’ cur fàilte air Ali Dòmhnallach, à Eilean Èirisgeigh. Thar nam bliadhnaichean, tha e air obrachadh anns a' chafé air an eilean, an co-chomunn agus an taigh-seinnse. Chaidh e an uair sin dhan oilthigh ann an Glaschu ann an 2013, airson cùrsa lagh a dhèanamh. Anns an treas bliadhna, chaidh e dhan oilthigh ann am Prague mar phàirt de phrògram eadar-nàiseanta sònraichte. Canaidh Ali gur e seo a' bhliadhna a b'fheàrr dha bheatha. Fhad 's a bha e ann, chaidh e air tòrr tursan air feadh na Roinn Eòrpa, agus dh'fhàs a mhiann airson a bhith a' siubhal. 'S e Afraga a Deas an dùthaich as fheàrr leis.
An-uiridh, thòisich Ali ag obair le gnìomhachas lagha ann an Glaschu far a bheil e a' trèanadh, mus tagh e an seòrsa lagh a tha e airson a dhèanamh làn ùine. Na chuid ùine fhèin, ‘s toigh leis gu mòr ball-coise, agus a bhith a’ ruith.
Cluinnidh sinn seanchas Ali, agus ceithir roghainnean ciùil pearsanta. Mar as àbhaist cuideachd, bidh measgachadh math de sheinneadairean is còmhlain aig Mac'illeMhìcheil fhèin dhuinn. Tha iad sin uile air an taghadh eadar Country, Americana is ceòl traidiseanta, le seann òrain agus feadhainn a tha buileach ùr air an clàradh.